1. Die yen une ẹsuọ chọn avwanre uko vwo ruẹ?

OHWO ọvo ro roro ine, ro ji titi mamọ da ta: “Eta sa nẹrhẹ wo roro iroro. Uhworo sa kẹ wẹ omavwerhovwẹn. Ẹkẹvuọvo, une ẹsuọ che djobọte ubiudu wẹn.” Avwanre vwẹ ine rẹ ukoko na vwo jiri Ọsẹ rẹ avwanre Jihova, je vuẹ oborẹ avwanre vwo ẹguọnọ rọyen te. Kọyensorọ une ẹsuọ vwọ dia ghanghanre vwẹ ẹga rẹ uyota, owenẹ ọ dianẹ avwanre ọvo yen so une na, yẹrẹ ukoko na eje.

2, 3. (a) Ẹwẹn vọ yen ihwo evo vwo kpahen ra vwọ so une phia gorigori vwevunrẹ ukoko na? (b) Enọ vọ yen a cha fuẹrẹn?

² Mavọ yen oma ru we, siẹrẹ wọ da sua une phia gorigori vwẹ uyono? Oma vo owẹ? Vwẹ asan evo, fikirẹ omavovwẹ eshare sa sua ine vwẹ azagba-a. Iniọvo buebun ji se vwo uruemu tiọna, ma rho ọ da dianẹ ekpako na rhọnvwa sua une-e, yẹrẹ ayen de ruẹ erọnvwọn efa ọke ra da sua une vwẹ uyono.​—Une 30:12.

³ Avwanre da mrẹvughe nẹ une ẹsuọ ọyen ẹbẹre ọvo rẹ ẹga avwanre, a rha cha ro otafe ọke ra da sua une-e. Ọtiọyena, e jẹ ohwo vuọvo nọ oma rọyen: ‘Ẹro vọ yen mi vwo ni une ra sua vwẹ uyono? Mavọ mi se vwo phi omavovwẹ kparobọ rere mi so une phia vẹ aghọghọ? Die yen mi se ru, rere me sa vwọ so une vwo nẹ otọ rẹ ubiudu rhe?’

4, 5. Djisẹ rẹ ọrhuẹrẹphiyotọ rẹ une ẹsuọ re ruru vwẹ uwevwin ẹga na?

⁴ O krire rẹ idibo rẹ Jihova ri fuevun vwọ vwẹ ine vwo jiro. Ọ vwerhoma ra vwọ riẹn nẹ ihwo rẹ Izrẹl vwẹ ẹro ọghanghanre vwo ni une ẹsuọ ọke rẹ ayen vwọ fuevun ga Jihova. Kerẹ udje, Ovie Devid vwo ruẹ ọrhuẹrẹphiyotọ vwọ kẹ uwevwin rẹ ẹga na, o de koko ihwo rẹ Livae 4,000 ri che hworo ihwehworo vwo jiri Jihova. Ihwo 288 vwẹ usun rayen, eyen ihwo re “yonori ri suine kẹ Ọrovwohwo, re nabọ riẹn.”​—1 Ikun 23:5; 25:7.

⁵ A nabọ vwẹ ihwehworo vẹ ine vwọba ruiruo ọke ra vwọ vwẹ uwevwin rẹ ẹga na vwọ kpahotọ kẹ Jihova. Baibol na da ta: “Ihwo ri hworo ewanre na vẹ otu re sua ine na [de] ku urhuru gbe ọvo vwọ so ejiro vẹ ẹkpẹvwẹ kẹ Ọrovwohwo na, ọke rẹ ayen [vwo] mu une na re, vẹ ewanre vẹ igogo kugbe ekuakua rẹ ihwehworo efa, vwọ so ejiro kẹ Ọghẹnẹ, . . . urinrin rẹ Ọrovwohwo na [da] vọn uwevwi rẹ Ọghẹnẹ na.” Vwẹ ẹro roro oborẹ ọnana bọn esegbuyota rẹ ihwo na gan te!​—2 Ikun 5:13, 14; 7:6.

6. Djisẹ rẹ ọrhuẹrẹphiyotọ rẹ une ẹsuo rẹ oghẹresan re ruru ọke rẹ Nehemaya vwọ dia osun vwẹ Jerusalẹm.

⁶ Ọke rẹ Nehemaya vwọ vwẹrote iruo rẹ ẹrhomabọn rẹ igbẹhẹ rẹ Jerusalẹm, o ji ru ọrhuẹrẹphiyotọ rẹ ihwo rẹ Livae vwo hworo ihwehworo ji so ine vwo jiri Jihova. Ihwehworo na ji toroba aghọghọ rẹ ihwo na ọke ra vwọ vwẹ igbẹhẹ na vwọ kpahotọ kẹ Jihova. Jẹ ọ rẹ udje nana, a da “ghare [ibuine] buebu na [kpo] ẹko ivẹ.” Ẹko rẹsosuọ na sua nẹ ẹbẹre ọvo cha, ẹko rivẹ na da rha so nẹ ẹbẹre ochekọ rhe, ayen da vwoma vwẹ igbẹhẹ rọ kẹrẹ uwevwin rẹ ẹga na; e de nyo umri rẹ une ẹsuọ rayen vwẹ ogboko. (Neh. 12:27, 28, 31, 38, 40, 43) O muẹro dẹn nẹ oma vwerhen Jihova rọ vwọ mrẹ idibo rọyen re sua une phia gorigori vwo jiro.

