GAIUS vẹ Inenikristi efa re diarọ vwẹ oba rẹ ẹgbukpe ujorin ẹsosuọ hirharoku egbabọse buebun. Ihwo evo guọnọ vwẹ uyono efian vwọ hra ukoko na. (1 Jọn 2:​18, 19; 2 Jọn 7) Ọshare ọvo re se Diotrifis rọ ta “eta ebrabra” kpahen ọyinkọn Jọn vẹ iniọvo efa, rhọnvwe dede Inenikristi ri nẹ asan kpo asa-an, ọ je guọnọ riẹriẹ ihwo efa vwo nene oma. (3 Jọn 9, 10) Uvwre ọke nana yen Jọn vwo si ọbe vwo rhe Gayọs. O si ọbe na vwẹ omarẹ 98 C.E., ọyehẹ “Ọbe Rerha ri Jọn” rọhẹ ẹbẹre ra vwẹ Grik si vwẹ Baibol na.

Gayọs nabọ fuevun ga Jihova dede nẹ o rhiẹromrẹ egbabọse buebun. Idjerhe vọ yen ọ vwọ fuevun? Diesorọ o vwo fo nẹ a vwẹrokere? Mavọ yen ọbe rẹ Jọn siri na sa vwọ chọn avwanre uko vwo ru ọtiọyen?

Ohwo ro si ọbe rẹ Jọn Rerha na se oma rọyen “Ọkpako na.” Ọnana nẹrhẹ Gayọs rọ pha kerẹ ọmọ ọghanghanre vwọ kẹ, riẹn nẹ ọyinkọn Jọn yen si ọbe na vwo rhe. Jọn se Gayọs ọ rọ “ghare, re me guọnọre vwẹ ọ rẹ uyota.” Jọn vwẹ imuẹro nẹ Gayọs nabọ sasa vwẹ ukoko na kirobo rọ sasare vwẹ ugboma. Ọyena omamọ ujiri!​—3 Jọn 1, 2, 4.

Ọ sa dianẹ Gayọs ga kerẹ ọkpako vwẹ ukoko na, ẹkẹvuọvo ọbe na ghwa ta ọtiọye-en. Jọn jiri Gayọs ro vwo phi iniọvo na phiyọ uwevwin dede nẹ ayen erhorha. O niro nẹ ọnana odjephia rẹ evun-ẹfuọn rẹ Gayọs, kidie idibo rẹ Ọghẹnẹ, eyen ihwo re ghọ erhorha.​—Jẹn. 18:​1-8; 1 Tim. 3:2; 3 Jọn 5.

Ujiri rẹ Jọn vwọ kẹ Gayọs na djerephia nẹ iniọvo buebun vrẹn nẹ ekogho rẹ Jọn hepha vwo kpo ikoko sansan, ayen de ji rhivwin rhe kẹ ayen vuẹ Jọn oborẹ ayen rhiẹromrẹ. Ọ sa dianẹ womarẹ iniọvo nana yen Jọn vwọ riẹn obo re phia vwẹ ikoko na.

Inenikristi ri kpo awusheri na guọnọ dia uwevwin rẹ iniọvo, kidie ihotẹ rẹ ọke yena nabọ vwẹrote ohwo-o, evwọfanrhiẹn vọnrọ, ihwo je vwẹ orharhe ẹro  vwo nẹ ayen. Ọtiọyena, ihwo ri kpo awusheri ke dia iwevwin rẹ igbeyan rayen; Inenikristi ke je dia iwevwin rẹ iniọvo rehẹ asan na.

Jọn vuẹ Gayọs nẹ o ji dede erhorha ọkieje, kidie ọ tare nẹ o “dje idjerhe na kẹ [erhorha na] kirobo ro fori kẹ ẹga rẹ Ọghẹnẹ.” Re vwo dje idjerhe kẹ ayen mudiaphiyọ ra vwọ kẹ ayen oborẹ ayen guọnọre vwọ kẹ ẹbẹre ochekọ rẹ oyan rayen na. O muẹro nẹ Gayọs ru ọtiọyen vwọ kẹ erhorha jovwo re, kidie ayen niyẹnrẹn rẹ ẹguọnọ vẹ esegbuyota rọyen kẹ Jọn.​—3 Jọn 3, 6.

