UYONO 45
Dje Ẹguọnọ ro Jẹ Rhẹriẹ Phia kẹ Ohwohwo Ọkieje
“Ovwan dje ẹguọnọ ro jẹ rhẹriẹ vẹ arodọnvwẹ kẹ ohwohwo.”—ZEK. 7:9, NW.
UNE 107 Udje rẹ Ẹguọnọ rẹ Jihova
ỌDJẸKOKO *
1-2. Diesorọ rọ vwọ dia obo ri yoma re vwo dje ẹguọnọ ro jẹ rhẹriẹ phia kẹ ohwohwo?
ỌYEN obo ri yovwirin mamọ re vwo dje ẹguọnọ ro jẹ rhẹriẹ phia vwọ kẹ ohwohwo. Diesorọ? Jokaphiyọ oborẹ isẹ ri Baibol re che djunute na vuẹ avwanre kpahen oboresorọ: “Wo jẹ omaevwokpotọ vẹ urhi ẹyọnrọn kanre owẹ-ẹ. . . . Kọye wọ vwọ mrẹ ẹroesiri vẹ odẹ esiri reyọ vwẹ obọ rẹ Ọghẹnẹ vẹ obọ rẹ ohwo rẹ akpọ.” “Ohwo ro nẹ aruẹdọ [ohwo ro dje ẹguọnọ ro jẹ rhẹriẹ phia] che vwo erere kẹ oma rọye.” “Ohwo ro nenesi rẹ ọvwata vẹ arodọvwẹ cha mrẹ arhọ.”—Isẹ 3:3, 4; 11:17; 21:21.
2 Ẹkpo ri Baibol re djunute re na dje iroro erha re sorọ ro vwo fo nẹ e dje ẹguọnọ ro jẹ rhẹriẹ phia. Ẹsosuọ, e de dje ẹguọnọ ro jẹ rhẹriẹ phia, ka cha dia ihwo re pha ghanghanre vwọ kẹ Ọghẹnẹ. Ọrivẹ, e de dje ẹguọnọ ro jẹ rhẹriẹ phia, a cha mrẹ erere vwọ kẹ omobọ rẹ avwanre. Kerẹ udje, avwanre che vwo uvi rẹ oyerinkugbe vẹ ihwo efa. Ọrẹrha, avwanre de dje ẹguọnọ ro jẹ rhẹriẹ phia, a cha mrẹ ebruphiyọ vwẹ obaro na, ji te arhọ ri bẹdẹ. Vwọrẹ uyota, ọyen obo ri yoma re vwo ru nene ota ri Jihova: “Ovwan dje ẹguọnọ ro jẹ rhẹriẹ vẹ arodọnvwẹ kẹ ohwohwo.”—Zẹk. 7:9, NW.
3. Enọ vọ yen a cha kpahenphiyọ vwẹ uyono nana?
3 Vwẹ uyona nana, a cha fuẹrẹn ẹkpahọnphiyọ rẹ enọ ẹne. Amono yen dje ẹguọnọ ro jẹ rhẹriẹ phia kẹ? Die yen se yono vwo nẹ ọbe ri Rutu rhe kpahen obo re dje ẹguọnọ ro jẹ rhẹriẹ phia wan? Mavọ yen e se vwo dje ẹguọnọ ro jẹ rhẹriẹ phia nonẹna? Erere vọ yen se te avwanre obọ siẹrẹ e de dje ẹguọnọ ro jẹ rhẹriẹ phia?
AMONO YEN DJE ẸGUỌNỌ RO JẸ RHẸRIẸ PHIA KẸ?
4. Mavọ yen a sa vwọ vwẹrokere Jihova vwo dje ẹguọnọ ro jẹ rhẹriẹ phia? (Mak 10:29, 30)
4 Uyono rọ wanre na chọn avwanre uko vwọ mrẹvughe nẹ Jihova dje ẹguọnọ ro jẹ rhẹriẹ rọyen na phia vwọ kẹ ihwo ri vwo ẹguọnọ rọyen re je ga. (Dan. 9:4) Avwanre guọnọ “vwẹ ẹro kere Ọghẹnẹ, kere ẹmọ re ghare.” (Ẹfe. 5:1) Ọtiọyena, ko fori nẹ e dje ẹguọnọ ro jẹ rhẹriẹ phia vwọ kẹ iniọvo rẹ avwanre rehẹ ukoko na.—Se Mak 10:29, 30.
