1. Diesorọ Jesu vwọ rẹ Jihova nẹ ọ sẹro rẹ idibo rọyen?

VWẸ ason rọ koba o ki ghwu, Jesu roro kpahen ebẹnbẹn eje rẹ idibo rọyen che hirharoku. Fikirẹ ẹguọnọ ro vwo kpahen idibo rọyen na, Jesu da rẹ Ọsẹ rọyen nẹ ọ “sẹro rẹ ayen nẹ obọ rẹ ohwo umwemwu na.” (Jọn 17:14, 15) Jesu riẹnre nẹ siẹrẹ ọyen de rhivwin kpo odjuvwu nu, Eshu cha họnre vwọso kohwo kohwo rọ guọnọ ga Jihova. Ọtiọyena, ihwo ri Jihova ghene guọnọ ochọvwe.

2. Diesorọ o vwo mu avwanre ẹro nẹ Jihova cha kpahenphiyọ ẹrhovwo rẹ avwanre?

² Jihova kpahenphiyọ ẹrhovwo ri Jesu kidie nẹ o vwo ẹguọnọ rọyen mamọ. Siẹrẹ avwanre da davwẹngba vwo ru oborẹ Ọghẹnẹ guọnọre, ko ji che vwo ẹguọnọ rẹ avwanre, ọ me je kpahenphiyọ erhovwo rẹ avwanre vwọ kẹ ochọvwe. Jihova ọyen Ọsẹ ro vwo ẹguọnọ rọ vwẹrote emọ rọyen. Ọtiọyena, ọ ra vwẹrote avwanre-e, jo miovwo odẹ rọyen vẹ oka rẹ ohwo rọ hepha.

3. Diesorọ avwanre vwọ guọnọ ochọvwe ri Jihova enẹna?

³ Avwanre guọnọ ochọvwe ri Jihova enẹna vrẹ obo ri jovwo. A djẹ Eshu vwo nẹ obodjuvwu rhire vẹ “ophu rode.” (Ẹvwọ. 12:12) Ọ nẹrhẹ ihwo evo ri muẹkpahan avwanre roro nẹ “Ọghẹnẹ ọye” ayen ga. (Jọn 16:2) Ihwo efa ri se Ọghẹnẹ gbuyota-a muẹ kpahan avwanre, kidie avwanre vwomaba ayen vwẹ irueru rẹ akpọ na-a. O toro oboresorọ ayen vwo muẹ kpahan avwanre-e, oshọ che mu avwanre-e. Diesorọ? Kidie Baibol na tare nẹ, “Ọrovwohwo na sẹro rẹ ihwo ri sere gbuyota.” (Une 31:23) E gbe jẹ a ta ota kpahen Idjerhe ivẹ rẹ Jihova vwọ sẹro avwanre.

4. Vwo nene obo rehẹ Ẹfesọs 6:13-17, die yen Jihova vwọ kẹ avwanre nẹ ọ sẹro rẹ avwanre?

⁴ Jihova kẹ avwanre ekuakua rẹ ofovwin re sa sẹro rẹ avwanre vrabọ rẹ ẹvwọsuọ rẹ Eshu. (Se Ẹfesọs 6:13-17.) Ekuakua rẹ ofovwin rẹ Jihova vwọ kẹ avwanre na ganre mamọ, e je nabọ wian. Ẹkẹvuọvo, ekuakua rẹ ofovwin na sa vwọ sẹro rẹ avwanre, kẹ avwanre ku ọvuọvo rẹ ebẹre rọyen na phiyọ ọkieje. Die yen ọvuọvo rẹ ẹbẹre rọyen na mudiaphiyọ? E jẹ e yono kpahen ayen ọvuọvo.

