OMA vwerhen ovwẹ nẹ ọsẹ vẹ oni mẹ, Fred kugbe Edna Molohan nabọ yono uvwe kpahen Jihova. Ayen vwomaba Emọ​—Uyono rẹ Baibol na (Iseri rẹ Jihova) te ẹgbukpe 20 tavwen e ki vwiẹ vwẹ vwẹ 1934. Orua rẹ avwanre dia ọmọko re se Parsons, vwẹ southeastern Kansas. Dino ihwo eje rehẹ ukoko rẹ avwanre ọke yena, vwo iphiẹrophiyọ rẹ ayen vwo kpo odjuvwu. Orua rẹ avwanre nabọ kpo uyono ọkieje. Kọke kọke yen avwanre ji vwo kpo aghwoghwo re yono ihwo Ota rẹ Ọghẹnẹ. Oghẹruvo rẹ Ẹdidjala otete yen avwanre vwo ruẹ aghwoghwo rẹ urhuvwun, ra riẹn phiyọ aghwogwho rẹ azagba enẹna. Ọkiọvo oma sa ghwọrọ avwanre, ẹkẹvuọvo, kọke kọke yen Ọsẹ mẹ vwọ dẹ isikrimu kẹ avwanre siẹrẹ e de ru nu.

Ukoko rẹ avwanre rọ ghwa rho na-a, ghwoghwo ota vwẹ irere vẹ aghwa buebun vwẹ ibrotọ ri ghwe sheri-i. Ọke buebun, avwanre de ghwoghwota kẹ eghwẹrẹ na, kẹ avwanre vwẹ ẹbe rẹ ukoko na vwo wene ifọ, ikọhọ kpokpọ (ra ghwa torọ nẹ ikeji rhe obọ), yẹrẹ tobọ ehọ dede. Enana keyen avwanre vwọba chere emu, kidie Ọsẹ mẹ ru itetoro phiyọ ẹbe na jovwo re.

Ọsẹ vẹ oni mẹ vwo fonografu (imiredio) rẹ ayen vwo ruiruo vwẹ aghwoghwo. Me reyerọ vwo ruiruo-o, kidie me hanvwe nọ ọke yena; ẹkẹvuọvo, me nabọ vwẹ ukẹcha kẹ Ọsẹ vẹ Oni mẹ vwo hworo ota rẹ Oniọvo Rutherford kẹ ihwo vwẹ orhivwinbrura vẹ uyono rẹ Baibol.

Ọsẹ mẹ wene imoto rẹ Ford rẹ 1936 rẹ avwanre vwori, vwo kpo imoto ro vwo agboro rode re ru phiyọ obenu rọyen. Imoto na chọn avwanre uko vwẹ aghwoghwo rẹ Uvie na mamọ. Ọke buebun, avwanre ke hworo ihwehworo vwo siẹ ihwo koko, tavwen e ki hworo ota rotu rẹ Baibol kẹ ayen. E de  ru ọyena nu, avwanre me ghare ẹbe rẹ ukoko na kẹ ihwo ri dje omavwerhovwẹn phia.

Elọkpa rehẹ omorere re se Cherryvale, vwẹ ubrotọ rẹ Kansas, rhọnvwere nẹ Ọsẹ mẹ djẹ imoto rẹ agboro rọyen na ro afieha ọvo-o, kidie Ẹdidjala rode yen ihwo buebun vwo ronvwoma, ẹkẹvuọvo, ayen tare nẹ o se muo phiyọ otafe. Ukperẹ Ọsẹ mẹ vwo nene ayen phrọ aphro, ọ da gua imoto na kpo urhuvwun ro hirharoku afieha na. Eriyina, ihwo rehẹ asan re de rovwonma na, da nabọ nyo ovuẹ ro hworo kẹ ayen vwẹ ẹdẹ yena. Oma nabọ vwerhen ovwẹ kọke kọke mi de nene Ọsẹ mẹ vẹ oniọvo mẹ ọkpako re se Jerry kpo aghwoghwo rẹ azagba.

