UYONO 21
Jihova Cha Kẹ Wẹ Ẹgba
“Ọke me vwọ hẹ ọvwiẹre, etiyin me da gan.”—2 Kọr. 12:10.
UNE 73 Kẹ Avwanre Uduefiogbere
ỌDJẸKOKO *
1-2. Egbabọse vọ yen idibo ri Jihova buebun hirharokuẹ?
ỌYINKỌN PỌL vwẹ uchebro kẹ Timoti nẹ o ruiruo rẹ aghwoghwo rọyen fiotọ; uchebro yena ji shekpahen Inenikristi eje nonẹna. (2 Tim. 4:5) Avwanre eje nene uchebro rẹ ọyinkọn Pọl. Ẹkẹvuọvo, ọ dia ọkieje yen ọ ghwa vwọ lọhọ-ọ. Oshọ mu iniọvo rẹ avwanre buebun rẹ ayen vwo vwobọ vwẹ iruo rẹ aghwoghwo na. (2 Tim. 4:2) Di roro kpahen iniọvo rẹ avwanre evo re dia ẹkuotọ ra da dobọ rẹ iruo rẹ avwanre ji. Ayen ghwoghwo ota dede nẹ ayen riẹnre nẹ e se mu ayen phiyọ uwodi.
2 Idibo ri Jihova rhiẹromrẹ ebẹnbẹn sansan re sa nẹrhẹ ofu dje ayen. Kerẹ udje, buebun rayan wian inọke buebun rere ayen sa vwọ vwẹrote orua rayen. Ayen guọnọ ru bunphiyọ vwẹ iruo rẹ aghwoghwo na, ẹkẹvuọvo oma ghwọrọ ayen vwẹ oba rẹ udughwrẹn. Fikirẹ emiavwe yẹrẹ ọghwo, efa rhe se ruẹ te obo ri jovwo-o; evo sa tobọ vrẹn nẹ uwevwi-in. O ji vwo efa ri no nẹ ayen fiẹmu vuọvo kẹ Jihova-a. Oniọvo aye ọvo re se Mary * rọ dia Middle East da ta: “Mi nene ofudjevwe ọgangan muabọ, ọnana nẹrhẹ mi muomaphiyọ. Ẹwẹn mẹ ko kpokpo uvwe, kidie ohọnre nana mie vwe ọke vẹ ẹgba ro fori nẹ mi vwo vwobọ vwẹ iruo rẹ aghwoghwo na vọnvọn.”
3. Die yen a cha fuẹrẹn vwẹ uyono nana?
3 O toro ebẹnbẹn rẹ avwanre hirharoku-u, Jihova sa kẹ avwanre ogangan re se vwo chirakon je vwẹ ẹga kẹ vwo te asan rẹ ẹgba rẹ avwanre teri. A ke ta ota kpahen oborẹ Jihova sa vwọ chọn avwanre uko, e jẹ a ta ota kpahen obo rọ wan chọn Pọl vẹ Timoti uko vwo ruiruo rẹ aghwoghwo rayen fiotọ dede nẹ ayen hirharoku ebẹnbẹn sansan.
JIHOVA KẸ AVWANRE ẸGBA RE VWO RUIRUO RẸ AGHWOGHWO NA
4. Ebẹnbẹn vọ yen Pọl hirharoku?
4 Pọl rhiẹromrẹ ebẹnbẹn buebun. Ọ ghene guọnọ ẹgba ọke ra vwọ vwẹ ikpokpo phio, hwe wiẹnwiẹn, ji muo phiyọ uwodi. (2 Kọr. 11:23-25) Pọl tare nẹ ofu dje ọyen vwẹ ọke evo. (Rom 7:18, 19, 24) Ọ je tanẹ ọ muọga rọ họhọ “unwe” re vwo duvwo, rọ guọnọre nẹ Ọghẹnẹ si nẹ ọyen oma.—2 Kọr. 12:7, 8.
