1. Die yen Jihova ru kẹ avwanre ohwo ọvuọvo?

JIHOVA si avwanre ohwo vuọvo te oma. (Jọn 6:44) Roro kpahen oborẹ ọyena mudiaphiyọ. Jihova vwọ fuẹrẹn oduduima buebun rẹ ihwo rehẹ akpọ na, ọ da mrẹ orọnvwọn ọghanghanre ọvo vwẹ oma wẹn. Ọ mrẹvughe nẹ wo vwo ẹwẹn esiri. Ọ je riẹn nẹ wo se vwo ẹguọnọ rọyen. (1 Ikun 28:9) Jihova vughe uwe, o vwo ẹruọ wẹ, o ji vwo ẹguọnọ wẹ. O muẹro dẹn nẹ ọyena vwerhen owẹ oma!

2. Mavọ yen Jesu djudje rẹ ọdavwẹ rẹ Jihova vwo kpahen ogegede rọyen ọvuọvo wan?

² Jihova vwo ọdavwẹ wẹ, o ji vwo ọdavwẹ rẹ iniọvo na eje rehẹ ukoko na. Kerẹ udje, Jesu vwẹ Jihova vwo dje osuigegedẹ. Die yen osuigegede che ru siẹrẹ ọvo usun rẹ igegede ujorin ro vwori de ghwru? O che “gbobọnyẹ ọvo nuro ujori na, rọ da yan ro evun rẹ aghwa ra guọnọ ọ ro ghwruru.” Ọ da mrẹ, ọ cha ghwọ kuo kidie nẹ ọ yan ghwru-u. Ukperẹ ọtiọyen, ọ cha ghọghọ. Die yen ọyena mudiaphiyọ? Igegede na eje ghanre kẹ Jihova. Jesu da ta: “Ọ dia ẹguọnọ rẹ Ọsẹ rẹ ovwan rọ hẹ obo odjuvwu rere ọvo rẹ imitete na ghwru-u.”—Matiu 18:12-14.

3. Die yen a cha ta ota kpahen vwẹ uyono nana?

³ Avwanre guọnọ so omaemuophiyọ kẹ iniọvo rẹ avwanre-e. Mavọ yen a sa vwọ kẹnoma kẹ obo re sa nẹrhẹ ophu mu iniọvo rẹ avwanre? Die yen e se ru siẹrẹ e de gbe avwanre ku? Uyono nana cha kpahenphiyọ enọ yena. Ẹsosuọ, a cha ta ota kpahen ihwo re seri nẹ “imitete na,” vwẹ Matiu uyovwin 18.

4. Amono yen “imitete na”?

⁴ Idibo ri Jesu rẹ ọke awanre vẹ ọke nana yen “imitete na.” O toro edje raye-en, e se ayen “imitete” kidie ayen guọnọre nẹ Jesu yono ayen. (Mat. 18:3) Dede nẹ ayen nẹ ekuotọ sansan rhe, ẹkuruemu rayen fẹnẹre, ẹro rẹ ayen vwo nẹ emu je dia ọvo-o, ayen ejobi vwo esegbuyota kpahen Kristi. Kristi ji vwo ẹguọnọ rayen mamọ.—Mat. 18:6; Jọn 1:12.

5. Mavọ yen oma ruẹ Jihova siẹrẹ ohwo ọvo de gboja kẹ ohwo rọyen ọvo?

⁵ “Imitete” nana eje ghanre kẹ Jihova. A sa vwọ riẹn obo ro vwo ọdavwẹ rẹ avwanre te, gbe roro kpahen ọdavwẹ rẹ avwanre vwo kpahen emọ. Avwanre nẹ ayen ghanghanre. Avwanre guọnọ sẹro rayen kidie ẹgba, ọhọ, vẹ aghwanre rayen te ọ rẹ imiragua-a. Oma cha sa vwerhen avwanre kpahen ohwo ro gboja kẹ ihwo ọfa-a, ma bra kẹ imitete. Eriyin Jihova je guọnọ sẹro rẹ avwanre, ophu tobọ muo siẹrẹ ọ da mrẹ ohwo rọ guọnọ gboja kẹ ihwo rọyen!—Aiz. 63:9; Mak 9:42.

