Vwọrẹ uyota, o vwo ohwo vuọvo rọ sa nabọ djisẹ rẹ oborẹ ugboma rẹ Pọl ghini hepha-a. E ra mrẹ vwẹ ẹbe rẹ avwanre, ghwa ihoho ghevweghe, ọ dia obo ra tọn mrẹ yen e ni vwo si aye-en.

Ẹkẹvuọvo, o vwo erọnvwọn evo re sa nẹrhẹ a riẹn oborẹ ugboma rẹ Pọl ghini hepha. Zion’s Watch Tower rẹ March 1, 1902, djunute ọvo usun rẹ erọnvwọn tiọyena, rọ vwọ ta: “Vwọ kpahen oborẹ ugboma rẹ Pọl hepha: . . . Ọbe re se, ‘Acts of Paul and Thecla,’ . . . re siri omarẹ ukpe rẹ 150 rẹ ọke avwanre na, nabọ djisẹ rẹ ugboma rẹ Pọl fiotọ. Ọbe na tare nẹ, Pọl ‘nabọ te ọshare, jẹ o ghwe gro-on, o gbe akpan, ọ vẹghawọ, ẹtoẹro rọyen bunrun, unwe rọyen ji gron.’ ”

Vwọ kpahen isiesi awanre yena, ọbe re se, The Oxford Dictionary of the Christian Church (ọ ra teyenphia vwẹ 1997) da ta ota nana: “Idjedje evo rẹ ọbe rẹ ‘Acts of Paul and Thecla’ na vwọphia sa ghene gba.” Isiesi rẹ Grik ri te 80 rẹ ọbe nana yen herọ, kugbe e ra fan kpo ephẹrẹ efa. Ọyena odjephia nẹ ihwo buebun nabọ muọghọ kẹ ọbe na vwẹ uvwre rẹ ikpe ujorin evo ra vwọ teyọnphia nu. Ọtiọyena, uhoho rẹ Pọl ra mrẹ vwẹ ẹbe rẹ avwanre, shephiyọ vẹ idjedje ra vwọphia kpahen ọyinkọn na vwẹ ẹbe rẹ awanre evo.

Erọnvwọn buebun herọ re ghanre vrẹ uhoho rẹ Pọl, ro fori nẹ e niso. Ọke rẹ Pọl vwo ruiruo rẹ aghwoghwo rọyen, ihwo evo jẹrẹfia, rẹ ayen vwọ tanẹ “ugboma rọye epha puẹchẹ, ota rọye ruẹ emuọvo-o.” (2 Kọr. 10:10) Ẹkẹvuọvo, ofori nẹ a karophiyọ nẹ Jesu komobọ yen kuro rhẹriẹ vwẹ idjerhe igbevwunu. O ji fo nẹ a karophiyọ oborẹ Pọl wian te, kerẹ ohwo ra “jẹreyọ . . . rere ọ ghwa odẹ [rẹ Jesu] bru otu ri Keferi” na ra. (Iruo 9:3-5, 15; 22:6-8) Vwọba, wọ me nabọ roro kpahen erere ra sa mrẹ vwo nẹ ẹbe sansan rẹ ẹwẹn ọfuanfon rẹ Jihova mu Pọl vwo si vwẹ Baibol na.

Pọl vwẹ obo ro vwori tavwen ọ ke rhe dia Onenikristi vwọ yeya-an, o ji djisẹ rẹ erhuvwu rẹ ugboma rọye-en. (Iruo 26:4, 5; Fil. 3:4-6) Ukperẹ ọtiọyen, ọ da ta: “Kidie mẹvwẹ hẹ ọyinkọn rẹ ọkuko, ro fori re se ọyinkọ-ọn.” (1 Kọr. 15:9) Ukuko na, o de si: “Mẹvwẹ, dede nẹ mẹvwẹ re ma hanvwe vwẹ usun rẹ ihwo efuanfon na ejobi, ọye a vwẹ ẹserọphẹ kẹ, vwo ghwoghwo kẹ ihwo ri Keferi efe ri Kristi rẹ otọ rọye bẹn ẹguọnọ.” (Ẹfe. 3:8) Aphro herọ-ọ, ovuẹ rẹ Pọl ghwoghwori na yen ma ghanre vwọ vrẹ oborẹ ugboma rọyen hepha.