Ọ GUỌNỌ uvi rẹ ẹgbaẹdavwọn e ki se vwo ufuoma, kidie avwanre yerẹn vwẹ akpọ rọ vọnre vẹ okpetu. Ufuoma da tobọ rhe avwanre dede, a je cha davwẹngba vwọ sẹro rọyen. Die yen Baibol na ta kpahen obo re se vwo vwo obọdẹn rẹ ufuoma rọ tọn? Mavọ yen a sa vwọ chọn ihwo efa uko vwo vwo oka rẹ ufuoma tiọyen?

A ke sa riavwerhen rẹ obọdẹn rẹ ufuoma, ofori nẹ avwanre vwo omafuvwe vẹ ẹwẹn re dọe. O ji fo nẹ e vwo uvi rẹ oyerinkugbe vẹ ihwo efa. Marho, ofori nẹ avwanre sikẹrẹ Jihova kpẹkpẹkpẹ. Mavọ yen e se vwo ru ọtiọyen?

Avwanre de nyupho rẹ Jihova ji muọghọ kẹ irhi rọyen, ọyena odjephia nẹ avwanre vwẹrosuọ, avwanre je guọnọ dia igbeyan rọyen. (Jer. 17:7, 8; Jems 2:22, 23) Jihova ko sikẹrẹ avwanre, ji kẹ avwanre ufuoma rẹ ubiudu. Aizaya 32:17 da ta: “Erere rẹ ọvwata kọ dia ufuoma, otọ rẹ ọvwata, kẹ ofuvwegbe kugbe ẹro ẹvwọsuọ bẹdẹ.” E se vwo obọdẹn rẹ ufuoma siẹrẹ e de nyupho rẹ Jihova vwo nẹ otọ rẹ ubiudu rhe.​—Aiz. 48:18, 19.

Orọnvwọn ọfa rẹ Jihova vwọ chọn avwanre uko rere e se vwo vwo obọdẹn rẹ ufuoma, ọyen ẹwẹn ọfuanfon rọyen ro siobọnu kẹ avwanre.​—Iruo 9:31.

Ufuoma yen orọnvwọn rerha rẹ ọyinkọn Pọl djunute usun rẹ “omamọ rẹ [“ẹwẹn,” NW ] na.” (Gal. 5:22, 23) Ọtiọyena, ofori nẹ avwanre vwẹ uphẹn kẹ ẹwẹn rẹ Ọghẹnẹ nẹ o sun avwanre, rere e se vwo vwo obọdẹn rẹ ufuoma. E gbe jẹ  a fuẹrẹn idjerhe ivẹ rẹ ẹwẹn ọfuanfon na sa vwọ chọn avwanre uko vwo vwo ufuoma.

Ẹsosuọ, e se vwo ufuoma siẹrẹ e de se Ọbe Ọfuanfon na kẹdẹ kẹdẹ. (Une 1:2, 3) Avwanre da ghwọrọ ọke vwo roro kpahen obo re se nẹ Baibol na rhe, ẹwẹn rẹ Ọghẹnẹ kọ chọn avwanre uko vwọ riẹn iroro rẹ Jihova vwẹ ẹdia sansan. Kerẹ udje, ọ cha nẹrhẹ a riẹn oborẹ Jihova vwọ dia ohwo rẹ ufuoma kugbe oboresorọ o vwo ni ufuoma ghanghanre. Avwanre de nene udje rọyen, ke se vwo ufuoma vwẹ akpeyeren rẹ avwanre vwọ vrẹ obo ri jovwo.​—Isẹ 3:1, 2.

Ọrivẹ, e jẹ avwanre yare ẹwẹn ọfuanfon mie Jihova womarẹ ẹrhovwo. (Luk 11:13) O veri nẹ a da nokpẹn rẹ ukẹcha mie, “Ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ [avwanre] vwi Kristi Jesu.” (Fil. 4:6, 7) Avwanre da vwẹ ọkieje vwọ nokpẹn rẹ ukẹcha rẹ ẹwẹn ọfuanfon rẹ Ọghẹnẹ, Jihova kọ cha kẹ avwanre ufuoma gbidiki rọ dia obo rọ vwọ kẹ igbeyan rọyen.​—Rom 15:13.

