1, 2. Egbabọse vọ yen Joshua hirharoku ọke rẹ Mosis vwo ghwu nu?

JOSHUA je karophiyọ eta nana rẹ Jihova ta kẹ: “Mosis rẹ odibo mẹ o ghwu nure; asakiephana gbe vrẹn, ru wọ wan Jọdan nana vrẹn, wẹ vẹ ihwo nana ejobi, vwo kpo otọ re me cha vwọ kẹ ayen.” (Jos. 1:1, 2) Ọnana ewene rode rẹ Joshua rọ gare kerẹ odibo rẹ Mosis omarẹ ẹgbukpe 40 re na, rhẹro rọye-en!

² Rọ vwọ dianẹ Mosis yen suẹn ihwo na vwẹ ikpe buebun rhire na, Joshua se vwo ẹwẹn ivivẹ sẹ ihwo na cha rhọnvwe vwomakpotọ nene odjekẹ rọyen. (Urhi 34:8, 10-12) Ehiahiẹ ọvo re ru kpahen Joshua 1:1, 2 de se: “Nẹ ọke awanre rhi te ọke nana, obo ro me muoshọ kparobọ, ọyen re vwo wene ohwo ro suẹn. Kidie o se djobọte ofuvwegbe rẹ ẹkuotọ.”

3, 4. Mavọ yen avwanre ru riẹn nẹ ẹroẹvwọsuọ rẹ Joshua fierere kẹ, kẹ onọ vọ yen a sa nọ oma rẹ ohwo?

³ Joshua vwẹroso Jihova, dede nẹ o vwo oboresorọ oshọ vwo muo. Ẹdẹ ibro vwọ wan nu, ọ da reyọ owọẹjẹ ọghanghanre ọvo. (Jos. 1:9-11) Ẹroẹvwọsuọ rọyen kpahen Jihova fierere kẹ. Kirobo rẹ Baibol na djere, Jihova sẹro rọyen vẹ ihwo rẹ Izrẹl womarẹ amakashe ọvo. Amakashe yena sa dia Ota na, rọ  dia Ọmọkpako rẹ Ọghẹnẹ.—Eyan. 23:20-23; Jọn 1:1.

⁴ Womarẹ ukẹcha rẹ Jihova, ihwo rẹ Izrẹl de rhiabọreyọ ewene na, rẹ ayen vwo nẹ otọ rẹ usuon rẹ Mosis vwo kpo ọ rẹ Joshua. Avwanre ji yerẹn vwẹ ọke rẹ ewene sansan vwọ vwomaphia. Eriyina, e se roro, ‘Ukoko rẹ Jihova vwọ yan obaro ghwraghwraghwra na, avwanre ghene sa vwẹroso Jesu rọ dia Osun rẹ avwanre?’ (Se Matiu 23:10.) E jẹ a fuẹrẹn oborẹ Jihova nabọ sun ihwo rọyen yoyovwin vwẹ ọke awanre.

5. Die phiare ọke rẹ Joshua vwo sikẹrẹ Jeriko? (Ni uhoho rẹsosuọ na.)

⁵ Ihwo rẹ Izrẹl vwọ shariẹ urhie rẹ Jọdan vrẹ nu, o kriri-i, Joshua de rhiẹromrẹ emuọvo ro gbere unu. Ro vwo siẹkẹrẹ orere rẹ Jeriko, ọ da mrẹ ọshare ọvo rọ vwẹ ọlọkọ yọnrọn obọ. Kidie nẹ o vughe ọshare na-a, Joshua da nọ: “Wọ vẹ avwanre obọ vwọ, gbenẹ wẹ ọvweghrẹ rẹ avwanre?” Ẹkẹvuọvo, o gbe Joshua unu ọke rẹ ọgbofovwin na vwo dje oma kẹ. Ọshare na tare nẹ ọyen “onotu rẹ ofovwi rẹ Ọrovwohwo” rọ choma rọ vwọ chochọn rẹ ihwo rẹ Ọghẹnẹ. (Se Joshua 5:13-15.) Dede nẹ Baibol na djere vwẹ asan efa kerẹ asan ra da mrẹ nẹ Jihova komobọ rọyen yen ta ota kẹ Joshua vwẹ ọke sansan, jẹ o muẹro dẹn nẹ o ru ọtiọyen womarẹ amakashe, kirobo ro ruru vwẹ ọke rẹ obuko.​—Eyan. 3:2-4; Jos. 4:1, 15; 5:2, 9; Iruo 7:38; Gal. 3:19.