5. Die yen uyota ra vwọ chobiẹ ehun na, kẹ diesorọ a vwọ reyọ vwọ chobiẹ ehun?

⁵ Uyota ra vwọ chobiẹ ehun na mudiaphiyọ uyota rọhẹ Baibol na. Diesorọ a vwọ vwẹ uyota na chobiẹ ehun? Kidie Eshu yen “ọsẹ rẹ ofian.” (Jọn 8:44) Ikpe buebun rhire na yen ọ vwọrọn efian je phiẹn “akpọ na ejobi” re! (Ẹvwọ. 12:9) Ẹkẹvuọvo, uyota rọhẹ Baibol na sẹro rẹ avwanre vwo nẹ ophiẹnvwe rẹ Eshu. Idjerhe vọ yen a cha vwọ vwẹ uyota na chobiẹ ehun? Avwanre ru ọtioyen womarẹ e vwo yono uyota ro shekpahen Jihova, a vwọ ga vwọrẹ “erhi [“ẹwẹn,” NW ] vẹ uyota” kugbe a vwọ ta uyota vwẹ kemu kemu.—Jọn 4:24; Ẹfe. 4:25; Hib. 13:18.

6. Die yen ọghan rẹ ọvwata na, kẹ diesorọ e vwo kuophiyọ?

⁶ Ọghan rẹ ọvwata na mudiaphiyọ iwan rẹ ọvwata ri Jihova. Diesorọ o vwo fo nẹ e kuophiyọ? Kirobo rẹ ọghan sẹro rẹ udu rẹ isodje ibiri vwo jẹ ẹruọ, ọtiọyen ọghan rẹ ọvwata sẹro rẹ avwanre rere akpọ rẹ umwemwu nana vwo jẹ avwanre emiovwo. (Isẹ 4:23) Jihova guọnọre nẹ avwanre vwo ẹguọnọ rọyen je ga vẹ ẹwẹn avwanre eje. (Mat. 22:36, 37) Ọtiọyena, Eshu davwẹngba avwanre vwo jẹ Jihova ẹga womarẹ ọ vwọ nẹrhẹ avwanre vwo ẹguọnọ rẹ ekuakua rẹ akpọ na. (Jems 4:4; 1 Jọn 2:15, 16) Ona yena ra wia-an, ọ me djuguegue mu avwanre vwo ru obo ri miovwo Jihova ivun.

7. Idjerhe vọ yen e vwo ku ọghan rẹ ọvwata na phiyọ?

⁷ Avwanre ku ọghan rẹ ọvwata na phiyọ womarẹ e vwo rhiabọreyọ iwan ri Jihova ri shekpahen erhuvwu vẹ umiovwo, a me je reyọ ayen vwo ruiruo. (Une 97:10) Ihwo evo se roro nẹ iwan ri Jihova gan nọ. Ẹkẹvuọvo, a ra reyọ odjekẹ ri Baibol vwo ruiruo vwẹ akpeyeren avwanre ọfa-a, ka cha họhọ isodje ro ku ọghan rọyen nu vwẹ ofovwin kidie o rorori nẹ ọ họhọ nọ. Ọyena emu rẹ ẹkpa dẹn! Vwọ kẹ ihwo ri vwo ẹguọnọ rẹ Jihova, irhi rọyen “ghwa họhọ-ọ,” ukperẹ ọtiọyen, o sivwin arhọ rẹ avwanre.—1 Jọn 5:3.

8. Die yen o mudiaphiyọ ra vwọ reyọ iyẹnrẹn esiri na vwo ru isabato kuphiyọ awọ?

⁸ Pọl ji jiro kẹ avwanre nẹ avwanre vwẹ iyẹnrẹn esiri rẹ ufuoma na vwo ru isabato kuphiyọ awọ. Ọnana mudiaphiyọ nẹ avwanre che muegbe ọkeneje re vwo ghwoghwo iyẹnrẹn esiri rẹ Uvie na. Avwanre da vuẹ ihwo efa kpahen ovuẹ ri Baibol na, ọnana bọn esegbuyota rẹ avwanre gan. Ọ kpurhiẹn phiyọ avwanre oma ọke ra da mrẹ oborẹ idibo ri Jihova vwẹ akpọneje reyọ kuphẹn kuphẹn ro rhiephiyọ vwo ghwoghwo vwẹ kasan kasan. Kerẹ udje, ayen ghwoghwo vwẹ asan iruo, isikuru, nuwevwin kpo uwevwin, asan ra da chueki, ọke rẹ ayen de kpo eki ra dẹ emu, ayen de bru ihwo orua re dia Iseri-i ra, yẹrẹ ọke rẹ ayen de nene ihwo efa rẹ ayen vugheri ta ota kuẹgbe. Avwanre da dobọ rẹ iruo rẹ aghwoghwo na ji fikirẹ oshọ, avwanre cha họhọ isodje ro ku isabato rọyen nu vwẹ ofovwin,  isodje tiọyena cha fobọ wan oma vwẹ owọ. Fikirẹ ọtiọyena, ọ cha mrẹ bẹnbẹn ọ vwọ chochọn rẹ oma rọyen, ọ je cha sa yan nene odjekẹ rẹ onini rọye-en.