Vwẹ okuphiyọ rẹ 1930, avwanre de ru egbada-ẹdjẹ oghẹresan ọvo, ro churobọ si aghwoghwo re che ru kpakpata vwẹ ẹkuotọ ra da vwọsua avwanre mamọ. Edegburhiọke yen avwanre vwo vrẹn, (kirobo rẹ avwanre ruru vwẹ orere rẹ Joplin, rọhẹ ubrotọ rẹ Missouri) avwanre me jomaotọ phi itrati yẹrẹ ẹbe itete phiyọ obotọ rẹ ẹchẹ rẹ iwevwin rẹ ihwo na. E de ru nu, avwanre mi siomakoko vwẹ otafe rẹ orere na rere a sa vwọ riẹn sẹ elọkpa mu evo usun rẹ avwanre.

Avwanre ji vwobọ vwẹ aghwogwo ra da vwẹ ephapha vwọ yan irhuvwun. Avwanre ku ephapha tiọyen phiyọ oma vwo ghwoghwo Uvie na vwẹ orere ọvo. Me karophiyọ ọvo rọyen re ruru vwẹ orere rẹ avwanre, rẹ igbeyan mẹ evo de ku ephapha re si eta nana phiyọ: “Ẹga Ọyen Eki kugbe Ufi.” Ayen yan omarẹ imaili ọvo (iroko 1.6) wan orere na, tavwen ayen ki rhivwin kpo. Ọ vwerhoma nẹ a vwọso ayen kakaka-a, ukperẹ ọtiọyen, ihwo buebun guọnọ riẹn obo re phia.

Nẹ ọke ra ruọke yen orua rẹ avwanre vwo nẹ Kansas vwo kpo ọghwẹkoko vwẹ Texas. Ọsẹ mẹ wian vwọ kẹ ikọpani re se Missouri-Kansas-Texas Railroad, ro vwo itrani sansan. Eriyina, kẹ avwanre sa ro itrani rẹ ikọpini na ọphẹ vwo kpo ọghwẹkoko, je kọn bru imoni rẹ avwanre ra. Oniọvo ọkpako rẹ Oni mẹ re se Fred Wismer vẹ aye rọyen Eulalie dia asan re se Temple vwẹ Texas. Fred mrẹ uyota na vughe ọke rọ vwọ hẹ eghene vwẹ ikpe re kpahen 1900, o de bromaphiyame. Ọ je davwẹngba vwo ghwoghwo ota kẹ oni mẹ vẹ iniovo rọyen itete. Buebun rẹ iniọvo rehẹ central Texas vughire mamọ, kidie ọ gare ọke yena kerẹ zone servant (ra riẹn phiyọ oniruo okinriariẹ enẹna). Ọyen ohwo esiri rẹ oma vwerhan, ro brọghọ phiyọ ihwo efa oma. O vwo ẹguọnọ rẹ uyota na mamọ, jẹ omamọ rẹ udje kẹ vwẹ ọke me vwọ hẹ eghene.

Vwẹ 1941, orua rẹ avwanre da ro itrani vwo kpo ọghwẹkoko rode ọvo re ruru vwẹ St. Louis rọhẹ Missouri. Vwẹ ọghwẹkoko na, e de durhie ighene na eje nẹ ayen rhi chidia kẹrẹ umukpe na rere ayen sa vwọ nabọ nyo ota rẹ Oniọvo Rutherford ro vwo uyovwinrota na “Emọ rẹ Uvie Na.” Vwẹ okuphiyọ rẹ ota na, a da vwẹ okẹ ọghanghanre ọvo kẹ ighene na eje re vrẹ 15,000, rẹ Oniọvo Rutherford vẹ irivẹ rọyen vwọ ghare ọbe kpokpọ re se Emọ kẹ avwanre.

 Vwẹ April 1943, avwanre de kpo osikoko otete ọvo ro vwo uyovwinrota na “Use re Vwo Ruiruo” vwẹ orere rẹ Coffeyville, rọhẹ Kansas. Etiyin kọyen e de ghwoghwo nẹ a vwẹ isukuru kpokpọ ọvo vwo mu vwẹ ikoko na eje, re se Isikuru rẹ Iruo Ruvie Na. E de ji siobọnu ọbe ọvo ro vwo iyono 52 re che vwo ruiruo vwẹ isukuru na. Ukpe vuọvo yena yen me je vwọ ta ota mẹ rẹsosuọ vwẹ isukuru na. Osikoko yena je ghanre kẹ vwẹ mamọ, kidie mẹvwẹ ọvo usun rẹ iniọvo re bru phiyọ ame vwẹ owẹ odjidjiro ọvo, rọ kẹrẹ asan re de ru ọghwẹkoko na.

