E VWIẸ vwẹ vwẹ ukpe rẹ 1923 vwẹ orere rẹ Hemsworth, rọhẹ ubrotọ rẹ Yorkshire, vwẹ ẹkuotọ rẹ England. Oniọvo vuọvo yen mi vwori, o vien vwe, odẹ rọyen Bob. Kidie nẹ ọsẹ mẹ vwo utuoma ọgangan kpahen ophiẹnvwe rẹ ẹga, ọke me vwọ hẹ ẹgbukpe irhirin, ọ da reyọ ẹbe evo ri tueghe aphiphẹn rẹ ẹga rẹ efian, mie ihwo evo. O vwo omavwerhovwẹn kpahen obo ro seri. Ikpe evo vwọ wan nu, Bob Atkinson vwo ghwoghwo ota te uwevwin rẹ avwanre, o de hworo ota rotu rẹ Oniọvo Rutherford kẹ avwanre. Avwanre de rhi noso nẹ ihwo ri vwo uhworo na, yen je vwo ẹbe rẹ ọsẹ mẹ reyọre na. Ọsẹ vẹ oni mẹ da vuẹ Oniọvo Atkinson nẹ ọ rhe uwevwin rẹ avwanre kovwọnvwọn kovwọnvwọn rere o nene avwanre riemu kugbe, ji kpahenphiyọ enọ buebun rẹ avwanre vwo kpahen Baibol na. O de durhie avwanre kpo uyono vwẹ uwevwin rẹ oniọvo ọvo; asan na ghwe sheri kẹ uwevwin rẹ avwanre-e. Kpakpata, avwanre da ton uyono ẹra phiyọ, ọke vwọ yanran na, a da vwẹ ukoko ọvo vwo mu vwẹ orere rẹ Hemsworth. O kriri-i, uwevwin rẹ avwanre kọyen iniọvo re se zone servants won (a riẹn ayen phiyọ iniruo okinriariẹ enẹna). Avwanre ji durhie ekobaro cha uwevwin rẹ avwanre vwọ kẹ emuọre. Oyerinkugbe nana djobọte vwe mamọ.

Dede nẹ avwanre ghwa ton ekiẹchuọ phiyọ, Ọsẹ mẹ da vuẹ oniọvo mẹ nẹ, “Wọ da guọnọ dia ọkobaro, a cha dobọ rẹ eki na ji.” Bob da ghene rhọnvwe, o de nẹ uwevwin re ruiruo rẹ ọkobaro, ọke rọ vwọ hẹ ẹgbukpe 21. Ikpe ivẹ vwọ wan nu, a da vwẹ ovwẹ mu ọkabaro, me hẹ ẹgbukpe 16 ọke yena. Vwọ vrẹ oba rẹ udughwrẹn, mẹvwẹ ọvo yen wian ọke buebun; ikadi re vwo ghwoghwo ota vẹ fonograf (imiredio) ọyen me vwọ wian. Jihova de ruo, me da vwẹ uyono rẹ Baibol mu kẹ ohwo ọvo, ohwo na da nabọ yan obaro vwẹ ukoko na. Buebun rẹ ihwo rẹ orua rọyen de ji kurhẹriẹ. Ukpe rọ vwọ kpahọn, a da vwẹ ovwẹ vẹ Mary Henshall vwo mu ekobaro oghẹresan. E de ji avwanre kpo ẹkuotọ rẹ ukoko vuọvo wia-an, vwẹ ubrotọ rẹ Cheshire.

