Dia Ugbeyan Ọke rẹ Oyerinkugbe na da hẹ Ẹdia rẹ Imuoshọ
Gianni vẹ Maurizio igbeyan omarẹ ẹgbukpe 50 re. O vwo ọke ọvo rẹ oyerinkugbe rayen vwọ hẹ ẹdia rẹ imuoshọ. Maurizio da ta: “O vwo ọke ovọ mi vwo ru erọnvwọn evo re nẹrhẹ avwanre hẹriẹ oma.” Gianni da vwọba: “Maurizio yen yono uvwe Baibol na. Ọ da rhe dia oniru kẹ vwẹ. Ọtiọyena, me nama roro nẹ o se ru obo ro ruru na-a. Ofu akpọ de rhi dje vwe hwe kidie me riẹnre nẹ avwanre cha hẹriẹ oma. Kọ ghwa họhọ nẹ e ku vwe phiyotọ.”
OMAMỌ ugbeyan pha ghanghanre mamọ, obọdẹn rẹ oyerinkugbe je dia obo re vwo kpregede-e. Oyerinkugbe na da hẹ ẹdia rẹ imuoshọ, die yen e se ru? E se yono erọnvwọn buebun vwo mie ihwo re djunute vwẹ Baibol na ri vwo uvi rẹ ugbeyan ẹkẹvuọvo ọke vwọ yanran na, oyerinkugbe rayen de rhi hirharoku ẹdia rẹ imuoshọ.
UGBEYAN DE RU OBO RE CHỌRE
Devid rọ dia osuigegede kugbe ovie na, vwo emamọ igbeyan. Ẹwẹn avwanre sa djẹ kpo ohwo kerẹ Jonatan. (1 Sam. 18:1) Ẹkẹvuọvo, Devid ji vwo igbeyan efa kerẹ ọmraro Natan. Baibol na ghwa vuẹ avwanre ọke rẹ ugbeyan rayen vwọ tonphiyọ-ọ. Dedena, o vwo ọke ọvo rẹ Devid vwọ vuẹ Natan obo rọ guọnọ ru kerẹ ugbeyan. Devid guọnọ bọn uwevwin kẹ Jihova. O muẹro nẹ Devid vwẹ ẹro ọghanghanre vwo nẹ uchebro rẹ Natan kerẹ ugbeyan kugbe ohwo ro vwo ẹwẹn ọfuanfon rẹ Jihova.—2 Sam. 7:2, 3.
Ẹkẹvuọvo, orọnvwọn ọvo da rhe phia ro phi oyerinkugbe rayen phiyọ ẹdia rẹ imuoshọ. Ovie Devid nene Batsheba gbe 2 Sam. 11:2-21) Devid fuevun kẹ Jihova ikpe buebun re, o ji titi orhiẹn abavo. Ẹkẹvuọvo, o de rhi ru umwemwu ra ghẹmrẹ nana! Die yen phia kẹ omamọ ovie nana? Ọ riẹn oborẹ umwemwu rọyen na gan te? O rorori nẹ o se sionu kẹ Ọghẹnẹ?
igberadja, o de ji hwe ọshare rọyen, Yuraya. (Die yen Natan che ru? Ọ cha vwẹ uphẹn kẹ ohwo ọfa nẹ ọ ra vuẹ ovie na obo ro ruru? Ihwo efa tobọ je riẹn kpahen oborẹ Devid hwe Yuraya wan. Natan che phioma phiyọ ẹdia na rere ugbeyan rayen fan? Arhọ rẹ Natan tobọ jehẹ ukpokpogho siẹrẹ o de bru Devid ra. Ọ diẹ Devid yen hwe Yuraya rọ riẹn emu vuọvo-o?
Dedena, Natan ọmraro rẹ Ọghẹnẹ. Ọ riẹnre nẹ ọyen de fotovwin, o che djobọte oyerinkugbe rọyen vẹ Devid, ẹwẹn obrorhiẹn rọyen ji che kpokpo. Ugbeyan rọyen, Devid ru obo re brare vwẹ ẹro rẹ Jihova. Ovie na guọnọ ukẹcha rere ọ vẹ Ọghẹnẹ sa vwọ rhoma vwo omamọ oyerinkugbe. Vwọrẹ uyota, Devid guọnọ uvi rẹ ugbeyan asaọkiephana. Natan, oka rẹ ugbeyan tiọyen. Ọ vwẹ ota na phia womarẹ udje ro se te ẹwẹn rẹ Devid ọ vwọ dianẹ ọ ka dia osuigegede jovwo na. Natan vwẹ ovuẹ rẹ Ọghẹnẹ vwọ kẹ Devid vwẹ idjerhe rẹ Devid da sa mrẹ oborẹ umwemwu rọyen na gan te, o mi ji ru orọnvwọn kpahọn.—2 Sam. 12:1-14.