5-6. Die yen ota na “evun-ẹfuọn” mudiaphiyọ dẹn?
5 Avwanre cha rhọvwen nẹ a da nabọ vwo ẹruọ rẹ oborẹ ẹguọnọ ro jẹ rhẹriẹ mudiaphiyọ, ọ cha chọn avwanre uko vwọ nabọ riẹn obo re se vwo dje phia vwọ kẹ iniọvo rẹ avwanre. Ra vwọ riẹn oborẹ ẹguọnọ ro jẹ rhẹriẹ mudiaphiyọ den, e gbe ja mrẹ oborẹ evun-ẹfuọn mudiaphiyọ, kọyen oborẹ ihwo reyọ vwo ruiruo wan. Je roro kpahen udje ọvo.
6 Nonẹna, e se dje ohwo rọ wian vwọ kẹ ikọmpini ọvo vwẹ ikpe buebun re kerẹ ọwi owian rọ fuevun. Ẹkẹvuọvo, ọ sa dianẹ vwẹ ikpe buebun rọ vwọ wian kẹ ikọmpini na re na, ọ je rhe mrẹ ọvuọvo usun rẹ ihwo ri vwo ikọmpini na-a. Ọ je sa dianẹ ọ dia ọkieje yen ọ vwọ rhọvwan phiyọ oriẹn rẹ ihwo ri vwo ikọmpini na brẹ-ẹ. O vwo ẹguọnọ rẹ ikompani na-a, jẹ omavwerhọn nẹ ọyen vwo owian ra da hwa osa kẹ ọyen. Ọ cha rha wian vwẹ etiyin rhi te ọke ọghwo rọyen, jokpanẹ ọ mrẹ iruo ọfa ro yovwin vrẹ ọyena.
7-8. (a) Die yen muẹ ohwo vwo dje ẹguọnọ ro jẹ rhẹriẹ phia? (b) Diesorọ a cha vwọ fuẹrẹn owọ rẹ eta evo vwẹ ọbe ri Rutu?
7 Kirobo re djere vwẹ ẹkorota 6, ofẹnẹ rọ herọ vwẹ uvwre rẹ ẹguọnọ ro jẹ rhẹriẹ kugbe evun-ẹfuọn yen obo ri muẹ ohwo vwo dje phia. Die yen mu ihwo rẹ Ọghẹnẹ vwo dje ẹguọnọ ro jẹ rhẹriẹ phia vwẹ Baibol na? Ayen dje ẹguọnọ ro jẹ rhẹriẹ phia ọ dia kidie nẹ ayen je ruo-o, ẹkẹvuọvo kidie nẹ ayen guọnọ ruo. Roro kpahen udje ri Devid. Ẹwẹn ri Devid muro vwo dje ẹguọnọ ro jẹ rhẹriẹ phia vwọ kẹ ugbeyan ọghanghanre rọyen Jonatan dedenẹ ọsẹ ri Jonatan guọnọ hwe. Ikpe buebun rẹ Jonatan vwo ghwu nu, Devid ji dje ẹguọnọ ro jẹ rhẹriẹ phia vwọ kẹ ọmọ ri Jonatan, Mefiboshet.—1 Sam. 20:9, 14, 15; 2 Sam. 4:4; 8:15; 9:1, 6, 7.