6. Vwo nene obo rehẹ 1 Kọrẹnt 1:26-29, ẹro vọ yen akpọ nana vwo nẹ idibo ri Jesu?

⁶ Idjerhe ọfa vọ yen idibo ri Jesu vwọ họhọ “imitete”? Ẹsosuọ, amono yen akpọ nana nẹ ghanghanre? Edafe, ihwo ri titiri, kugbe otu ri vwo ogangan. Idibo ri Jesu ghanre kẹ ihwo rẹ akpọ nana-a, ayen họhọ “imitete” ghevweghe. (Se 1 Kọrẹnt 1:26-29.) Jẹ, ọ dia ẹro tiọyena yen Jihova vwo nẹ aye-en.

7. Ẹro vọ yen Jihova guọnọre nẹ e vwo ni iniọvo rẹ avwanre?

⁷ Jihova vwo ẹguọnọ rẹ idibo rọyen, o toro uche ikpe rẹ ayen hẹ ukoko na re-e. Iniọvo na eje ghanre kẹ Jihova, o ji fo nẹ avwanre ni ayen ghanghanre. E jẹ avwanre “guọnọ imoni” rẹ avwanre eje, ọ dia evo usun raye-en. (1 Pita 2:17) E jẹ avwanre choma ra vwọ vwẹrote je sẹro rayen. Avwanre da riẹn nẹ avwanre gbe ohwo ọvo ku, e jẹ avwanre ni ota na kuẹrofia yẹrẹ no nẹ ohwo na fobọ muophu gan nọ-ọ. Die yen sa nẹrhẹ ophu mu ihwo evo? Iniọvo evo nẹ oma rayen kueku fikirẹ oborẹ ayen rhiẹromrẹ nẹ ọkiemọ rhe. Efa kurhẹriẹ rhe ukoko na obọ, ayen je rhe riẹn oborẹ ayen se vwo yerin ghene ijẹgba rẹ ihwo efa-a. Obo rọ wanre eje, ofori nẹ avwanre davwẹngba vwọ rhuẹrẹ kugbe. Vwọba, e jẹ ohwo rọ fobọ muophu mrẹvughe nẹ ọyena orharhe uruemu ro fori nẹ o siobọnu. Ofori nẹ o ru ọtiọyen rere ọ vẹ ihwo efa se vwo yerinkugbe vwọrẹ ufuoma, ẹwẹn rọyen mi ji totọ.

8. Uruemu vọ yen ihwo buebun vwori ro ji ghworo idibo ri Jesu?

⁸ Diesorọ Jesu vwọ ta ota kpahen “imitete”? Idibo rọyen nọ rọ onọ nana: “Ọno re ma rho vwẹ uvie rẹ odjuvwu?” (Mat. 18:1) Vwẹ ọke yena, ihwo ri Ju buebun titi ẹdia rode. Ohwo ọvo ro yono ẹbe kodo da ta: “Eshare vwẹ akpeyeren rayen eje vwọ guọnọ ọrho, okpodẹ, otitivwe, ujiri kugbe ọghọ.”

9. Die yen idibo ri Jesu che ru?

⁹ Jesu riẹnre nẹ idibo rọyen cha davwẹngba rayen eje rere ayen sa vwọ sen omaevwanvwọn rọ dia ẹkuruemu rẹ ihwo ri Ju buebun titẹ. Ọ da ta kẹ ayen: “Jẹn ohwo rọ ma rho ejobi rhe dia kerẹ omotete ejobi, osun kerẹ ohwo ro gbe odibo.” (Luk 22:26) Avwanre sa dia kerẹ “omotete” siẹrẹ e de no nẹ “ihwo efa yovwi nọ” avwanre. (Fil. 2:3) Ọyena de  hirhephiyọ ẹkuruemu rẹ avwanre re, kọ cha bẹn re vwo gbe ihwo efa ku.