7. Mavọ yen Jesu dje oborẹ une ẹsuọ ghanre te vwẹ ẹga rẹ avwanre?

⁷ Une ẹsuọ jẹ ẹbẹre ọvo rẹ ẹga rẹ uyota vwẹ ọke rẹ Jesu. Vwẹ ẹro roro obo re phiare vwẹ ason rọ ma ghanre kparobọ vwẹ ikuegbe rẹ ihworakpọ, rọ dia ason rẹ Jesu ton irueru rẹ Emu Ovwọnvwọn rẹ Orovwori na phiyọ. A vwọ riemu rẹ ovwọnvwọn na nu, ayen da so une vwo jiri Jihova.​—Se Matiu 26:30.

8. Udje vọ yen Inenikristi rẹ ẹgbukpe ujorin rẹsosuọ phi phiyotọ kpahen ine ra vwọba ga Ọghẹnẹ?

⁸ Inenikristi rẹ ẹgbukpe ujorin rẹsosuọ phi uvi rẹ udje phiyotọ rẹ ayen vwo jiri Jihova womarẹ une ẹsuọ. Dede nẹ ubruwevwin yen ayen da vwoma ọkiọvo, ayen je so ine phia gorigori kẹ Jihova. Ẹwẹn ọfuanfon de mu ọyinkọn Pọl vwo si eta nana kpahen ayen: “Ovwan yono ohwohwo, rere ovwan bru ohwohwo uche, vwẹ akpata, vẹ ine rẹ ejiro kugbe ine rẹ [“ẹwẹn,” NW ] rere wa vwẹ udu rẹ ovwan so ine vwevwerhe kẹ Ọghẹnẹ.” (Kọl. 3:16) Ofori nẹ oma vwerhen avwanre ọke ra da sua “ine rẹ [“ẹwẹn,” NW ]” rehẹ evunrẹ ọbe une rẹ avwanre, kidie ayen ẹbẹre ọvo rẹ eta rẹ Ọghẹnẹ rẹ “odibo esiri na” vwo yono avwanre.​—Mat. 24:45.

9. (a) Die yen sa nẹrhẹ ihwo evo siomauko kẹ une ẹsuọ vwẹ emẹvwa vẹ eghwẹkoko? (b) Iroroẹjẹ vọ yen sa chọn avwanre uko vwọ so une gorigori vwo jiri Jihova, kẹ amono yen cha kobaro rọyen? (Ni uhoho rẹsosuọ na.)

⁹ Die yen sa nẹrhẹ e siomauko kẹ une ẹsuọ? Ọ sa dianẹ une ẹsuọ ghwa dia ẹkuruemu  rẹ ihwo rẹ orua wẹ-ẹn, yẹrẹ e ghwe tito vwẹ asan wo nurhe-e. Ọ je sa dianẹ oma vo owẹ, kidie wo niro nẹ upho wẹn yovwin te ọ rẹ ibuine re sua ine vwẹ TV yẹrẹ iredio-o. Ẹkẹvuọvo, ofori nẹ a karophiyọ nẹ avwanre eje vwo oghwa ra vwọ so ine vwo jiri Jihova. Kpare ọbe une wẹn kpenu, kpare uyovwin wẹn kpenu, wọ so une phia gorigori kẹ Jihova nẹ otọ rẹ ubiudu rhe! (Ẹzra 3:11; se Une Rẹ Ejiro 147:1.) Vwẹ Eguan Ruvie buebun nonẹna, kidie nẹ a vwẹ eta rẹ ine na phia vwẹ TV rọhẹ enu rẹ umukpe na, ka sa so ayen phia gorigori. Ọ vwerhoma ra je vwọ riẹn nẹ, a vwẹ ine ẹsuọ vwọba ọrhuẹrẹphiyotọ rẹ Isikuru rẹ Ekpako vẹ Idibo Rowian re. Ọnana ghwe dje obo rọ ghanre te rẹ ekpako vwọ kobaro rẹ une ẹsuọ vwevunrẹ ukoko na.