Die yen chọn Pọl uko vwo ruiruo rẹ aghwoghwo rọyen fiotọ? (Ni ẹkoreta 5-6) *
5. Mavọ yen Pọl wian te dede nẹ o hirharoku egbabọse buebun?
5 Jihova kẹ Pọl ẹgba ro se vwo ruiruo rẹ aghwoghwo rọyen fiotọ, dede nẹ o hirharoku ebẹnbẹn buebun. Roro kpahen oborẹ Pọl wian te. Kere udje, ọke rọ vwẹ hẹ uwodi vwẹ Rom, ọ chochọn rẹ iyẹnrẹn esiri na vẹ oruru vwẹ irharo rẹ isun ri Ju, ọkiọvo o ji ru ọtiọyen vwẹ irharo rẹ ihwo rehẹ ẹdia ride vwẹ usuon. (Iruo 28:17; Fil. 4:21, 22) O ji ghwoghwo ota kẹ ihwo eje ri bruro rhe, ji te isodje rẹ ọguan na. (Iruo 28:30, 31; Fil. 1:13) Vwẹ uvwre ọke vuọvo yena Pọl ji si ẹbe sansan ri fierere kẹ Inenikristi rẹ uyota vwẹ ọke yena, e je vọn vẹ erere kẹ avwanre nonẹna. Vwọba, udje ri Pọl bọn iniọvo rehẹ Rom gan, ọ da nẹrhẹ ayen “yivwaro phihọ vwọ ta ota rẹ Ọghẹnẹ na.” (Fil. 1:14) Dede nẹ o ji vwẹ ọke evo rẹ Pọl sa wian bu-un, jẹ o ru asan rẹ ẹgba rọyen teri, ọyena da nẹrhẹ “iyẹnrẹ esiri na yan hẹ obaro.”—Fil. 1:12.
6. Vwo nene obo rehẹ 2 Kọrẹnt 12:9, 10, die yen chọn Pọl uko ro se vwo ruiruo rẹ aghwoghwo rọyen fiotọ?
6 Pọl riẹnre nẹ Jihova yen chọn rọ uko vwo ru kemu kemu ro ruru vwẹ ẹga rẹ Ọghẹnẹ, ọ dia ẹgba romobọ rọye-en. Ọ tare nẹ “vwẹ evun rẹ ovwiẹre e de ru ogangan” rẹ Ọghẹnẹ gba. (Se 2 Kọrẹnt 12:9, 10.) Womarẹ ẹwẹn ọfuanfon na, Jihova kẹ Pọl ẹgba ro se vwo ruiruo rẹ aghwoghwo rọyen fiotọ dede nẹ e mu kpahọn, e muro phiyọ uwodi, o ji hirharoku egbabọse efa.
Die yen chọn Timoti uko vwo ruiruo rẹ aghwoghwo rọyen fiotọ? (Ni ẹkorota 7) *
7. Ebẹnbẹn vọ yen Timoti hirharoku re sa dia egbabọse vwẹ iruo rẹ aghwoghwo rọyen?
7 Eghene Timoti ro nene Pọl wiankugbe je vwẹroso ẹgba rẹ Ọghẹnẹ vwẹ iruo rẹ aghwoghwo rọyen. Timoti nene Pọl yan oyan ogrongron vwẹ iruo rẹ imishọnare. Vwọba, Pọl ji jo kpo asan efa ra bọn iniọvo rehẹ ikoko sansan gan. (1 Kọr. 4:17) Timoti niro nẹ ọyen muwa-an. Ọkiọvo ọnana yen nẹrhẹ Pọl vwẹ uchebro nana kẹ: “E jẹn ohwo ọvuọvo ni we saka fiki rẹ obo wọ vwọ hẹ omotete-e.” (1 Tim. 4:12) Vwọba, Timoti ji vwo “ọga ro kpokpo” kọke kọke, rọ pha kerẹ unwe ro duvwo. (1 Tim. 5:23) Ẹkẹvuọvo, Timoti riẹnre nẹ ẹwẹn ọfuanfon ri Jihova cha kẹ ọyen ẹgba rẹ ọyen se vwo ghwoghwo iyẹnrẹn esiri na, je vwẹ ukẹcha kẹ iniọvo rọyen.—2 Tim. 1:7.