9. Diesorọ o vwo fo nẹ avwanre vwo ekpọfia rẹ esegbuyota na?

⁹ Ekpọfia rẹ esegbuyota na mudiaphiyọ esegbuyota re vwo kpahen Jihova. Avwanre vwo esegbuyota nẹ o che ru ive rọyen eje gba. Esegbuyota yena cha chọn avwanre “vwọ kpọ ibiri rẹ erhanre rẹ idẹbono kufia.” Diesorọ avwanre vwọ guọnọ ekpọfia na? Kidie ọ sẹro avwanre vrabọ rẹ iyono rẹ ihwo ri she nẹ ukoko na re vwọ suọ, ọ je nẹrhẹ udu nẹ avwanre awọ-ọ ọke rẹ ihwo da vwẹ avwanre jẹ ehwẹ fikirẹ esegbuyota. Ababọ rẹ esegbuyota, avwanre che se vwo ẹgba ra vwọ sen ọke rẹ ihwo efa da guọnọ nẹ avwanre vwọso irhi ri Jihova-a. Ẹkẹvuọvo, kọke kọke rẹ avwanre da chochọn rẹ esegbuyota avwanre vwẹ iruo yẹrẹ isikuru, kọyen avwanre vwo ekpọfia rẹ esegbuyota na. (1 Pita 3:15) Ọkieje avwanre da sen iruo ra da hwa okposa kẹ avwanre ro che gbowọphiyọ irueru rẹ ẹga rẹ avwanre, jẹ e vwo ekpọfia rẹ esegbuyota. (Hib. 13:5, 6) Avwanre da je ga Jihova dede nẹ e muẹ kpahen avwanre, jẹ avwanre ji vwo ekpọfia rẹ esegbuyota na.—1 Tẹsa. 2:2.

10. Die yen ubierhu rẹ esivwo na, kẹ diesorọ e vwo vwo?

 ¹⁰ Ubierhu rẹ esivwo na yen iphiẹrophiyọ rẹ Jihova vwọ kẹ avwanre nẹ ọyen cha hwosa kẹ ihwo eje ri ru ọhọre rọyen, avwanre da tobọ ghwu dede ọ cha rhọvwọn avwanre. (1 Tẹsa. 5:8; 1 Tim. 4:10; Taitọs 1:1, 2) Kirobo rẹ ubierhu rẹ isodje sẹro rẹ uyovwin rọyen, ọtiọyen ubierhu rẹ esivwo na je sẹro rẹ ẹgba iroro rẹ avwanre. Vwẹ idjerhe vọ? Iphiẹrophiyọ yena nẹrhẹ a tẹnroviẹ ive rẹ Ọghẹnẹ, ọ je chọn avwanre uko ebẹnbẹn vwo jẹ avwanre emuorọ. Mavọ e se vwo vwo ubierhu na? E se vwo siẹrẹ a da vwẹ ẹro rẹ Ọghẹnẹ vwo ni emu vwo ni ayen. Kerẹ udje, avwanre vwo iphiẹrophiyọ kpahen Ọghẹnẹ ukperẹ efe ro muẹro-o.—Une 26:2; 104:34; 1 Tim. 6:17.

