1. Erhọ yen erọnvwọn evo re sa so oshọ kẹ ohwo?

 RORO kpahen ikuegbe nana. Nestor vẹ aye rọyen María guọnọ ga vwẹ asan ra da ma guọnọ ukẹcha. * Tavwen ayen ki se kpo oyan na, ofori nẹ ayen ru ewene phiyọ akpeyeren rayen. Ẹkẹvuọvo, oshọ mu ayen sẹ ayen ghene sa mrẹ omavwerhovwẹn siẹrẹ ayen de ru akpeyeren rayen lọhọ. Ọke rẹ Biniam rhe vwọ dia Oseri ri Jihova vwẹ ẹkuotọ a da vwọsua iruo rẹ avwanre, ọ da rhe mrẹvughe nẹ a je sa vwọso ọyen. Ọnana da nẹrhẹ oshọ muo. Jẹ obo ri me muoshọ mamọ yen oborẹ ihwo rẹ orua rọyen che ru siẹrẹ ayen da riẹn nẹ ọ rhe dia Oseri ri Jihova re. A vuẹ Valérie nẹ o vwo oka orharhe rẹ ikansa ọvo. Ọ bẹn vwọ kẹ rọ vwọ mrẹ idọktọ rọ sa bẹrẹ ababọ rẹ ọbara kirobo rẹ Baibol na tare. Vwọrẹ uyota, oshọ muro nẹ ọyen se ghwu.

2. Diesorọ o vwo fo nẹ a davwẹngba vwo sun oshọ ro muẹ avwanre?

² Oka rẹ oshọ tiọyena ji mu we jovwore? Buebun rẹ avwanre djẹ oka rẹ oshọ tiọyena re. E rhe se sun oshọ ro muẹ avwanre-e, ọ sa nẹrhẹ e brorhiẹn re chọre ri se gbowọphiyọ oyerinkugbe rẹ avwanre vẹ Jihova. Ọnana yen oborẹ Eshu guọnọre. Ọ je davwẹngba rọ vwọ reyọ oshọ rẹ avwanre djẹ vwọ nẹrhẹ a churhi ri Jihova, ji gbobọnyẹ iruo rẹ aghwoghwo na. (Ẹvwọ. 12:17) Eshu ohwo vẹ ọkon, o gbe arodọnvwẹ kẹ ohwo-o, o ji vwo ẹgba. Ẹkẹvuọvo, wọ sa sẹro rẹ oma wẹn vrabọ rọyen. Vwẹ idjerhe vọ?

3. Die yen cha vwẹ ukẹcha kẹ avwanre vwo phi oshọ kparobọ?

 ³ Ẹgbaẹdavwọn rẹ Eshu che shefia siẹrẹ e de vwo imuẹro nẹ Jihova vwo ẹguọnọ rẹ avwanre, nẹ ọ vẹ avwanre je herọ. (Une 118:6) Kerẹ udje, ohwo ro si ọbe rẹ Une Rẹ Ejiro 118 hirharoku ẹdia evo vwẹ akpeyeren rọyen re nẹrhẹ ofu dje. O vwo ivwighrẹn buebun, evo vwẹ usun rayen vwo ogangan (awọ 9, 10). O hirharoku ukeke ọgangan vwẹ ọke evo (owọ 13). Jihova je vwẹ ọghwọku ọgangan vwọ kẹ (owọ 18). Dedena, ọbuine na da so: “Me gbe djẹ oshọ-ọ.” Die yen nẹrhẹ ọbuine na se vwo ufuoma tiọna? Dede nẹ Jihova ghwọkuo, ọ je riẹn nẹ Ọsẹ rọyen rọhẹ odjuvwu na vwo ẹguọnọ rọyen mamọ. Ọbuine na vwo imuẹro nẹ o toro obo ro hirharoku-u, Ọghẹnẹ rọyen ro vwo ẹguọnọ na muegbe rọ vwọ vwẹ ukẹcha kẹ ọyen ọkieje.—Une 118:29.

