Ihwo evo ri brokpakpa se ikuegbe ri Baibol nana nọ onọ nana re. Jẹ, vwọrẹ uyota, ihwo ivẹ yen vwo odẹ na Mefiboshet vwẹ ikuegbe ri Baibol nana, e se yono vwo nẹ obo re phiare vwẹ ikuegbe na rhe siẹrẹ a da rhoma fuẹrẹn ikuegbe na.

Sọl rọ dia ovie rẹ Izrẹl vwo emeshare ighwrẹn kugbe emetẹ ivẹ. Jonatan yen ọmọshare rọyen ọkpako. Ọke vwọ yanran na, ọsen rẹ Ovie Sọl re se Rizpah de vwiẹ ọmọshare ọfa vwọ kẹ, odẹ rọyen Mefiboshet. Emuọvo ro gbe ohwo unu kẹ ọna, Jonatan rhe vwo vwiẹ ọmọshare, o de ji mu odẹ na Mefiboshet vwọ kẹ ọmọ na. Obo rọ hepha kọna, ọmọ rẹ Ovie Sọl kugbe uvwrọmọ rọyen yen vwo odẹ na Mefiboshet.

Ọkiọvo rhi vwo te, Ovie Sọl de rhi vwo utuoma kpahen ihwo ri Gibiọn, ọ da jowọ rọ vwọ teyen ayen hwe. Ọyen obo re brare mamọ. Diesorọ? Vwẹ ọke ri Joshua, ekpako rẹ ihwo rẹ Izrẹl vẹ ihwo ri Gibiọn re ọphọ rẹ ufuoma.—Jos. 9:3-27.

Ọphọ yena ji vwo ẹgba rhi te ọke rẹ Ovie Sọl. Ovie na vwọso ọphọ yena rọ vwọ davwẹngba vwo hwe uvwiẹ rẹ ihwo ri Gibiọn eje. Owoẹjẹ yena da nẹrhẹ “Abe rẹ ọbara [dia vwẹ] enu ri Sọl vẹ evwruwevwi rọye.” (2 Sam. 21:1) Ukuotọ rọyen, Devid da rhe dia ovie. Ihwo ri Gibiọn ri sivwin rhọ da vuẹ vwọ kpahen ọkpan rẹ oruchọ ri Sọl na. Devid da nọ ayen oborẹ ayen ru kpahen ichobọ ri Sọl na rere Jihova se vwo ku ebruphiyọ Rọyen vwo ku ẹkuotọ na. Ukperẹ ayen vwọ nokpẹn rẹ igho, ihwo ri Gibiọn da tanẹ, a vwẹ emeshare ighwrẹn rẹ ohwo rọ ‘jẹ iroro kpahen ayen nẹ ọyen hwe ayen’ na vwọ kpahotọ rere a teyen ayen hwe. (Ukeri 35:30, 31) Devid da rhọnvwephiyọ oyare rayen na.—2 Sam. 21:2-6.

Vwẹ ọke yena, Sọl vẹ Jonatan ghwu vwẹ ofovwin re, jẹ ọmọ ri Jonatan, Mefiboshet je herọ yerẹn. Owọ miavwọn vwẹ ọke yena kidie ọ kuoma vwẹ ọkiemọ, ọtiọyena, o rhe se vwobọ vwẹ iroroẹjẹ rẹ ọsẹ rọyen rode ro vwo hwe ihwo ri Gibiọn na-a. Devid vẹ Jonatan re ọphọ jovwore, rọ dia obo ri se fierere vwọ kẹ emọ rọyen ji te Mefiboshet rọ dia ọmọ rọyen na. (1 Sam. 18:1; 20:42) Baibol na da ta: “Ovie da yan ji Mefiboshet rẹ ọmọ ri Jonatan vwo, fiki rẹ iveve rẹ Ọrovwohwo rọ uherevie rayen.”—2 Sam. 21:7.

Dedena, Devid rhọnvwephiyọ oyare rẹ ihwo ri Gibiọn na. Ọ da vwẹ emọ ri Sọl ivẹ rẹ ọvo rọyen dia Mefiboshet kugbe ivwrọmọ rọyen iyorin vwọkpahotọ kẹ ayen. (2 Sam. 21:8, 9) Obo ri Devid ruru na de si abe rẹ ọbara vwo nẹ otọ na.

Ọnana de ghwa ikuegbe ghwevweghe-e. Urhi rẹ Ọghẹnẹ phẹnre vwẹ ẹdia nana. Ọ da ta: “E ji hwe emọ na sohọ esemọ na-a.” (Urhi 24:16) Mane kẹ emọ ri Sọl ivẹ na kugbe ivwrọmọ rọyen iyorin na riabe-e, Jihova rha rhọnvwephiyọ obo re phia vwọ kẹ ayen na-a. Urhi na vwọba: “Ohwo ro ru umwemwu ri ghwu phihọ umwemwu rọye.” Ọ họhọre nẹ emọ ri Sọl ighwrẹn na vwẹ idjerhe ọvo yẹrẹ ọfa vwo vwobọ vwẹ iroroẹjẹ ri Sọl ro vwo hwe ọsoso rẹ uvwiẹ rẹ ihwo ri Gibiọn na. Ọtiọyena, ayen ighwrẹn na da vwẹ arhọ rayen vwọ hwa osa rẹ oruchọ rayen na.

Ikuegbe nana djerephia nẹ ohwo che se guomariase vwo nẹ ichobọ ro ruru nẹ ọyen di nene odjeke ra vwọ kẹ ọye-en. Isẹ ọvo da ta: “Kẹnẹ oma vwẹ idjerhe re wọ wan, oma ko fu we vwẹ oyan wẹn ejobi.”—Isẹ 4:24-27; Ẹfe. 5:15.