1, 2. Die yen avwanre niso ọke rẹ oyerinkugbe rẹ avwanre vẹ Jihova vwọ kpẹkpẹ te asan ọvo nu? Djudje rọyen.

OHWO ọvo ruẹse kẹ ọmọ ọvo. Ọsẹ vẹ oni rẹ ọmọ na da ta kẹ nẹ, “Vuẹ nẹ, wẹ kobiruo.” Ọmọ na de ru ọtiọyen, ẹkẹvuọvo o ruro kẹmẹkẹmẹ. Jẹ, ọmọ na vwọ ghwanran cha na, ọdavwaro ro vwo kpahen iroro rẹ ọsẹ vẹ oni rọyen vẹ ẹse rẹ ihwo ruẹ kẹ, mi rhi kodophiyọ. Ukuotọ rọyen, ọ me rhe riẹn obo ra kpẹvwẹ ẹse vwo nẹ otọ rẹ ẹwẹn cha. Diesorọ? Kidie ọdavwaro tiọyena rhe dia ẹbẹre ọvo rẹ iroro rọyen re.

² Vwẹ idjerhe vuọvo na, avwanre ghwa vwọ mrẹ uyota na vughe ẹsosuọ, avwanre da rhe riẹn obo ro yovwin te re vwo muọghọ kẹ iji evo rẹ Jihova vwọphia vwẹ Baibol na. Jẹ, oyerinkugbe rẹ avwanre vẹ Jihova vwo kpẹkpẹ te asan ọvo nu, avwanre de rhi vwo oniso rẹ erọnvwọn efa kpahen iroro rọyen; avwanre da riẹn obo ri je, vẹ obo ri tuoma, eriyin ji te ẹro ro vwo nẹ emu. Avwanre da vwẹ uphẹn kẹ iroro rẹ Jihova nẹ o djobọte uruemu vẹ ojẹ rẹ avwanre, ọyena ghwa odjephia nẹ avwanre guọnọre nẹ iroro rẹ avwanre shephiyọ vẹ ọ rẹ Jihova.

3. Diesorọ ọ vwọ bẹn re vwo ru iroro rẹ avwanre shephiyọ vẹ ọ rẹ Ọghẹnẹ?

³ Dede nẹ omavwerhovwẹn herọ siẹrẹ e de vwo iroro rẹ Jihova, jẹ ọ lọhọre re vwo ru ọtiọye-en. Kidie ọkiọvo, jẹgba sa nẹrhẹ ọ bẹn re vwo roro kirobo rẹ Jihova roro. Kerẹ udje, ọ sa  bẹn re vwo vwo ẹruọ rẹ ẹro rẹ Jihova vwo ni ọbara re se phiyọ oma, uruemu rẹ jẹfuọn, ẹvwọtua rẹ ekuakua rẹ akpeyeren, iruo rẹ aghwoghwo na, vẹ erọnvwọn efa tiọyen. Die yen e se ru? Mavọ yen avwanre se vwo vwo iroro rẹ Jihova vwọ vrẹ obo ri jovwo? Mavọ yen ọnana sa vwọ chọn avwanre uko vwo bru omamọ orhiẹn vwẹ ọke rọ cha obaro?

4. Die yẹn uchebro rẹ Pọl nana churobọ si: ‘Wene iroro rẹ udu wẹn’?

⁴ Se Rom 12:2. Ọyinkọn Pọl djisẹ rẹ obo ro mudiaphiyọ re vwo vwo ọkpọ rẹ iroro ro rhe Jihova. Uyono rọ wanre na chọn avwanre uko vwọ riẹn nẹ a cha sen iroro vẹ uruemu rẹ akpọ na, siẹrẹ avwanre rha guọnọ vwẹ uphẹn kẹ akpọ na nẹ o sun iroro rẹ avwanre, yẹrẹ nẹrhẹ e “hirhe oma phihọ ohwo rẹ akpọ nana ọvo-o.” Ẹkẹvuọvo, Pọl ji djunute obo rọ ghanre te re vwo ‘wene iroro rẹ udu rẹ avwanre.’ Ọnana churobọ si re vwo yono Baibol na vwẹ idjerhe re se vwo vwo vughe iroro rẹ Jihova, roro kokodo kpahen ayen, ji ru iroro rẹ avwanre shephiyọ vẹ e rẹ Ọghẹnẹ.