6-8. (a) Diesorọ odjekẹ evo rẹ amakashe rẹ Jihova vwọphia na vwo gbe ohwo unu? (b) Diesorọ odjekẹ yena vwọ dia ọ rẹ aghwanre, ro ji fo aruọke? (Ni eta rehẹ obotọ na.)

⁶ Amakashe na vuẹ Joshua obo ro se vwo phi Jeriko kparobọ. Jẹ, e se roro nẹ odjekẹ evo rọ vwọphia na cha sa wia-an. Kerẹ udje, ọ vuẹ Joshua nẹ e jẹ eshare na eje yanvwe. Ọyena mudiaphiyọ nẹ eshare na rha cha sa họnre vwẹ uvwre rẹ ẹdẹ evo-o. Oyanvwe kẹ obo re ji ruẹ vwẹ ọke rẹ ofovwin?​—Jẹn. 34:24, 25; Jos. 5:2, 8.

⁷ Ọkiọvo udu bru isodje rẹ Izrẹl mamọ kpahen oborẹ ayen sa vwọ chochọn rẹ orua rayen vẹ era rẹ oyanvwe na, siẹrẹ ivwrighrẹn de bru ayen rhe. Kpregede na, ayen de nyo nẹ a “kare Jeriko gbe vwẹ obo evun te otafe fiki rẹ ihwo rẹ Izrẹl.” (Jos. 6:1) O muẹro dẹn nẹ iyẹnrẹn yena nẹrhẹ ẹroẹvwọsuọ rayen rhoma ganphiyọ kpahen Jihova!

⁸ Amakashe na je vuẹ ihwo rẹ Izrẹl nẹ ayen họnre Jeriko-o, ukperẹ ọtiọyen, ọ tare nẹ e jẹ ayen yan riariẹ orere na obọ ọvo ẹdọke vwẹ ẹdẹ esan, ayen mi rhe ru ọtiọyen abọ ighwrẹn vwẹ ẹdẹ righwrẹn na. Evo usun rẹ isodje na se roro, ‘Ọnana rha dia ọke ehwe-e!’ Ẹkẹvuọvo, Osun rayen rẹ ayen rhiẹromrẹ-ẹ na, riẹn obo ro ruẹ. Ona nana bọn esegbuyota rẹ ihwo rẹ Izrẹl gan, ọ je nẹrhẹ ayen sa kẹnoma kẹ ohọnre rẹ ayen rha họnre vẹ egbofovwin rẹ Jeriko.​—Jos. 6:2-5; Hib. 11:30. *

9. Diesorọ o vwo fo nẹ e nene odjekẹ rẹ ukoko rẹ Jihova vwọphia? Djudje rọyen.

⁹ Die yen ikuegbe nana yono avwanre? Ukoko rẹ Jihova se ru ewene evo ri che gbe avwanre unu vwẹ ọke sansan. Kerẹ udje, ọ sa dianẹ wo vwo ẹwẹn ivivẹ ẹsosuọ kpahen ifonu vẹ itablẹti rẹ ukoko na tare nẹ a sa vwọba ruiruo vwẹ aghwoghwo vẹ emẹvwa, kugbe uyono romobọ. Ẹkẹvuọvo, avwanre mrẹ erere nọ cha asaọkiephana. Vwọrẹ uyota,  erhuvwu ro nẹ ewene tiọyena cha ukuotọ rọyen, nabọ bọn esegbuyota rẹ avwanre gan, je siẹ avwanre kẹrẹ ohwohwo.

10. Ono yehẹ obuko rẹ echidiotọ ọghẹresan rẹ ẹko rọvwẹrote na ruru vwẹ Jerusalẹm?

¹⁰ Omarẹ ẹgbukpe 13 rẹ Kọniliọs vwo kurhiẹriẹ nu, a je mrẹ Inenikristi rẹ Ju evo ri titi oyanvwe. (Iruo 15:1, 2) Aphro vwọ vwomaphia vwẹ Antiọk, iniọvo na da jiroro re vwo ji Pọl bru ẹko rọvwẹrote na ra vwẹ Jerusalẹm, rere a rhuẹrẹ ota na phiyọ. Ẹkẹvuọvo, die yen ghini mu ayen vwọ jiroro yena? Pọl da ta: “Vwẹ evun rẹ ẹvwọphia me vwọ yanran.” Aphro herọ-ọ, Jesu yen ruro ọtiọyen rere ẹko rọvwẹrote na sa vwọ rhuẹrẹ ota na phiyọ.​—Gal. 2:1-3.

