1. Ẹdia vọ yen Inenikristi rẹ ẹgbukpe ujorin ẹsosuọ hirharoku?

ỌKIỌVO uvwre rẹ ẹgbukpe 62 fiẹ 64 C.E., ọyen ọyinkọn Pita vwo si ọbe “rhe otu re hẹ imu re hra ro Pọntus, Galesha, Kepadosia, Esha, kugbe Bitinia.” (1 Pita 1:1) Iniọvo nana rehẹ ikoko sansan vwẹ ubrotọ rẹ Asia Minor na, ghene guọnọ uduephiophiyawọ kugbe odjekẹ kidie ẹkuotọ sansan yen ayen nurhe. Iniọvo na rioja rẹ omukpahen, a je hanrhe ayen. Ayen hirharoku “odjadja rẹ erhanre.” Ayen yerin vwẹ ọke rọ pha gangan mamọ. Ọyinkọn Pita de si: “Oba rẹ emu na ejobi si kẹre re.” Kidie omarẹ ẹgbukpe ihwe yen chekọ tavwen eyeren rẹ ihwo rẹ Ju na ki che vwoba. Die yen cha vwẹ ukẹcha kẹ Inenikristi eje vwẹ ọke ọgangan yena?​—1 Pita 4:4, 7, 12.

2, 3. Die yen nẹrhẹ Pita vuẹ Inenikristi nẹ ayen ghọ erhorha? (Ni uhoho rẹsosuọ na.)

² Vwọba erọnvwọn efa, Pita da vuẹ iniọvo na: “Ovwan ghọ erhorha.” (1 Pita 4:9) Vwẹ ejajẹ rẹ Grik, ubiota na “ghọ erhorha” mudiaphiyọ re vwo djẹ “ẹguọnọ, yẹrẹ uruemuesiri kẹ erhorha.” Noso nẹ Pita vuẹ iniọvo na nẹ ayen dede “ohwohwo” phiyọ oma. Erere vọ yen che te ayen obọ siẹrẹ ayen de vwo uruemu ra vwọ ghọ erhorha?

³ Ọ cha nẹrhẹ ayen sikẹrẹ ohwohwo. Roro kpahen obo wo  rhiẹromrẹ re. Ohwo durhie uwe kpo uwevwin rọyen obọ ọvo jovwo re? Oma vwerhen owẹ wọ vwọ ra? Wo vwo dede iniọvo rẹ ukoko wẹn evo ri bru we rhe, ọ nẹrhẹ oyerinkugbe rẹ ovwan kpẹkpẹ phiyọ? Idjerhe ro me yovwin ra vẹ iniọvo na vwọ nabọ vughe ohwohwo, ọyen re vwo dede ayen phiyọ oma. A guọnọre nẹ Inenikristi re herọ vwẹ ọke rẹ ọyinkọn Pita sikẹre ohwohwo phiyọ, fikirẹ eyeren rẹ ọke yena rọ bra phiyọ. Ọtiọyen o ji fo nẹ Inenikristi ri yeren vwẹ “oba rẹ ẹdẹ” ra hepha na ji ru.​—2 Tim. 3:1.

4. Enọ vọ yen a cha kpahenphiyọ vwẹ uyono nana?

⁴ Ọke vọ yen uphẹn de se rhiephiyọ kẹ avwanre, re vwo dede “ohwohwo” phiyọ oma? Mavọ yen avwanre se vwo phi ebẹnbẹn re vwo jẹ erhorha edede kparobọ? Die yen sa nẹrhẹ avwanre dia uvi rẹ erhorha?

5. Mavọ yen e se vwo dede erhorha re rhe emẹvwa rẹ avwanre?

⁵ Vwẹ emẹvwa: Avwanre dede kohwo kohwo rọ rhe emẹvwa rẹ avwanre rhe kerhọ kẹ Ota rẹ Ọghẹnẹ. Jihova vẹ ukoko rọyen yen durhie avwanre. (Rom 15:7) Ihwo kpokpọ da rhe, kẹ avwanre kuomakugbe Jihova vwo dede ayen. Jowọ wo vwo dede ihwo kpokpọ, ọ da tobọ dianẹ irhuon vẹ osẹnvwe rayen shephiyọ-ọ. (Jems 2:1-4) Wo de noso nẹ ohwo kpokpọ ọvo chidia ọ robọ rọyen, wọ sa vuẹ nẹ o rhi chidia kẹrẹ owẹ. Oma cha vwerhọn siẹrẹ wọ da chọn uko vwọ nabọ nene ọrhuẹrẹphiyotọ na, ji nene guọnọ ẹkpo rẹ Baibol re che se. Ọnana cha dia omamọ uphẹn re se vwo “yono obo re ru ẹse.”​—Rom 12:13.