Die wo che ru siẹrẹ ugbeyan wẹn de ru umwemwu ọgangan? Wo se roro nẹ wọ da ta ota phia, ugbeyan rẹ ovwan cha fan. Yẹrẹ wo se roro nẹ, wọ da vuẹ ekpako na, ihwo re sa vwẹ ukẹcha kẹ ugbeyan wẹn, o mudiaphiyọ nẹ wo kuro phiyotọ. Die wo che ru?
Gianni, re djunute vwẹ obenu na da ta: “Me mrẹvughe nẹ emu ọvo shechọ. Maurizio rhe rhie evun kẹ vwẹ kirobo ro ruẹ jovwo-o. Mi de brora dede nẹ ọ bẹn kẹ vwẹ gangan. Ki mi roro: ‘Die me cha vuẹ ro jẹ ẹriẹn? Ivun se miovwon!’ Jẹ, me vwọ karophiyọ oborẹ avwanre yono kpahen re, mi de fiudugberi ra ta ota kẹ. Maurizio ka chọn vwẹ uko jovwo re. Me guọnọ nẹ ugbeyan avwanre fa-an, ẹkẹvuọvo me guọnọ chọn uko kidie mi vwo ẹguọnọ rọyen.”
Maurizio da ta: “Gianni ta uyota kẹ vwẹ, obo rọ tare na gbare. Me riẹnre nẹ ọ diẹ ọyen yẹrẹ Jihova yen so obo ri nẹ obuko rẹ umwemwu mẹ na rhe-e. Mi de rhiabọreyọ ọghwọku na, ọke ọvo vwọ wan nu, me da rhoma mudia gan vwẹ ukoko na.”
UGBEYAN DA HẸ UKPOKPOGHO
Devid ji vwo igbeyan efa ri bicha vwẹ ọke rẹ ukpokpogho. Ọvo tiọyen yen Hushai, rẹ Baibol na seri nẹ “ugbeyan ri Devid.” (2 Sam. 16:16; 1 Ikun 27:33) Ọ sa dianẹ ọ wian vwẹ aguare rẹ ovie na jovwo kerẹ uvi rẹ ugbeyan, rọ yan uwevwin ra vuẹrẹ vwẹ odjahọn.
Ọke rẹ ọmọ rẹ Devid re se Absalọm vwọ reyọ uvie na mie, ihwo rẹ Izrẹl buebun da ka ẹbẹre rẹ Absalọm, ẹkẹvuọvo Hushai ru ọtiọye-en. Devid vwọ djẹ, Hushai de brora. Oborẹ ọmọ rọyen vẹ ihwo efa rọ vwẹroso ruro na, da Devid mamọ. Ẹkẹvuọvo, Hushai fuevun kẹ kerẹ ohwo ro muegbe rọ vwọ vwẹ arhọ rọyen kpahotọ rere ọ sa vwọ yanghan iroro rẹ Absalọm na. Ọ diẹ fikirẹ iruo rọyen kerẹ ohwo rọ wian vwẹ aguare rẹ Devid yen nẹrhẹ o vwo ẹwẹn nana-a. Ẹkẹvuọvo, omamọ rẹ ugbeyan rọ fuevun dẹn, ọyen o ruẹ.—2 Sam. 15:13-17, 32-37; 16:15–17:16.
Ọ vwerhoma ra vwọ mrẹ iniọvo eya vẹ eshare ri vwo oyerinkugbe rọ vrẹ e di vwo ruiruo ra vwọ kẹ ohwo vwẹ ukoko na. Womarẹ uruemu rayen ayen tanẹ, “Mẹvwẹ ugbeyan wẹn, ọ diẹ a gba vwẹ ruo-o, ẹkẹvuọvo kidie nẹ wọ pha ghanghanre kẹ vwẹ.”
Ọnana yen oborẹ oniọvo re se Federico rhiẹromrẹ. O se chirakon rẹ ebẹnbẹn evo ri tere oma kidie ugbeyan ọghanghanre rọyen re se Antonio bicha. Federico da ta: “Ọke rẹ Antonio vwọ kua rhe ukoko avwanre, avwanre da rhe dia igbeyan. Avwanre ihwo ivẹ idibo rowian, avwanre je wian kuẹgbe mamọ. O rhe kri-i, e de vwo mu ọkpako. Vwọ vrẹ ugbeyan mẹ, ọ je hepha kerẹ oniru vwọ kẹ vwẹ.” Federico de ru umwemwu ọvo. Kpakpata, ọ da yare ukẹcha rẹ ekpako na, ẹkẹvuọvo ọ rha sa ga kerẹ ọkobaro yẹrẹ odibo rowia-an. Die yen Antonio ruru?