5. Djisẹ rẹ ofẹnẹ rọhẹ uvwre rẹ isese ghevweghe vẹ uyono.

⁵ Uyono ghwa dia isese ghevweghe, yẹrẹ re vwo jokaphiyọ ẹkpahọnphiyọ rẹ enọ-ọ. Ọke re de ruẹ uyono, avwanre nabọ frẹkotọ guọnọ oborẹ asan re yono na ta kpahen Jihova komobọ, eriyin ji te obo rọ ta kpahen idjerhe vẹ iroro rọyen. Vwọba, avwanre je cha davwẹngba vwo vwo ẹruọ rẹ oboresorọ Jihova vwọ vuẹ avwanre nẹ e ru erọnvwọn evo, ji kẹnoma kẹ efa. Ukuotọ rọyen, avwanre mi ji roro kpahen ewene re che ru vwẹ iroro vẹ uruemu rẹ avwanre. Dede nẹ ọ dia ọke vuọvo yen e che vwo roro kpahen enana eje-e, jẹ erere herọ siẹrẹ a da vwẹ ubro rẹ ọke ra ghwọrọ phiyọ uyono na, vwọ nabọ roro kokodo kpahen obo re seri.​—Une 119:97; 1 Tim. 4:15.

6. Die yen cha phia siẹrẹ e de roro kokodo kpahen iroro yẹrẹ Ota rẹ Ọghẹnẹ?

⁶ Emu oghẹresan ọvo che te avwanre obọ siẹrẹ a da vwẹ ọkieje vwo roro kpahen Ota rẹ Ọghẹnẹ. Ọ cha nẹrhẹ ‘o mu avwanre ẹro nẹ’ iroro rẹ Jihova pha gbagba. Ọyena ko che mu avwanre vwo rhiabọreyọ iroro rẹ Jihova, je vwẹ ẹro rẹ Jihova vwo nẹ emu, ji vwo no. Ọke yena, ka sa tanẹ iroro rẹ udu rẹ avwanre ‘weneri,’ kidie avwanre rhi vwo iroro kpokpọ re. Ememerha na, iroro rẹ avwanre vẹ ọ rẹ Jihova me rhe dia ọvo.

7, 8. (a) Ẹro vọ yen Jihova vwo ni ekuakua rẹ akpeyeren? (Ni ihoho rẹsosuọ na.) (b) Die yen e che phi phiyọ ẹdia rẹsosuọ siẹrẹ a da vwẹ ẹro rẹ Jihova vwo nẹ emu, ji vwo no?

⁷ Iroro ghwa dia obo re di mu ẹwẹn kpahen ghevweghe-e. Ọ vẹ uruemu yen gba yan. (Mak 7:21-23; Jems 2:17) E se vwo ẹruọ rẹ obo ra ta na siẹrẹ a da fuẹrẹn udje evo. Ẹbe ẹne re si ikuegbe rẹ Jesu phiyọ vwẹ Baibol na, nabọ chọn avwanre uko vwọ riẹn iroro rẹ Ọghẹnẹ fiotọ kpahen ekuakua rẹ akpeyeren. Jihova komobọ yen sane Josẹf vẹ Meri nẹ ayen dia ọsẹ vẹ oni rẹ Ọmọ rọyen, dede nẹ ayen feri-i. (Liv. 12:8; Luk 2:24) Re vwo vwiẹ Jesu nu, Meri “de [muo] phihọ urhuẹ rẹ eranvwe, fikiridie ayen mrẹ uwevwi wo phihọ vwẹ orere na-a.” (Luk 2:7) Jihova rhe se ruo rere e vwiẹ Ọmọ rọyen vwẹ uwevwin oyoyovwin jovwo, siẹrẹ ọ da guọnọ. Jẹ, obo re ma ghanre kẹ, ọyen re vwo vwiẹ Ọmọ rọyen vwẹ evwruwevwin re de phi ẹga rọyen phiyọ ẹdia rẹsosuọ.