6. Amono yen ihwo rẹsosuọ rẹ avwanre se durhie rhe uwevwin rẹ avwanre?

⁶ Ọrekugbe: Vwẹ ọke awanre, ihwo vwẹ udemu vwọ ghọ erhorha. (Jẹn. 18:1-8; Iguẹ. 13:15; Luk 24:28-30) E de durhie ohwo kpo udemu, ọyena odjephia nẹ avwanre guọnọre nẹ a vẹ ohwo yena dia ugbeyan, ji yerinkugbe vwọrẹ ufuoma. Amono yen ihwo rẹsosuọ re se durhie? Iniọvo rehẹ ukoko na. Kidie ayen ihwo ri che bicha avwanre siẹrẹ erọnvwọn da gan. Ọtiọyena, ofori nẹ a vẹ ayen dia igbeyan ri yerẹn kuẹgbe vwọrẹ ufuoma. Vwẹ ukpe rẹ 2011, Ẹko Rọvwẹrote na de si ọke rẹ orua rẹ Bẹtẹl rọhẹ United States vwo ruẹ uyono rẹ Uwevwin Orhẹrẹ, nẹ 6:45 p.m. rhe 6:15 p.m. Diesorọ? Aghwoghwo na djerephia nẹ e wene ọke na rere buebun rẹ iniọvo na sa vwọ mrẹ ọke vwo dede ohwohwo phiyọ oma siẹrẹ uyono na de kuphiyọ nu. Ọke vwọ yanran na, eghọn ukoko efa da je vwẹrokere ayen. Ọrhuẹrẹphiyotọ nana nẹrhẹ oyerinkugbe rẹ iniọvo rehẹ orua rẹ Bẹtẹl rhoma ganphiyọ.

7, 8. Idjerhe vọ yen avwanre se vwo dede etota re ji bru avwanre rhe?

⁷ Avwanre eje riavwerhen rẹ ota rẹ ọtota ọrhorha, iniruo okinriariẹ, kugbe iniọvo re ji nẹ oghọn ukoko bru avwanre rhe. Iniọvo tiọyena de won avwanre, ọyena ghwa uphẹn re vwo dje uruemu ra vwọ ghọ erhorha phia. (Se 3 Jọn 5-8.) Re vwo durhie iniọvo tiọyena rhe uwevwin rẹ avwanre vwọ kẹ ọrekugbe, ọyen idjerhe oyoyovwin ọvo re se vwo dede ayen. Wo se ruo?

⁸ Oniọvo aye ọvo vwẹ America da ta: “Ikpe evo rhire na yen me vẹ ọshare mẹ vwo durhie buebun rẹ iniọvo tiọyena vẹ eya rayen cha uwevwin rẹ avwanre. Oma vwerhen avwanre kọke kọke rẹ avwanre de ruo, marho kparobọ, ọ bọn esegbuyota rẹ avwanre gan. Avwanre cha sa viẹ idiekpọvwẹ-ẹ.”

9, 10. (a) Amono yen se nene avwanre dia ọke grongron? (b) Iniọvo rẹ uwevwin rayen ghwa rho-o, je sa vwẹ ukẹcha phia? Djudje rọyen.