8 E se yono emu buebun kpahen ẹguọnọ ro jẹ rhẹriẹ vwo nẹ ọbe ri Rutu rhe. Die yen e se yono kpahen ẹguọnọ ro jẹ rhẹriẹ vwo miẹ ihwo re si ikuegbe rayen phiyọ ọbe ri Baibol yena? Mavọ yen a sa vwọ vwẹ obo re yono miẹ ayen vwo ruiruo vwẹ ukoko rẹ avwanre? *
DIE YEN E SE YONO VWO NẸ ỌBE RI RUTU RHE KPAHEN ẸGUỌNỌ RO JẸ RHẸRIẸ
9. Diesorọ Naomi vwo roro nẹ Jihova yen vwọ sua ọyen?
9 Vwẹ ọbe ri Rutu, etiyin e de se kpahen ikuegbe ri Naomi, aye rẹ ọmọ rọyen Rutu, kugbe ọshare ọvo ro vwo ẹguọnọ rẹ Ọghẹnẹ re se Boaz rọ je dia ohwo rẹ orua rẹ ọshare ri Naomi. Fikirẹ owẹnvwe ro firi vwẹ Izrẹl, Naomi, ọshare rọyen kugbe emọ rọyen ivẹ da kua kpo Moab. Vwẹ oboyin, ọshare ri Naomi de ghwu. Emọ rọyen ivẹ na da rọnvwọn, ọ da ohwo mamọ nẹ emọ ivẹ na ji ghwu. (Rutu 1:3-5; 2:1) Irhevwa nana ro te Naomi oma na so ọkuọrọn vwọ kẹ. Ẹwẹn ri Naomi hra totọ te asan ro de roro nẹ Jihova yen vwọ sua ọyen. Jokaphiyọ obo rọ ta kpahen Ọghẹnẹ: “Obọ rẹ Ọrovwohwo vwo gbe kpahe ovwẹ.” “Ọrovwoẹgba na ru obo re yara kẹ vwẹ.” Ọ da je ta: “Ọrovwohwo kpokpo uvwe rẹ Ọrovwoẹgba de kru okpetu nyẹ vwẹ.”—Rutu 1:13, 20, 21.
10. Mavọ yen Jihova kpahen phiyọ eta ri Naomi wan?
10 Mavọ yen Jihova kpahen phiyọ eta ri Naomi na wan? Ọ kpairoro vrẹ odibo rọyen nana rẹ ẹwẹn rọyen hra totọ na-a. Ukperẹ ọtiọyen, O dje arodọnvwẹ vwọ kẹ. Jihova riẹnre nẹ “oshenyẹ re nẹrhẹ ọvwaghwanre ru ẹkpa.” (Aghwo. 7:7) Dedena, Naomi guọnọ ukẹcha rọ sa vwọ mrẹvughe nẹ Jihova je hẹ ẹbẹre rọyen. Ukẹcha vọ yen Jihova vwọ kẹ? (1 Sam. 2:8) Jihova mu Rutu vwo dje ẹguọnọ ro jẹ rhẹriẹ phia vwọ kẹ Naomi. Vẹ owenvwe kugbe aghẹnghẹn, Rutu da chọn oniorọnvwen rọyen uko vwọ kpairoro vrẹ ẹnwan ji vwo imuẹro nẹ Jihova ji vwo ẹguọnọ rọyen. Die yen e yono vwo nẹ udje ri Rutu rhe?
11. Diesorọ iniọvo ri vwo ẹwẹn esiri vwọ vwẹ ukẹcha phia vwọ kẹ iniọvo rẹ ẹwẹn rayen hra totọ?
11 Ẹguọnọ ro jẹ rhẹriẹ muẹ avwanre vwọ chọn ihwo rẹ ẹwẹn rayen hra totọ uko. Kirobo rẹ Rutu tinkamu Naomi, iniọvo ri vwo ẹwẹn esiri je vwẹ ukẹcha phia vwọ kẹ iniọvo rẹ ẹwẹn rayen hra totọ vwẹ ukoko na. Ayen vwo ẹguọnọ rẹ iniọvo rayan na, ọtiọyena, ayen muegbe rẹ ayen vwo ru obo rẹ ayen se ru eje vwọ chọn ayen uko. (Isẹ 12:25; 24:10) Ọnana ghwe shamu vẹ oborẹ ọyinkọn Pọl tare: “Yono otu rẹ oma rhọ, cha otu rẹ evwiẹre uko, chirako rẹ ayen ejobi.”—1 Tẹsa. 5:14.
A sa chọn iniọvo rẹ ẹwẹn rayen hra totọ uko siẹrẹ a da nabọ kerhọ rayen (Ni ẹkorota 12)
12. Ọrhọ yen idjerhe ro me yovwin ra sa vwọ vwẹ ukẹcha phia vwọ kẹ oniọvo?