JIHOVA KẸ AVWANRE ẸGBA RA SA VWỌ FUEVUN SIẸRẸ E DE HIRHAROKU EBẸNBẸN
8. Die yen Jihova vwọ bọn idibo rọyen gan nonẹna?
8 Nonẹna, Jihova kẹ idibo rọyen “ẹgba rọ vrẹ ẹgba” rere ayen sa vwọ fuevun ga ọkieje. (2 Kọr. 4:7, NW ) E jẹ a ta ota kpahen erọnvwọn ẹne nana rẹ Jihova vwọ chọn avwanre uko je bọn avwanre gan rere a sa vwọ fuevun ga: ẹrhovwo, Baibol na, uyono ẹra, kugbe iruo rẹ aghwoghwo na.
Jihova bọn avwanre gan womarẹ ẹrhovwo (Ni ẹkorota 9)
9. Mavọ yen ẹrhovwo ẹnẹ sa vwọ chọn avwanre uko?
9 Ọ bọn avwanre gan womarẹ ẹrhovwo. Vwẹ Ẹfesọs 6:18, Pọl bru avwanre uche nẹ a nẹrhovwo rhe Ọghẹnẹ “kọke kọke.” Ọ cha chọn avwanre uko siẹrẹ e de ru ọtiọyen. Jonnie rọ dia Bolivia mrẹ ukẹcha yena ọke ro vwo rhiẹromrẹ ebẹnbẹn sansan. Aye rọyen kugbe ọsẹ vẹ oni rọyen muọga uvwre ọke vuọvo. Ọ bẹnre mamọ vwọ kẹ Jonnie rọ vwọ vwẹrote ayen ihwo erha na. Ukuotọ rọyen oni rọyen de ghwu. Vwọba, ọ reyọ ọke tavwen oma rẹ aye rọyen vẹ ọ rẹ ọsẹ rọyen ke rhe gan. Vwọ kpahen obo re phiare ọke yena Jonnie da ta: “Ofu de dje vwe mamọ, ke me vuẹ Jihova kpahen ọdavwẹ mẹ, ọyena chọn vwẹ uko dẹn.” Jihova kẹ Jonnie ẹgba ro se vwo chirakon rẹ ebẹnbẹn na. Ronald rọ dia ọkpako vwẹ Bolivia nyori nẹ oni rọyen vwo ọga rẹ ikansa. Emeranvwe evo vwọ wan nu, oni na de ghwu. Die yen chọn rọ uko vwo chirakon? Ọ da ta: “Ẹrhovwo ẹnẹ chọn vwẹ uko vwọ ta ọdavwẹ mẹ kẹ Jihova. Me riẹnre nẹ o vwo ẹruọ mẹ vrẹ kohwo kohwo ejobi, tobọ vrẹ obo ri mi vwo ẹruọ rẹ oma mẹ te.” Ọke evo avwanre cha sa riẹn obo ra cha nẹrhovwo kpahe-en. Ẹkẹvuọvo, Jihova durhie avwanre nẹ a nẹrhovwo rhe ọyen, ọ da tobọ dianẹ ọ bẹnre re vwo djisẹ rẹ ọdavwẹ rẹ avwanre fiotọ.—Rom 8:26, 27.
Jihova bọn avwanre gan womarẹ Baibol na (Ni ẹkorota 10)
10. Kirobo ra tare vwẹ Hibru 4:12, diesorọ ọ vwọ dia obo re ghanre re vwo se Baibol na ji roro kokodo kpahọn?
10 Ọ bọn avwanre gan womarẹ Baibol na. Kerẹ Pọl, avwanre sa mrẹ ọbọngan vẹ uchebro vwo nẹ Ọbe Ọfuanfon na rhe. (Rom 15:4) Avwanre vwo se Ota rẹ Ọghẹnẹ ji roro kokodo kpahọn ọkieje ye, Jihova kọ cha womarẹ ẹwẹn ọfuanfon rọyen vwọ chọn avwanre uko vwo vwo ẹruọ rẹ obo ra sa vwọ vwẹ obo re seri vwo ruiruo. (Se Hibru 4:12.) Ronald re djunute siẹvure da ta: “Oma vwerhen ovwẹ nẹ mi rhi vwo ẹkuruemu mi vwo se ẹkpo evo vwẹ Baibol na kason kason. Mi ji roro kokodo vwọ kpahen iruemu sansan rẹ Jihova vwori kugbe obo ro nene idibo rọyen yerẹn vwẹ idjerhe rẹ ẹguọnọ. Enana bọn vwẹ gan.”