⁹ Erhorha re cha dia ọke grongron: Vwẹ ọke awanre, ihwo buebun vwo ẹkuruemu rẹ ayen vwo dede erhorha  phiyọ uwevwin. (Job 31:32; Filim. 22) Ofori nẹ avwanre ji ru ọtiọyen. Ukoko ọvuọvo yen vwo oghwa rẹ ayen vwọ guọnọ asan rẹ oniruo okinriariẹ ro kiẹn ukoko rayen cha dia. Ọtiọyen ọ je hepha vwọ kẹ ihwo ri kpo isikuru rẹ ukoko na vwo mu, kugbe iniọvo re vwomakpahotọ vwọ kẹ iruo rẹ ebabọn. Iniọvo rẹ oghwọrọ te oma, je guọnọ asan rẹ ayen cha dia bẹsiẹ ra vwọ rhoma bọn uwevwin rayen. Avwanre nama roro nẹ ihwo ri vwo omamọ rẹ iwevwin ọvo yen sa vwẹ ukẹcha phia-a, ọ sa tobọ dianẹ ayen ru ọtiọyen abọ buebun re. Wọ sa vwẹ ukẹcha phia, ọ da tobọ dianẹ uwevwin wẹn ghwa rho-o?

¹⁰ Oniọvo ọshare ọvo vwẹ South Korea karophiyọ ọke rẹ iniọvo ri kpo isikuru rẹ ukoko na vwo won uwevwin rọyen. O de si: “Me vẹ aye mẹ dino siomauko kidie avwanre ghwa rọvwọn nu obọ, uwevwin avwanre na je rho-o. Ẹkẹvuọvo, oma vwerhen avwanre mamọ ọke rẹ iniọvo na rhe vwọ nene avwanre dia. Ọyena nẹrhẹ avwanre sa mrẹ omavwerhovwẹn rọ herọ siẹrẹ aye gbe ọshare da ga Jihova kuẹgbe, ji vwo oboratẹnrovi ọvuọvo.”

11. Diesorọ o vwo fo nẹ wo dede iniọvo re kua rhe ukoko wẹn phiyọ oma?

¹¹ Iniọvo re kua rhe ukoko na: Iniọvo yẹrẹ orua evo sa kua rhe ukoko wẹn. Evo rayen sa dia iniọvo re rhe ga vwẹ asan ra da ma guọnọ ukẹcha. E ji se ji ekobaro evo rhe ukoko wẹn nẹ ayen rhi vwẹ ukẹcha phia. Ọnana ewene rode vwọ kẹ ayen, kidie asan kpokpọ vẹ ukoko kpokpọ yen ayen rhere na, ọkiọvo dede, ephẹrẹ vẹ ẹkuruemu rẹ asan na je sa dia emu ọrhorha kẹ ayen. E de durhie ayen vwọ kẹ udemu yẹrẹ reyọ ayen vwọ yan ekogho na, ọ sa nẹrhẹ asan na fobọ riẹnriẹn ayen oma.

12. Ikuegbe vọ yen djerephia nẹ a guọnọ emu buebun tavwen a ke ghọ ọrhorha-a?

¹² Ọ guọnọ emu buebun tavwen a ke ghọ ọrhorha-a. (Se Luk 10:41, 42.) Oniọvo ọshare ọvo vwọ karophiyọ ọke rọ vwọ ton ẹga rẹ imishọnare phiyọ, ọ da ta: “Avwanre ighene, avwanre jẹ igbori, urhuru rẹ uwevwin ji ghwe siẹ avwanre. O vwo ovwọnvwọn ọvo rẹ aye mẹ vwo brenu nẹ ọyen guọnọ kpo, dede nẹ me davwẹngba vwo bruche, jẹ uchebro mẹ eje shefia. Omarẹ 7:30 p.m., ohwo ọvo de hworo ẹchẹ. Avwanre vwo rhie ẹchẹ, avwanre da mrẹ aye ọvo ra vwẹ Baibol yono ro mudia anurhoro vẹ itiẹn erha rọ ghwa nene oma rhe. O rhi dede imishọnare kpokpọ re rhere na. Avwanre de dede ro uwevwin je vwẹ uko ame kẹ. Avwanre ji gbe iti, ji ru ishọkọleti ọrhorhoro kẹ. Ọke yena avwanre sa jẹ Swahili-i, ọ je riẹn obo ra jẹ Oyibo-o. Jẹ, obo rọ phiare ẹdẹ yena nẹrhẹ avwanre riẹn obo rọ cha vwerhen te siẹrẹ avwanre da vwẹ ugbeyan vwo mu iniọvo na.”