4. Oka rẹ oshọ vọ yen e se phikparobọ siẹrẹ e de vwo imuẹro nẹ Ọghẹnẹ vwo ẹguọnọ rẹ avwanre?

⁴ Ofori nẹ e vwo imuẹro nẹ Jihova vwo ẹguọnọ avwanre ohwo ọvuọvo. Imuẹro tiọyena cha chọn avwanre uko vwo phi oka rẹ oshọ erha kparobọ, (1) oshọ nẹ a cha sa vwẹrote orua rẹ avwanre-e, (2) oshọ rẹ ohworakpọ, (3) oshọ rẹ ughwu. Iniọvo re djunute vwẹ ẹkorota rẹsosuọ na se phi oshọ kparobọ kidie ayen vwo imuẹro nẹ Ọghẹnẹ vwo ẹguọnọ rayen.

5. Erhọ yen erọnvwọn evo re sa so ẹnwan vwọ kẹ ọgbuyovwin rẹ orua? (Ni uhoho rọhẹ opharo ọbe na.)

⁵ Ofori ọgbuyovwin rẹ orua vwọ vwẹ ẹro ọghanghanre vwo ni oghwa rọ vwọ vwẹrote orua rọyen. (1 Tim. 5:8) Wọ da dia ọgbuyovwin rẹ orua, ọ sa dianẹ oshọ mu we nẹ iruo wẹn cha va wẹ abọ vwẹ ọke rẹ ọga akpọeje na. Ọ sa dianẹ wọ ro ẹnwan kpahen oborẹ wọ sa vwọ hwa osa rẹ uwevwin yẹrẹ obo wọ sa vwọ ghẹrẹ orua wẹn. Ọ je sa dianẹ oshọ mu wẹ nẹ iruo wẹn da va wẹ abo, wọ cha sa mrẹ ọfa-a. Yẹrẹ kerẹ Nestor kugbe María re djunute siẹvure, ọ sa dianẹ wo roro nẹ wo che se ru akpeyeren wẹn lọhọ-ọ. Eshu djẹ uguegue mu ihwo buebun vwọ dobọ rẹ ẹga ri Jihova ji re.

6. Ẹro vọ yen Eshu guọnọre nẹ e vwo ni Jihova?

⁶ Eshu davwan rere avwanre vwo vwo imuẹro nẹ Jihova davwerhọn rẹ avwanre-e, nẹ Ọ je cha chọn avwanre uko vwọ vwẹrote orua rẹ avwanre-e. Fikirẹ ọtiọyena, e se no nẹ ofori e vwo ru obo re se ru eje rere a sa vwọ sẹro rẹ iruo rẹ avwanre, ọ da tobọ dianẹ e che ru erọnvwọn re vwọso odjekẹ ri Baibol na.

7. Imuẹro vọ yen Jesu vwọ kẹ avwanre?

⁷ Jesu rọ nabọ vughe Ọsẹ na vwọ vrẹ kohwo kohwo eje kẹ avwanre imuẹro nẹ Ọghẹnẹ rẹ avwanre na “riẹn obo re da [avwanre] tavwe [a] ke nọ.” (Mat. 6:8) Jesu je riẹn nẹ Jihova muegbe rọ vwọ kẹ avwanre obo ra guọnọre. Kidie nẹ avwanre Inenikristi, avwanre kẹ evwruwevwin rẹ Ọghẹnẹ. Avwanre riẹnre nẹ kerẹ Ọgbuyovwin rẹ orua, Jihova che ru nene odjekẹ rọ vwọphia vwẹ 1 Timoti 5:8.

8. (a) Die yen sa chọn avwanre uko vwo phi oshọ nẹ a cha sa vwẹrote orua rẹ avwanre-e kparobọ? (Matiu 6:31-33) (b) Mavọ yen a sa vwọ vwẹrokere aye gbe ọshare rehẹ evunrẹ ifoto na ri muẹ emu vwo rhe oniọvo aye ọvo?