10. Uchebro ri Pọl vọ yen ofori nẹ e vwo ruiruo?

¹⁰ Iniọvo rẹ avwanre eje, te eya te eshare, yovwin nọ avwanre vwẹ idjerhe ọvo yẹrẹ ọfa. Ọ lọhọre ra vwọ mrẹ ọnana vughe siẹrẹ a da tẹnrovi omamọ uruemu rẹ ayen vwori. E jẹ avwanre reyọ uchebro nana rẹ ọyinkọn Pọl vwọ kẹ Inenikristi vwo ruiruo: “Ono re mrẹ ofẹnẹ vwẹ oma rẹ ovwan? Die wo vwori ro jẹ uwe obọ e te? Wo de rhe vwo nu, die wọ rha vwọ yan eyan kerẹsiẹ ra mrẹ nẹ ọphẹ wọ mrẹ-ẹ?” (1 Kọr. 4:7) E jẹ avwanre kẹnoma kẹ obo re cha nẹrhẹ ihwo tẹnrovi avwanre yẹrẹ no nẹ avwanre yovwin nọ ayen. Oniọvo ọshare ọvo da riẹn ota ta vwẹ umukpe, yẹrẹ oniọvo aye ọvo da dia ọwena rẹ obo re nene ihwo ton uyono ri Baibol phiyọ, e jẹ ayen vwẹ ejiro na vwo rhe Jihova.

11. Die yen otọ rẹ itẹn rẹ Jesu kperi kpahen ovie ọvo vẹ odibo rọyen?

¹¹ Jesu vwo si idibo rọyen orhọ nẹ ayen gbe ihwo kuẹ-ẹ nu, o de kpe itẹn rẹ ovie ọvo vẹ odibo rọyen. Ovie na kpairoro vrẹ igho obuebun rẹ odibo na riosa rọyen. Vwẹ ọke ọfa, odibo vuọvo yena rha sa kpairoro vrẹ imigho rẹ odibo ọfa riosa rọye-en. Ukuotọ rọyen, ovie na de do odibo ro se vwo ghwovwo na-a phiyọ uwodi. Die yen otọ rẹ itẹn na? Jesu da ta: “Eriyin Ọsẹ mẹ ro hẹ obo odjuvwu ru kẹ ovwan, ọ da dianẹ ovwan gbe sa vwẹ imwemwu rẹ orivẹ rẹ ovwan vwo ghovwo te otọ rẹ evu-un.”—Mat. 18:21-35.

12. Die yen sa phia siẹrẹ e rhe vwo ghovwo ohwo ro gbe avwanre ku-u?

¹² Odibo na so ojaẹriọ kẹ oma rọyen kugbe ihwo efa. Ẹsosuọ, o sianro te ẹdia ro vwo mu odibo ochekọ na, “o de re muo phihọ uwodi, bẹsiẹ rọ vwọ mrẹ igho hwa.” Ọrivẹ, ọ nẹrhẹ ivun miovwo idibo efa re mrẹrẹ ọke ro vwo ru obo ro ruru na. Ọ “da da ayen gangan.” Ọtiọyen uruemu rẹ avwanre ji djobọte ihwo efa. Die yen sa phia siẹrẹ avwanre rha rhọvwen reyọ vwo ghwovwo ohwo ro gbe avwanre ku-u? Ẹsosuọ, oma cha sa vwerhen ohwo na-a, kidie avwanre rhe che se sikẹrẹ yẹrẹ dje ẹguọnọ kẹ-ẹ. Ọrivẹ, ẹwẹn rẹ iniọvo rehẹ ukoko na che se totọ siẹrẹ ayen da riẹn nẹ avwanre nene oniọvo ro gbe avwanre ku na jẹ eghrẹ-ẹn.