Ọke re vwo phiẹ Ofovwin Akpọeje II, e de jurhi nẹ eya vwẹ ukẹcha phia. Kerẹ ihwo rehẹ ẹga ọkieje, avwanre ki roro nẹ kirobo re si ihwo rẹ ẹga efa nẹ iruo nana, ọtiọyen e ji si avwanre no. Ẹkẹvuọvo,  aguare na rhọnvwere-e, e de mu vwe phiyọ uwodi, me da dia etiyin ẹdẹ 31. Vwẹ ukpe rọ vwọ kpahọn, mi vwo te ẹgbukpe 19, abọ ivẹ yen e mu vwe kpo aguare, kidie me rhọnvwe vwobọ vwẹ ofovwi-in fikirẹ ẹwẹn obrorhiẹn mẹ. Ẹkẹvuọvo, e de brorhiẹn na nẹ me riase. Ẹwẹn ọfuanfon rẹ Jihova chọn vwẹ uko vwẹ ẹdia nana eje, Jihova nabọ yọnrọn ovwẹ obọ, o de ru vwe gan.​—Aiz. 41:10, 13.

Ukpe rẹ 1946 yen mẹ vẹ Arthur Matthews vughe ohwohwo. Oniọvo Matthews ghwe nẹ uwodi rhe obọ, emeranvwe erha yen ọ dia uwodi kidie ẹwẹn obrorhiẹn rọyen rhọnvwe kẹ nẹ o kpo ofovwi-in. Ọ da vwomaba oniọvo rọyen Dennis rọ dia ọkobaro oghẹresan vwẹ orere rẹ Hemsworth. Ọsẹ rayen yono ayen kpahen Jihova nẹ ọkiemọ rhe, ayen de bromaphiyame ọke rẹ ayen vwọ hẹ eghene. O kriri-i, e de ji Dennis kpo ẹkuotọ rẹ Ireland ra ga, Arthur ọvo kọyen chekọ vwẹ Hemsworth. Ọsẹ vẹ oni mẹ vwọ mrẹ uvi uruemu ro rhe Arthur, ayen de durhie nẹ o rhi nene ayen dia. Ọke yena, me da rhe uwevwin, mẹvwẹ vẹ Arthur keyen hworhẹ imize. O vwo te ọke ọvo, kẹ avwanre siẹ ileta rhe ohwohwo. Vwẹ ukpe rẹ 1948, a da rhoma mu Arthur phiyọ uwodi vwẹ emeranvwe erha. Avwanre da rọvwọn vwẹ January 1949 vẹ ẹwẹn rẹ avwanre vwọ dia evunrẹ iruo rẹ ẹga ọkieje na. Avwanre ke vwẹ ọke rẹ omaerovwon rẹ avwanre vwọ tọrọ emamọ, a me hwosa kẹ avwanre; womarẹ ukẹcha rẹ Jihova, igho yena kọyen avwanre vwọ vwẹrote oma avwanre vwẹ iruo ọkobaro na.

Ẹgbukpe ọvo vwọ wan nu, e de ji avwanre kpo Northern Ireland. Ẹsosuọ, avwanre ke kpo Armagh, ukuko na avwanre de kpo Newry; ẹga rẹ Ifada vwẹ owọ muotọ vwẹ irere ivẹ yena. Fikirẹ ẹvwọsuọ rẹ ẹga, kẹ avwanre nomasua tavwen avwanre ki ghwoghwo ota kẹ ihwo. E ru yono vwẹ uwevwin rẹ oniọvo ọshare ọvo vẹ aye rọyen, asan rayen vwẹ iroko 16 vwo sheri kẹ asan rẹ avwanre dia. Omarẹ ihwo ẹrenren yen vwoma vwẹ etiyin. Ayen da tanẹ avwanre vwerhẹn hrọke, avwanre mi sherhẹn otọ fefe, urhiọke kẹ avwanre re omamọ rẹ emu.Emu rẹ omavwerhovwẹn ra vwọ riẹn nẹ iniọvo buebun hẹ ekogho yena asaọkiephana.

