Inenikristi evo reyọ ena kpokpọ ri she rhe vwọ vwẹ evuẹ rhe ihwo rẹ orua rayen kugbe iniọvo efa. Ẹkẹvuọvo, Onenikristi ro tedje cha karophiyọ uchebro nana: “Ọvwaghwanre da mrẹ ukpokpogho rọ cha o mi sioma nu; ẹkẹvuọvo ohwo oghẹnghẹn me kọn ruọ o mi ghwu phihọ.”—Isẹ 27:12.

Avwanre riẹnre nẹ Jihova guọnọ sẹro avwanre. Ọtiọyena, avwanre kuomagbe ihwo re so ohra, e ra djẹ nẹ ukoko, yẹrẹ i ri titẹ iyono re chọre-e. (Rom 16:17; 1 Kọr. 5:11; 2 Jọn 10, 11) Ọ sa dianẹ ihwo evo re vwomaba avwanre vwevunrẹ ukoko na yeren akpọ nene irhi ri Baibol na-a. (2 Tim. 2:20, 21) Avwanre karophiyọ ọnana ọke ra da sane igbeyan. Ẹkẹvuọvo ọ sa bẹn ra vwọ jomaotọ sane igbeyan vwẹ aplikeshọni ra vwọ vwẹ evuẹ rhe ihwo efa.

Ọ ghanre mamọ a vwọ sane omamọ rẹ igbeyan ma rho vwẹ ọke rẹ ihwo buebun da vwẹ ovuẹ rhe ohwohwo vwevunrẹ ẹko ọvo. Orharhe iyẹnrẹn yen nuro rhe ọke rẹ iniọvo evo vwọ vwomaba ẹko tiọyena. Mavọ yen oniọvo sa vwọ jomaotọ ọ da dianẹ ihwo rehẹ ẹko na bun te ujorin yẹrẹ uriorin buebun? Ọ cha bẹn ra vwọ nabọ riẹn ayen kugbe oborẹ oyerinkugbe rayen vẹ Jihova hepha. Une Rẹ Ejiro 26:4 da ta: “Mi tidia kugbe ihwo ogbarogba-a, eyẹ me vẹ ihwo rẹ okpetu kuoma gbe-e.” Ọnana djerephia nẹ a vwọ vwẹ ovuẹ rhe ihwo ra nabọ vughe ọvo yen me yovwin.

Ọ da tobọ dianẹ ihwo rehẹ ẹko na bunru-un, o ji fo nẹ Onenikristi jomaotọ kpahen uchọke rọ ghwọrọ vẹ eta ra ta vwọ. E jẹ avwan re roro nẹ ofori nẹ a kpahenphiyọ kovuẹ kovuẹ-ẹ, o toro obo ro shekpahen vẹ uchọke rọ cha reyọ-ọ. Pọl vwẹ orhọ-esio vwọ kẹ Timoti kpahen otu re “vwẹ oma ru otidia ohwarha re kare unu phihọ ota” rẹ ihwo efa. (1 Tim. 5:13) Nonẹna, emu tiọyena je sa phia womarẹ ifonu yẹrẹ ikọmputa.

Oniọvo ro te edje cha ta yẹrẹ kerhọ rẹ erharhe rẹ eta yẹrẹ ovuẹ odjahọn ro shekpahen iniọvo rọye-en. (Une 15:3; Isẹ 20:19) Ọ je cha kẹnoma kẹ evuẹ re bruba ri muoshọ yẹrẹ evuẹ ra riẹn esiri raye-en. (Ẹfe. 4:25) Avwanre vwo evuẹ iyoyovwin buebun re mu kpahen Baibol na kugbe iyẹnrẹn ra sa vwẹroso vwẹ wẹbsaiti ri jw.org/urh kugbe JW Broadcasting^®.

Iniọvo evo reyọ aplikeshọni ra vwọ vwẹ evuẹ rhe ihwo na vwọ shẹ, dẹ, ji ghwoghwo ekuakua rayen yẹrẹ reyọ ihwo phiyọ iruo. Erọnvwọn yena eki ẹchuọ, ayen shekpahen ẹga ri Jihova-a. Inenikristi re guọnọ siomanu “urhuru si vwe rẹ igho” cha kẹnoma kẹ ra vwọ reyọ iniọvo vwọ chueki.—Hib. 13:5.

Ofori nẹ a reyọ aplikeshọni ra vwọ vwẹ evuẹ rhe ihwo vwọ nokpẹn rẹ igho kẹ iniọvo re guọnọ ukẹcha yẹrẹ kẹ iniọvo rẹ oghwọrọ phia kẹ? Avwanre vwo ẹguọnọ vẹ ọdavwẹ rẹ iniọvo avwanre, ọtiọyena ọkieje yen avwanre vwọ guọnọ vwẹ ukẹcha phia ji phiudu phiyọ ayen awọ. (Jems 2:15, 16) Ẹkẹvuọvo, a da davwẹngba vwo ru ọtiọyen womarẹ ihwo buebun vwọ vwẹ ovuẹ rhe ohwohwo vwevunrẹ ẹko ọvo, o che gbowọphiyọ omamọ ọrhuẹrẹphiyotọ rẹ oghọn ukoko yẹrẹ ukoko na rure. (1 Tim. 5:3, 4, 9, 10, 16) O muẹro nẹ a guọnọre nẹ ihwo roro nẹ a sane avwanre vwẹ idjerhe rẹ oghẹresan ra vwọ vwẹrote iniọvo avwanre-e.

Avwanre guọnọ ru obo re cha hwarhiẹ urinrin rhe Ọghẹnẹ. (1 Kọr. 10:31) Ọtiọyena, wọ de che brorhiẹn rẹ oborẹ wọ cha reyọ aplikeshọni ra vwọ vwẹ evuẹ rhe ihwo yẹrẹ ena efa vwo ruiruo, gbe roro kpahen imuoshọ ri se no rhe rere wọ kẹnoma.