Jẹ Urhi rẹ Uruemu Esiri na Sun We
Ọ VWỌ ta ota kpahan obo ri muro vwọ rhe ukoko na, Lisa * da ta: “Uruemu esiri rẹ iniọvo na djephia yen me te vwe ẹwẹn.” Ọna yen oborẹ Anne je ta: “Ẹsosuọ, uruemu esiri rẹ iniọvo na yen si vwe rhe ukoko na ukperẹ oborẹ ayen yono.” Iniọvo eya ivẹ nana nabọ riavwerhen rẹ isese rẹ Baibol kugbe eroro kodo kpahen oborẹ ayen seri enẹna, ẹkẹvuọvo uruemu esiri rẹ iniọvo na yen me te ayen ẹwẹn.
Idjerhe vọ yen e se vwo dje uruemu esiri phia ro de se te ubiudu rẹ ihwo re riariẹ avwanre phiyọ? E jẹ a fuẹrẹn idjerhe ivẹ: eta rẹ unu kugbe uruemu avwanre. A je cha ta ota kpahen ihwo ri fori nẹ e dje uruemu esiri kẹ.
JẸ URHI RẸ URUEMU ESIRI NA SUN ETA RẸ UNU WẸN
Uvi rẹ aye re djisẹ rọyen vwẹ Isẹ uyovwin 31 na vwẹ uphẹn kẹ urhi rẹ uruemu esiri na nẹ o sun eta rẹ unu rọyen. (Isẹ 31:26) Ọ vwẹ uphẹn vwọ kẹ urhi nana nẹ o sun obo rọ ta vẹ oka rẹ upho rọ vwọ ta ota. Ofori nẹ esẹ ji vwẹ uphẹn kẹ urhi nana nẹ o sun oborẹ ayen ta ota wan. Esẹ vẹ ini buebun riẹnre dẹn nẹ eta re gbagbagba sa so omaẹkuọn vwọ kẹ emọ na, ọnana je sa nẹrhẹ ọ bẹn emọ na vwo nyupho rayen. Ọke rẹ esẹ vẹ ini da ta eta kẹ emọ rayen bọrọbọrọ, kọ nẹrhẹ ọ lọhọ kẹ emọ na rẹ ayen vwọ kerhọ ji nyupho rayen.
Te ọdianẹ wẹwẹ ọmiọvwọn yẹrẹ wẹ dia ọmiọvwọ-ọn, mavọ wọ sa vwọ ta eta esiri? A mrẹ obo re sa chọn avwanre uko vwẹ ẹbẹre rẹsosuọ rẹ Isẹ 31:26 rọ tare nẹ, “o rhie unu rọye vẹ aghwanre.” Ọyena churobọ si ra vwọ vwẹ aghwanre vwọ sane obo ra ta vẹ obo ra ta wan. Ọnana cha chọn avwanre uko vwọ nọ oma avwanre, ‘Obo re me cha ta na cha ghwa ufuoma rhe gbanẹ ọ cha nẹrhẹ ophu mu ihwo re kerhọ mẹ?’ (Isẹ 15:1) Ghini uyota, ọyen emu rẹ aghwanre re vwo roro te tavwen a ke ta ota.
Isẹ ọfa da rha ta: “Ohwo ọvo herọ rẹ eta rọye epha kpatakpata kerẹ adjara ro duvwẹ ohwo.” (Isẹ 12:18) Avwanre de roro kpahen oborẹ eta avwanre vẹ obo ra ta ayen wan ruẹ vwẹ oma rẹ ihwo efa, ọnana che mu avwanre vwọ davwẹngba vwo sun obo ri nẹ unu rẹ avwanre cha. Avwanre da vwẹ urhi rẹ uruemu esiri na vwo ruiruo, ọ cha chọn avwanre uko vwọ kẹnoma kẹ eta re gbagbagba yẹrẹ eta re sa so omaẹkuọn vwọ kẹ ihwo efa. (Ẹfe. 4:31, 32) Ọ je cha chọn avwanre uko vwọ vwẹ eta esiri ra tare bọrọbọrọ vwo wene erharhe eta vẹ iroro echọchọ. Jihova phi udje rẹ ọnana phiyotọ ọke rọ vwọ ta eta rẹ uduephiophiyawọ vwọ kẹ odibo rọyen Ilaija ọke udu vwo no awọ. Amakashe rẹ Jihova ji rhe na ta ota kẹ vẹ “umurhuru bọrọ bọrọ.” (1 Ivie 19:12) Ẹkẹvuọvo, a vwọ dia ohwo esiri vrẹ ra de vwọ ta eta bọrọbọrọ. Ofori nẹ avwanre ji dje uruemu esiri na phia kẹ ihwo efa. Vwẹ Idjerhe vọ?