⁸ Ikuegbe nana ro shekpahen evwiẹ rẹ  Jesu na, nẹrhẹ a riẹn ẹro rẹ Jihova vwo ni ekuakua rẹ akpeyeren. Emiọvwọn evo guọnọre nẹ emọ rayen dia edafe, ọ da tobọ dianẹ ọyena che gbowọphiyọ oyerinkugbe rayen vẹ Jihova. Ẹkẹvuọvo, ẹyan-obaro rẹ avwanre vwevunrẹ ukoko na yen ma ghanre kẹ Ọghẹnẹ. Ẹro rẹ Jihova vwo ni ekuakua rẹ akpeyeren yen wo ji vwo no? Die yen uruemu wẹn djephia?​—Se Hibru 13:5.

9, 10. Mavọ yen e se vwo djephia nẹ ẹro rẹ Jihova vwo nẹ ihwo yen avwanre ji vwo nẹ ayen?

⁹ Udje ọfa kẹ ẹro rẹ Jihova vwo nẹ ohwo rọ dia ekprowọ kẹ ihwo efa. Jesu da ta: “Kohwo kohwo rọ nẹrhẹ ọvo vwẹ imitete nana ri se vwe gbuyota na she, oyovwi kẹ ohwo yena ro churu oragha rode mu ohọre, re muo teyọ abadi.” (Mak 9:42) Eta rẹ Jesu na vwo ọkpan! Rọ vwọ dianẹ Jesu vwẹrokere Ọsẹ rọyen gbagba na, ke se vwo imuẹro nẹ ẹwẹn tiọyena yen ji rhe Jihova kpahen ohwo rọ vwẹ arogba vwọ dia ekprowọ kẹ ọvo usun rẹ idibo rẹ Jesu.​—Jọn 14:9.

¹⁰ Ẹro rẹ Jihova vẹ Jesu vwo nẹ ihwo yen avwanre ji vwo nẹ ayen? Die yen uruemu rẹ avwanre djephia? Kerẹ udje, ọ da dianẹ oka rẹ irhuon vẹ osẹnvwe ro je we na sa dia ekprowọ kẹ ihwo evo vwevunrẹ ukoko na, yẹrẹ nẹrhẹ ayen vwo urhurusivwe rẹ ọfanrhiẹn vwo? Ẹguọnọ rẹ iniọvo na sa nẹrhẹ wọ kpairoro vrẹ oka rẹ irhuon vẹ osẹnvwe tiọyen?​—1 Tim. 2:9, 10.

11, 12. Mavọ yen omaẹriẹnsuon vẹ utuoma re vwo kpahen oborẹ Jihova vwo utuoma kpahen sa vwọ sẹro rẹ avwanre vwo nẹ umiovwo?

¹¹ Udje rerha kọna: Jihova vwo utuoma kpahen umiovwo. (Aiz. 61:8) Dede nẹ ọ riẹnre nẹ ọkiọvo jẹgba sa nẹrhẹ ọ bẹn re vwo ru obo ri yovwirin. Jẹ, o bru avwanre uche nẹ a vwẹrokere ọyen vwo vwo utuoma kpahen umiovwo. (Se Une Rẹ Ejiro 97:10.) E de roro kokodo kpahen oboresorọ Jihova vwo vwo utuoma kpahen umiovwo, ọyena cha chọn avwanre vwẹ ẹro tiọyen ji vwo no. Ọ je cha kẹ avwanre ẹgba ra vwọ kẹnoma kẹ.