⁸ E de vwo imuẹro nẹ Jihova vwo ẹguọnọ rẹ avwanre vẹ orua rẹ avwanre, a rha cha ro ẹnwan kpahen obo ra guọnọre a sa vwọ vwẹrote orua rẹ avwanre-e. (Se Matiu 6:31-33.) Jihova vwo owenvwe rọ vwọ kẹ avwanre obo ra ghene guọnọ, Ọyen ghene Ohwo rọ Kokẹ ghwologhwolo! Ọ vwọ ma otọrakpọ na, ọ dia obo ra de guọnọ re vwo yerin ọvo yen ọ vwọ kẹ avwanre-e. Ọ je ma akpọ na vọn vẹ erọnvwọn re sa kẹ avwanre omavwerhovwẹn. (Jẹn. 2:9) Ọ da tobọ dianẹ erọnvwọn re di  vwo yerin ọvo yen herọ kẹ avwanre, o ji fo nẹ a tẹnrovi uyota na nẹ a je hẹ akpọ yerẹn. Jihova yen kẹ avwanre obo ra ghene guọnọ ọkieje. (Mat. 6:11) E jẹ o mu avwanre ẹro nẹ oborẹ Jihova che vwo ruẹse kẹ avwanre enẹna vẹ ọke rọ cha vwẹ obaro na che bun vrẹ kemu kemu re vwo ze vwọ kẹ ẹga rọyen. Ọnana yen oborẹ Nestor vẹ María rhe mrẹvughe.—Aiz. 65:21, 22.

9. Die yen avwanre se yono vwo nẹ udje ri Nestor vẹ María rhe?

⁹ Nestor vẹ María yeren akpọ rẹ omafuvwe vwẹ Colombia. Ayen da ta: “Avwanre roro kpahen obo re se vwo yeren akpọ ri kekpe je hẹrẹ iruo aghwoghwo avwanre phiyọ, ẹkẹvuọvo oshọ mu avwanre nẹ oma cha vwerhen avwanre-e siẹrẹ e de ru akpeyeren avwanre lọhọ.” Die yen chọn ayen uko vwo phi oshọ ro mu ayen na kparobọ? Ayen karophiyọ idjerhe sansan rẹ Jihova wan djephia nẹ o vwo ẹguọnọ rayen mamọ. Imuẹro rẹ ayen vwori nẹ ọ cha vwẹrote ọdavwẹ rayen ọkieje na de mu ayen vwo siobọnu iruo ra da hwa okposa kẹ ayen. Ayen shẹ uwevwin rayen je kua kpo ẹbẹre ọfa vwẹ ẹkuotọ na ra da ma guọnọ ighwoghwota rẹ Uvie na. Mavọ yen oma ru ayen kpahen orhiẹn rẹ ayen bruru na? Nestor da ta: “Avwanre mrẹ orugba rẹ obo rehẹ Matiu 6:33. O vwo emuvuọvo rẹ avwanre ghene guọnọ rọ kanre avwanre-e. Enẹna, avwanre yeren akpọ rẹ omavwerhovwẹn re.”

10. Diesorọ ihworakpọ vwọ djoshọ rẹ ohwohwo?

¹⁰ Ghwe vwo nẹ ọke rẹ Adam vẹ Ivi vwo gbevwọso Jihova, yen ihworakpọ vwọ so okpetu vwọ kẹ ohwohwo. (Aghwo. 8:9) Kerẹ udje, ihworakpọ shenyẹ ihwo rẹ ayen suẹn, inogbozighi ruẹ obo re brare, emọ rẹ isikuru shenyẹ ohwohwo, ihwo evo tobọ gboja kẹ ihwo rẹ orua rayen brabra. A gbe ta rẹ ihworakpọ vwo djoshọ rẹ ohwohwo! Siẹrẹ a da djoshọ rẹ ihworakpọ, idjerhe vọ yen Eshu vwọ tẹnroviẹ ọyena vwọ davwen avwanre nẹ?

11-12. Idjerhe vọ yen Eshu vwọ reyọ oshọ rẹ ihworakpọ vwọ djẹ uguegue muẹ avwanre?

¹¹ Eshu davwẹngba rọ vwọ reyọ oshọ rẹ ihworakpọ vwọ gba avwanre vwo vwo ẹwẹn ra vwọ dobọ rẹ iruo rẹ aghwoghwo na ji. Eshu reyọ ihwo ri suẹn vwo mukpahen avwanre je dobọ rẹ iruo rẹ avwanre ji re. (Luk 21:12; Ẹvwọ. 2:10) Nonẹna, vwẹ akpọ rẹ Eshu nana, ihwo buebun hrahra evuẹ efian kpahen Iseri ri Jihova. Ihwo ri se efian nana gbuyota  sa vwẹ avwanre jehwẹ yẹrẹ tobọ mukpahen avwanre dede. (Mat. 10:36) Ena rẹ Eshu nana gbe avwanre unu? Ẹjo, kakaka. Kidie rhanvwe ẹgbukpe ujorin rẹsosuọ yen ọ vwọ reyọ ayen vwo ruiruo cha re.—Iruo 5:27, 28, 40.

