VWẸ ikpe re kpahen 1910, ọsẹ vẹ oni mẹ da kua nẹ Tbilisi rọhẹ Georgia kpo amaghwa ọvo rọ kẹrẹ Pelly, Saskatchewan, vwẹ obohwẹre rẹ ọnre vwẹ Canada. E vwiẹ vwẹ vwẹ 1928, avwanre emọ esan, mẹvwẹ yen ubrevwiẹ. Emeranvwe esan e ki vwiẹ vwẹ yen ọsẹ mẹ vwo ghwu, oni mẹ ji ghwu ọke me vwọ hẹ omotete. Ọmọke ọvo vwọ wan nu, oniọvo mẹ ọkpako re se Lucy de rhe ghwu, ọke rọ vwọ hẹ ẹgbukpe 17. Oniọvo oni mẹ re se Nick kọyen yọnrọn ovwẹ vẹ iniọvo mẹ ri chekọ ghwanre.

O vwo ẹdẹ ọvo, ọke mi ji vwo yono oyan obọ, rẹ ihwo orua mẹ vwọ mrẹ vwẹ mi vwo siẹ urhurhu rẹ iyesi avwanre. Ayen de kperi nẹ mi siobọno kidie oshọ mu ayen nẹ iyesi na se chiyin uvwe, jẹ me je yọnrọn. Mi chukoku ayen, mi ji nyo ukperi rayen na-a. A kpẹvwẹ Ọghẹnẹ nẹ iyesi na wan vwẹ oma-a, ẹkẹvuọvo ẹdẹ yena yen orua mẹ rhe mrẹvughe nẹ mẹvwẹ odin.

Ugbeyan avwanre ọvo da tanẹ e mu vwe kpo isikuru rẹ idin, ọtiọyena oniọvo oni mẹ na de phi vwe phiyọ isikuru rẹ idin rọhẹ Saskatoon, vwẹ Saskatchewan. Oboyin kọyen me dia, asan na vwẹ inọke buebun vwo sheri kẹ orua mẹ, oshọ ko mu vwe kidie ẹgbukpe iyorin yen me hepha ọke yena. Ọke rẹ họlide ọvo kọyen me vwọ mrẹ orua mẹ. Ukuotọ rọyen, mi de rhi yono ejajẹ rẹ idin, me vẹ emọ efa ke je nabọ heha kuẹgbe.

Vwẹ 1939, oniọvo mẹ ọkpako re se Marion da rọvwọn Bill Danylchuck, me vẹ oniọvo mẹ Frances ki nene ayen dia. Ayen yen ihwo ẹsosuọ vwẹ orua mẹ ri nene Iseri rẹ Jihova yono Baibol na. Me da hẹ họlide, kẹ ayen davwẹngba vwọ  reyọ oborẹ ayen yono na vwo yono uvwe. Vwọrẹ uyota, ọ ghwa lọhọ kẹ aye-en kidie ayen riẹn ejajẹ rẹ idi-in. Ẹkẹvuọvo, ayen niroso nẹ mi vwo ẹguọnọ rẹ Ota rẹ Ọghẹnẹ. Me mrẹvughe nẹ ayen ru oborẹ ayen yono na, ọtiọyena ki mi nene ayen kpo iruo aghwoghwo. O rhe kri-i, mi de brorhiẹn mi vwo bromaphiyame, vwẹ September 5, 1941 Bill de bru vwe phiyame vwevunrẹ ikuru re vo ame phiyọ. Ame na djirori mamọ!

Me vwọ hẹ họlide vwẹ 1946, avwanre de kpo ọghwẹkoko vwẹ Cleveland, Ohio, obẹ America. Vwẹ ẹdẹ ẹsosuọ rẹ ọghwẹkoko na, iniọvo mẹ rẹ emetẹ ki siẹ obo ra ta na phiyọ ọbe kẹ vwẹ me sa vwọ riẹn obo re ruẹ. Vwẹ ẹdẹ rivẹ, oma vwerhen ovwẹ me vwọ riẹn nẹ o vwo asan ra rhuẹrẹ vwọ kẹ idin vẹ oniọvo rọ fan eta kẹ ayen. Enẹna, ke me sa riavwerhen rẹ ọghwẹkoko na, je nabọ vwo ẹruọ rẹ iyono rẹ Baibol na.