11. (a) Ẹwẹn vọ yen ji rhe Inenikristi rẹ Ju kpahen oyanvwe? (b) Die phiare rọ rhe nẹrhẹ a mrẹvughe sẹ Pọl ghini vwo ẹwẹn ro vwo nene odjekẹ rẹ ekpako rehẹ Jerusalẹm? (Ni eta rehẹ obotọ na.)

¹¹ Womarẹ odjekẹ rẹ Jesu, ẹko rọvwẹrote na da ta phephẹn nẹ igiye ri kurhẹriẹ rhe ukoko na guọnọ oyanvwe-e. (Iruo 15:19, 20) Ẹkẹvuọvo, ikpe evo vwọ tobọ wan nu, buebun rẹ Inenikristi rẹ Ju na dobọ rẹ oyanvwe rẹ emọ rayen ji-i. Ekpako rehẹ Jerusalẹm de rhi nyo iguegun ọvo kpahen ọyinkọn Pọl, rẹ ihwo evo vwọ tanẹ Pọl yọnrọn Urhi rẹ Mosis na-a. Eriyina, ayen da vuẹ nẹ o ru emuọvo ro rhẹro rọye-en. * (Iruo 21:20-26) Ayen vuẹrẹ nẹ ọ reyọ eshare ẹne kpo uwevwin rẹ ẹga na, rere ihwo na vwọ riẹn nẹ ọ “yọnre urhi na.” Pọl rha sa sen kẹ ayen jovwo, je vuẹ ayen nẹ Inenikristi rẹ Ju na yen jẹ ẹruọ rẹ ota rẹ oyanvwe na evwo. Ẹkẹvuọvo, Pọl niroso nẹ ekpako na guọnọre nẹ ufuoma dia evunrẹ ukoko na, ọ da vwomakpotọ ru oborẹ ayen tare. E se roro, ‘Diesorọ Jesu vwọ vwẹ uphẹn kẹ ota rẹ oyanvwe na nẹ ọ dia otọ kri te ọtiọyen, jẹ ọ riẹnre nẹ ughwu rọyen phioba phiyọ Urhi rẹ Mosis na re?’​—Kọl. 2:13, 14.

12. Diesorọ Jesu vwọ vwẹ uphẹn kẹ ota rẹ oyanvwe na nẹ ọ dia otọ krekri tavwen ọ ke rhuẹrẹ phiyọ?

 ¹² Ọ reyọ ọke tavwen ewene re ru phiyọ iyono rẹ ukoko na ke sa riẹnriẹn ohwo oma. Inenikristi rẹ Ju guọnọ ọke rẹ ayen vwo wene iroro rayen. (Jọn 16:12) Ọ bẹn kẹ evo usun rayen, rẹ ayen vwọ rhọnvwe nẹ a rha cha sa vwẹ oyanvwe vwo vughe ohwo rọ vẹ Jihova gbe vwo oyerinkugbe oghẹresa-an. (Jẹn. 17:9-12) Efa yọnrọn urhi rẹ oyanvwe na kokoroko, fikirẹ oshọ nẹ ihwo rẹ Ju rehẹ ekogho na che mukpahen ayen. (Gal. 6:12) Ọke vwọ yanran na, Jesu da vwẹ odjekẹ efa phia womarẹ ẹbe rẹ Pọl si vwo rhe ikoko na.​—Rom 2:28, 29; Gal. 3:23-25.

13. Die yen sa nẹrhẹ e vwo ọdavwaro kpahen usuon rẹ Jesu nonẹna?

¹³ Ọ da dianẹ ọ pha bẹnbẹn rẹ avwanre vwo vwo ẹruọ rẹ oboresorọ ukoko na vwo ru ewene evo, avwanre me ghwọrọ ọke vwo roro kpahen oborẹ Jesu sun ihwo rẹ Ọghẹnẹ wan vwẹ ọke awanre. Odjekẹ rọ vwọphia vwẹ ọke rẹ Joshua vẹ ẹgbukpe ujorin ẹsosuo, sẹro rẹ ihwo rẹ Ọghẹnẹ kerẹ ẹko, ọ bọn esegbuyota rayen gan, ọ je chọn ayen uko vwọ sẹro rẹ uvi rẹ oyerinkugbe rọhẹ evunrẹ ukoko na.​—Hib. 13:8.

14-16. Mavọ yen odjekẹ rẹ “odibo esiri na” vwọphia vwo djephia nẹ Jesu guọnọ chọn avwanre uko vwo vwo esegbuyota ọgangan?