13. Die yen wo yono vwo nẹ ikuegbe rẹ ọkobaro ọvo.

¹³ Avwanre da reyọ vwo ghovwo iniọvo rẹ avwanre, ọyena che fierere kẹ avwanre kugbe ihwo efa. Ọkobaro ọvo rẹ avwanre che se Crystal mrẹ ẹkpo rẹ ota yena vughe. Oniọvo aye ọvo gbe re ku. Crystal da ta: “Ọke evo eta ri waewae rọyen na se bru vwe kerẹ aphia. Me tobọ guọnọ nene chidia imotọ ọvuọvo kpo aghwoghwo-o. Ememerha na, aghọghọ vẹ oruru mẹ de rhi shekpotọ.” Crystal niro nẹ e gbe ọyen ku. Ẹkẹvuọvo, o mu ophu na krekri-i. Ukperẹ ọtiọyen, ọ da vwomakpotọ ru nene uchebro ri Baibol ra vwọphia vwẹ uyovwinrota na “Forgive From Your Heart,” rọ vwomaphia vwẹ Uwevwin Orhẹrẹ rẹ October 15, 1999. O de vwo ghovwo oniọvo rọyen na. Crystal da ta: “Me rhe mrẹvughe re nẹ avwanre eje davwẹngba rere e se vwo ku ohwo ọkpọkpọ na phiyọ. Vwọba, Jihova vwo ghovwo avwanre ọphẹ kẹdẹ kẹdẹ. Kọ ghwa họhọ nẹ e mu oghwa ọhọhọhọ nu vwe ohọre. Me da rhoma rhi vwo aghọghọ.”

14. Vwo nene obo rehẹ Matiu 18:21, 22, egbabọse vọ yen ọyinkọn Pita se hirharoku, kẹ die yen ẹkpahọnphiyọ ri Jesu yono uwe?

 ¹⁴ Avwanre riẹnre nẹ ofori a vwọ reyọ vwo ghovwo. Jẹ, ọ lọhọre e vwo ru ọtiọye-en. Ọ sa dianẹ ọyinkọn Pita ji hirharoku egbabọse yena vwẹ ọke evo. (Se Matiu 18:21, 22.) Die yen sa chọn avwanre uko? Ẹsosuọ, roro kokodo kpahen oborẹ Jihova vwo ghovwo uwe kọke kọke. (Mat. 18:32, 33) Dede nẹ avwanre muwan rẹ evwoghovwo rọye-en, jẹ o vwo ghovwo avwanre ọphẹ. (Une 103:8-10) Ọtiọyena, “avwanre ke je guọnọ ohwohwo rhe.” Kọyen evwoghovwo dia ojẹ-ẹ. A guọnọre nẹ avwanre vwẹ ọkieje vwọ reyọ vwo ghovwo iniọvo rẹ avwanre. (1 Jọn 4:11) Ọrivẹ, roro kokodo kpahen obo re sa phia siẹrẹ e de vwo ghovwo ohwo. A sa vwẹ ukẹcha kẹ ohwo na, nẹrhẹ ewẹn rọyen totọ, toroba oyerinkugbe rọhẹ ukoko na, je sẹro rẹ oyerinkugbe rẹ avwanre vẹ Jihova. (2 Kọr. 2:7; Kọl. 3:14) Ọ rọ koba, nẹrhovwo rhe Jihova rọ dia ohwo rọ guọnọre nẹ avwanre vwo ghovwo ihwo efa. Wo jẹ Eshu mrẹ uphẹn vwo gbowọphiyọ ufuoma rẹ avwanre riavwerhen rọye-en. (Ẹfe. 4:26, 27) Avwanre cha nokpẹn rẹ ukẹcha ri Jihova siẹrẹ avwanre da guọnọ kẹnoma kẹ ifi rẹ Eshu.