Ọke yena, e ghwe phi Ofovwin Akpọeje II nu, ihwo buebun ji titi ẹkuotọ rayen. Mi vwo nẹ ọghwẹkoko na rhe, mi de muegbe me vwọ sẹro rẹ esegbuyota mẹ vwẹ isikuru. Ọtiọyena, me rha so une rẹ ẹkuotọ na, ji yeren aphiala-a. Mi rhe ji vwobọ vwẹ erẹ rẹ igiye-e, ji te irueru rẹ ishọshi. Oma mẹ rha vwerhen iyono na-a, ayen guọnọre nẹ mi wene ẹwẹn mẹ; kẹ ayen vwẹ efian vẹ eta rẹ uguegue vwọ họnre ovwẹ. Emọ rẹ isikuru mẹ ki rhi vwo oniso rẹ obo re phia, ọnana da nẹrhẹ uphẹn rhiephiyọ mi vwo ghwoghwo kẹ ayen. Evo da rhe mrẹ uyota na vughe; ihwo kerẹ Larry Androsoff, Norman Dittrick, kugbe Emil Schneider, ayen je ga Jihova rhi te nonẹna.

Me davwẹngba vwo ghwoghwo kẹ idin vwẹ kasan kasan me rare. Kerẹ udje, vwẹ asan ọvo rẹ idin de koko vwẹ orere re se Montreal, mi ghwoghwo ota kẹ eghene ọshare re se Eddie Taeger ro suẹn ẹko rẹ idin. Eghene yena hẹ ukoko rẹ idin vwẹ Laval, Quebec, rhi duvwun ẹdẹ ughwu rọyen vwẹ ukpe ọwanre na. Me je mrẹ eghene re se Juan Ardanez. Kerẹ ihwo rẹ Biria, eghene nana nabọ hiẹ Baibol na vwọ guọnọ uyota na. (Iruo 17:​10, 11) Ọ mrẹ uyota na vughe, ọ da je rhe ga kerẹ ọkpako vwẹ Ottawa, Ontario rhi duvwun ẹdẹ ughwu rọyen.

Vwẹ 1950, me da kua kpo Vancouver. Dede nẹ ọma vwerhen ovwẹ ọke mi de ghwoghwo kẹ idin, jẹ obo re phiare ọke mi vwo ghwoghwo ota kẹ aye ọvo re se Chris Spicer vwẹ urhuvwun, cha sa chọrọ ovwẹ ẹro-o; aye na dia odi-in. Aye na de durhie phiyọ imagazini avwanre re cha kemeranvwe kemeranvwe, ọ je guọnọ nẹ mi nene ọshare rọyen re se Gary yono. Ọtiọyena, mi de kpo uwevwin  rayen, me vẹ ayen da ghwọrọ ọke grongron vwọ ta ota kpahen Baibol na womarẹ ọbe rẹ avwanre siẹ kẹ ohwohwo. Ẹdẹ yena vwọ wan nu, avwanre rha mrẹ ohwohwo ọfa-a. Ikpe evo vwọ wan nu, mi de kpo ọghwẹkoko vwẹ Toronto, Ontario, ayen da kpaẹro mrẹ vwẹ vwẹ uvwre rẹ iniọvo. Ẹdẹ yena yen e bru Gary phiyame. Ọnana chọn vwẹ uko vwọ mrẹ obo rọ ghanre te re vwo muomaphiyọ iruo aghwoghwo na kidie a riẹn asan yẹrẹ ọke rẹ uyota na che vwo te ubiudu rẹ ohwo-o.

Ọke vwọ yanran na, mi de rhivwin kpo Saskatoon. Vwẹ etiyin, aye ọvo da vuẹ vwẹ nẹ mi yono emetẹ rọyen Jean vẹ Joan Rothenberger re dia ejimẹ, ayen jẹ idin. Isikuru rẹ idin me rare ọyen ayen je ra. Emetẹ na ke vwẹ oborẹ ayen yono na vwo yono emọ iklasi rayen. Ukuotọ royen, emọ iyorin vwẹ iklasi rayen da rhe dia Iseri rẹ Jihova. Ọvo usun rayen yen Eunice Colin. Ọke mi che vwo wontọ nẹ isikuru na ọyen me ka vwọ mrẹ Eunice. Ọke yena, ọ da kẹ vwẹ iswiti, ọ da je tanẹ me vẹ ọyen dia igbeyan. Ukuko na, ọ da rhe dia aye mẹ!