Oniọvo mẹ vẹ aye rọyen Lottie, ga kerẹ ekobaro oghẹresan vwẹ Northern Ireland; avwanre eje de kpo ọghwẹkoko re ruru vwẹ Belfast vwẹ ukpe rẹ 1952. Oniọvo ọshare ọvo de phi avwanre ihwo ẹne phiyọ uwevwin, ji te oniọvo Pryce Hughes rọ vwẹrote iruo rẹ oghọn ukoko rẹ Britain ọke yena. Vwẹ ason ọvo, avwanre da ta ota kpahen ọmọbe re se God’s Way Is Love, re siobọnu fikirẹ ihwo rẹ Ireland. Oniọvo Hughes ta ota kpahen obo rọ bẹn te, re vwo ghwoghwo ota kẹ ihwo ri kpo ẹga rẹ Ifada vwẹ ẹkuotọ re se Irish Republic. Ọke yena, irherẹn rẹ ẹga rẹ Ifada ruero, ọtiọyena, ka djẹ iniọvo na nẹ iwevwin rayen, ji ruẹ ayen djadja. Oniọvo Pryce da ta: “Avwanre guọnọ eya gbe eshare ri vwo imoto, ri che vwobọ vwẹ egbadaẹdjẹ ogheresan ra cha vwọ ghare ọmọbe nana ro ẹkuotọ na eje.” * Kpakpata, avwanre  da tanẹ “Avwanre che ruo!” Ọnana yen eta ra vwọ ton ikuegbe nana phiyọ.

Asan ọvo rẹ ekobaro sa dia vwẹ Dublin, yen uwevwin rẹ Ma Rutland, rọ dia oniọvo aye rọ fuevun ga krẹ re. Avwanre vwọ domaji vwẹ etiyin emerha, ji shẹ ekuakua rẹ avwanre evo nu, avwanre ihwo ẹne na da ro imotosaikoro rẹ Bob re ru imoto otete phiyọ akọkọ rọyen; avwanre da djẹ ro orere na, ra guọnọ imoto. Ohwo ọvo kọyen shẹ imoto awanre ọvo kẹ avwanre, avwanre da vuẹ nẹ ọ djẹ imoto na bru avwanre rhe uwevwin, kidie avwanre riẹn obo ra djẹ imoto-o. Ovwọnvwọn yena, Arthur de chidia ehwa, jẹ o vwẹ ẹwẹn roro obo rọ cha djẹ imoto na wan. Ọke vwo rhie, Arthur vwọ davwwẹngba rọ vwọ djẹ imoto na nẹ asan ra muro phiyọ, Mildred Willett rọ dia imishọnare (rọ rọvwọn John Barr ukuko na) da ghwa rhe. Rọ vwọ dianẹ ọ riẹn obo ra djẹ imoto na, o de yono Arthur obo ra djẹ imoto, tavwen avwanre ke ro idjerhe!

Orọnvwọn ọfa rẹ avwanre guọnọre, kẹ uwevwin. E si avwanre orhọ jovwo nẹ avwanre vwerhen evunrẹ imoto ride-e, kidie ihwo re vwọso ẹga avwanre, se phi erhanre phiyọ; ẹkẹvuọvo, avwanre mrẹ uwevwi-in. Ason yena, avwanre ihwo ẹne na da vwerhẹn imoto na. Vwẹ ẹdẹ rivẹ, avwanre da mrẹ imoto re ru umuwevwin phiyọ, vẹ ehwa itete ivẹ; e ru ọvo phiyọ enu rẹ ọ ro chekọ. Imoto na kọyen rhe dia uwevwin rẹ avwanre. Oma vwerhen avwanre nẹ eghwẹrẹ evo re dia igbeyan rẹ avwanre, kẹ avwanre asan rẹ avwanre se mu imoto na phiyọ. Avwanre wian ẹkuotọ re vwẹ iroko 16 fiẹ 24 vwo sheri kẹ avwanre. Avwanre de nẹ ẹkuotọ ọvo vwo kpo ọfa nu, avwanre me rhoma kpo orhivwinbrura vwẹ asan rẹ avwanre nurhe na.

