DANIEL VẸ MIRIAM rọvwọnre vwẹ September 2000, ayen ke dia orere rẹ Barcelona, vwẹ Spain. Daniel da ta: “Avwanre yeren akpọ rẹ kohwo kohwo yerẹn. Avwanre vwo omamọ iruo, ọtiọyena kẹ avwanre sa riemu vwẹ ihotẹ, kpo ẹkuotọ efa, ji ghwa iwun eghanghanre. Avwanre ji kpo aghwoghwo ọkieje.” Ẹkẹvuọvo, erọnvwọn de rhi wene.

Vwẹ ọghwẹkoko re ruru vwẹ 2006, ọtota ọvo da nọ onọ nana ro te Daniel ẹwẹn mamọ: “Wọ davwẹngba wọ vwọ vwẹ ukẹcha kẹ ‘ihwo re yan chedi chedi kpo ughwu’ rere ayen vwọ ro idjerhe rẹ arhọ na? (Isẹ 24:11) Ọ kanrunumu oghwa rọ herọ re vwo ghwoghwo ovuẹ rẹ Baibol vwọ kẹ ihwo. (Iruo 20:​26, 27) Daniel da ta: “Mi niro nẹ Jihova yen ta ota kẹ vwẹ na.” Ọtota na je tanẹ ohwo de ruiruo aghwoghwo rọyen hẹrephiyọ, ọ cha nẹrhẹ ọ mrẹ aghọghọ rode. Daniel riẹnre nẹ ọnana uyota. Miriam tobọ ton iruo rẹ ọkobaro phiyọ re, ọ je mrẹ ebruphiyọ buebun.

Daniel da ta: “Mi de brorhiẹn nẹ mi che ru ewene rode.” Ọtiọyen o ghini ru. O de si ọke rẹ iruo rọyen kpotọ, ọ da ton iruo ọkobaro phiyọ, o de ji roro kpahen aghọghọ ro che te ayen obọ siẹrẹ ayen da yanran ra ga vwẹ asan ra da ma guọnọ ukẹcha.

Vwẹ May 2007, Daniel vẹ Miriam de siobọnu iruo rayen, ayen de kpo ẹkuotọ rẹ Panama rẹ ayen je ka ra jovwo re. Asan na vwo ibrotọ buebun rẹ ame riariẹ phiyọ vwẹ ẹbẹre re se Bocas del Toro Archipelago rọhẹ Urhie rẹ Caribbean. Ihwo rẹ Guaymi buebun yen dia etiyin. Daniel vẹ Miriam niro nẹ igho rẹ ayen sẹro rọyen na che te ayen vwọ dia Panama te emeranvwe ẹrenren.

Womarẹ okọ vẹ idjighere, ayen de kpo ibrotọ rẹ ame riariẹ phiyọ na, ayen nabọ karophiyọ obo re phiare ọke rẹsosuọ rẹ ayen vwọ vwẹ idjighere djẹ omarẹ iroko 20 wan igbenu, jẹ uvo gangan muẹ ayen. Daniel joma shero. Ẹkẹvuọvo, ihwo rẹ Guaymi na nabọ rhiabọdede ayen, ma rho ọke rẹ ayen rhe vwọ riẹn eta evo vwẹ ejajẹ na. O kriri-i, kẹ ayen vwẹ Baibol vwo yono ihwo 23.

Igho rẹ ayen ghwa nene oma na vwo re, ayen de muomaphiyọ. Daniel da ta: “Kẹ avwanre roro kpahen oborẹ avwanre se vwo rhivwin kpo Spain, jẹ ame-ovie suẹn nẹ ẹro avwanre cha. Ọ da avwanre nẹ avwanre yanjẹ ihwo rẹ avwanre yono na vwo.” Ẹkẹvuọvo, emeranvwe ọvo vwọ wan nu, omamọ iyenrẹn ọvo de te ayen obọ. Mariam da ta: “A da vwẹ avwanre vwo ru ekobaro oghẹresan. Oma vwerhen avwanre nẹ a rhọnvwere nẹ avwanre je ga vwẹ Panama!”

Fikirẹ ewene rọ vwomaphia vwẹ 2015, a da vuẹ Daniel vẹ Miriam nẹ ayen dia ekobaro ọkieje. Kẹ die yen ayen rhi ru? Ayen vwẹroso ive rọhẹ evunrẹ Une Rẹ Ejiro 37:5: “Phi idjerhe wẹn phihọ obọ rẹ Ọrovwohwo; vwẹ ẹro vwọ suọ, ko ruo kẹ wẹ.” Ayen mrẹ iruo rẹ ayen vwọ ghẹrẹ oma rayen vwẹ iruo ọkobaro ọkieje rẹ ayen ruẹ na. Nonẹna, ayen ga vwẹ ukoko ọvo rọhẹ ubrotọ rẹ Veraguas vwẹ Panama.

Daniel da ta: “Tavwen avwanre ki nẹ Spain, avwanre ghwa riẹn sẹ avwanre se yerin akpọ ọlọlọhọ-ọ. Nonẹna, avwanre ghini ruẹ ọtiọyen, jẹ emu vuọvo kanre avwanre-e.” Die yen ma kẹ ayen aghọghọ? Ayen da ta: “Aghọghọ rode herọ siẹrẹ a da vwẹ ukẹcha kẹ ihwo vwọ riẹn Jihova!”