Ọke rẹ oni rẹ Eunice vwọ riẹn nẹ ọmọtẹ rọyen yono Baibol na, ọ da vuẹ ohwo ro suẹn isikuru na nẹ ọ dobọ rẹ uyono na ji. Ọ da reyọ ẹbe na eje re vwo yono Eunice. Ẹkẹvuọvo, Eunice muegbe ro vwo phi Jihova phiyọ ẹdia ẹsosuọ. Ọke ro che vwo bromaphiyame, ọsẹ vẹ oni rọyen da vuẹ nẹ, “Wọ da dia Oseri rẹ Jihova, wo che vrẹn nẹ uwevwin na!” Eunice de ghini vrẹn nẹ uwevwin na ọke rọ vwọ hẹ ẹgbukpe 17, orua ọvo rẹ ihwo rọyen dia Iseri rẹ Jihova de phio phiyọ uwevwin. O vwo yono te ẹdia, o de rhi bromaphiyame. Avwanre vwọ rọvwọn vwẹ 1960, ọsẹ vẹ oni rọyen  rhere-e. Ẹkẹvuọvo, ọke vwọ yanran na, ayen de rhi muọghọ kẹ orhiẹn rẹ avwanre, fikirẹ oborẹ avwanre se gbuyota kugbe uyono rẹ avwanre vwọ kẹ emọ avwanre.

Avwanre vwiẹ emeshare ighwrẹn. Rọ vwọ dianẹ ayen dia idi-in na, kẹ avwanre yono ayen ejajẹ rẹ idin rere avwanre se vwo yono ayen uyota na, jẹ ọ ghwa lọhọ-ọ. Iniọvo na chọn avwanre uko mamọ. Kerẹ udje, ọmiọvwọn ọvo si ọbe kẹ avwanre rọ vwọ vuẹ avwanre nẹ ọvo usun rẹ emọ avwanre na ta erharhe eta vwẹ Ọguan Ruvie. Kpakpata avwanre da kpọ ọmọ na vi vwẹ etiyin. Emọ avwanre James, Jerry, Nicholas, kugbe Steven ga Jihova sasasa vẹ erua rayen. Ayen ẹne na ga kerẹ ekpako. Vwọba, Nicholas vẹ aye rọyen Deborah fan ejajẹ rẹ idin vwẹ oghọn ukoko rẹ Britain; Steven vẹ aye rọyen Shannan ke rha fan ejajẹ rẹ idin vwẹ oghọn ukoko rẹ United States.

Emeranvwe ọvo tavwen avwanre ki ru ẹkarophiyọ rẹ orọnvwe avwanre ro te ẹgbukpe 40 re, aye mẹ Eunice de ghwu, ikansa yen hwere. O chirakon rẹ ọga na mamọ. Esegbuyota ro vwo kpahen evrẹnushi na yen chọn rọ uko. Me rhẹro rẹ ọke me cha vwọ rhoma mrẹ.

Vwẹ February 2012, mi de she vwirhin ehun, ke me rhe mrẹvughe nẹ me guọnọ ukẹcha. Mi de re nene ọmọ mẹ ọvo vẹ aye rọyen dia. Enẹna, avwanre ga vwẹ ukoko rẹ Calgary rọ dia ukoko rẹ idin; me je ga kerẹ ọkpako. Vwọrẹ uyota, ọnana yen obọ ẹsosuọ me vwọ dia ukoko rẹ idin! Di roro! Die yen chọn vwẹ uko me vwọ ga vwẹ ukoko Oyibo rhanvwe 1946 rhire na? Jihova veri nẹ ọ cha vwẹrote emọ ri vwo esẹ vẹ ini-i, o ghini ru ọtiọyen. (Une 10:14) Me kpẹvwẹ iniọvo na eje ri si ẹbe vwo nene uvwe ta ota kugbe i ri yono ejajẹ rẹ idin rere me sa vwọ riẹn obo re phia.

Vwọrẹ uyota, o vwo ọke evo rẹ ofu vwo dje vwe kidie mi se vwo ẹruọ rẹ oborẹ ihwo ta-a, yẹrẹ ihwo sa nabọ vwo ẹruọ mẹ-ẹ. Ẹkẹvuọvo, mi roro kpahen eta rẹ Pita vuẹ Jesu: “Ọrovwohwo, kono mi bru ra? Wẹ ri vwo eta rẹ arhọ ri bẹdẹ na.” (Jọn 6:​66-68) Kerẹ iniọvo buebun re dia edje mẹ re je dia idin, mi rhi yono obo re vwo odirin. Me mrẹ erere rhuarho kidie me kobaro kẹ Jihova vẹ ukoko rọye-en! Asaọkiephana, ẹbe vẹ ividio buebun herọ vwẹ ejajẹ mẹ, me je riavwerhen rẹ uyono vẹ eghwẹkoko vwẹ ejajẹ rẹ idin rẹ America (ASL). Mi ghini yeren akpọ rọ vọnre vẹ omavwerhovwẹn vwẹ ẹga rẹ Ọghẹnẹ avwanre, Jihova.