Avwanre ghwoghwo vwẹ iwevwin na eje rehẹ uherevie rẹ obọrhen vẹ obotọ ọnre rẹ ẹkuotọ na. Avwanre ghare ọmọbe re vrẹ 20,000 kẹ ihwo, ji vwẹ edẹ rẹ ihwo ri dje omavwerhovwẹn phia, vwo rhe oghọn ukoko rọhẹ Britain. Avwanre ghwe hirharoku ẹvwọsuọ-ọ. Iseri rẹ Jihova buebun hẹ etiyin enẹna.

Ikpe evo vwọ wan nu, e de ji avwanre kpo ẹbẹre obotọ rẹ ọnre vwẹ London. Udughwrẹn evo vwọ wan nu, iniọvo rehẹ oghọn ukoko rẹ Britain de se Arthur, ayen da vuẹ nẹ ọ ton iruo rẹ oniruo okinriariẹ phiyọ vwẹ ẹdẹ rivẹ! Avwanre vwo kpo uyono rẹ udughwrẹn ọvo nu, avwanre de kpo okinriariẹ avwanre vwẹ Scotland. Arthur ghwa mrẹ ọke vwo muegbe rẹ eta rọyen tavwen avwanre ki ro idjerhe-e, jẹ ọ choma ro vwo ru kiruo kiruo ra vwọ kẹ vwẹ ukoko na. Oruru rọyen bọn vwẹ gan. Avwanre nabọ riavwerhen rẹ iruo na. Avwanre gare vwẹ ikpe evo vwẹ ẹkuotọ rẹ ukoko vuọvo wia-an, jẹ ọ vwerhoma nẹ asaọkiephana avwanre ga vwẹ ohri rẹ iniọvo buebun re.

Avwanre hirharoku orhiẹn ọgangan vwẹ ukpe rẹ 1962, re vwo durhie Arthur kpo Isikuru rẹ Gilead. Avwanre de brorhiẹn nẹ, ọ sa ra. Ẹgbukpe ọvo vwọ wan nu, Arthur vwo rhivwin rhe, e de vwo mu oniruo ubrotọ; ko kiẹn ibrotọ rẹ Scotland, ẹbẹre rẹ obenu rẹ ọnre vwẹ England, kugbe Northern Ireland.

Vwẹ 1964, a da vwẹ Arthur vwo mu nẹ ọ vwẹrote iruo rẹ oghọn ukoko rẹ Irish Republic. Kidie nẹ oma fu avwanre vwẹ iruo oniruo okinriariẹ rẹ ọshare mẹ ruẹ ọke yena, oshọ ko mu vwe fikirẹ ewene rẹ iruo kpokpọ nana cha ghwa rhe. Jẹ enẹna, oma vwerhen ovwẹ nẹ me ga vwẹ Bẹtẹl. Mi vwo imuẹro nẹ Jihova che bruba kẹ kohwo kohwo ro rhiabọreyọ iruo ra vwọ kẹ vwẹ ukoko na, ọ da tabọ dianẹ iruo na ghwe je-e. Mi ruiruo rẹ orufon vwẹ Bẹtẹl, me je wian vwẹ ọfisi, asan re de koko ẹbe ra teyenre, kugbe ukoni. A je rhoma vwẹ ọshare mẹ Arthur vwo mu oniruo ubrotọ vwẹ uvwre rẹ ọke ọvo, ọ da nẹrhẹ avwanre vughe iniọvo buebun vwẹ ẹkuotọ na. Ihwo evo rẹ avwanre vwẹ Baibol vwo yono, je nabọ yan obaro. Enana ghini uvi rẹ ebruphiyọ, kidie e nẹrhẹ avwanre sikẹrẹ iniọvo na eje re ga vwẹ Ireland.

Vwẹ 1965, e de ru ọghwẹkoko akpọeje rẹsosuọ vwẹ orere rẹ Dublin, vwẹ Ireland. * E ru ọghwẹkoko na egberhẹnẹdẹ, dede nẹ a vwọso avwanre mamọ. Ihwo 3,948 yen rare, e de rhe bru ihwo 65 phiyamẹ. A je vwẹ ileta rẹ uyeren kẹ ihwo eje ri phi iniọvo 3,500 re rhe ọghwẹkoko na phiyọ uwevwin. Ihwo na da je ta omamọ ota kpahen uruemu rẹ iniọvo na djephia. Ọnana ghini ewene rode rọ vwomaphia vwẹ Ireland.