Erhorha nana sa dia imishọnare, iniruo ri kiẹn, yẹrẹ ihwo rẹ Jọn ji uwevwin. Ayen yan oyan nana eje fikirẹ iyẹnrẹn esiri na. Jọn da ta: “Fiki rọye ayen vwọ yan oyan na.” (3 Jọn 7) Jọn ghwa ta ota kpahen Ọghẹnẹ nu (ni owọ 6), kọyen “fiki rọye” na sa dia fikirẹ Jihova. Iniọvo na hẹ ẹbẹre ọvo rẹ ukoko na, ko ji fo nẹ e dede ayen sasasa. Kọyesorọ Jọn vwo si: “O fori rere avwanre cha ihwo ọtiọye na uko, rere avwanre vẹ ayen vwo okugbe vwẹ evun rẹ uyota na.”​—3 Jọn 8.

Ọ ghwa dia fikirẹ ujiri ọvo yen nẹrhẹ Jọn si ọbe rhe Gayọsi-i. Jọn je guọnọ chọn uko vwo phi ebẹnbẹn ọvo kparobọ. Diotrifis guọnọ rhiabọdede iniọvo ri nẹ awusheri rhe-e. Ọ je tobọ guọnọ nẹ iniọvo efa vwẹ ukoko na rhiabọdede aye-en.​—3 Jọn 9, 10.

Aphro herọ-ọ, iniọvo na cha tobọ rhọnvwe dia uwevwin rọye-en. Ọ guọnọ ẹdia rẹsosuọ vwẹ ukoko na, o muọghọ kẹ eta rẹ Jọn kakaka-a, ọ je ta eta ebrabra kpahen iyinkọn na vẹ iniọvo efa. Dede nẹ Jọn sere oyono rẹ efia-an, jẹ Diotrifis rhọnvwa phiyọ odjekẹ rẹ iyinkọn na-a. Diotrifis guọnọ ẹdia rode, orharhe uruemu rọyen da nẹrhẹ e no phiyọ ohwo rọ fuevu-un. Uruemu rọyen na djerephia nẹ omaephuo vẹ aroeyivwo sa hra ukoko na. Ọtiọyena, oborẹ Jọn vuẹ Gayọs je sa chọn avwanre uko nonẹna, rọ vwọ ta: “Wọ vwẹ ẹro kere ohwo umwemwu-u.”​—3 Jọn 11.

Vwọ fẹnẹ Diotrifis, Dimitrọs ọyen Onenikristi rẹ Jọn ta omamọ ota kpahen. Jọn de si: “Kohwo kohwo se oseri kẹ Dimitrọs, . . . mi ji se oseri kẹ rhe, yẹ ovwan riẹnre nẹ oseri mẹ uyota.” (3 Jọn 12) Ọ sa dianẹ Dimitrọs guọnọ ukẹcha rẹ Gayọs, ọbe rẹ Jọn Rerha na kọyen ọyinkọn na vwo jiro vwọ kẹ Gayọs. Ọ sa je dianẹ Dimitrọs komobọ yen vwẹ ọbe na vwọ kẹ Gayọs. Ọ sa dianẹ Dimitrọs yen kpuriẹn phiyọ oborẹ Jọn siri na, kidie ọ yan uwevwin kẹ Jọn yẹrẹ ọ sa dianẹ ọyen oniruo ro kiẹn.