JẸ URUEMU ESIRI WẸN TE IHWO EFA ẸWẸN
A da vwẹrokere Jihova, ka sa ta ota esiri kẹ ihwo ji dje uruemu esiri phia kẹ ayen. (Ẹfe. 4:32; 5:1, 2) Lisa re djunute siẹvure, ta ota kpahen uruemu esiri rẹ Iseri na djephia kẹ. “Ọke ra vwọ vuẹ orua rẹ avwanre nẹ avwanre kua nẹ asan rẹ avwanre dia kpakpata, eya gbe eshare ivẹ rehẹ ukoko rẹ avwanre da rhuẹrẹ ọke phiyọ vwo nẹ iruo rayen rere ayen se vwo nene avwanre kua ekuakua rẹ avwanre. Vwẹ ọke yena dede, me je rhe ton uyono ri Baibol phiyọ-ọ!” Uruemu esiri rẹ iniọvo na djephia na yen mu Lisa vwo ton uyono ri Baibol phiyọ.
Anne re djunute siẹvure ji dje ọdavwaro phia kpahen uruemu esiri rẹ Iseri na djephia vwọ kẹ. Ọ da ta: “Fikirẹ oborẹ ihworakpọ ru vwe re, ke me mrẹ bẹnbẹn me vwọ vwẹroso ihwo.” Ọ da je ta: “Me ka vwọ mrẹ Iseri na, me nama vwẹroso aye-en. Ki mi roro, ‘Diesorọ ayen vwo vwo ọdavwẹ me dede?’ Ẹkẹvuọvo, uvi rẹ uruemu esiri rẹ ohwo ro yono uvwe Baibol na de mu uvwe vwọ vwẹrosuọ.” Emu rẹ erhuvwu vọ yen nuro rhe? “Ọke vwọ yanran na, ki mi rhi mu ẹwẹn phiyọ obo ri mi yono na.”
Jokaphiyọ nẹ uruemu esiri rẹ iniọvo rẹ ukoko na djephia yen te Lisa vẹ Anne ẹwẹn, ọnana yen ji mu ayen vwọ ton uyono ri Baibol phiyọ. Uruemu esiri rẹ iniọvo rẹ ukoko na djephia yen mu ayen rhe vwọ vwẹroso Jihova vẹ iniọvo rehẹ ukoko na.
VWẸROKERE ỌGHẸNẸ VWO DJE URUEMU ESIRI PHIA KẸ IHWO EFA
Ihwo evo sa mrẹ lọlọhọ ayen vwọ ta ota esiri je sasa opharo kẹ ihwo efa fikirẹ asan rẹ Iruo Rẹ Iyinkọn Na 28:2.
ayen dia ghwanre. Uruemu esiri tiọyen rẹ asan ra dia ghwanre yẹrẹ obo re ru rienrioma mu ohwo vwo ruẹ na, ọyen omamọ rẹ uruemu dẹn. Ẹkẹvuọvo, ọ da dianẹ ọyena ọvo yen mu avwanre vwo dje uruemu esiri phia, kọyen avwanre vwẹrokere uruemu esiri rẹ Ọghẹnẹ-ẹ.—NiUruemu esiri rẹ Ọghẹnẹ, ọyen ẹbẹre ọvo rẹ omamọ rẹ ẹwẹn ọfuanfon na. (Gal. 5:22, 23) Ọtiọyena, ẹwẹn ọfuanfon rẹ Ọghẹnẹ yen sa chọn avwanre uko vwo dje uruemu esiri phia kẹ ihwo efa. Ọnana je sa chọn avwanre uko vwọ vwẹrokere Jihova kugbe Jesu. Kidie nẹ avwanre Inenikristi, ke se vwo uvi rẹ ọdavwẹ kpahen ihwo efa. Ọtiọyena, ẹguọnọ re vwo kpahen Jihova kugbe irivẹ rẹ avwanre yen mu avwanre vwo dje uruemu esiri phia. Ọ da dia ọtiọyen, kọyen uruemu esiri rẹ avwanre kọ cha dia uvi rọyen, ọ ro nẹ ubiudu rhe, rẹ Ọghẹnẹ je rhọnvwephiyọ.