¹² Ọ dia oshọ rẹ ihwo ri suẹn ọvo yen ona rẹ Eshu reyọ vwo ruiruo-o. Vwọ kẹ ihwo evo, oshọ rẹ oborẹ ihwo rẹ orua rayen che ru siẹrẹ ayen de nyo nẹ ayen rhe dia Iseri ri Jihova re yen muẹ ayen. Ayen vwo ẹguọnọ rẹ orua rayen mamọ, ayen guọnọre nẹ ayen rhe ga Jihova ji vwo ẹguọnọ rọyen. Ọ da ayen mamọ ọke rẹ ayen de nyo eta ebrabra rẹ ihwo rẹ orua rayen ta kpahen Ọghẹnẹ rẹ uyota na kugbe ihwo re ga. Ọkievo, Ihwo rẹ orua re ka vwọso avwanre jovwo rhoma rhe ga Jihova ukuko na. Kẹ, ọ da rha dianẹ ihwo rẹ orua rẹ avwanre sen avwanre fikiridie nẹ avwanre rhe dia Iseri vwo? Die kọyen avwanre che ru?

13. E de vwo imuẹro nẹ Jihova vwo ẹguọnọ rẹ avwanre, mavọ yen ọ sa vwọ chọn avwanre uko ọke rẹ ihwo rẹ orua rẹ avwanre da sen avwanre? (Une Rẹ Ejiro 27:10)

¹³ Ẹwẹn rẹ avwanre se totọ siẹrẹ e de roro kpahen eta rehẹ Une Rẹ Ejiro 27:10. (Se.) A da karophiyọ oborẹ Jihova vwo ẹguọnọ rẹ avwanre te, ọ cha nẹrhẹ ẹwẹn rẹ avwanre totọ siẹrẹ ihwo da vwọso avwanre. Avwanre vwo imuẹro dẹn nẹ Ọ cha hwa ọsa kẹ avwanre fikirẹ akoechiro rẹ avwanre. Jihova cha chọn avwanre uko a vẹ ọyen vwo vwo uvi rẹ oyerinkugbe, Ọ cha vwẹrote ọdavwẹ rẹ avwanre eje, je chọn avwanre uko vwo yeren akpọ rẹ omavwerhovwẹn vwọ vrẹ oborẹ kohwo kohwo se ru. Ọna yen oborẹ Biniam re djunute siẹvure mrẹvughe.

14. Die wo se yono vwo nẹ udje ri Biniam rhe?

¹⁴ Biniam rhe dia Oseri ri Jihova dede nẹ ọ riẹnre nẹ ihwo ri suẹn vwọsua Iseri rehẹ ẹkuotọ na. Roro kpahen oborẹ imuẹro rẹ Biniam vwo kpahen ẹguọnọ ri Jihova vwọ chọn uko vwo phi oshọ rẹ ihworakpọ kparobọ. Ọ da ta: “Ẹvwọsuọ na ganre mamọ vwọ vrẹ obo ri mi rorori. Ẹkẹvuọvo, obo re me ma djoshọ rọyen vwọ vrẹ ẹvwọsuọ rẹ ihwo ri suẹn kẹ ẹvwọsuọ rẹ ihwo rẹ orua mẹ. Oshọ mu vwe nẹ orhiẹn ri mi bruru re me vwọ dia Oseri ri Jihova cha da Ọsẹ mẹ rọ dia Oseri-i mamọ, nẹ ihwo rẹ orua mẹ rhe che se vwe gbe ohwo-o.” Dedena, Biniam ji vwo imuẹro nẹ Jihova cha vwẹ ọkieje vwọ vwẹrote ihwo ri vwo ẹguọnọ Rọyen. Biniam da ta: “Mi roro kpahen oborẹ Jihova vwẹ ukẹcha vwọ kẹ ihwo ri chirakon rẹ uweren ọgangan, ihwo re ni fiemu-u, kugbe ihwo ri  hirharoku ozighi ọgangan. Me riẹnre nẹ mi de tinkamu Jihova, o che bruphiyọ kẹ vwẹ. E vwo mu vwe abọ buebun ji gboja kẹ vwẹ, me da rhe mrẹvughe nẹ Jihova ghene chọn avwanre uko siẹrẹ a da fuevun kẹ.” Jihova da rhe dia uvi re Ọsẹ vwọ kẹ Biniam, iniọvo na da je rhe dia uvi rẹ orua vwọ kẹ.