11. Die yen ọlọkọ rẹ ẹwẹn na, kẹ diẹsorọ a vwọ guọnọ?

¹¹ Ọlọkọ rẹ ẹwẹn na yen ota rẹ Ọghẹnẹ rọ dia Baibol na. Ọlọkọ yena vwo ẹgba rọ sa vwọ hiẹ obo rehẹ udu rẹ ohworakpọ eje je sẹro rọyen vrabọ rẹ iyono rẹ efian vẹ erharhe rẹ iruemu. (2 Kọr. 10:4, 5; 2 Tim. 3:16, 17; Hib. 4:12) Avwanre se yono obo ra vwẹ ọlọkọ yena vwo ruiruo womarẹ uyono romobọ vẹ iyono ra vwọ kẹ avwanre vwẹ ukoko ri Jihova. (2 Tim. 2:15) Vwọ vrẹ ekuakua rẹ ofovwin na, Jihova je kẹ avwanre emu ọfa ro vwo ẹgba rọ sa sẹro avwanre. Ọyen die?

12. Die ọfa yen avwanre guọnọre, diesorọ?

¹² Isodje rọ tẹn ona riẹnre nẹ ọyen ọvo cha sa họnre ituofovwin buebun ji phi ayen kparobọ-ọ, ọ guọnọ ukẹcha rẹ isodje efa. Vwẹ idjerhe vuọvo na, avwanre ọvuọvo cha sa họnre ji phi Eshu kparobọ-ọ, a guọnọ ukẹcha rẹ iniọvo avwanre. Jihova kẹ avwanre isodje buebun re sa chọn avwanre uko, isodje yena yen “imoni” avwanre rehẹ akpọeje.—1 Pita 2:17.

13. Vwo nene obo rehẹ Hibru 10:24, 25, ọrhọ yen erere rọ herọ re vwo kpo uyono ọkieje?

¹³ Idjerhe ọvo ra vwọ mrẹ ukẹcha yen e vwo kpo uyono ọkieje. (Se Hibru 10:24, 25.) Udu se nẹ avwanre owọ ọkievo, siẹrẹ emu tiọyen da phia, avwanre sa mrẹ uduephiophiyawọ vwẹ emẹvwa rẹ avwanre. Ẹkpahanphiyọ ra nabọ muegbe rọyen rẹ iniọvo avwanre vwọ phia bọn avwanre gan. Eta vẹ idje rayen nẹrhẹ e vwo owenvwe ra vwọ ga Jihova ọkieje. Otaẹtakuẹgbe re vwobọ vwọ a ke ton uyono phiyọ vẹ o de kuphiyọ nu je bọn avwanre gan. (1 Tẹsa. 5:14) Vwọba, emẹvwa rẹ avwanre kẹ avwanre uphẹn ra vwọ vwẹ ukẹcha vwọ kẹ ihwo efa, ọnana toroba aghọghọ avwanre. (Iruo 20:35; Rom 1:11, 12) Emẹvwa avwanre je chọn avwanre uko vwẹ idjerhe efa. Ọ chọn avwanre uko vwọ dia ighwoghwota vẹ iyono re tẹn ona. Kerẹ udje, avwanre yono obo ra sa vwọ vwẹ ẹbe rehẹ Ekpeti rẹ Uyono na vwo ruiruo vwẹ idjerhe abavo. Ọtiọyena, nabọ muegbe vwọ kẹ emẹvwa na. Je nabọ kerhọ wọ dahẹ omẹvwa na. Omẹvwa na de kuphiyọ nu, gba vwẹ oborẹ wo yonori vwo ruiruo. Wo de se ru enana, ku wọ sa dia “omamọ rẹ isodje ri Kristi Jesu.”—2 Tim. 2:3.