¹² Avwanre da vwẹ ẹro rẹ Jihova vwo nẹ umiovwo ji vwo no, ọ cha nẹrhẹ e se vwo oniso rẹ iruemu evo re chọre rẹ Baibol na ghwe djunute-e. Kerẹ udje, uruemu re vwo gbeha rẹ ọfanrhiẹn vwẹ awọ rẹ ohwo ro chidia, rhi titi mamọ vwẹ akpọ na enẹna. Ihwo evo tobọ tanẹ uruemu tiọyena brare-e, nẹ ọ vẹ ọfanrhiẹn egbe dia ọvo-o. * Ku wo rorori nẹ uruemu tiọyena vẹ iroro rẹ Ọghẹnẹ shephiyọ? Karophiyọ nẹ Jihova vwo utuoma kpahen koka koka rẹ umiovwo. E jẹ avwanre vwo uruemu rẹ omaẹriẹnsuon rere a djẹ shesheri kẹ umiovwo, ji vwo utuoma kpahen oborẹ Jihova vwo utuoma kpahen.​—Rom 12:9.

13. Diesorọ o vwo fo nẹ a jiroro phiyotọ kpahen oborẹ iroro rẹ Jihova se vwo djobọte orhiẹn rẹ avwanre che bru vwẹ ọke rọ cha obaro na?

¹³ Ọke rẹ avwanre de yono, ofori nẹ e roro kpahen oborẹ iroro rẹ Jihova sa vwọ chọn avwanre uko vwẹ ẹdia sansan re se hirharoku vwẹ ọke rọ cha obaro. E de ru ọtiọyen, ke se muegbe hẹrhẹ edavwini, e rhe che brorhiẹn chọ-ọ. (Isẹ 22:3) E jẹ a fuẹrẹn udje rẹ Baibol evo.

14. Die yen avwanre yono vwo nẹ ẹsiọn rẹ Josẹf sen aye rẹ Potifa?

¹⁴ Josẹf brokpakpa sen aye rẹ Potifa rọ guọnọ riẹriẹ vwo nene gbe ọfanrhiẹn,  ọyena ghwa odjephia nẹ ọ vwẹ ẹro rẹ Jihova vwo ni evun-ẹfuọn vwẹ orọnvwe, ji vwo no. (Se Jẹnẹsis 39:8, 9.) Vwọba, ọ ta kẹ nẹ, “Komavọ mi ru emu obrabra nana, ri mi ru umwemwu kpahe Ọghẹnẹ.” Ọnana ghwe djephia ne iroro rọyen vẹ ọ rẹ Ọghẹnẹ shephiyọ. Kẹ avwanre vwo? Die yen wo che ru siẹrẹ ohwo ru wẹ vẹ ọyen gba wian kuẹgbe da frẹfrẹ nene uwe? Kẹ, siẹrẹ ohwo da vwẹ uhoho yẹrẹ ovuẹ rẹ ọfanrhiẹn vwo rhe we vwẹ ifonu vwo? * Ọ cha lọhọ ra vwọ fuevun kẹ Jihova siẹrẹ avwanre da vwẹ ẹro rẹ Jihova vwo nẹ erọnvwọn tiọyena ji vwo no, e de ji brorhiẹn phiyotọ kpahen obo re che ru vwẹ ẹdia tiọyen.