Mavọ yen ihwo evo vwo ru nene uchebro rẹ Baibol nana, ji ru ewene rọ rhe nẹrhẹ ayen vwo obọdẹn rẹ ufuoma, ji vwo ufuoma vẹ Jihova kugbe ihwo efa?

Iniọvo evo ri “fobọ muẹ ophu” jovwo, chirakon nene ihwo efa yerẹn kuẹgbe vwọrẹ ufuoma vẹ aghwanre enẹna, ayen ji ruẹse. * (Isẹ 29:22) A mrẹ udje rẹ ọnana womarẹ iniọvo ivẹ re davwẹngba vwo siobọnu ophu ji nene ihwo efa yerin kugbe vwọrẹ ufuoma.

David vwo uruemu ọbrabra ro djobọte oka rẹ eta ri nẹ unu rọyen cha. Tavwen ọ ke rhe vwomakpahotọ kẹ Jihova, ọ vwẹ kohwo kohwo vwo guẹdjọ, ọ je ta eta ebrabra kẹ ihwo rẹ orua rọyen. Ọke vwọ yanran na, David da rhe mrẹvughe nẹ ofori nẹ ọyen kuobọrhẹriẹ rere ọ dia ohwo rẹ ufuoma. Mavọ yen ufuoma wan te David obọ? Ọ da ta: “Ke me vwẹ irhi rẹ Baibol vwo ruiruo vwẹ akpeyeren mẹ, ọyena chọn vwẹ uko vwo muọghọ kẹ ihwo rẹ orua mẹ, ayen da je muọghọ kẹ vwẹ.”

Asan rẹ Rachel dia ghwanre, djobọte mamọ. Ọ da ta: “Me vẹ ophu ọgangan je muabọ te ọke na, kidie e vwiẹ vwẹ vwẹ uwevwin rẹ ihwo de  muophu mamọ.” Die yen chọn rọ uko vwọ dia ohwo rẹ ufuoma? Ọ da kpahen, “Kọke kọke yen me vwọ nokpẹn rẹ ukẹcha rẹ Jihova womarẹ ẹrhovwo.”

Obo re phia kẹ David vẹ Rachel, nẹrhẹ a mrẹvughe nẹ ufuoma se te ohwo obọ siẹrẹ a da vwẹ irhi rẹ Baibol vwo ruiruo, ji nokpẹn rẹ ukẹcha rẹ ẹwẹn ọfuanfon rẹ Ọghẹnẹ. Ọnana ghwa odjephia nẹ, e se vwo ufuoma rẹ ubiudu ro che toroba uvi rẹ oyerinkugbe vwevunrẹ orua rẹ avwanre kugbe ukoko na, dede nẹ avwanre yerẹn vwẹ akpọ rọ vọnre vẹ okpetu. Jihova bru avwanre uche nẹ, e jẹ avwanre “vẹ ohwo ọvuọvo ghwọ-ọ.” (Rom 12:18) E se ghini nene kohwo kohwo yerin kugbe vwọrẹ ufuoma? Erere vọ yen che norhe siẹrẹ a da davwẹngba vwọ rhuẹrẹ ẹghwọ?

Womarẹ aghwoghwo rẹ avwanre, avwanre durhie ihwo nẹ ayen rhe mrẹ erere vwo nẹ ovuẹ rẹ ufuoma ro shekpahen Uvie rẹ Ọghẹnẹ rọ cha na. (Aiz. 9:6, 7; Mat. 24:14) Ọ vwerhoma nẹ ihwo buebun rhiabọreyọ ovuẹ na. Ihwo tiọyena rha rioja rẹ omaemuophiyọ ọgangan yẹrẹ muophu ọgangan fikirẹ oborẹ ayen rhiẹromrẹ vwẹ akpọ na-a. Ukperẹ ọtiọyen, ovuẹ na nẹrhẹ ayen se vwo uvi rẹ iphiẹrophiyọ kpahen obaro na, o ji mu ayen vwọ “guọnọ ufuoma, [ji] vwọ tua.”​—Une 34:14.

