Mavọ Yen Oma sa Vwọ Vwerhen Owẹ Vwẹ Ukoko Wọ Kua ra Na?
ALLEN da ta: “Udu bru vwe ọke me vwọ kua cha, me riẹnre sẹ mi se vwo igbeyan kpokpọ vwẹ obonẹ-ẹ, yẹrẹ sẹ iniọvo na cha nabọ dede uvwe-e.” * Allen ghwa kua kpo ukoko ọvo rọ vwẹ iroko re vrẹ 1,400 vwo sheri kẹ uwevwin rọyen.
Udu se bru we ẹsosuọ, siẹrẹ wọ da kua kpo ukoko ọfa. Die yen sa chọn wẹ uko? Die wo che ru siẹrẹ egbabọse na da bẹn kẹ wẹ? Vwọba, siẹrẹ ihwo kpokpọ da kua rhe ukoko wẹn, mavọ yen wọ sa vwọ vwẹ ukẹcha kẹ ayen?
MAVỌ YEN UKOKO NA SA VWỌ FOBỌ RIẸNRIẸN OWẸ OMA?
Roro kpahen udje nana: Vwẹ ẹro roro urhe re che ghwie nẹ asan rọ hepha, ra kọn phiyọ asan ọfa. Ọke re de ghwie urhe na, a me nyavwe awọ evo no, rere e se vwo muo kpo asan ra cha kọn phiyọ. A da ghwa kọn nu, ọ me tan awọ kpokpọ. Eriyin ọ je hepha siẹrẹ wo de kpo ukoko ọfa. “Awọ” wẹn nabọ ghwotọ vwẹ ukoko wẹn ri jovwo, kidie wo vwo igbeyan buebun wọ vẹ ayen gba ga kuẹgbe sasasa. Jẹ asaọkiephana, ofori nẹ awọ wẹn nabọ ghwotọ vwẹ ukoko wọ kua ra na. Die yen sa chọn wẹ uko vwo ru ọnana? Nene odjekẹ rẹ Baibol. Jẹ a fuẹrẹn evo usun rayen.
Ohwo ro se Ota rẹ Ọghẹnẹ kọke kọke, pha kerẹ “urhe ra kọnre kẹrẹ asan ame, rọ mọ emamọ rọye vwẹ ọke ororo rọye, ẹbe rọye se vwioro-o. Kemu kemu ro ruru ejobi, ko yovwi kẹ.”—Une 1:1-3.
Kirobo rẹ urhe vwẹ ọkieje vwo se ame reyọ rere ọ sa vwọ ghwẹbẹ phiyọ, eriyin o ji fo nẹ Onenikristi se Ota rẹ Ọghẹnẹ kọke kọke rere ọ sa vwọ bọn oyerinkugbe rọyen vẹ Jihova gan. Ọtiọyena, vwẹ isese rẹ Baibol vẹ uyono ẹra vwo ru ẹkuruemu. Muomaphiyọ ẹga rẹ orua vẹ uyono romobọ rẹ ọkieje. Erọnvwọn eje wo ruẹ wọ bọn oma wẹn gan vwẹ ukoko wẹn ri jovwo na, eyen wo ji che ru vwẹ ukoko wọ hepha asaọkiephana.
“Ohwo ro kuẹ ame kuẹ emu ra kọnre eriyin e ji ku ame kuo.”—Isẹ 11:25.
Wẹ vẹ iniọvo na cha fobọ riẹnriẹn oma siẹrẹ wo de kpo aghwoghwo ọkieje. Kevin rọ ga kerẹ ọkpako ukoko da ta: “Mẹ vẹ aye mẹ ghwe vwo te ukoko rẹ avwanre kua ra na, avwanre da reyọ ọkobaro ubrọke. Ọyena nẹrhẹ avwanre fobọ riẹnriẹn oma vẹ iniọvo na, ekogho rẹ avwanre de ghwoghwo, kugbe ekobaro efa.” Roger rọ kua kpo ukoko rọ vwẹ iroko re vrẹ 1,600 vwo sheri kẹ asan rọ dia, da ta: “Obo rọ cha ma chọn ohwo uko vwo vughe iniọvo na, ọyen re vwo nene ayen kpo aghwoghwo ọkieje. Vwọba, jẹ ekpako na riẹn nẹ wọ choma wọ vwọ vwẹ ukẹcha phia siẹrẹ uphẹn de rhiephiyọ; wọ sa vwẹ ukẹcha phia wọ ta ota rẹ kpregede, wo se vwobọ vwẹ ẹroevwote rẹ Ọguan Ruvie, yẹrẹ vwẹ imoto wẹn vwo mu ohwo ọvo kpo uyono. Iniọvo na da ghwa mrẹ ohwo ro vwo ẹwẹn rẹ omaevwoze, kẹ ayen vwẹ ugbeyan muo.”
“We gbe rhie udu rẹ ovwan phihọ.”—2 Kọr. 6:13.