Ọke rẹ Federico vwo hirharoku ebẹnbẹn, ugbeyan rọyen Antonio nabọ kerhọ kẹ je vwẹ uchebro vwọ kẹ
Federico vwọ karophiyọ, ọ da ta: “Me mrẹrẹ nẹ ẹdia mẹ na da Antonio mamọ. O bicha vwẹ dẹn. Ọ ghene guọnọ nẹ me rhoma mudia gan vwẹ ukoko na, ọ yan juvwe vwo kakaka-a. O phiuduphiyawọ mẹ rere me vwọ yọnre gan, ofu vwo juvwe edje.” Antonio da ta: “Me vẹ Federico nabọ ghwọrọ ọke kugbe. Me guọnọre nẹ ọ riẹn nẹ o se rhie evun kẹ vwẹ kpahen kemu kemu, tobọ ji te obo re miavwọn.” Ọ kẹ ohwo omavwerhovwẹn nẹ Federico rhoma mudia gan vwẹ ukoko na, a da rhoma reyọ vwo mu ọkobaro kugbe odibo rowian. Antonio da ta: “Dede nẹ ọ diẹ ukoko vuọvo yen avwanre hepha enẹna-a, oyerinkugbe avwanre kpẹkpẹ vrẹ obo ri jovwo.”
WO CHE NO NẸ E KU WE PHIYOTỌ?
Die wo che ru siẹrẹ ugbeyan rọ kẹrowẹ da sen wẹ ọke wọ vwọ ma guọnọ ukẹcha rọyen? A mrẹ vwo dje ọmiaovwẹ rọye-en. Wo se vwo ghovwo? Oyerinkugbe rẹ ovwan sa rhoma gan kirobo rọ hepha jovwo?
Roro kpahen obo re phia kẹ Jesu vwẹ ẹdẹ re koba rẹ akpeyeren rọyen. Ọ vẹ idibo rọyen nabọ ghwọrọ ọke kugbe, ayen ji vwo omamọ oyerinkugbe. Jesu tobọ se ayen igbeyan rọyen. (Jọn 15:15) Ẹkẹvuọvo, die yen phiare ọke re vwo muo? Idibo na da djẹ jovwo. Pita tare jovwo nẹ ọyen cha sa yanjẹ Onini rọyen vwo-o, ẹkẹvuọvo vwẹ ason yena, Pita da sen nẹ ọyen tobọ vughe Jesu-u!—Mat. 26:31-33, 56, 69-75.
Jesu riẹnre nẹ ọyen ọvo yen che hirharoku ọdavwini rọ koba ro che rhiẹromrẹ. O se roro nẹ e ku ọyen phiyotọ. Dedena, otaẹtakuẹgbe rọyen vẹ idibo na ọke ra vwọ rhọvwọn nushi nu, djerephia nẹ ivun rẹ idibo na miovwiro-o, yẹrẹ ọ tobọ muophu kpahen aye-en. Jesu rhoma kere echobọ rẹ idibo na vwọ kẹ aye-en, tobọ ji te oborẹ ayen ruru vwẹ ason re vwo muo na-a.
Vwọ fẹnẹ ọyena, Jesu phiuduphiyawọ rẹ Pita vẹ idibo ichekọ na. O djerephia nẹ ọ vwẹroso ayen ọke rọ vwọ kẹ ayen odjekẹ sansan ri shekpahen iruo aghwoghwo na. Jesu ji ni idibo na kerẹ igbeyan rọyen. Ẹguọnọ ro djephia te ayen ẹwẹn mamọ. O muẹro nẹ ayen rhe vwo ẹwẹn ayen vwọ rhoma sen Jesu kakaka-a. Ayen da nabọ ruiruo rẹ Jesu vwọ kẹ ayen na.—Iruo 1:8; Kọl. 1:23.
Oniọvo aye Elvira karophiyọ ọke rọ vẹ ugbeyan rọyen Giuliana vwo vwo ẹghwọ, ọ da ta: “Ọ da vwẹ mamọ ọke rẹ Giuliana vwọ vuẹ vwẹ nẹ mi ru obo ri miovwiro ivun. Obo mi ruro na ghini yovwi-in. Ẹkẹvuọvo, obo ri me gbevwunu yen ọdavwẹ ro vwo kpahen ovwẹ, o ji roro kpahen oborẹ uruemu mẹ na sa so kẹ vwẹ. Omamọ uruemu rọyen na cha sa chọrovwẹro-o, ukperẹ ọ vwọ tẹnrovi echobọ mẹ, o de mu ẹwẹn kpahen oborẹ uruemu mẹ na che djobọte vwe wan. Me kpẹvwẹ Jihova nẹ mi vwo ugbeyan rọ vwẹ ọdavwẹ mẹ vwọ ka obaro rẹ ọ rọyen.”
Ọtiọyena, die yen omamọ ugbeyan che ru siẹrẹ oyerinkugbe rayen da hẹ ẹdia rẹ imuoshọ? O che muegbe rọ vwọ vuẹ ọrivẹ rọyen vwẹ idjerhe rẹ ẹguọnọ. Ugbeyan na cha dia kerẹ Natan vẹ Hushai ri bicha Devid vwẹ ọke rẹ ukpokpogho, ọ je cha dia kerẹ Jesu ro vwo ghovwo. Wẹwẹ oka rẹ ugbeyan tiọyen?