12 Idjerhe ro me yovwin wọ sa vwọ vwẹ ukẹcha phia vwọ kẹ oniọvo rẹ ẹwẹn rọyen hra totọ yen wọ vwọ nabọ kerhọ rọyen je kẹ imuẹro nẹ wo vwo ẹguọnọ rọyen. Oma vwerhen Jihova kpahen oborẹ wo ruẹ wọ sa vwọ chọn odibo rọyen uko na. (Une 41:1) Isẹ 19:17 da ta: “Ohwo ro ru ẹse kẹ ovwiogbere ruru kẹ Ọrovwohwo na, kọye cha hwa osa rẹ iruo rọye kẹ.”
Rutu gbomavwra oniorọnvwe rọyen, Orpa rhivwin kpo Moab. Rutu da vuẹ Naomi: “Asan wọ ra, ọye me ra.” (Ni ẹkorota 13)
13. Die yen ofẹnẹ rọ herọ vwẹ uvwre ri Rutu vẹ Ọrpa, kẹ diesorọ uruemu ri Rutu na vwọ dia uruemu rẹ ẹguọnọ ro jẹ rhẹriẹ? (Ni uhoho rọhẹ opharo ọbe na.)
13 A cha nabọ vwo ẹruọ rẹ oborẹ ẹguọnọ ro jẹ rhẹriẹ mudiaphiyọ kpobarophiyọ siẹrẹ e de roro kpahen obo re phia vwọ kẹ Naomi ọke rẹ ọshare rọyen kugbe emọ rọyen ivẹ vwo ghwu nu. Naomi rhe vwọ riẹn nẹ “Ọrovwohwo ra mrẹ ihwo rọye, ọ da vwẹ emuọre kẹ ayen,” o de brorhiẹn ro vwo rhivwin kpo. (Rutu 1:6) Ọ vẹ eya rẹ emọ rọyen ivẹ na da tuẹn oyan phiyọ. Ayen vwọ yanran vwẹ idjerhe, abọ erha yen Naomi vuẹ eya na nẹ ayen rhivwin kpo Moab. Die yen phiare? Baibol na da ta: “Ọrpa da fiọnfiọn unu rẹ oniorọvwe rọye, ẹkẹvuọvo Rutu de churu muo.” (Rutu 1:7-14) Ọrpa de ru kirobo rẹ Naomi vuẹrẹ, o de rhivwin kpo Moab. Ẹkẹvuọvo, Rutu ru vrẹ oborẹ Naomi vuẹrẹ nẹ o ru. O re ji se rhivwin kpo jovwo, ẹkẹvuọvo, o de brorhiẹn ro vwo tinkamu Naomi. (Rutu 1:16, 17) Rutu brorhiẹn nana, ọ dia fikiridie nẹ ọyen obo ra guọnọ mie-e, ẹkẹvuọvo, kidie nẹ ọyen obo rọ guọnọ ru. Uruemu nana ro dje phia na, ọyen uruemu rẹ ẹguọnọ ro jẹ rhẹriẹ. Die yen e yono vwo nẹ ikuegbe nana rhe?
14. (a) Mavọ yen iniọvo buebun vwọ vwẹrokere udje ri Rutu nonẹna? (b) Kirobo rehẹ Hibru 13:16, mavọ yen avwanre se vwo ru obo ri vwerhen Jihova oma?