Diesorọ Jọn vwo jiri uruemu ra vwọ ghọ erhorha vwọ kẹ Gayọs dede nẹ ọ ruẹ ọtiọyen jovwo? Jọn niroso nẹ Gayọs guọnọ uduefiogbere? Gbanẹ o niro nẹ Gayọs che siobọ nẹ uruemu nana kidie Diotrifis guọnọ djẹ iniọvo ri vwo uruemu tiọyena nẹ ukoko? Kọyensorọ, Jọn vwo phiuduphiyawọ rẹ Gayọs nẹ, “Ohwo ro ru emu esiri yẹ ọye ọ rẹ Ọghẹnẹ.” (3 Jọn 11) Ọnana yen sorọ o vwo fo nẹ e ru emu esiri ọkieje.

Ọbe rẹ Jọn na sa nẹrhẹ Gayọs tinka mu uruemu ra vwọ ghọ erhorha? E, kọyensorọ ọbe rẹ Jọn Rerha je vwọ hẹ  Baibol na, rere o vwo mu ihwo vwọ “vwẹ ẹro kere ohwo esiri.”

E rhe nyo eta efa kpahen oniọvo ọghanghanre nana re se Gayọsi-i. Dedena, e se yono emu buebun mie.

Ẹsosuọ, buebun avwanre yono uyota na vwo mie iniọvo ri nẹ awusheri rhe rhi ghwoghwo ota vwẹ ekogho avwanre. Ọ ghwa dia iniọvo na eje yen se kpo awusheri re ghwoghwo ota-a. Ẹkẹvuọvo, kerẹ Gayọs, avwanre eje sa vwẹ ukẹcha vẹ uduephiophiyawọ kẹ iniọvo ri nẹ asan efa rhe, kerẹ iniruo okinriariẹ vẹ eya rayen. Yẹrẹ avwanre je sa vwẹ ukẹcha kẹ iniọvo re ga vwẹ asan ra da ma guọnọ ukẹcha vwẹ ẹkuotọ rẹ avwanre yẹrẹ vwẹ ẹkuotọ efa. Ọtiọyena, e gbe jẹ avwanre “yono obo re ru ẹse.”​—Rom 12:13; 1 Tim. 5:​9, 10.

Ọrivẹ, e jẹ o gbe avwanre unu siẹrẹ a da mrẹ ihwo re vwọsua ọrhuẹrẹphiyotọ rẹ ukoko na-a. E gbevwọso ọyinkọn jọn, ọtiọyen ji te ọyinkọn Pọl. (2 Kọr. 10:​7-12; 12:​11-13) Die yen ofori nẹ e ru siẹrẹ iniọvo evo de gbevwọso avwanre vwẹ ukoko na? Pọl da vwẹ uchebro kẹ Timoti: “Odibo rẹ Ọrovwohwo dia ohwo rẹ ẹghwọ-ọ ẹkẹvuọvo o nẹ aruẹdọn kẹ ohwo kohwo, oyono vẹ aghẹghẹ, ro vwo odiri, rọ vwẹ aghwanre bru otu re ghwọ uche.” Avwanre de ru dẹndẹn ọke re de gbe avwanre ku, ọyena sa nẹrhẹ ihwo ri gbevwọso avwanre na wene. Ukuotọ rọyen, Jihova kọ cha “kẹ ayen ekuorhẹriẹ re da rhe mrẹ uyota na vughe.”​—2 Tim. 2:​24, 25.

Ọrerha, ofori nẹ e vwo oniso rẹ iniọvo re fuevun ga Jihova dede nẹ ayen hirharoku ẹvwọsuọ, e mi ji jiri ayen. Ọyinkọn Jọn nabọ phiuduphiyọ Gayọs awọ je vwẹ imuẹro kẹ nẹ obo ro ruẹ na yen yovwirin. Ekpako da vwẹrokere ọyinkọn Jọn vwo phiuduphiyọ iniọvo na awọ, “oma” rha cha “ghwọrọ aye-en.”​—Aiz. 40:31; 1 Tẹsa. 5:11.

Eta 219 yen Jọn vwo si ọbe nana vwo rhe Gayọs vwẹ ephẹrẹ rẹ Grik, ọnana yen ọbe rọ ma krẹ kparobọ vwẹ Baibol na. Dedena, ọ vọnre vẹ erere vwọ kẹ avwanre nonẹna.