URHI rẹ Mosis rhọnvwephiyọ iyorin eduvwo. Ẹkẹvuọvo, ọke rẹ Jesu vwọ hẹ otọrakpọ na, ihwo buebun vwo ẹkuruemu rẹ ayen vwo duvwu iyorin phiyọ kota kota rẹ ayen tare. Ayen niro nẹ ọnana cha nẹrhẹ e vwo imuẹro kpahen oborẹ ayen ta; ẹkẹvuọvo, abọ ivẹ soso yen Jesu ta ota vwọso uruemu nana. Ọ da ta: “Jẹ Ẹjo wẹn dia Ẹjo, ji E wẹn dia E.”​—Mat. 5:33-37; 23:16-22.

Kirobo rẹ ọbe re se Theological Dictionary of the New Testament tare, “a sa riẹn oborẹ ẹkuruemu nana gan te vwẹ ohri rẹ ihwo rẹ ju,” siẹrẹ e de se obẹ re se Talmud, rọ nabọ dje ofẹnẹ rẹ iyorin re mu duvwun vẹ ọ ra cha yọnren.

Ọ dia Jesu ọvo yen vwọso uruemu nana-a. Kerẹ udje, ogbikuegbe rẹ Ju re se Flavius Josephus vwo djisẹ rẹ uruemu ro rhe ihwo rẹ ẹko ọvo, ọ da ta: “Ayen kẹnoma kẹ iyorin eduvwo, kidie ayen niro nẹ ọ bra vrẹ ofian eguon; ayen tare nẹ e rhe se se ota wẹn gbuyota-a, jokpanẹ ku wo duvwun iyovwin, kọyen wẹwẹ ọvwọrefian.” Ọbe rẹ ihwo rẹ Ju ra riẹn phiyọ Wisdom of Sirach, yẹrẹ Ecclesiasticus, (23:11) da je ta: “Ohwo ro vwo ẹkuruemu ro vwo duvwun iyorin, riẹn urhi-i.” Jesu si avwanre orhọ gangan kpahen iyorin eduvwo. Avwanre de vwo ẹkuruemu ra vwọ ta uyota ọkieje, avwanre rhe che duvwun iyorin tavwen e ki se ota rẹ avwanre gbuyota-a.