14 Ẹguọnọ ro jẹ rhẹriẹ che mu avwanre vwo ru vrẹ obo re rhẹro rọyen miẹ avwanre. Kirobo rọ je hepha vwẹ ọke awanre, nonẹna iniọvo rẹ avwanre buebun ji dje ẹguọnọ ro jẹ rhẹriẹ phia vwọ kẹ iniọvo efa, tobọ te ihwo rẹ ayen vugheri dede-e. Kerẹ udje, ayen de nyo nẹ oghwọrọ ri kpregede phiare, kẹ ayen guọnọ idjerhe rẹ ayen sa vwọ vwẹ ukẹcha phia. Uwenre da gan kẹ oniọvo ọvo vwẹ ukoko na, kẹ ayen vwẹ ukẹcha vwọ phia kpakpata. Kerẹ iniọvo rehẹ Masidonia rẹ ẹgbukpe ujorin rẹsosuọ, ayen ruẹ vrẹ obo re rhẹro rọyen miẹ ayen. Ayen vwẹ ọke vẹ ẹgba rayen vwo ze, “ayen tobọ vwẹ ọhọrobọ rayen kẹ bunọ obo rẹ ayen vwo te” rere ayen sa vwọ vwẹ ukẹcha phia vwọ kẹ iniọvo ri ghwe vwo-o. (2 kọr. 8:3) Oma vwerhen Jihova kpahen oka uruemu tiọyena rẹ ayen djephia na!—Se Hibru 13:16.
MAVỌ YEN AVWANRE SE VWO DJE ẸGUỌNỌ RO JẸ RHẸRIẸ PHIA NONẸNA?
15-16. Mavọ yen Rutu vwo churumu oniorọnvwe rọyen?
15 E se yono emu iyoyovwin buebun vwo nẹ ikuegbe rẹ oborẹ Rutu chọn Naomi uko wan. Je eroro kpahen evo vwẹ usun rayen.
16 Wo jẹ oma rhọ wẹ-ẹ. Ọke rẹ Rutu vwọ tanẹ ọyen guọnọ nene oniorọnvwe rọyen kpo Juda, ẹsosuọ Naomi senre. Ẹkẹvuọvo oma rhọ Rutu-u. Die kọyen nẹ obuko rọyen rhe? “Ọke ri Naomi vwọ mrẹ nẹ ọ choma ro vwo nene ọye ra, ọ gbe ta ota ọfa-a.”—Rutu 1:15-18.
17. Die yen sa chọn avwanre uko oma vwo jẹ avwanre ẹrhọ?
17 Obo ra sa vwọ reyọ vwo ruiruo: Ọ guọnọ odirin a ke sa vwẹ ukẹcha kẹ ihwo ri she ọkuọrọn, ẹkẹvuọvo e jẹ oma rhọ avwanre-e. Ọkiọvo oniọvo aye rọ guọnọ ukẹcha sa sen ukẹcha rẹ avwanre vwẹ ẹsosuọ. * Dedena ẹguọnọ ro jẹ rhẹriẹ che mu avwanre vwo tinka muo. (Gal. 6:2) Avwanre rhẹro nẹ ukuotọ rọyen o che rhiabọreyọ ukẹcha na.
18. Die yen rhe se miovwo Rutu ivun jovwo?
18 Wo jẹ ivun miovwo uwe-e. Ọke rẹ Naomi vẹ Rutu vwo te Bẹtlẹhẹm, Naomi da mrẹ ihwo re vẹ ọyen gba dia asan ọvo jovwo. Ọ da ta: “Me yanran vọnvọn, Ọrovwohwo da vwe ovwẹ rhivwi rhe ofefe.” (Rutu 1:21) Vwẹ ẹwẹn roro oborẹ oma cha ru Rutu ọke rẹ Naomi vwọ ta eta yena. Rutu davwẹngba rọyen eje rere ọ sa vwọ vwẹ ukẹcha vwọ kẹ Naomi. O nenire viẹ, je bọn gan, o de ji nene yan oyan ogrogron vwẹ ẹdẹ buebun. Dedenẹ Rutu ru enana eje, Naomi da ta: “Ọrovwohwo da vwe ovwẹ rhivwi rhe ofefe.” Womarẹ eta yena, kọyen Naomi vwẹ ẹro okueku vwo ni oborẹ Rutu ro mudia kẹrẹ vwẹ etiyin na ru kẹ. Mavọ yen wo rorori nẹ eta yena cha da Rutu te! Dedena o tinka muo.
19. Die yen sa chọn avwanre uko vwo tinka mu oniọvo rọhẹ ẹdia ọkuọrọn?
Isẹ 17:17.
