Uruemu Esiri rẹ Onenikristi Ọvo Djephia
OMORERE rẹ India ọvo re se Gujarat yen ọsẹ rẹ John de bromaphiyame kerẹ Oseri rẹ Jihova vwẹ oba rẹ ikpe re kpahen 1950. John vẹ iniọvo rọyen iyorin kugbe oni rayen muomaphiyọ Ẹga rẹ Ifada mamọ, ọtiọyena kẹ ayen vwọsua ọsẹ rayen.
Ẹdẹ ọvo, ọsẹ rẹ John da vuẹ nẹ ọ reyọ ẹnvẹlopu vwo rhe oniọvo ọvo. Ẹkẹvuọvo, vwẹ urhiọke rẹ ẹdẹ yena rẹ John vwo rhie idrọmu, idrọmu na de bru obọ rọyen. Ora na rhoro mamọ. Dedena, kidie nẹ ọ guọnọ muọghọ kẹ ọsẹ rọyen, ọ da vwẹ ẹbẹre amwa vwọ gba obọ na ro hwẹ ọbara, ọ da reyọ ẹnvẹlopu na vwo rhe oniọvo na.
John vwo te asan re jiro ra na, aye rẹ oniọvo na rọ je dia Oseri rẹ Jihova kọyen ọ mrẹre. Aye na vwọ reyọ ẹnvẹlopu na mie, ọ da mrẹ ora na, ọ da vuẹ nẹ ọ cha vwẹ ukẹcha kẹ. O de mu ekpeti rọ ghwẹ ihuvwun phiyọ rhe, ọ da vwẹ uhuvwun vwo rien ora na tavwen ọ ke gba. O vwo ru ọyena nu, o de gbe iti kẹ. Ro vwo ruẹ enana eje na, jẹ o nene ta ota kpahen Baibol na.
Ọnana da rhe nẹrhẹ ẹwẹn rẹ utuoma ro vwo kpahen Iseri na kpotọ, ọtiọyena, ọ da nọ aye na enọ ivẹ vwẹ ẹdia rẹ esegbuyota rọyen da fẹnẹ ọ rẹ ọsẹ rọyen; ọ nọ rọ sẹ Jesu yen Ọghẹnẹ kugbe sẹ ofori rẹ Inenikristi nẹrhovwo kẹ Meri. Kidie nẹ aye na yono ephẹrẹ rẹ Gujarati, ọ da vwẹ Baibol vwọ kpahenphiyọ enọ na, ọ da je kẹ ọmọbe re se “This Good News of the Kingdom.”
John vwo se ọbe na, ọ da rhe mrẹvughe nẹ ọnana yen uyota na. O de bru olori rẹ ẹga rayen ra, ọ da je nọ enọ ivẹ yena. Ivun de miovwo olori rẹ ẹga na mamọ, ọ da vwẹ Baibol vwo phio, ọ da van: “Wo hirhephiyọ Eshu re! Tivọ vwẹ Baibol na yen tare nẹ Jesu dia Ọghẹnẹ-ẹ? Mọ dje asan rọ da tanẹ a vwẹ ẹga kẹ Meri-i kẹ vwẹ. Dje kẹ vwẹ!” Uruemu rẹ olori ẹga na de gbe John unu mamọ, te ẹdia rọ vwọ vuẹ olori na nẹ, “Mi rhe che duvwu owọ phiyọ ishọshi rẹ Ifada ọfa-a.” O rhe ghini kpo ishọshi na ọfa-a!
John da ton uyono rẹ Baibol phiyọ, o de kurhẹriẹ rhe ukoko na. Ọke vwọ yan obaro, ihwo rẹ orua rọyen efa de ji kurhẹriẹ. Upe rẹ ora na jehẹ urhiobọ rẹ John te ọke na, dede nẹ ọ vrẹ ẹgbukpe 60 re. Kọke kọke yen oma vwọ vwerhọn siẹrẹ ọ da karophiyọ uruemu esiri re dje kẹ, rọ nẹrhẹ ọ rhe mrẹ uyota na vughe.—2 Kọr. 6:4, 6.