Dje ẹguọnọ kẹ iniọvo na eje. Melissa vẹ orua rọyen vwọ kua kpo ukoko ọfa, kẹ ayen guọnọ iniọvo rẹ ayen che vwo ru igbeyan. Melissa da ta: “Avwanre nabọ yeren iniọvo na tavwen uyono ke tuanphiyọ kugbe ọke rẹ uyono de kuphiyọ nu. Avwanre nabọ nene iniọvo na gbikun, ọ ghwa dia
uyeren ghevweghe-e.” Ọnana chọn ayen uko vwọ fobọ riẹn edẹ rẹ iniọvo na. Vwọ vrẹ ọyena, ayen ji vwo uruemu re vwo dede erhọrha, ọyena de si ayen kẹrẹ iniọvo na mamọ. Vwọba, Melissa da ta: “Avwanre reyọ ukeri rẹ ifonu rẹ ohwohwo, rere iniọvo na se vwo se avwanre ọke rẹ ayen de che ruiruo evo vwẹ ukoko na, yẹrẹ vwobọ vwẹ ọrhuẹrẹphiyotọ rẹ oghẹresan.”Ọ da dianẹ oma vo owẹ wo vwo nene erhorha ta ota, wọ sa ton otaẹtakuẹgbe na phiyọ ememerha. Kerẹ udje, davwẹngba wọ hwẹ kẹ ayen. Kidie ehwe sa nẹrhẹ ihwo sikẹrẹ owẹ. Rachel rọ kua nẹ asan rọ dia ghwanre vwo kpo asan ọfa, da ta: “Mẹvwẹ ohwo rẹ oma vua. Ọkiọvo na, ẹgbẹgba yen mẹ vẹ iniọvo rehẹ ukoko me kua ra na, sa vwọ ta ota. Mi de te Ọguan Ruvie, ohwo ro chidia ọ romobọ rọyen rọ ta ota kẹ ohwo vuọvo-o, yen me chidia kẹrẹ. Ọ sa dia ohwo rẹ oma vua kerẹ omẹvwẹ.” Davwẹngba wo nene ohwo ọvo rọ ghwa kua rhe ukoko wẹn ta ota kugbe tavwen uyono ke tonphiyọ, yẹrẹ o de kuphiyọ nu.
Ẹsosuọ, oma sa vwerhen owẹ wọ vwọ mrẹ iniọvo rehẹ ukoko wọ kua rhe na, ẹkẹvuọvo, ọke vwọ yanran na, “omavwerhovwẹn” yena se rhi shekpotọ. Ọtiọyena, kọ guọnọ ẹgbaẹdavwọn rẹ ọkieje wo se vwo vwo igbeyan kpokpọ.
E de ghwie urhe nẹ otọ, awọ rọyen evo se bru; jẹ, a da kọn phiyọ asan ọfa nu, ọ me rhe tan awọ muotọ
VWẸ ỌKE KẸ OMA WẸN
Irhe evo fobọ tan awọ muotọ siẹrẹ e de mu ayen ra kọn vwẹ asan ọfa, ẹkẹvuọvo efa reyọ ọke. Ọtiọyen ọ je hepha, ọ dia ihwo eje yen fobọ vwo igbeyan vwẹ ukoko kpokpọ-ọ. Ọ da dianẹ ukoko wọ kua ra na je rhe riẹnriẹn owẹ oma-a, jẹ o kriri emerha wọ kua kpo oboyin re, ẹkpo rẹ Baibol nana sa chọn wẹ uko:
“E jẹn oma rẹ iruo esiri rhọ avwanre-e, kidie vwẹ ọmọke wobọ avwanre che vun, ọ da dianẹ uvwerhi gbe ro avwanre-e.”—Gal. 6:9.
Ji vwẹ ọke kẹ oma wẹn. Kerẹ udje, imishọnare buebun ri wontọ nẹ Isikuru rẹ Gilead, dia asan rẹ ayen da ga vwẹ ikpe buebun tavwen ayen ke kọn kpo obuwevwin. Ọyena nẹrhẹ oyerinkugbe rayen vẹ iniọvo na ganphiyọ, o je nẹrhẹ ẹkuruemu rẹ ihwo na riẹnriẹn ayen oma.
Alejandro rọ kua kpo ukoko sansan re, riẹnre nẹ ọ reyọ ọke tavwen e ki se nene iniọvo rehẹ ukoko kpokpọ na mu ugbeyan. Ọ da ta: “Avwanre vwo te ukoko rẹ avwanre kua ra kuko, aye mẹ da ta, ‘Igbeyan mẹ eje hẹ ukoko rẹ avwanre nurhe na!’ ” Alejandro da karophiyọ aye rọyen nẹ, ọtiọyen ọ je ta ẹgbukpe ivẹ re wanre na, rẹ ayen vwo tu kua kpo ukoko rẹ ayen kua nurhe na. Ẹkẹvuọvo, vwẹ uvwre rẹ ẹgbukpe ivẹ yena, o dje omavwerhovwẹn phia kpahen ihwo efa, iniọvo na da rhe dia igbeyan rọyen.
“Wọ tanẹ, Die ọke rẹ awanre vwo yovwi nọ ọke nana? kidie ọ dia nẹ aghwanre wo vwori wọ vwọ nọ enanọ nana-a.”—Aghwo. 7:10.