Mi vwo wontọ nẹ kọlegi vwẹ ukpe rẹ 1951 nu, mi de brorhiẹn rẹ oborẹ me cha vwẹ akpeyeren mẹ vwo ru. Ẹga rẹ Bẹtẹl je vwe mamọ. Oniọvo mẹ Jerry je ga vwẹ Bẹtẹl jovwo. Ọtiọyena, me da ghwobọphiyọ ifomu rẹ Bẹtẹl. Orhiẹn yena fierere kẹ vwẹ mamọ. O kriri-i, e de durhie uvwe kpo Bẹtẹl. Me da ton iruo phiyọ vwẹ oboyin vwẹ March 10, 1952.

Mi rhẹro rọyen nẹ me cha wian vwẹ asan ra da teyen imagazini vẹ ẹbe efa. Ẹkẹvuọvo, uphẹn na te vwe obọ-ọ. Ukperẹ ọtiọyen, a da vuẹ vwẹ nẹ me vwomaba iniọvo re ghara emuọre. Ọke vwọ yanran na, e de mu vwe kpo obẹ ukoni. Mi yono emu buebun vwẹ iruo yena ivẹ na. Ọrhuẹrẹphiyotọ rẹ owian rẹ obo ukoni na shephiyọ kẹ vwẹ dẹn, kidie ọ nẹrhẹ ovwẹ sa mrẹ ọke vwo ru uyono romobọ vwẹ oghẹruvo, vwẹ liabri rọhẹ Bẹtẹl rọ vọnre vẹ ẹbe na. Ọyena bọn esegbuyota mẹ gan, ọ je nẹrhẹ oyerinkugbe mẹ vẹ Jihova ganphiyọ. Ọ nẹrhẹ ovwẹ yọnre orhiẹn-ebro mẹ kokoroko nẹ me cha vwẹ akpọ mẹ eje vwọ ga Jihova vwẹ Bẹtẹl. Jerry vrẹn nẹ Bẹtẹl vwẹ ukpe rẹ 1949, ọ da rọvwọn Patricia, ayen ihwo ivẹ na dia kẹrẹ Brooklyn. Ayen nabọ vwẹ ukẹcha kẹ vwẹ, ji bru vwe uche, ọke me vwọ ton ẹga rẹ Bẹtẹl phiyọ obọ.

Mi ghwe vwo te Bẹtẹl, o kriri-i, ka guọnọ ihwo ra sa vwọba etota rẹ Bẹtẹl. Kukpe kukpe yen iniọvo ra sanere na che rhe nẹ Brooklyn vwo kpo ikoko sansan ri sheri te iroko 322 (imaili 200). Ayen me ta ota rotu vwẹ ikoko rẹ ayen rare, ji nene iniọvo na kpo aghwoghwo. Uphẹn na de rhiephiyọ kẹ vwẹ, me vwọ dia ọvo usun rẹ iniọvo na. Oshọ yen me vwọ ton iruo nana phiyọ, je ta ota rotu mẹ rẹsosuọ, rọ dia ota rẹ unọke ọvo vwẹ ọke yena. Mi ro itrani abọ buebun kpo oyan nana. Me karophiyọ obo re phiare vwẹ oghẹruvo rẹ Ẹdidjana rode ọvo, vwẹ ọke rẹ ohwahwa rẹ 1954. Ẹdẹ yena, mi ro itrani ro kpo New York, rere mi fobọ te Bẹtẹl vwẹ ovwọnvwọn. Ẹkẹvuọvo, odju ọgangan ọvo de dju, imicho da je rhọ. Ọ da nẹrhẹ igini rẹ ẹlẹtriki rẹ itrani na fun, eriyin ji te irhukpẹ rehẹ itrani na. Jẹ, a kpẹvwẹ Ọghẹnẹ nẹ a sa tẹbiẹ itrani na te asan ro wonri vwẹ New York omarẹ ughọjọ iyorin rẹ urhiọke rẹ Monday. Kpakpata me da wan idjerhe rọhẹ obotọ rẹ asan rẹ itrani na wonri, vwo kpo Brooklyn. Mi ghwe vwo te oboyin, mi de kpo iruo vwobẹ ukoni na. Jẹ, mi fobọ te iruo-o, oma ji bru vwe ku, kidie itrani ro miovwirin na, ju vwe sa vwerhẹn vwẹ aso-on. Ẹkẹvuọvo, aghọghọ me mrẹre me vwọ vwẹ ukẹcha kẹ ukoko na, vẹ iniọvo buebun re rhe dia igbeyan mẹ, rho nẹ korọnvwọn korọnvwọn mi vwo ze.