11. Mavọ yen Baibol na vwọ vwẹ ukẹcha kẹ oniọvo aye ọvo ro vwerhe uvweri?
11 A sa vwẹ ẹro abavo vwo ni ebẹnbẹn rẹ avwanre siẹrẹ e de roro kokodo kpahen Baibol na. Roro kpahen oborẹ Baibol na vwo fierere kẹ oniọvo aye ọvo rẹ ọshare rọyen ghwuru. Ọkpako ọvo vuẹrẹ nẹ ọbe ri Job cha chọn uko mamọ siẹrẹ o
de se. Oniọvo aye na vwọ ton ese rẹ ọbe ri Job phiyọ, o de brokpakpa brorhiẹn hwe Job fikirẹ ororochọ rọyen. O de si Job orhọ vwevunrẹ ẹwẹn rọyen: “Job! Wo muẹ ẹwẹn wẹn eje kpahen ebẹnbẹn wẹ-ẹn!” Ẹkẹvuọvo, ọ da rhe mrẹvughe nẹ oborẹ Job ruru yen ọyen ji ruẹ na. Ọyena chọn rọ uko vwọ kpọ iroro rọyen vi, ji yerin ghene omaemuophiyọ rọyen na.Jihova bọn avwanre gan womarẹ uyono ẹra (Ni ẹkorota 12)
12. Mavọ yen Jihova wan reyọ iniọvo rẹ ukoko na vwọ bọn avwanre gan?
12 Ọ bọn avwanre gan womarẹ uyono ẹra. Orọnvwọn ọfa rẹ Jihova vwọ bọn idibo rọyen gan yen emẹvwa rẹ avwanre. Pọl siri nẹ ọyen guọnọ mrẹ iniọvo na rere ayen “ru esegbuyota rẹ ohwohwo gan.” (Rom 1:11, 12) Mary re djunute siẹvure vwo omavwerhovwẹn kpahen emẹvwa. Ọ da ta: “Jihova chọn vwẹ uko womarẹ iniọvo eya vẹ eshare re tobọ riẹn oborẹ mi chirakon rọye-en. Ayen vwẹ imikadi rhe vwe, yẹrẹ vuẹ vwẹ eta rẹ ọbọngan vwẹ ọke re me ghwa vwọ guọnọ. Me ta ọdavwẹ mẹ kẹ iniọvo eya ri phi oka rẹ ebẹnbẹn ri mi hirharoku kparobọ re; ọyena bọn vwẹ gan, mi ji yono emu buebun mie ayen. Vwọba, ọkieje yen ekpako na vwọ kẹ vwẹ imuẹro nẹ me ghanre kẹ iniọvo rẹ ukoko na.”
13. Mavọ yen a sa vwọ bọn ohwohwo gan vwẹ uyono?
13 Ọvo usun rẹ asan ri me yovwin ra da sa bọn ohwohwo gan yen Ọguan Ruvie. Davwẹngba vwo dje ẹguọnọ phia, je ta eta rẹ ọbọngan kẹ ihwo efa ọke wo de kpo uyono. Kerẹ udje, tavwen a ke ton uyono phiyọ ẹdẹ ọvo, ọkpako ukoko ọvo re se Peter da ta kẹ oniọvo aye ọvo rẹ ọshare rọyen dia Oseri-i: “Oma vwerhen ovwẹ kọke kọke me da mrẹ wẹ vwẹ uyono. Wo muegbe rẹ emọ esan vwọ kẹ uyono, wọ me rha chọn ayen uko vwo muegbe rẹ ẹkpahọnphiyọ.” Eta nana te oniọvo aye na ẹwẹn mamọ, ọ da ta: “Wọ cha sa riẹn oborẹ eta ru wọ tare na vwerhen ovwẹ oma te-e.”