Vwẹ 1966, oghọn ukoko rọhẹ Dublin kọyen vwẹrote iruo rẹ ukoko na re ruẹ vwẹ ẹbẹre obenu vẹ obotọ ọnre na vwẹ Ireland. Ọka rẹ oyerinkugbe tiọyena hẹ evun rẹ usuon vẹ ẹga sansan rehẹ ibrotọ yena-a. Ọ vwerhoma ra vwọ mrẹ ihwo ri kurhẹriẹ nẹ ẹga rẹ Ifada vẹ ẹga efa ri broma reyọ nẹ ẹga rẹ Ifada rhe, rẹ ayen vwọ ga kuẹgbe vwẹ ukoko na.

Vwẹ 2011, akpeyeren avwanre de wene. Ọke yena, e de ku oghọn ukoko rẹ Britain vẹ ọ rẹ Ireland kugbe, a da je tanẹ avwanre kpo Bẹtẹl rọhẹ London. Arthur ghwe she ọga obọ, ọke rẹ iyẹnrẹn na vwo te avwanre obọ. Ọga re se Parkinson yen muro. Vwẹ May 20, 2015, Arthur rọ dia ọshare mẹ vwẹ ẹgbukpe 66 rhire na de ghwu.

Ẹwẹn mẹ kuọrọnre, mi ji muomaphiyọ vwẹ ikpe evo rhire na. Arthur bicha vwẹ mamọ ọke rọ vwọ hẹ akpọ. Ọ da vwẹ nẹ ọ rha herọ-ọ! Ẹkẹvuọvo, ebẹnbẹn tiọna nẹrhẹ ohwo siẹkẹrẹ Jihova. Oma vwerhen ovwẹ mamọ me vwọ riẹn oborẹ ihwo vwo ẹguọnọ rẹ ọshare mẹ te. Igbeyan avwanre buebun rehẹ ẹkuotọ rẹ Ireland, Britain, ji te United States dede, si ẹbe vwo rhe vwe. Vwọ vrẹ ẹbe rẹ iniọvo na siẹ vwo rhe vwe, mi che se gbikun rẹ oborẹ oniọvo rẹ Arthur re se Dennis vẹ aye rọyen Mavis, kugbe Ruth vẹ Judy re dia emọ rẹ oniọvo mẹ ọkpako, nabọ bicha vwẹ te-e.

Ẹkpo rẹ Baibol ọvo rọ nabọ bọn vwẹ gan yehẹ Aizaya 30:18. Ọ tare nẹ, “Fiki rẹ ọtiọye na Ọrovwohwo vwọ hẹrhẹ ro vwo ni arodọvwẹ wẹ kọye ọ da vwẹ oma rọye kpenu ro vwo dje aruẹdọn rọye kẹ wẹ. Kidie Ọrovwohwo ọye Ọghẹnẹ rẹ ọsoso ebruba kẹ ayen ihwo re hẹrherẹ.” Oma vwerhen ovwẹ me vwọ riẹn nẹ Jihova hẹrhẹ ọke ro vwo si ebẹnbẹn avwanre no, ji kẹ avwanre iruo rọ kẹ ohwo omavwerhovwẹn vwẹ akpọ kpokpọ na.

Me da fuẹrẹn akpọ rẹ avwanre yerin, ke me mrẹ oborẹ Jihova chọn avwanre uko, ji bruba kẹ iruo aghwoghwo avwanre vwẹ Ireland! Oma vwerhen ovwẹ nẹ me hẹ usun rẹ ihwo re gare vwẹ oboyin. Vwọrẹ uyota, ebruphiyọ ghini herọ siẹrẹ e de ru oborẹ Jihova guọnọre.