Vwẹ ikpe rẹsosuọ mẹ vwẹ Bẹtẹl, e durhie uvwe nẹ me vwomaba ọrhuẹrẹphiyotọ rẹ uyono rẹ Baibol re ruẹ kudughwrẹn kudughwrẹn vwẹ iredio rẹ ukoko na, re se WBBR. Istudio na hẹ ubruwevwin rivẹ vwẹ ọfisi rọhẹ 124 Columbia Heights. Ọke yena, Oniọvo A. H. Macmillan, ro gare ikpe buebun vwẹ Bẹtẹl vwobọ vwẹ ọrhuẹrẹphiyotọ rẹ iredio na ọkieje. Oniọvo Mac yen avwanre se, ọyen uvi rẹ udje rẹ akoechiro kẹ avwanre ighene re ga vwẹ Bẹtẹl.

Vwẹ 1958, a da kẹ vwẹ iruo ro churobọ si Isikuru rẹ Gilead. Me vwẹ ukẹcha kẹ iniọvo na vwo ruẹ ivisa, ji muegbe rẹ ẹbe efa, rere ayen se vwo kpo asan re ji ayen ra. Ọ dia ọmọrhiẹ igho yen a vwọ rua aropleni ọke yena-a, eriyina, imihwo krẹn yen ruọ. Buebun rẹ iniọvo re ji kpo Africa vẹ Asia rua okuna ri muẹ eghwa. Ikpe evo vwọ wan nu, re vwo si unu rẹ ighọ ra vwọ rua aropleni kpotọ, buebun rẹ imishọnare na ke ruọ vwo kpọ ẹkuotọ re ji ayen ra.

Vwẹ 1960, mi de vwo ọrhuẹrẹphiyotọ oghẹresan rẹ aropleni ọvo vwo mu vwe nẹ United States kpo Europe, rere mi se vwo kpo ọghwẹkoko rẹ akpọeje re ruru vwẹ 1961. Me ro aropleni na nẹ New York kpo Hamburg, Germany, vwọ kẹ ọghwẹkoko na. E vwo ru ọghwẹkoko na nu, mẹ vẹ iniọvo eshare erha re je ga vwẹ Bẹtẹl da vwẹ igho vwo momo imoto ọvo. Imoto na kọyen avwanre ro nẹ Germany kpo Italy re kin oghọn ukoko rọhẹ Rom. Avwanre de nẹ etiyin ro France, ra wan Igbenu rehẹ Pyrenees ro Spain, ra da dobọ rẹ iruo rẹ avwanre ji vwẹ ọke yena. Avwanre da vwẹ ẹbe evo ra nabọ phare kerẹ ọko, vwọ kẹ iniọvo rehẹ Barcelona. Ọ vwerhoma dẹn ra vwọ mrẹ ayen! Avwanre da gua imoto na wan Amsterdam, vwo kpo asan rẹ avwanre da cha ro aropleni ro mu avwanre rhe na, rhivwin kpo New York.

Omarẹ ẹgbukpe ọvo vwọ wan nu, a da vwẹ iruo ọfa kẹ vwẹ vwẹ Bẹtẹl. A kẹ vwẹ iruo re me vwọ vwẹrote ọrhuẹrẹphiyotọ oghẹresan ọvo. Ọnana ọrhuẹrẹphiyotọ rẹ iniọvo 583 che vwo kpo eghwẹkoko oghẹresan rẹ akpọeje, re ru kpahen ohwohwo vwẹ 1963. Ọghwẹkoko na vwo uyovwinrota na “Iyẹnrẹn Esiri rẹ Bẹdẹ.” Iniọvọ na kpo ọghwẹkoko na vwẹ Europe, Asia, kugbe South Pacific, eriyin ji te Honolulu, Hawaii, kugbe Pasadena, vwẹ California. Ayen de ji kpo ikiekin oghẹresan vwẹ Lebanon vẹ Jordan, re si edẹ rayen phiyọ Baibol na. E de si ẹbe yẹrẹ ivisa rẹ asan rẹ ayen rare na no nu, akon iruo rẹ avwanre yen ji muegbe rẹ iwevwin rẹ ayen wonri, vẹ ẹbe rẹ ayen sa vwọ ro ẹkuotọ na eje rẹ ayen da domaji.