15. Diesorọ ihwo vwọ djoshọ rẹ ughwu?

¹⁵ Baibol na vuẹ avwanre nẹ ughwu ọyen ọvweghrẹn. (1 Kọr. 15:25, 26) Avwanre sa ro ẹnwan kpahen ughwu, ma rho ọke rẹ avwanre yẹrẹ ohwo re vwo ẹguọnọ kpahen de she ro okpọga. Diesọrọ a vwọ djoshọ rẹ ughwu? Kidie Jihova ma avwanre a vwọ riavwerhen rẹ akpọ bẹdẹ. (Aghwo. 3:11) A da vwẹ ẹro rẹ abavo vwo ni ughwu, ọ sa chọn avwanre uko vwọ sẹro rẹ arhọ rẹ avwanre. Kerẹ udje, o se mu avwanre vwo brorhiẹn ra vwọ re omamọ rẹ emu, sasa oma ọkieje, nokpẹn rẹ ukẹcha rẹ idọktọ je reyọ ihuvwun siẹrẹ o de fo. Ọ je sa chọn avwanre uko vwọ kẹnoma kẹ kemu kemu ro se phi arhọ rẹ avwanre phiyọ ẹdia rẹ imuoshọ.

16. Idjerhe vọ yen Eshu vwọ reyọ oshọ rẹ ughwu vwọ djẹ uguegue muẹ avwanre?

¹⁶ Eshu riẹnre nẹ avwanre ni arhọ ghanghanre. Ọ tare nẹ avwanre che gbobọnyẹ kemu kemu eje ji te oyerinkugbe rẹ avwanre vẹ Jihova rere a sa vwọ sẹro rẹ arhọ rẹ avwanre. (Job 2:4, 5) Ẹkẹvuọvo, ọyen ofian! Jẹ ọ vwọ dianẹ Eshu yen “ohwo ro vwo ogangan rẹ ughwu na,” kọ reyọ oshọ rẹ ughwu vwọ djẹ uguegue muẹ avwanre rere e vwo gbobọnyẹ Jihova. (Hib. 2:14, 15) Vwẹ ọkievo, ihwo rẹ Eshu suẹn sa reyọ ughwu vwọ djẹ uguegue muẹ avwanre rere a sa vwọ sen esegbuyota rẹ avwanre. Vwẹ ẹdia efa, Eshu da mrẹvughe nẹ a guọnọ oka rẹ omaesivwon ọvo mamọ, ọ sa davwẹngba rọ vwọ reyọ ọnana vwọ mu avwanre vwọ churi ri Jihova. Idọktọ yẹrẹ ihwo rẹ orua re dia Iseri-i se kpokpo avwanre nẹ e se obara phiyọ oma, rọ dia obo re vwọso urhi rẹ Ọghẹnẹ. Yẹrẹ ohwo ọvo sa riẹriẹ avwanre re vwo vwobọ vwẹ oka rẹ omaesivwon rọ vwọso odjekẹ ri Baibol na.

17. Vwo nene obo rehẹ Rom 8:37-39, diesorọ oshọ rẹ ughwu vwo jẹ avwanre emuo?

¹⁷ Ọ da tobọ dianẹ e ghwuru, dede nẹ ọ dia ọyen oborẹ avwanre guọnọre-e, ẹguọnọ rẹ Jihova vwo kpahen avwanre che vwoba-a. (Se Rom 8:37-39.) Igbeyan ri Jihova de ghwu, ọ je karophiyọ ayen kerẹsiẹ ra da mrẹ nẹ ayen je herọ yerẹn. (Luk 20:37, 38) O vwo owenvwe ọgangan rọ vwọ rhovwọn avwanre rhivwin rhe akpọ. (Job 14:15) Jihova hwa okposa rere avwanre se vwo “vwo arhọ ri bẹde.” (Jọn 3:16) Avwanre riẹnre nẹ Jihova vwo ẹguọnọ kpahen avwanre mamọ, nẹ o je vwẹrote avwanre. Ọtiọyena, ukperẹ e vwo gbobọnyẹ Jihova ọke ra da muọga yẹrẹ e de hirharoku oshọ rẹ ughwu, e jẹ a vwẹroso Jihova nẹ o che bicha avwanre je kẹ avwanre aghwanre vẹ ẹgba ra guọnore. Ọnana yen oborẹ Valérie vẹ ọshare rọyen ruru.—Une 41:3.