13. Erere vọ yen herọ siẹrẹ e de vwo uruemu re vwo dede erhorha?

¹³ Wo siomauko vwọ kẹ ọrhorha ẹghọ dẹvure? Ọ da dia ọtiọyen, kọyen wo ku uphẹn ru wo vwo vwo omamọ otaẹtakuẹgbe kugbe uvi rẹ ugbeyan kufia. Erhorha ẹghọ, ọyen emu oyoyovwin ọvo ro se si ohwo nẹ ẹdia rẹ ọruvwohwo. Ọkiọvo wo se roro, ‘Kẹ diesorọ ohwo vwo jẹ ọrhorha edede?’ Erọnvwọn buebun sa suọ.

14. Die yen avwanre se ru ọ da dianẹ avwanre vwo ọke yẹrẹ ẹgba re vwo durhie ihwo rhe uwevwin rẹ avwanre yẹrẹ kpo ọ raye-en?

¹⁴ Ọke vẹ ẹgba: Idibo rẹ Jihova wian mamọ, buebun rayen ji vwo oghwa buebun rẹ ayen muẹ. Evo se no nẹ ayen vwo ọke vẹ ẹgba rẹ ayen sa vwọ ghọ erhorha-a. Ọ da dia ọtiọyen wo niro, gba rhoma fuẹrẹn ọrhuẹrẹphiyotọ wẹn. Wo se ru ewene evo re cha nẹrhẹ wo se durhie ihwo rhe uwevwin wẹn yẹrẹ nẹrhẹ owẹ se kpo uwevwin rayen siẹrẹ ayen de durhie uwe?  Baibol bru avwanre uche nẹ a ghọ erhorha. (Hib. 13:2) Vwọrẹ uyota, ọyen obo ro fori nẹ avwanre rhuẹrẹ ọke vwo ru, ọ chọre-e. Ọkiọvo dede, wo se siobọ rẹ erọnvwọn evo kpotọ, rere wọ sa mrẹ ọke vwo ruo.

15. Ẹnwan vọ yen ihwo evo rua kpahen erhorha ẹghọ?

¹⁵ Ẹro wo vwo ni oma wẹn: Wo vwo ẹwẹn wọ vwọ ghọ ọrhorha dẹvure, ẹkẹvuọvo wo de no nẹ wo che se ruo-o? Oma vo ihwo evo, ayen niro nẹ ayen cha mrẹ ota ta-a, yẹrẹ ayen che se ru obo re cha nẹrhẹ oma vwerhen ohwo na-a. Efa niro nẹ ayen igbere, nẹ ayen che se ru te iniọvo efa vwevunrẹ ukoko na-a. Karophiyọ nẹ, obo re ma ghanre ọyen wọ vwọ nabọ rhuẹrẹ uwevwin wẹn phiyọ, ji ruo fuanfon, wọ me je dia uvi rẹ ugbeyan.

16, 17. Die yen sa nẹrhẹ udu rẹ erhorha ẹghọ juwe ebro?

¹⁶ Ọ dia owẹ ọvo yen ro ẹnwan ọtiọye-en. Ọkpako ọvo vwẹ Britain da ta: “Ohwo sa ghene ro ẹnwan ọke ro de muegbe vwọ hẹrhẹ ọrhorha. Jẹ, kirobo rẹ kemu kemu re ruẹ vwẹ ẹga rẹ Jihova hepha, erere ra cha mrẹ, rho vrẹ ẹnwan na shesheri. Oma vwerhen ovwẹ, siẹrẹ mẹ vẹ erhorha ri bru vwe rhe na da da ikọfi ji gbikun.” Karophiyọ nẹ, erere herọ siẹrẹ e de vwo ọdavwẹ rẹ erhorha. (Fil. 2:4) Oma vwerhen ihwo buebun siẹrẹ ayen de gbikun rẹ oborẹ ayen rhiẹromrẹ vwẹ akpeyeren. Echidiotọ tiọyena yen ihwo da sa mrẹ uphẹn vwọ nọ wẹ kpahen obo wo rhiẹromrẹ re. Ọkpako ọfa de si: “Kidie nẹ mi durhie iniọvo rehẹ ukoko mẹ rhe uwevwin, ọyena chọn vwẹ uko vwọ nabọ vughe ayen, ji riẹn oborẹ ayen wan mrẹ ukoko na vughe.” Ọma cha vwerhen iniọvo na siẹrẹ wo de djephia nẹ wo vwo ọdavwẹ rayen.