O ji vwo emu ọfa rọ nẹrhẹ ukpe rẹ 1963 na ghanre kẹ vwẹ mamọ. Vwẹ June 29, me da rọvwọn Lila Rogers rọhẹ Bẹtẹl te ẹgbukpe erha re. Orere rẹ Missouri yen o nurhe. Udughwrẹn ọvo rẹ avwanre vwọ rọvwọn nu, mẹ vẹ Lila da vwomaba ihwo ri kpo ikiekin oghẹresan na; avwanre de kpo Greece, Egypt, kugbe Lebanon. Avwanre ro aropleni nẹ Beirut kpo Jordan. A dobọ rẹ iruo rẹ avwanre ji vwẹ Jordan ọke yena; a tobọ vuẹ avwanre nẹ a rhọnvwa vwẹ ivisa kẹ Iseri rẹ Jihova-a. Eriyina, avwanre rha riẹn obo re cha phia siẹrẹ e de te oboyi-in. Jẹ, avwanre vwo wontọ nẹ aropleni na vwẹ oboyin, oma da vwerhen avwanre mamọ, rẹ avwanre vwọ mrẹ otu buebun re hẹrhẹ avwanre vẹ amwa rode re si phiyọ nẹ “Ovwan Kobẹcha Iseri rẹ Jihova”! Ọ vwerhoma dẹn re vwo kin ibrotọ sansan re si edẹ rayen vwẹ Baibol na! Avwanre kin asan sansan rẹ esẹ ride rẹ ihwo rẹ Izrẹl diare, asan rẹ Jesu vẹ iyinkọn rọyen de ghwoghwo, kugbe asan rẹ Ukoko rẹ Inenikristi da tonphiyọ tavwen ọ ke hrabọ ro akpọ na ejobi.​—Iruo 13:47.

Lila nabọ fuevun chọn vwẹ uko vwẹ asan na eje me da ga vwẹ uvwre rẹ ẹgbukpe 55 rhire na. Avwanre kpo Spain vẹ Portugal abọ buebun vwẹ ọke ra vwọ dobọ rẹ iruo rẹ avwanre ji vwẹ oboyin. Avwanre nabọ bọn iniọvo na gan, je kẹ ayen ẹbe rẹ ukoko na vẹ erọnvwọn efa rẹ ayen guọnọre. Avwanre je tobọ kọn bru iniọvo rẹ avwanre evo ra vwẹ uwodi re mu ayen phiyọ vwẹ ubrotọ rẹ Cádiz, rọhẹ Spain. Oma je vwerhen ovwẹ mamọ nẹ me sa ta ota ro nẹ Baibol rhe, vwọ bọn ayen gan.

 Rhanvwe ukpe rẹ 1963 yen mẹ vẹ iniọvo sansan vwo ruẹ ọrhuẹrẹphiyotọ rẹ omaẹfa vwọ kẹ ihwo ri kpo eghwẹkoko rẹ akpọeje vwẹ Africa, Australia, Europe, East Asia, Hawaii, New Zealand, Puerto Rico, Central America kugbe South America. Mẹ vẹ Lila riavwerhen rẹ eghwẹkoko buebun re cha sa chọrọ avwanre ẹro-o; kerẹ ọ rẹ avwanre rare vwẹ Warsaw, rọhẹ Poland vwẹ 1989. Iniọvo buebun ri nẹ Russia rhe, ji kpo ọghwẹkoko rode yena rọ dia ọrẹsosuọ rẹ ayen rare! Avwanre mrẹ iniọvo sansan rẹ usuon rẹ Soviet Union mu phiyọ uwodi vwẹ ikpe buebun fikirẹ esegbuyota rayen.