AMONO YEN E CHE DJE URUEMU ESIRI PHIA KẸ?
Ọ sa dia obo re lọhọre re vwo dje uruemu esiri phia kẹ ihwo ri ji dje uruemu esiri phia kẹ avwanre yẹrẹ ihwo re vugheri. (2 Sam. 2:6) Idjerhe ọvo re se vwo ruẹ ọtiọyen yen a vwọ kpẹvwẹ ayen. (Kọl. 3:15) Ẹkẹvuọvo, e de rhe no nẹ ohwo na fo ohwo re dje uruemu esiri phia kẹ-ẹ vwo?
Roro kpahen ọnana: Jihova yen ohwo ro dje uvi rẹ uruemu esiri phia, o de rhe yono avwanre uyono ọghanghanre vwẹ Baibol na kpahen obo re se vwo dje uruemu nana phia vwọ kẹ ihwo efa. Ubiota na “ẹserọphẹ” vwomaphia abọ buebun vwẹ Ẹbẹre ra vwẹ Grik si vwẹ Baibol na. Idjerhe vọ yen Ọghẹnẹ wan dje uruemu esiri phia vwọ kẹ avwanre?
Roro kpahen iduduru rẹ ihwo buebun rẹ Jihova dje uruemu esiri rọyen phia vwọ kẹ re, womarẹ ọ vwọ kẹ ayen oborẹ ayen ghene guọnọ ayen se vwo yeren akpọ. (Mat. 5:45) Jihova tobọ dje uruemu esiri phia kẹ avwanre tavwen e ki vughe. (Ẹfe. 2:4, 5, 8) Kerẹ udje, ọ vwẹ Ọmọ rọyen ọvuọvo ro je mamọ na vwọ kpahotọ vwọ kẹ ihworakpọ eje. Ọyinkọn Pọl de si nẹ Jihova vwẹ izobo re otanhirhe na vwọ kẹ avwanre “kirobo rẹ ẹserọphẹ rọye bute.” (Ẹfe. 1:7) Kpobarophiyọ, dede nẹ avwanre ruẹ umwemwu ji kuẹ Jihova phiyotọ, o ji yono ji suẹn avwanre. Uyono vẹ eta rọyen pha kerẹ “eghwẹghwẹ rẹ osio.” (Urhi 32:2) A cha sa hwosa rẹ uruemu esiri ro djephia kẹ avwanre na kẹ rhivwi-in. Avwanre je riẹn nẹ mane kẹ Jihova dje uruemu esiri phia kẹ avwanre-e, e rhe vwo iphiẹrophiyọ kpahen obaro na-a.—Ni 1 Pita 1:13.
Aphro herọ-ọ nẹ uruemu esiri ri Jihova je avwanre dẹn, o ji muẹ avwanre vwo dje uruemu esiri phia vwọ kẹ ihwo efa. Ọtiọyena, ukperẹ a vwọ sane ihwo re che dje uruemu esiri phia kẹ, kẹ ofori nẹ a vwẹrokere Jihova rere uruemu esiri dia ẹkuruemu rẹ avwanre. (1 Tẹsa. 5:15) E de dje uruemu esiri phia ọkieje, avwanre ke cha rhe dia kerẹ erhanre ra vwọ yara oma vwẹ ọke rẹ ekpahen. Avwanre ohwo ọvuọvo cha rhe dia uvi rẹ ukẹcha vwọ kẹ ihwo rẹ orua, iniọvo rẹ ukoko na, ihwo ra vẹ ayen gba wiankuẹgbe, emọ rẹ isikuru kugbe ihwo efa.
Roro kpahen ihwo rẹ orua wẹn yẹrẹ iniọvo rẹ ukoko na re cha mrẹ erere fikirẹ eta vẹ uruemu esiri wẹn. Ọ sa dianẹ o vwo ohwo ọvo vwẹ ukoko wẹn rọ guọnọ ukẹcha rẹ ohwo rọ sa chọn uko vwọ vwẹrote uwevwin vẹ egodo rọyen yẹrẹ nene dẹ erọnvwọn ọkieje. Vwọba, Ọ da dianẹ wọ yan kanre ohwo ọvo vwẹ iruo rẹ aghwoghwo na rọ guọnọ ukẹcha, wọ sa vwẹ ukẹcha phia?
E jẹ avwanre vwẹrokere Jihova rere urhi rẹ uruemu esiri na se vwo sun eta vẹ iruemu rẹ avwanre.
^ E wene edẹ evo