¹⁷ Oniọvo aye ọvo rọ dia ọkobaro, rhie uwevwin rọyen phiyọ vwọ kẹ iniọvo ri kpo isikuru sansan rẹ ukoko na vwo mu. Oniọvo na da ta: “Ẹsosuọ, udu ke bru vwe kidie uwevwin mẹ ghwe fẹro-o, egbara awanre yen me vwọ rhuẹrẹ. Aye rẹ ọvo usun rẹ iyono rẹ isikuru na da ta ota ọvo rọ rhe nẹrhẹ ẹwẹn mẹ totọ. Ọ tare nẹ, ọke rẹ ọshare rọyen vwọ ga kerẹ oniruo okinriariẹ, udughwrẹn rẹ ayen nene iniọvo ri vwo omamọ rẹ oyerinkugbe vẹ Jihova dia uwevwin, yen ma kẹ ayen omavwerhovwẹn, ọ da tobọ dianẹ iniọvo na feri-i. Ọyena da nẹrhẹ ovwẹ karophiyọ eta rẹ oni mẹ ta ọke rẹ avwanre vwọ hẹ imitete: ‘Ukodo rẹ ẹbe diodi ra ria vẹ ẹguọnọ yen me yovwin.’ ” (Isẹ 15:17) Siẹrẹ ẹguọnọ de mu we vwo dede erhorha, udu rhe che bru we-e.

18, 19. Mavọ yen uruemu ra vwọ ghọ ọrhorha sa vwọ chọn avwanre uko vwọ kpairoro vrẹ oruchọ rẹ ihwo efa?

¹⁸ Ẹro wo vwo ni ihwo efa: O vwo ohwo ọvo vwẹ ukoko wẹn rẹ ivun rọyen miovwo uwe? Wo rhe si ivun emiovwo na nẹ evu-un, o se hirhephiyọ ẹghwọ ra cha sa rhuẹrẹ-ẹ. Uruemu rẹ ohwo rhe je we-e, ọ cha bẹn kẹ wẹ wo vwo durhie rhe uwevwin wẹn. Yẹrẹ ọ sa dianẹ ohwo ọvo gbe we ku vwẹ ọke rọ wanre, jẹ ọ pha bẹnbẹn te ọke na wọ vwọ kpairoro vrẹ obo ro ru we.

¹⁹ Baibol na jiri uruemu ra vwọ ghọ erhorha. Ọ tare nẹ e dje uruemu tiọyena tobọ vwọ kẹ ivwighrẹn rẹ avwanre, kidie o se toroba uvi rẹ oyerinkugbe. (Se Isẹ 25:21, 22.) Uruemu ra vwọ ghọ ọrhorha sa chọn avwanre uko vwọ rhuẹrẹ ẹghwọ, ji si ophu nẹ evun. Ọ sa nẹrhẹ a mrẹ omamọ rẹ uruemu ro rhe ohwo rẹ avwanre vẹ ọyen gba ghwọ, rọ dia obo re nẹrhẹ Jihova sio rhe ukoko na. (Jọn 6:44) Ẹguọnọ de mu we vwo durhie ohwo wẹ vẹ ọyen vwo ẹghwọ rhe uwevwin wẹn, ọ sa nẹrhẹ ovwan rhuẹrẹkugbe. Mavọ yen o se vwo mu wẹ ẹro nẹ ẹguọnọ yen mu we vwo ruo? Idjerhe ọvo, ọyen wo vwo nene uchebro rọhẹ Filipae 2:3: “Vwẹ oma evwokpotọ kere phihọ nẹ ihwo efa yovwi nọ ovwan.”  Roro kpahen asan rẹ iniọvo efa vwo yovwin vrẹ wẹ. Ọkiọvo ọ sa dia esegbuyota, akoechiro, uduefiogbere yẹrẹ iruemu efa rẹ ayen vwori. Re vwo roro kpahen omamọ rẹ uruemu rayen na cha nẹrhẹ ẹguọnọ rẹ avwanre vwo kpahen ayen kodophiyọ, kọ je nẹrhẹ ọ lọhọ kẹ avwanre re vwo dede ayen phiyọ oma.