Uphẹn rẹ ẹga ọfa ro te vwe obọ, kẹ ọ rẹ me vwọ kọn brẹ imishọnare vẹ erua rẹ Bẹtẹl sansan ra, rere me sa vwọ bọn ayen gan. Ọ rọ koba usun rẹ oyan tiọyen rẹ avwanre rare, kẹ ọ rẹ South Korea rẹ avwnare da je kọn bru iniọvo rẹ avwanre 50 ra vwẹ uwodi rọhẹ Suwon. Ayen ejobi nabọ sẹro rẹ omavwerhovwẹn rayen, ayen je rhẹro rẹ ọke rẹ ayen cha vwọ rhoma vwobọ vwẹ iruo rẹ aghwoghwo na vọnvọn. Ẹmrẹ rẹ avwanre mrẹ ayen na, bọn avwanre gan dẹn!​—Rom 1:11, 12.

Me mrẹ oborẹ Jihova ku ebruphiyọ ku ihwo rọyen vwẹ ikpe nana eje na. Omarẹ iniọvo 100,000 yen ighwoghwota re herọ ọke mi vwo bromaphiyame vwẹ 1943. Ẹkẹvuọvo, ighwoghwota re vrẹ 8,000,000 yen herọ ga Jihova vwẹ etọ 240 enẹna. Uvi rẹ ẹgbaẹdavwọn rẹ iniọvo ri wontọ nẹ Isikuru rẹ Gilead, yen ghwa ebruphiyọ nana rhe. Oma vwerhen ovwẹ nẹ mẹ vẹ buebun rẹ imishọnare nana wianre, re me vwọ chọn ayen uko vwo kpo asan re ji ayen ra.

Me kpẹvwẹ Jihova nẹ mi se brorhiẹn vwẹ ọke eghene mẹ nẹ me cha ga vwẹ Bẹtẹl. Jihova ghini bruba kẹ vwẹ gbidiki vwẹ ikpe nana eje na. Vwọba aghọghọ rẹ ẹga rẹ Bẹtẹl, mẹ vẹ aye mẹ Lila je riavwerhen rẹ uphẹn rẹ avwanre vwo nene iniọvo buebun wian kugbe vwẹ ikoko sansan rehẹ Brooklyn, buebun rayen jẹ igbeyan rẹ avwanre te ọke na.

Womarẹ ukẹcha rẹ aye mẹ Lila, me je ga vwẹ Bẹtẹl, dede nẹ me hẹ ẹgbukpe 84 enẹna. Me je riavwerhen rẹ iruo mẹ, re me vwọ vwẹrote ẹbe sansan re si rhe oghọn ukoko, vẹ e rẹ oghọn ukoko na siẹ vwo rhe ikoko sansan.

Ọ vwerhoma nẹ me hẹ evunrẹ ukoko rẹ Jihova, me je mrẹ ofẹnẹ rode rọhẹ uvwre rẹ ihwo re vwẹ ẹga kẹ Jihova, vẹ e re ga-a. Enẹna avwanre nabọ vwo ẹruọ rẹ eta nana rehẹ Malakae 3:18: “Ọke yena re kẹ ovwan che vughe ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ga.” Kẹdẹ kẹdẹ yen akpọ rẹ Eshu nana vwo miovwẹn phiyọ, ọ vọnre vẹ ihwo ri vwo iphiẹrophiyọ-ọ, ihwo ri vwo aghọghọ tutuno. Ẹkẹvuọvo, ihwo ri vwo ẹguọnọ rẹ Jihova, re je vwẹ ẹga kẹ, yeren akpọ rẹ omavwerhovwẹn; ayen tobọ vwo iphiẹrophiyọ ro muẹro kpahen obaro na, vwevunrẹ ọke ọgangan nana re de yerẹn na. Avwanre vwo okpuphẹn re vwo ghwoghwo iyẹnrẹn esiri rẹ Uvie na! (Matt. 24:14) Avwanre hẹrhẹ ọke rẹ Uvie rẹ Ọghẹnẹ rọ cha rhe kẹrẹkpẹ na, cha vwọ guọghọ akpọ umwemwu nana, je ghwa akpọ kpokpọ rhe vẹ ebruphiyọ rọyen ejobi, re che vwo vwo omakpokpọ vẹ arhọ rẹ bẹdẹ. Ọke yena, idibọ rẹ Jihova eje rehẹ otọrakpọ na, ke cha riavwerhen rẹ uvi rẹ akpeyeren bẹdẹ bẹdẹ.