14. Ukẹcha ọfa vọ yen herọ vwọ kẹ avwanre?

¹⁴ Avwanre je mrẹ ukẹcha rẹ emekashe uriorin buebun re vọnre vẹ ẹgba. Roro kpahen oborẹ amakashe ọvo se ru! (Aiz. 37:36) Gbe roro kpahen oborẹ uriorin buebun rẹ ayen se ru. O vwo ohwo yẹrẹ amakashe ri Dẹbono vuọvo ro se phi amakashe ri Jihova kparobọ-ọ. Jihova yen me vwo ẹgba, ọ vẹ avwanre da herọ, o vwo ọke vuọvo rẹ ihwo re vwọsua sa vwọ  gan nẹ avwanre-e, o toro oborẹ ayen bun te-e. (Iguẹ. 6:16) O muẹro nẹ ọyena uyota! Roro kpahen ihwo re sa chọn wẹ uko ọke rẹ ihwo vwẹ asan rẹ wo de ruiruo, isikuru, yẹrẹ ihwo rẹ orua re dia iseri-i da vwọso owẹ. Karophiyọ nẹ ọ dia owẹ ọvo yen herọ-ọ. Odjekẹ ri Jihova yen wo nene.

15. Vwo nene obo rehẹ Aizaya 54:15, 17, diesorọ ohwo vuọvo cha sa dobọ rẹ owian rẹ aghwoghwo na ji-i?

¹⁵ Akpọ rẹ Eshu nana vwo iroro buebun re sorọ rẹ ayen vwo vwo utuoma kpahen avwanre. Avwanre vwobọ vwẹ oseghe rẹ usuon yẹrẹ kpo ofovwi-in. Avwanre ghwoghwo odẹ rẹ Ọghẹnẹ vẹ Uvie rọyen nẹ ọyen ọvo yen sa kẹ avwanre ufuoma. Avwanre ji nene iwan rẹ ovwata rọyen. Avwanre dje kẹ ihwo nẹ osun rẹ akpọ nana ọvwọnrofian kugbe ozighẹ. (Jọn 8:44) Avwanre ji ghwoghwo nẹ a cha ghwọrọ akpọ rẹ Eshu nana kẹrẹkpẹ. Ẹkẹvuọvo, Eshu vẹ usun rọyen cha sa dobọ rẹ owian rẹ aghwoghwo na ji-i. Ukperẹ ọtiọyen, avwanre che re jiri Jihova vwẹ kidjerhe kidjerhe ro rhiephiyọ eje! Dede nẹ Eshu vwo ẹgba mamọ, jẹ ọ je sa dobọ rẹ aghwoghwo rẹ Uvie na ji ro vwo jẹ akpọneje ete-e. O se ru ọtiọye-en kidie Jihova sẹro rẹ avwanre.—Se Aizaya 54:15, 17.

16. Idjerhe vọ yen Jihova che vwo sivwin ihwo rọyen vwẹ ọke rẹ ukpokpogho rode na?

¹⁶ Die yen hẹrhẹ avwanre vwẹ obaro? Vwẹ ọke rẹ ukpokpogho rode na, Jihova che sivwin avwanre vwẹ idjerhe ivẹ. Ẹsosuọ, o che sivwin idibo rọyen re fuevun ọke ro che vwo mu ivie rẹ akpọ na vwọ ghwọrọ Babilọn rode rọ dia okugbe rẹ ẹga rẹ efian eje. (Ẹvwọ. 17:16-18; 18:2, 4) O ji che sivwin ihwo rọyen ọke rọ cha vwọ ghwọrọ uchekotọ rẹ akpọ rẹ Idẹbono vwẹ Amagidọn.—Ẹvwọ. 7:9, 10; 16:14, 16.

17. Erere vọ yen herọ siẹrẹ avwanre da ka ẹbẹre ri Jihova ọkieje?

¹⁷ Avwanre da ka ẹbẹre ri Jihova ọkieje, Idẹbono cha sa so ọmiaovwẹ ri bẹdẹ kẹ avwanre-e. Vwọrẹ uyota, ọyen re cha rioja rẹ oghwọrọ ri bẹdẹ. (Rom 16:20) Ọtiọyena, gbe ku ekuakua rẹ ofovwin na phiyọ ọkieje! Wọ davwẹngba wẹ ọvo vwo phi ofovwin na-a. Bicha iniọvo wẹn wo ji nene odjekẹ ri Jihova. Wo de ru ọtiọyen, gbe jẹ o muwẹro nẹ Jihova rọ dia Ọsẹ wẹn ro vwo ẹguọnọ na cha kẹ wẹ ẹgba je sẹro wẹ.—Aiz. 41:10.