10. Die yen ofori nẹ a karophiyọ ọ da dianẹ oshọ rẹ une ẹsuọ muẹ avwanre?

¹⁰ Fikirẹ oshọ nẹ upho rayen cha mra vrẹ e rẹ ihwo ichekọ, yẹrẹ nẹ a cha vwẹ ayen jehwẹ, ihwo buebun rha rhọnvwa sua ine phia-a. Ẹkẹvuọvo, ọke rẹ avwanre da ta ota, e jẹ a karophiyọ nẹ avwanre eje “sheri vwẹ oma rẹ emu buebu.” (Jems 3:2) Ẹkẹvuọvo, ọyena djẹ avwanre ota ẹta-a. Kẹ diesorọ avwanre vwo jẹ une ẹsuọ kidie nẹ upho rẹ avwanre ghwe shephiyọ-ọ?

11, 12. Erhọ yen iroroẹjẹ evo re sa nẹrhẹ ona rẹ une ẹsuọ rẹ avwanre yovwinphiyọ?

¹¹ Ọ da dianẹ oshọ rẹ une ẹsuọ muẹ avwanre kidie avwanre riẹn une sua-a, iroroẹjẹ evo herọ re sa chọn avwanre uko vwo ru yovwinphiyọ. *

¹² Upho wẹn sa nabọ mra, siẹrẹ wọ da riẹn obo ra nabọ wẹn totọ ọke ra da sua une. Kirobo rẹ ẹlẹtriki nẹrhẹ urhukpẹ la ye, ọtiọyen ẹwẹn wẹn je kẹ wẹ ẹgba ọke wọ da ta ota yẹrẹ sua ine. Jẹ upho rẹ wọ  vwọ sua ine, gan te ọ rẹ wọ vwọ ta ota yẹrẹ tobọ vrẹ ọtiọyen dede. (Ni iroroẹjẹ ra vwọphia vwẹ ọbe rẹ Benefit From Theocratic Ministry School Education, aruẹbe 181 re te 184, vwẹ obotọ rẹ uyovwinrota na, “Properly Control Your Air Supply.”) Baibol na tobọ jiro kẹ idibo rẹ Ọghẹnẹ ọke sansan, nẹ ayen so une phia vẹ “edo rode.”​—Une 33:1-3.

13. Djisẹ rẹ obo re sa chọn wẹ uko vwọ so une phia gorigori.

¹³ Davwen iroroẹjẹ nana vwẹ ọke romobọ wẹn, yẹrẹ ọke rẹ ovwan de ruẹ ẹga orua: Sane une rọ ma vwerhen owẹ vwẹ ọbe une rẹ avwanre. Se eta une na phia sasasa vẹ upho gorigori. Vwẹ upho vuọvo yena vwọ ta ọsoso rẹ urhiẹ ọvo ofuọvo. Wo de ru ọyena nu, gba suọ vẹ uphọ vuọvo yena. (Aiz. 24:14) Iroroẹjẹ nana cha nẹrhẹ wọ sa so une phia vẹ ẹgba; ọyena ghwa obo ra guọnọre. Wo jẹ ọ nẹrhẹ oshọ mu we, yẹrẹ nẹrhẹ oma vo owẹ-ẹ!

14. (a) Erhuvwu vọ yen che norhe siẹrẹ a da nabọ rhie unu phiyọ so une? (Ni ekpeti na “ Ru Ona rẹ Une Ẹsuọ Wẹn Yovwinphiyọ.”) (b) Iroroẹjẹ vọ ro shekpahen ebẹnbẹn rẹ upho ra vwọ sua ine, yen me je we?

¹⁴ Upho wẹn cha sa nabọ mra-a, jokpanẹ wọ nabọ rhie unu wẹn phiyọ ọke wọ da sua une. Orọnvwọn ọfa wo se ru kẹ ọna: davwẹngba wo rhie unu wẹn vrẹ asan ro te, ọke wọ ta ota. Die yen ofori nẹ wo ru, siẹrẹ wo de no nẹ upho wẹn mra te-e, yẹrẹ ọ mra gan nọ? Wọ sa mrẹ iroroẹjẹ ri shekpahen ebẹnbẹn tiọna vwẹ ọbe rẹ Benefit From Theocratic Ministry School Education, aruọbe 184, vwẹ ekpeti na, “Overcoming Specific Problems.”

15. (a) Aghwoghwo vọ yen e ruru vwẹ omẹvwa rẹ kukpe kukpe rẹ 2016? (b) Erhọ yen ọdavwẹ evo rọ nẹrhẹ e ru ọbe une kpokpọ na?