20. Diesorọ o vwo fo nẹ avwanre muọghọ kẹ edurhie rẹ avwanre rhiabọreyọ nure? Mavọ yen e se vwo ru ọtiọyen?

²⁰ Ọbuine Devid da nọ: “E Ọrovwohwo ono re sa dia uwevwi wẹn na?” (Une 15:1) Ọ vwọ nọ onọ yena nu, o de kere iruemu rẹ Ọghẹnẹ guọnọ mie ihwo re guọnọ dia uwevwin rọyen. Ọvo usun rẹ iruemu yena yen, ra vwọ ta uyota: “Ro duvwu iyori kẹ omobọ rọye ọ da dia obo re miavwọ dede o gbi se kuẹ rhẹriẹ-ẹ.” (Une 15:4) Avwanre de rhiabọreyọ edurhie, avwanre me davwẹngba vwọ yanmuo. Ọ sa dianẹ ohwo ro durhie avwanre na, nabọ ghwọrọ ọke vwo muegbe hẹrhẹ avwanre nure, avwanre rha ra-a, jẹ ẹgbaẹdavwọn rọyen shefia. (Mat. 5:37) Ihwo evo ku ihwo ri durhie ayen phiyotọ, fikirẹ edurhie ọfa rẹ ayen niri nẹ o yovwin nọ ọrẹsosuọ na. Ọyena dje ẹguọnọ vẹ ọghọ phia-a. Ọtiọyena, ofori nẹ avwanre rhiabọreyọ edurhie ji dje ọdavwaro phia kpahen kemu kemu rẹ ohwo na mrẹ vwọ ghọ avwanre. (Luk 10:7) Ọ da dianẹ orọnvwọn cha djẹ avwanre ẹra, ofori nẹ a fobọ vuẹ ohwo ro durhie avwanre na.

21. Mavọ yen ọghọ re muẹ vwọ kẹ ẹkuruemu rẹ asan ra dia sa vwọ nẹrhẹ ohwo dia omamọ rẹ ọrhorha?

²¹ O ji fo nẹ avwanre muọghọ kẹ ẹkuruemu rẹ asan rẹ avwanre dia. Vwẹ asan evo, erhorha se won ohwo kpregede; ẹkẹvuọvo, vwẹ asan efa, wọ cha vuẹ ohwo na phiyotọ tavwen wọ ke kọn bro ra. Vwẹ asan evo, erhorha yen a ka jẹ emu kẹ tavwen a ke jẹ kẹ ihwo rẹ orua na. Vwẹ asan efa, ihwo eje yen koko riemu na kuẹgbe. Vwẹ asan evo, erhorha vwo ẹkuruemu rẹ ayen vwọ hwarhiẹ emu nene oma cha; vwẹ asan efa, ohwo ro durhie ihwo na yen muẹ oghwa rẹ emu rẹ erhorha na cha re. Vwẹ asan evo, ihwo vwo ẹkuruemu rẹ ayen vwọ sian edurhie obọ ọvo yẹrẹ abọ ivẹ tavwen ayen ki muọghọ kẹ; vwẹ asan efa, ohwo da siọn edurhie, kọyen ọ riẹn ese-e. Obo rọ wanre eje, e jẹ avwanre davwẹngba vwo ru obo re cha nẹrhẹ oma vwerhen ohwo ro durhie avwanre na.

22. Diesorọ ọ vwọ dia obo re ghanre ra vwọ “ghọ erhorha”?

²² Pita da ta: “Oba rẹ emu na ejobi si kẹre re.” (1 Pita 4:7) Enẹna, o sikẹre vrẹ obo ri jovwo. Avwanre rhẹro rẹ ukpokpogho rode rẹ akpọ na je rhe mrẹ dẹvo-o. Eyeren na vwo miovwẹn phiyọ na, ofori nẹ ẹguọnọ rọhẹ uvwre rẹ avwanre ganphiyọ. Ọke nana yen uchebro rẹ Pita na ma vwọ ghanre: “Ovwan ghọ erhorha.” (1 Pita 4:9) Vwọrẹ uyota, uruemu ra vwọ ghọ ọrhorha kẹ ohwo omavwerhovwẹn, o ji fo nẹ avwanre djephia ọke nana rhirin bẹdẹ.