18. Die yen wo se yono vwo nẹ udje ri Valérie rhe?

¹⁸ Ọke rẹ Valérie vwọ hẹ ẹgbukpe 35, a da vuẹ nẹ o vwo ọga rẹ ikansa ọvo ro muoshọ mamo. Roro kpahen oborẹ ẹguọnọ vwọ chọn uko vwo phi oshọ rẹ ughwu kparobọ. Ọ da ta: “Obo ra vuẹ avwanre na wene akpeyeren rẹ avwanre ason hrọke. Mi se vwo sivwin rhọ, ofori nẹ a bẹrẹ ovwẹ. Mi de nene Idọktọ sansan re tona rẹ oma ẹbẹrẹ ta ota, ẹkẹvuọvo, ayen eje tare nẹ e che jẹ ọbara e se phiyọ uvwe oma-a. Oshọ mu vwe mamọ, jẹ vwo nene oborẹ Baibol na tare, o vwo ọke vuọvo me cha vwọ rhọnvwe nẹ e se ọbara phiyọ ovwẹ oma-a! Vwẹ akpeyeren mẹ  eje, Jihova dje ẹguọnọ kẹ vwẹ mamọ re. Enẹna, mi rhi vwo uphẹn mi se vwo djephia kẹ nẹ mi vwo ẹguọnọ rọyen re. Kọke kọke ri mi de nyo erharhe rẹ iyẹnrẹn yen mi vwo vwo owenvwe ri mi vwo ru obo re cha nẹrhẹ oma vwerhen Jihova ukperẹ Eshu. Ukuotọ rọyen, a da bẹrẹ ovwẹ ababọ rẹ ọbara. Dede nẹ ọga na ji siotọ, ọkieje yen Jihova vwọ vwẹ obo re me ghene guọnọ vwọ kẹ vwẹ. Kerẹ udje, vwẹ uyono rẹ oba rẹ udughwrẹn re ruru tavwen a ke vuẹ vwẹ nẹ mi vwo ọga rẹ ikansa, a da fuẹrẹn uyovwinrota na, ‘Meeting Today’s Adversities With Courage.’ * Uyovwinrota nana phiuduphiyọ avwanre awọ dẹn. Avwanre da rhoma vwariẹn se abọ buebun. Iyovwinreta kerẹ ọnana, aghwoghwo kugbe uyono ẹra chọn avwanre uko vwo brorhiẹn rọ gbare ji vwo ẹwẹn ri dọe.”

19. Die yen cha phia kẹrẹkpẹ?

¹⁹ Womarẹ ukẹcha ri Jihova, Inenikristi rehẹ akpọ na eje rhi phi ẹdia rẹ imuoshọ sansan kparobọ, je reyọ vwọso Idẹbono re. (1 Pita 5:8, 9) Wo ji se ru ọtiọyen. O rhe che kri-i, Jihova cha reyọ Jesu vẹ ihwo re vẹ ọyen gbe suẹn vwọ “guọghọ iruo rẹ Idẹbono.” (1 Jọn 3:8) Ọyena da wan nu, ihwo re ga Ọghẹnẹ vwẹ otọrakpọ na ke cha vrẹ “abọ rẹ uguegue,” ayen “gbe djẹ oshọ-ọ.” (Aiz. 54:14; Maika  4:4) Tavwen ọke yena ki te, e gbe jẹ a davwẹngba vwo phi oshọ ro muẹ avwanre kparobọ.

20. Die yen cha chọn avwanre uko vwo phi oshọ kparobọ?

²⁰ Ofori e vwo vwo imuẹro kokoroko nẹ Jihova vwo ẹguọnọ rẹ avwanre, nẹ ọ je sẹro rẹ idibo rọyen. E se phi oshọ kparobọ siẹrẹ de roro je ta ota kpahen oborẹ Jihova chochọn rẹ idibo rọyen wan vwẹ obuko re. A je sa karophiyọ oborẹ Jihova chọn avwanre uko komobo ọke re vwo hirharoku ẹdia sansan re nẹrhẹ ofu dje avwanre. Jihova sa chọn avwanre uko vwo phi oshọ kparobọ!—Une 34:4.