¹⁵ Oma vwerhen iniọvo ri kpo omẹvwa rẹ kukpe kukpe rẹ Watch Tower  Bible and Tract Society of Pennsylvania re ruru vwẹ 2016, ọke rẹ Oniọvo Stephen Lett rọ dia ọvo usun rẹ Ẹko Rọvwẹrote na vwo ghwoghwo kẹ otu na nẹ o rhe che kri-i, e che siobọnu ọbe une kpokpọ re mu odẹ kẹ nẹ Suine kẹ Jihova vẹ Aghọghọ, re che vwo ruiruo vwẹ emẹvwa rẹ avwanre. Oniọvo Lett da tanẹ ọdavwẹ ọvo kiriguo rọ nẹrhẹ e wene ọbe une na, ọyen rere eta rehẹ evun rọyen se vwo shephiyọ vẹ eta rehẹ New World Translation of the Holy Scriptures ra rhoma si. E wene eta ine buebun ji si eta evo no, vwo nene ewene re ru phiyọ New World Translation ra rhoma si vwẹ 2013. E ji si ine kpokpọ efa ri shekpahen aghwoghwo, vẹ ọdavwaro rẹ avwanre vwọ kpahen ọtanhirhe na vwọba e re herọ jovwo. Vwọba, kidie nẹ une ọyen ẹbẹre ọvo rẹ ẹga rẹ avwanre, Ẹko Rọvwẹrote na guọnọre nẹ e ru opharo rẹ ọbe une kpokpọ na họhọ ọ rẹ New World Translation ra rhoma si na.

16, 17. Ewene vọ yen e ru phiyọ ọbe une kpokpọ na?

¹⁶ A rhuẹrẹ ine rẹ Suine kẹ Jihova vẹ Aghọghọ na, vwo nene iyovwinreta ri churobọ si ohwohwo rere e vwọ phẹre erhie. Kerẹ udje, ine 12 rẹsosuọ na shekpahen Jihova, 8 re vwọ kpahen eyena de rhe shekpahen Jesu vẹ ọtanhirhe na. O vwo asan ra rhuẹrẹ iyovwinreta na eje phiyọ, wo se kpo etiyin ra sane une vwọ kẹ ota rotu wẹn.

¹⁷ E wene eta rẹ ine evo rere ayen vwọ phẹn, rere kohwo kohwo sa vwọ so ayen nẹ otọ rẹ ubiudu rhe, e ji si eta evo no ri kpo awanre re. E si eta rẹ ine na kirobo ra ta ota wan rere ine na vwọ phẹre ẹsuọ, e mi ji vwo ẹruọ rayen. E ji si ayen lọlọhọ rere kohwo kohwo sa vwọ fobọ riẹn ayen. A rhoma si eta rẹ ine evo rere ayen vwo shephiyọ obo ra guọnọ ta ota kpahan, kerẹ ine ri shekpahen emẹvwa vẹ iruo aghwoghwo na.

18. Diesorọ o vwo fo nẹ e yono ine rehẹ ọbe une kpokpọ na? (Ni eta rehẹ obotọ na.)

¹⁸ Buebun rẹ ine rehẹ ọbe une rẹ Suine kẹ Jihova vẹ Aghọghọ na, e si ayen kerẹ ẹrhovwo. Womarẹ ine nana, wọ sa ta ọdavwẹ wẹn kẹ Jihova. Ine efa che mu iniọvo avwanre vwo vwo “ẹguọnọ [ji ruiruo] esiri.” (Hib. 10:24) O muẹro nẹ avwanre guọnọ yono eta rẹ ine na kugbe obo ra sua ayen wan. Wo se ru ọtiọyen siẹrẹ wọ da nabọ kerhọ kẹ e ra vwẹ unu so vwẹ jw.org. Wọ da nabọ yono ayen vwẹ uwevwin, kẹ wọ sa so ayen phia gorigori nẹ otọ rẹ ubiudu rhe. *

19. Ọrhọ yen idjerhe ọvo rẹ avwanre eje sa vwọ vwẹ ẹga kẹ Jihova?

¹⁹ Karophiyọ nẹ une ẹsuọ pha ghanghanre vwẹ ẹga rẹ avwanre. Ọyen idjerhe ọvo kiriguo re vwo dje ẹguọnọ vẹ ọdavwaro phia kẹ Jihova. (Se Aizaya 12:5.) Wọ da so une phia vẹ aghọghọ, ọyena che phiuduphiyọ ihwo efa awọ rẹ ayen ji vwo ru ọtiọyen. Ihwo eje sa vwẹ ẹga kẹ Jihova womarẹ une ẹsuọ, te ighene, te emare, kugbe ihwo kpokpọ. Ọtiọyena, wo siomauko wọ vwọ so une phia-a. Ru nene odjekẹ nana rẹ Jihova vwọ kẹ avwanre womarẹ ọbuine na: “So ine kẹ Ọrovwohwo.” E, so une vẹ aghọghọ!​—Une 96:1.