15. Mavọ yen avwanre sa vwọ vwẹrokere emeshare rẹ Hibru erha na vwọ sen ọdavwini re vwo jẹ evun ẹfuọn kẹ Jihova?

¹⁵ E gbe jẹ a fuẹrẹn udje rẹ ighene rẹ Hibru erha ra riẹn phiyọ Shadrak, Mashak kugbe Abẹdnigo. Orhiẹn rẹ ayen bruru nẹ ayen cha sa vwẹ ẹga kẹ oma rẹ oro rẹ Ovie Nẹbukadreza vwo mu na-a, vẹ ẹkpahọnphiyọ re phiọngun rẹ ayen vwọ kẹ ovie na, djerephia nẹ ayen brorhiẹn phiyotọ jovwo kpahen oborẹ ayen sa vwọ fuevun kẹ Jihova. (Eyan. 20:4, 5; Dan. 3:4-6, 12, 16-18) E gbe dje nẹ ohwo ru wọ wian kẹ vuẹ wẹ nẹ wo toro igho vwọ kẹ irueru ọvo ro churobọ si ẹga rẹ efian. Die yen wo che ru? Ukperẹ wọ vwọ hẹrhẹ te ọke rẹ ẹdia tiọyena vwọ vwomaphia, ghwọrọ ọke asaọkiephana vwo roro kpahen ẹro rẹ Jihova vwo ni irueru tiọyen. Wo de ru ọtiọyen, kọ cha lọhọ ru wọ vwọ vwẹrokere emeshare rẹ Hibru erha na. Ku wọ sa ta ota ro fori ji ru obo ri shephiyọ siẹrẹ ẹdia tiọyena da vwomaphia.

16. Mavọ yen ẹruọ ro fiotọ re vwo kpahen iroro rẹ Ọghẹnẹ se vwo muegbe rẹ avwanre hẹrhẹ omaesivwo rẹ okpakpa?

¹⁶ Orhiẹn re bru phiyotọ kpahen obo ra sa vwọ fuevun kẹ Jihova, je sa chọn avwanre uko siẹrẹ a da guọnọ omaesivwo rẹ okpakpa. Dede nẹ avwanre cha rhọnvwe reyọ ọbara yẹrẹ ọvo usun rẹ ẹbẹre ẹne ra sa gharọ phiyọ-ọ, jẹ o vwo orhiẹn evo ri churobọ si ọbara, rẹ odjekẹ rẹ Baibol na sa chọn avwanre uko vwo bru vwẹ idjerhe ro shephiyọ vẹ iroro rẹ Ọghẹnẹ. (Iruo 15:28, 29) Jẹ, ọ  dia evunrẹ họspito rẹ oma vwọ miavwa ohwo, re ji vwo hirharoku ẹdia rọ guọnọ orhiẹn-ebro okpakpa na, yẹn a da cha jiroro rẹ obo re ru-u. Ọnana yen ọke ro fori wo vwo ru ehiahiẹ, ghwobọphiyọ ọbe ro che dje orhiẹn wẹn phia, ji nene idọktọ wẹn ta ota kugbe. *

17-19. Diesorọ o vwo fo nẹ a fuẹrẹn iroro rẹ Jihova kpahen ẹdia sansan asaọkiephana? Djunute ẹdia ọvo re se muegbe hẹrhẹ.

¹⁷ Ọ rọ koba yen udje rẹ Jesu. Kpakpata yen Jesu vwọ kpahen ọke rẹ Pita vwọ vwẹ orharhe uchebro nana kẹ: “Ọrovwohwo gbobọnyẹ eta yena.” O muẹro dẹn nẹ Jesu nabọ ghwọrọ ọke vwo roro kpahen oborẹ Baibol na ta kpahen akpeyeren vẹ ughwu rọyen vwẹ otọrakpọ na, eriyin ji te ọhọre rẹ Ọghẹnẹ vwọ kẹ. Ọmrẹvughe nana yen kẹ rẹ ẹgba rọ sa vwọ fuevun kẹ Jihova, je vwẹ arhọ rọyen vwọ kpahotọ kẹ avwanre.​—Se Matiu 16:21-23.