Jihova bọn avwanre gan womarẹ iruo rẹ aghwoghwo na (Ni ẹkorota 14)
14. Ukẹcha vọ yen iruo rẹ aghwoghwo na vwọ kẹ avwanre?
14 Ọ bọn avwanre gan womarẹ iruo rẹ aghwoghwo na. Oma vwerhen avwanre siẹrẹ a da vuẹ ihwo efa kpahen oborẹ Baibol na tare, o torori sẹ ayen kerhọ yẹrẹ sen ovuẹ na-a. (Isẹ 11:25) Oniọvo aye ọvo re se Stacy mrẹ ọbọngan vwẹ iruo rẹ aghwoghwo na. Ọke ra vwọ djẹ ohwo rẹ orua rọyen ọvo nẹ ukoko, Stacy de muomaphiyọ mamọ, ọ da nọ oma rọyen: ‘Me chọn rọ uko te?’ Ọnana kọyen obo ro roro kọke kọke. Die kọyen chọn rọ uko vwo chirakon rẹ ẹdia nana? Iruo rẹ aghwoghwo na! Ọke ro de kpo aghwoghwo, Stacy kọ tẹnroviẹ ihwo re guọnọ ukẹcha vwẹ ekogho rẹ ayen de ghwoghwo. Ọ da ta: “Uvwre rẹ ọke yena, Jihova chọn vwẹ uko vwo yono ohwo ọvo rọ nabọ reyọ obo ro yonori vwo ruiruo. Ọyena bọn vwẹ gan. Vwọrẹ uyota, iruo rẹ aghwoghwo na yen obo re ma chọn vwẹ uko.”
15. Die yen eta ri Mary yono uwe?
15 Fikirẹ ẹdia rẹ ayen hepha, ihwo evo se no nẹ ẹgbaẹdavwọn rayen vwẹ iruo rẹ aghwoghwo na teri-i. Wo de vwo ẹwẹn tiọyen, karophiyọ nẹ oma vwerhen Jihova siẹrẹ wo de ru asan rẹ ẹgba wẹn teri. Roro kpahen udje ri Mary ra ta ota kpahen siẹvure. Ọ vwọ kua kpo ekogho ra da jẹ ephẹrẹ ọrhorha, o de no nẹ ọyen ruẹ te-e. Ọ da ta: “Vwẹ uvwre ọke evo, omota kprẹn ọvo yen me sa ta, yẹrẹ ki mi se ẹkpo ri Baibol yẹrẹ vwẹ itrati kẹ ihwo.” Ọnana da nẹrhẹ o no nẹ ọyen che se ru yovwin te ighwoghwota re nabọ jẹ ephẹrẹ na fiotọ-ọ. Ẹkẹvuọvo, ọ da kpọ iroro rọyen vi.
Ọ da rhe mrẹvughe nẹ Jihova sa reyọ vwo ruiruo dede nẹ ọ sa jẹ ephẹrẹ na fiotọ-ọ. Ọ da ta: “Uyota ri Baibol ro sivwin arhọ na pha lọlọhọ, jẹ o se wene akpeyeren rẹ ohwo.”16. Die yen sa vwẹ ukẹcha kẹ iniọvo ri se vrẹn nẹ uwevwi-in?
16 Jihova vwo ọdavwaro kpahen oruru rẹ avwanre vwo kpahen iruo rẹ aghwoghwo na, ọ da tobọ dianẹ avwanre se vrẹn nẹ uwevwi-in. Ọ sa gbẹn idjerhe kẹ avwanre re vwo ghwoghwo ota kẹ inọsu vẹ ihwo efa re vwẹrote avwanre. Ofu se dje avwanre siẹrẹ a da vwẹ oborẹ avwanre ruẹ enẹna vwọ vwanvwe oborẹ avwanre ruru vwẹ ọke rọ wanre. Ẹkẹvuọvo, avwanre da riẹn ukẹcha rẹ Jihova vwọ kẹ avwanre asaọkiephana, ke se chirakon rẹ koka koka rẹ ebẹnbẹn je sẹro rẹ aghọghọ rẹ avwanre.