19 Obo ra sa vwọ reyọ vwo ruiruo: Nonẹna, oniọvo rẹ aye rọhẹ ẹdia ọkuọrọn sa ta eta ri che miovwo avwanre ivun, dedenẹ avwanre davwẹngba abọ buebun ra vwọ vwẹ ukẹcha kẹ. Ẹkẹvuọvo e jẹ ivun miovwo avwanre-e, ofori nẹ e ji tinka mu oniọvo rẹ avwanre na rọhẹ ẹdia ọkuọrọn na. Rere a je rẹ Jihova nẹ ọ chọn avwanre uko a sa vwọ bọn gan.—Mavọ yen ekpako sa vwọ vwẹrokere Boaz? (Ni ẹkoreta 20-21)
20. Die yen nẹrhẹ Rutu sa chọn Naomi uko ọkieje?
20 Vwẹ uchebro phia vwẹ ọke ro fori. Rutu dje ẹguọnọ ro jẹ rhẹriẹ phia vwọ kẹ Naomi, enẹna Rutu kọyen guọnọ uchebro. Jihova da vwẹ Boaz vwọ bọn gan. Boaz da ta kẹ Rutu: “Ọrovwohwo hwa osa kẹ wẹ kirobo wo ruru, osa rọ vọnre ọye Ọrovwohwo hwa kẹ wẹ, Ọghẹnẹ rẹ Izrẹl, ohwo ri wo rhi sioma nu vwẹ obotọ rẹ ibekpe rọye.” Eta rẹ ọbọngan yena ghini te Rutu ẹwẹn mamọ. Rutu da ta kẹ Boaz: “Wo nẹ arodọvwe kẹ vwẹ gangan.” (Rutu 2:12, 13) Uchebro rẹ Boaz vwọ phia vwọ ọke ro fori na ghini phi ẹgba phiyọ Rutu oma.
21. Kirobo re djisẹ rọyen vwẹ Aizaya 32:1, 2, die yen ekpako ri nẹ otọ sua che ru?
21 Obo ra sa vwọ reyọ vwo ruiruo: Ihwo ri dje ẹguọnọ ro jẹ rhẹriẹ phia kẹ ihwo efa je guọnọ ọbọngan komobọ. Kerẹ Boaz rọ vwẹ imuẹro vwọ kẹ Rutu nẹ uruemu esiri rọyen cha sa chọri Jihova ẹro-o, nonẹna ekpako ri nẹ otọ sua ji vwo oniso rẹ ukẹcha rẹ iniọvo rehẹ ukoko na vwọ phia. Oka rẹ uchebro ro fo aruọke tiọyena che phi ẹgba phiyọ iniọvo na oma rere oma vwo jẹ ayen ẹrhọ.—Se Aizaya 32:1, 2.
ERERE VỌ YEN IHWO RI DJE ẸGUỌNỌ RO JẸ RHẸRIẸ PHIA KẸ IHWO EFA CHA MRẸ?
22-23. Mavọ yen ẹro rẹ Naomi vwo nẹ ẹdia rọyen wene wan, kẹ diesorọ? (Une Rẹ Ejiro 136:23, 26 )
22 Ọke evo vwọ wan nu, Boaz da vwẹ emu vwo ruẹse kẹ Rutu vẹ Naomi. (Rutu 2:14-18) Die yen Naomi ru kpahen ẹse ri Boaz ru kẹ ayen na? Naomi da ta: “Ebruphiyọ rẹ Ọrovwohwo dia kẹ ohwo na, ro gbobọ nyẹ ẹse ro ruẹ vwọ kẹ ihwo ekpokpọ eyẹ ighweghwu-u.” (Rutu 2:20a) Iroro ri Naomi ro tighiku jovwo na re dia ọsoso re. Ọ ka ta jovwo vwevunrẹ ẹdia omaemuophiyọ rọyen nẹ, “Ọrovwohwo kpokpo uvwe,” ẹkẹvuọvo enẹna ọ da ta vẹ aghọghọ: “Ọrovwohwo gbobọ nyẹ ẹse” ro rue-ẹ. Die yen nẹrhẹ Naomi rhoma wene ẹwẹn?