¹⁸ Nonẹna, Ọghẹnẹ guọnọre nẹ idibo rọyen nabọ sikẹrẹ, ji vwobọ vọnvọn vwẹ iruo rẹ aghwoghwo na. (Mat. 6:33; 28:19, 20; Jems 4:8) Kirobo rọ phia kẹ Jesu, ihwo ri vwo ọdavwẹ rẹ avwanre je sa vuẹ avwanre obo ri se si ẹwẹn rẹ avwanre nẹ iruo rẹ Uvie na. Kerẹ udje, die yen wo che ru siẹrẹ ọga wẹn de phiba osa wẹ, je kẹ wẹ ẹdia rode ro che gbowọphiyọ ẹga wẹn? Kẹ, isikuru wọ ra na da vwẹ uphẹn kẹ wẹ nu wo vrẹn nẹ uwevwin kpo asan ọfa re yono kpobaro vwo? Wọ sa nẹrhovwo, ru ehiahiẹ, ji nene ihwo rẹ orua wẹn vẹ ekpako na ta ota kpahọn tavwen wo ki brorhiẹn? O che yovwin siẹrẹ wọ da vwẹ ọke nana vwo ru ehiahiẹ kpahen ẹro rẹ Jihova vwo ni eta tiọyen, rere wọ sa vwọ vwẹ ẹro tiọyena ji vwo ni ayen. Wo de ru ọtiọyen, ọ rha cha dia ọdavwini siẹrẹ wo de hirharoku ẹdia tiọyen vwẹ obaro obọ-ọ. Kidie wo brorhiẹn vwevunrẹ ubiudu wẹn nure, ẹga rẹ Jihova yen wọ tẹnrovi, eriyina wọ riẹn obo wo che ru.

¹⁹ Wo se roro kpahen ẹdia efa re sa vwomaphia kpregede, e me davwen evun-ẹfuọn wẹn ni. Vwọrẹ uyota, ọ dia ẹdia na eje yen avwanre sa vwẹro roro-o. Ẹkẹvuọvo, a da vwẹ ọke re vwo ruẹ uyono romobọ vwọ nabọ fuẹrẹn iroro rẹ Jihova, ka sa karophiyọ obo re yonori, je vwẹ ayen vwo brorhiẹn rẹ aghwanre vwẹ kẹdia kẹdia. Ọtiọyena, e jẹ avwanre riẹn iroro rẹ Jihova, rere a vwẹrokere; e mi ji roro kpahen oborẹ iroro rọyen se vwo djobọte orhiẹn rẹ avwanre brẹ enẹna kugbe ọke rọ cha obaro.

20, 21. (a) Diesorọ avwanre cha vwọ riavwerhen rẹ egbomọphẹ vwẹ akpọ kpokpọ na? (b) Mavọ yen oma sa vwọ vwerhen avwanre asaọkiephana?

²⁰ Avwanre rhẹro rẹ akpọ kpokpọ na. Buebun rẹ avwanre guọnọ dia bẹdẹ vwẹ iparadaisi vwẹ otọrakpọ na. Vwẹ otọ rẹ usuon rẹ Ọghẹnẹ, ihworakpọ cha vrabọ rẹ oja vẹ odjadja re rhiẹromrẹ enẹna. Vwẹ ọke yena dede, ihworakpọ ji che vwo egbomọphẹ rẹ ayen che vwo ruiruo. Ohwo vuọvo che brorhiẹn rẹ obo ri je.

²¹ Ẹkẹvuọvo, egbomọphẹ yena je cha basan. Iroro vẹ irhi rẹ Jihova yen ihwo vworovworo che vwo brorhiẹn rẹ obo re brare vẹ obo ri yovwirin. Ọnana cha ghwa ufuoma vẹ omavwerhovwẹn rhe akpọ na. (Une 37:11) Ẹkẹvuọvo, oma je sa vwerhen avwanre asaọkiephana siẹrẹ iroro rẹ avwanre vẹ e rẹ Jihova de shephiyọ ọvo.