Jẹ, ọ dia ihwo eje yen ghwa rhiabọreyọ ovuẹ na ichichiyi na-a. (Jọn 3:19) Dedena, ẹwẹn ọfuanfon na chọn avwanre uko vwo ghwoghwo ota kẹ ayen vwọrẹ ufuoma vẹ ọghọ. Ọtiọyena, ka sa tanẹ avwanre nene uchebro nana rẹ Jesu vwọphia vwẹ Matiu 10:11-13 kpahen aghwoghwo: “Ovwan de te uwevwi we yere. Ọ da dia uwevwi ro fori, ufuoma rẹ ovwan kọ dajo: o rhe fo-o, ufuoma rẹ ovwan ko rhivwi bru ovwan rhe.” E de nene uchebro rẹ Jesu, ke se nẹ etiyin vwọrẹ ufuoma. Ọyena kọ nẹrhẹ uphẹn se rhiephiyọ ra vwọ chọn ohwo na uko vwẹ ọke ọfa.

E se toroba ufuoma siẹrẹ e de muọghọ kẹ ihwo ri suẹn, ji te i ri vwọsua iruo rẹ avwanre dede. Kerẹ udje, fikirẹ utuoma rẹ ihwo buebun vwo kpahen avwanre, usuon rẹ ẹkuotọ ọvo vwẹ Africa rha rhọnvwe ghwobọphiyọ ebabọn rẹ Eguan Ruvie rẹ avwanre-e. Rere a sa vwọ rhuẹrẹ ota na phiyọ vwọrẹ ufuoma, e de ji oniọvo ọvo rọ gare kerẹ imishọnare vwẹ ẹkuotọ na jovwo, bru ambasadọ rẹ ẹkuotọ rẹ Africa na ra vwẹ London, England. E jiro yanran re dje kẹ ohwo na nẹ iruo rẹ aghwoghwo rẹ Iseri rẹ Jihova ruẹ vwẹ ẹkuotọ rọyen, dia ọ rẹ ozighi-i. Die kọyen nẹ obuko rọyen rhe?

Oniọvo na da ta: “Mi vwo te asan re de dede erhorha ri bru ayen rhe, fikirẹ osẹnvwe rẹ aye rọ wian vwẹ etiyin na, ẹwẹn mẹ da vuẹ vwẹ nẹ ọyen ohwo rẹ ephẹrẹ ọvo ri mi yonori vwẹ ọke ọvo rọ wanre. Me vwọ vwẹ ephẹrẹ na vwo yeren, o de gbe unu mamọ. Ọ da nọ, ‘die yen mu we rhe?’ Me da vwẹ unu kpotọ vuẹ nẹ me guọnọ mrẹ ambasadọ na. Ọ da ghwa vwẹ ifonu se ọshare na. Ọshare na vwọ rhe, ọ da vwẹ ephẹrẹ rẹ iniọvo na vwo yeren uvwe. Ukuotọ rọyen, ọ da nabọ kerhọ kẹ vwẹ. Mi de dje kẹ nẹ iruo rẹ avwanre dia ọ rẹ ozighi-i.”

Kidie nẹ oniọvo na brọghọ phiyọ ayen oma, ji vwẹ unu kpotọ djisẹ rẹ erọnvwọn eje kẹ ayen, ayen rhe muophu kpahen iruo rẹ avwanre ọfa-a. Ọke vwọ yanran na, usuon na da ghwobọphiyọ iruo rẹ ebabọn rẹ avwanre. Ọma nabọ vwerhen iniọvo na fikirẹ ufuoma ro rhi te ayen obọ! Vwọrẹ uyota, erere ghini herọ gbidiki siẹrẹ e de muọghọ kẹ ihwo efa. Ufuoma, ọyen ọvo usun rẹ erere ro se norhe.

Nonẹna, idibo rẹ Jihova riavwerhen rẹ iparadaisi rẹ ẹwẹn, rọ dia oyerinkugbe rẹ ufuoma rẹ ayen vwori. Wo se toroba ufuoma yena siẹrẹ wọ da davwẹngba vwo dje ẹbẹre nana rẹ omamọ rẹ ẹwẹn rẹ ọfuanfon na phia vwẹ akpeyeren wẹn. Marho kparobọ, ọ cha nẹrhẹ wo se sikẹrẹ Jihova, ji vwo ebruphiyọ vẹ ufuoma rẹ bẹdẹ bẹdẹ vwẹ akpọ kpokpọ rọ cha na.​—2 Pita 3:13, 14.