15. Vwo nene obo rehẹ Kọlose 3:13, die yen e se ru ọ da dianẹ avwanre cha sa kpairorovrẹ oborẹ oniọvo ọvo ru avwanre-e?

¹⁵ Kẹ, oniọvo ọvo de rhe gbe we ku vwo? Die yen o fori nẹ wo ru? Ru oborẹ wo se ru eje rere wọ sẹro rẹ ofuoma. Vuẹ Jihova ọdavwẹ wẹn vwẹ ẹrhovwo. Vuẹ nẹ o bruba kẹ oniọvo ro gbe we ku na, ọ me je chọn wẹ uko vwọ mrẹ uvi uruemu rẹ oniọvo na vwori rọ nẹrhẹ o vwo ẹguọnọ rọyen. (Luk 6:28) Ọ da dianẹ wọ cha sa kpairorovrẹ ogbeku na-a, gbe  roro kpahen idjerhe ro me yovwin wọ sa vwọ vuẹ. Kọke kọke rẹ oniọvo wẹn de gbe we ku, wo no nẹ arogba yen o vwo ruo-o. (Mat. 5:23, 24; 1 Kọr. 13:7) Wẹ vẹ ọyen da ta ota, wo vwo ẹwẹn ivivẹ kpahen obo rọ vuẹ wẹ-ẹ. Kẹ, ọ da rha dianẹ o vwo ẹwẹn rẹ ovwan vwọ rhuẹrẹ kugbe kakaka vwo-o? Wo mi “rhe chirakon rẹ” oniọvo wẹn, wo jẹ ọ bẹn wẹ-ẹ. (Se Kọlose 3:13, NW.) Ma rho kparobọ, wo phi ota phiyọ evu-un, kidie ọyena se gbowọphiyọ oyerinkugbe wẹn vẹ Jihova. Wo muophu gangan fikirẹ oborẹ ohwo ru we-e. Wọ da sẹro rẹ ufuoma, ku wo se djephia nẹ wo vwo ẹguọnọ ri Jihova vwọ vrẹ kemu kemu.—Une 119:165.

16. Ọrhọ yen oghwa ro te avwanre ohwo ọvuọvo?

¹⁶ Avwanre vwẹ ẹro ọghanghanre vwo nẹ uphẹn ra vwọ ga Jihova kuẹgbe kerẹ “igodẹ ọvo” vwẹ otọ rẹ “osuigegede ọvuọvo”! (Jọn 10:16) E si eta nana vwẹ aruọbe 165 rẹ ọbe na Ukoko ro Ruẹ Ọhọre ri Jihova: “Ọ vwọ dianẹ wọ je mrẹ erere vwo nẹ oyerinkugbe nana, kọyen wo vwo oghwa wọ vwọ sẹro rọyen.” Ọtiọyena, ofori nẹ avwanre “yono oma avwanre kpahen obo re se vwo ni iniọvo avwanre kirobo rẹ Jihova ni ayen.” Jihova nẹ avwanre eje kerẹ “imitete” re pha ghanghanre vwọ kẹ. O ji fo nẹ wo ni iniọvo wẹn ghanghanre. Jihova vwo oniso rẹ erọnvwọn eje wo ruẹ kẹ iniọvo wẹn, o vwo ọdavwaro kpahen ẹgbaẹdavwọn wẹn.—Mat. 10:42.

17. Die yen avwanre eje guọnọ ru?

¹⁷ Avwanre vwo ẹguọnọ rẹ iniọvo rẹ avwanre. Ọtiọyena, o vwo ohwo vuọvo rọ guọnọ “dia ukọn kẹ oniọvo rọye-e eyẹ . . . so okpetu kẹ-ẹ.” (Rom 14:13) Avwanre no nẹ iniọvo rẹ avwanre rẹ eya vẹ eshare yovwin nọ avwanre, avwanre je guọnọ reyọ vwo ghovwo ayen nẹ otọ rẹ ubiudu rhe. E jẹ avwanre muophu gangan fikirẹ oborẹ ihwo efa ru avwanre-e. Ukperẹ ọtiọyen, e jẹ avwanre “nene idjerhe rẹ ufuoma rere avwanre ru esegbuyota rẹ ohwohwo gan.”—Rom 14:19.