17. Vwo nene oborẹ Aghwoghwo 11:6 tare, diesorọ avwanre vwo muomaphiyọ iruo rẹ aghwoghwo na, ọ da tobọ dianẹ ohwo vuọvo kerhọ-ọ?
17 Usun rẹ ubi rẹ uyota na eje rẹ avwanre kọnre, avwanre riẹn ọ rọ cha tọn awọ muotọ je djẹ-ẹ. (Se Aghwoghwo 11:6.) Kerẹ udje, Barbara rọ dia oniọvo aye rọ vrẹ ẹgbukpe 80 re, ghwoghwo ota womarẹ ifonu vẹ ileta. O vwo si ileta ọvo nu, o de ji kpirhin Uwevwin Orhẹrẹ ri March 1, 2014 ro vwo uyovwinrota na, “What God Has Done for You” phiyọ ẹnvẹlopu na. Ọ rha riẹn nẹ ileta na che she obọ rẹ aye gbe ọshare ọvo ra djẹ nẹ ukoko na-a. Ayen de se magazini na abọ buebun. Ọshare na de no nẹ Jihova yen ta ota kẹ ọyen na. Ọ vẹ aye rọyen da ton uyono ẹra phiyọ, ukuotọ rọyen ayen da rhoma rhe dia iniọvo rẹ avwanre. Ọ vrẹ ẹgbukpe 27 tavwen ayen ki rhivwin rhe ukoko na. Di roro oborẹ ọnana bọn Oniọvo Barbara gan te, rọ vwọ mrẹ erhuvwu rẹ ileta vuọvo yena ghwa rhe!
Jihova bọn avwanre gan womarẹ (1) ẹrhovwo, (2) Baibol na, (3) uyono ẹra, kugbe (4) iruo rẹ aghwoghwo na (Ni ẹkoreta 9-10, 12, 14)
18. Die yen e se ru rere a sa vwọ mrẹ ukẹcha rẹ ẹgba rẹ Ọghẹnẹ?
18 Jihova gbẹn idjerhe buebun phiyotọ rere avwanre sa vwọ mrẹ ukẹcha rẹ egba rọyen rọ basa-an. Avwanre da nẹrhovwo, se Baibol na, kpo uyono, ji vwobọ vwẹ iruo rẹ aghwoghwo na, ke se djephia nẹ avwanre vwo imuẹro nẹ Jihova ọyen Ọghẹnẹ ro vwo ẹgba, rọ je guọnọ chọn avwanre uko. E jẹ a vwẹ ọkieje vwọ vwẹroso Ọsẹ rẹ avwanre rọhẹ obo odjuvwu, rọ guọnọ “dje ẹgba rọye kpahe ihwo rẹ udu rọye fon kpahọ.”—2 Ikun 16:9.
UNE 61 Yan Phiaro, Ovwan Iseri!
^ ẹko. 5 Avwanre yerẹn vwẹ ọke ọgangan, ẹkẹvuọvo Jihova vwẹ ukẹcha kẹ avwanre rere e se vwo chirakon. Vwẹ uyono nana, a cha mrẹ oborẹ Jihova chọn Timoti vẹ ọyinkọn Pọl uko vwọ vwẹ ẹga kẹ dede nẹ ayen rhiẹromrẹ ebẹnbẹn. A je cha ta ota kpahen erọnvwọn ẹne rẹ Jihova vwọ chọn avwanre uko nonẹna rere e se vwo chirakon.
^ ẹko. 2 E wene odẹ na.
^ ẹko. 53 IDJEDJE RẸ IHOHO: Ọke rọ vwọ hẹ uwodi vwẹ Rom, Pọl si ileta vwo rhe ikoko sansan, o ji ghwoghwo ota kẹ ihwo ri bruro rhe.
^ ẹko. 55 IDJEDJE RẸ IHOHO: Timoti bru iniọvo na uche ọke ro vwo kin ikoko sansan.