23 Naomi re mrẹ iruo esiri ri Jihova vwẹ akpeyeren rọyen re. Jihova reyọ Rutu vwọ chọn uko vwẹ oyan rọyen ọke ro vwo rhivwin kpo Juda. (Rutu 1:16) Naomi je mrẹ ukẹcha ri Jihova ọke rẹ Boaz rọ dia “omoni kpẹkpẹkpẹ,” kẹ ayen vwo ru ẹse kẹ eya ivẹ nana. * (Rutu 2:19, 20b) O se roro ‘me re riẹnre nẹ Jihova yan jẹ uvwe vwo-o. O bicha vwẹ vwẹ ọke nana eje!’ (Se Une Rẹ Ejiro 136:23, 26.) Mavọ yen oma vwerhen Naomi te rọ vwọ riẹn nẹ Rutu vẹ Boaz yan jẹ ọyen vwo-o! Oma vwerhen ayen eje nẹ Naomi rhoma ri vwo aghọghọ rọyen rhivwin ji rhoma vwo obọ vwẹ ẹga ri Jihova vọnvọn.
24. Diesorọ o vwo fo nẹ e dje ẹguọnọ ro jẹ rhẹriẹ phia kẹ iniọvo rẹ avwanre ọkieje?
24 Die yen e yono vwo nẹ ọbe ri Rutu rhe kpahen ẹguọnọ ro jẹ rhẹriẹ? Ẹguọnọ ro jẹ rhẹriẹ chọn avwanre uko rere oma vwo jẹ avwanre ẹfobọ rhọ ọke ra da vwẹ ukẹcha vwọ kẹ ohwo rẹ ẹwẹn rọyen hra totọ. O ji muẹ avwanre vwọ vwẹ erọnvwọn evo vwo ze a sa vwọ chọn ihwo efa uko. Ofori nẹ ekpako na vwẹ ujiri vwọ kẹ ihwo ri dje ẹguọnọ ro jẹ rhẹriẹ phia vwọ kẹ ihwo efa vwẹ ukoko na. Ọke rẹ avwanre da mrẹ obo rẹ ihwo rẹ ẹwẹn rayen hra totọ jovwo vwọ rhoma mrẹ aghọghọ vẹ ẹgba rẹ ayen vwọ ga Jihova, ọnana kẹ avwanre omavwerhovwẹn. (Iruo 20:35) Diesorọ ọ vwọ dia obo re ghanre re vwo dje ẹguọnọ ro jẹ rhẹriẹ phia ọkieje? Kidie avwanre guọnọ vwẹrokere ji ru obo re vwerhan Jihova rọ dia ohwo “rọ vọnre vẹ ẹguọnọ ro jẹ rhẹriẹ” na oma.—Eyan. 34:6; Une 33:22.
UNE 130 Vwo Ghovwo
^ ẹko. 5 Jihova guọnọre nẹ e rhe dje ẹguọnọ vwọ kẹ iniọvo rẹ avwanre rehẹ ukoko na. Ẹruọ re vwo kpahen ẹguọnọ ro jẹ rhẹriẹ che kodophiyọ siẹrẹ a da fuẹrẹn oborẹ idibo ri Jihova evo rẹ ọke rẹ awanre dje uruemu nana phia wan. Vwẹ uyono nana, a cha mrẹ obo re se yono vwo nẹ udje ri Rutu, Naomi, kugbe Boaz rhe.
^ ẹko. 8 Wọ sa vwọ mrẹ erere vọnvọn vwo nẹ uyono nana rhe, e jiro kẹ wẹ nẹ wo se Rutu uyovwin 1 vẹ 2 komobọ.
^ ẹko. 17 Kidie nẹ udje ri Naomi yen avwanre yono kpahan na, kọyensorọ rẹ avwanre je vwọ reyọ iniọvo eya re guọnọ ukecha vwo ruẹ udje. Ẹkẹvuọvo ẹkpo nana ji shekpahen iniọvo eshare.
^ ẹko. 23 Vwọ da guọnọ riẹn evuẹ efa kpahen Boaz kerẹ omoni kpẹkpẹkpẹ, Ni uyovwinrota na “Imitate Their Faith—‘An Excellent Woman,’ ” vwẹ Uwevwin Orhẹrẹ ri October 1, 2012, aruọbe 20.