Wọ vwẹ ukoko kpokpọ na vwọ vwanvwen ọ rẹ wo nurhe na-a. Kerẹ udje, ọ sa dianẹ iniọvo na fobọ ta ota-a, yẹrẹ ayen ta ota vrẹ iniọvo rehẹ ukoko rẹ wọ kua nurhe na. Tẹnrovi omamọ rẹ uruemu rayen, kirobo wọ je guọnọ nẹ ayen ru kẹ wẹ. Iniọvo evo ri kua kpo ukoko kpokpọ, ke rhoma nọ oma rayen, ‘Me ghene vwo ẹguọnọ rẹ “imoni” rehẹ akpọeje na?’—1 Pita 2:17.
“Nọ, ka vwọ kẹ wẹ.”—Luk 11:9.
Nẹrhovwo vwọ kẹ ukẹcha. Ọkpako ọvo re se Devid da ta: “Wo roro nẹ wẹwẹ ọvo se chirakon rọye-en. Jihova sa chọn avwanre uko vwo ru erọnvwọn buebun. Ọtiọyena, nẹrhovwo kpahọn!” Rachel, ra ta ota kpahen siẹvure, je rhọnvwe. Ọ tare nẹ, “Mẹ vẹ ọshare mẹ de ghwe no nẹ avwanre siomauko emerha kẹ inọvo na, kẹ avwanre nẹrhovwo kpahọn. Avwanre me vuẹ Jihova nẹ, ‘Biko jẹ avwanre riẹn siẹrẹ avwanre de ruẹ erọnvwọn re nẹrhẹ ọ bẹn kẹ inọvo na, rẹ ayen vwo sikẹrẹ avwanre.’ Kẹ avwanre davwẹngba vwo nene inọvo na ghwọrọ ọke kuẹgbe.”
Emiọvwọn, ọnana da dia ebẹnbẹn kẹ emọ rẹ ovwan, ovwan nene ayen nẹrhovwo kpahọn. Chọn ayen uko vwo vwo igbeyan kpokpọ; ovwan se durhie iniọvo evo rhe uwevwin rẹ ovwan.
DEDE INIỌVO RE GHWA KUA RHE UKOKO WẸN
Ukẹcha vọ yen wọ sa vwọ kẹ iniọvo re ghwa kua rhe ukoko wẹn? Nene ayen mu ugbeyan ghwe vwo nẹ ẹdẹ rẹsosuọ. Wo se vwo ru ọtiọyen, vwẹ ẹro roro obo wọ rha guọnọ nẹ e ru kẹ wẹ, ọ da dianẹ wẹ yehẹ ẹdia rayen, rere wo ruo kẹ ayen. (Mat. 7:12) Ayen sa vwomaba ẹga rẹ orua wẹn, yẹrẹ nene ovwan ni JW Broadcasting re ruẹ kemeranvwe kemeranvwe? Ayen se nene uwe wian vwẹ iruo rẹ aghwoghwo na? Wo de durhie ayen kpo uwevwin wẹn vwọ kẹ emuẹriọ, obo wo ru kẹ ayen na cha sa chọrọ ayen ẹro-o. Ukẹcha ọfa vọ yen wọ sa vwọ kẹ iniọvo re kua rhe ukoko wẹn?
Carlos da ta: “Avwanre ghwa vwọ kua rhe ukoko kpokpọ rẹ avwanre hepha na, oniọvo aye ọvo de dje asan rẹ avwanre da sa mrẹ emu ri kuru dẹ. Ọyena chọn avwanre uko mamọ.” A sa vwẹ ukẹcha kẹ iniọvo re kua nẹ asan rẹ aruọke na fẹnẹre, vwọ riẹn oka rẹ iwun ayen che kuphiyọ vwẹ ọke uvo, ọke ekpahen, yẹrẹ ọke osio. Wọ je sa chọn ayen uko vwọ riẹn ona rẹ aghwoghwo rọ ma wian vwẹ ekogho wẹn, siẹrẹ wo de gbikun rẹ orere na kẹ ayen, yẹrẹ vuẹ ayen oborẹ ihwo rẹ orere na segbuyota.
ẸGBAẸDAVWỌN WẸN CHE FI ERERE KẸ WẸ
Allen re djunute vwẹ ọtonphiyọ rẹ uyovwinrota nana, dia evunrẹ ukoko rọ kua ra te ẹgbukpe ọvo re. Ọ da ta: “Ọ bẹn kẹ vwẹ ẹsosuọ me vwọ vwẹ ugbeyan mu iniọvo na. Jẹ asaọkiephana, ayen pha kerẹ ihwo rẹ orua mẹ; ọnana nẹrhẹ oma vwerhen ovwẹ.” Allen rhe mrẹvughe nẹ ẹkua rọ kuare na, nẹrhẹ o rhi vwo igbeyan kpokpọ re sa dia igbeyan rọyen bẹdẹ bẹdẹ.
^ e?ko. 2 E wene edẹ evo.