¹⁴ Odjekẹ ro fo aruọke rẹ “odibo esiri na” na vwọphia kọke kọke, ghwa odjephia nẹ Jesu guọnọre nẹ avwanre vwo omamọ oyerinkugbe vẹ Jihova. (Mat. 24:45) Marc ro vwo emọ ẹne, da ta: “Eshu vwọso erua buebun, kidie ọ guọnọ ghwa ovwiẹrẹ ro ukoko na. Ọrhuẹrẹphiyotọ rẹ ẹga orua rẹ kudughwrẹn kudughwrẹn na, ghwa uchebro vwọ kẹ igbuyovwin rẹ erua nẹ ayen sẹro rẹ erua rayen!”

¹⁵ Avwanre de vwo ẹruọ rẹ oborẹ Jesu suẹn ukoko na wan, ọ cha nẹrhẹ a riẹn nẹ ọ ghene guọnọ chọn avwanre uko vwọ yan obaro vwevunrẹ ukoko na. Patrick rọ ga kerẹ ọkpako da ta: “Ọ bẹn kẹ iniọvo evo ẹsosuọ, rẹ ayen vwọ vwoma ekuẹko vwo kpo aghwoghwo vwẹ oba rẹ udughwrẹn. Jẹ, ọrhuẹrẹphiyotọ nana nẹrhẹ a mrẹvughe nẹ Jesu vwo ọdavwẹ rẹ ihwo eje, ji te otu re nẹ kuẹrofia. Iniọvo rẹ oma vua, vẹ e re ghwa sasa vwevunrẹ ukoko na-a, nabọ kpo aghwoghwo enẹna; ọrhuẹrẹphiyotọ na chọn ayen uko vwọ riẹn nẹ ẹgbaẹdavwọn rayen fiemu. Ọ bọn esegbuyota rayen gan.”

¹⁶ Jesu je chọn avwanre uko vwọ tẹnroviẹ iruo rẹ aghwoghwo na, rọ dia iruo rọ ma ghanre kparobọ vwẹ otorakpọ na enẹna. (Se Mak 13:10.) André re vwo mu ẹdia rẹ ọkpako o kri nọ-ọ na, davwẹngba vwo nene odjekẹ kpokpọ eje rẹ ukoko na vwọphia. Ọ da ta: “Uche ihwo re wian vwẹ oghọn ukoko re si kpotọ na, nẹrhẹ a karophiyọ nẹ ọke ro chekọ na rhe gro-on, ofori nẹ e mu ẹwẹn kpahen iruo rẹ aghwoghwo na, rere e ruo vẹ okpakpa.”

17, 18. Diesorọ o vwo fo nẹ e roro kpahen erere ra mrẹ vwo nẹ ewene sansan rẹ ukoko na ruru?

¹⁷ Odjekẹ sansan rẹ Ovie rẹ avwanre Jesu Kristi vwọphia, ghwe djephia nẹ o muegbe rọ vwọ chọn avwanre uko asaọkiephana kugbe ọke rọ cha. Eriyina, e gbe jẹ avwanre ghọghọ fikirẹ erhuvwu rẹ ewene nana eje ghwa rhe. Wẹ vẹ orua wẹn sa vwẹ ọke rẹ ẹga orua rẹ ovwan, vwọ ta ota kpahen erere rẹ ovwan mrẹ vwo nẹ ewene rẹ ukoko na ru phiyọ ọrhuẹrẹphiyotọ rẹ aghwoghwo vẹ uyono rẹ kudughwrẹn kudughwrẹn.

¹⁸ E de roro kpahen oboresorọ ukoko  na vwọ kẹ avwanre odjekẹ sansan vẹ erere rẹ ayen cha ghwa rhe, ọ cha nẹrhẹ ọ lọhọ re vwo nene ayen vẹ omavwerhovwẹn. Ọ vwerhoma ra vwọ riẹn nẹ uche ẹbe ra teyanphia rẹ ukoko na si kpotọ na, nẹrhẹ a sa sẹro rẹ igho; ẹbe vẹ erọnvwọn efa re phiẹ phiyọ ifonu vẹ itableti je nẹrhẹ a sa hẹre iruo rẹ aghwoghwo rẹ akpọeje na phiyọ. Ọniso rẹ erhuvwu nana cha nẹrhẹ a sa vwẹ ẹbe vẹ erọnvwọn efa re phiẹ phiyọ ifonu vẹ itablẹti vwo ruiruo vọnvọn asaọkiephana vwọ vrẹ obo ri jovwo. O ji che djephia nẹ avwanre biẹcha Jesu, rọ guọnọre nẹ ukoko na reyọ ekuakua tiọyena vwo ruiruo vwẹ idjerhe rẹ aghwanre.

19. Diesorọ e vwo nene odjekẹ rẹ Jesu?

¹⁹ Avwanre da davwẹngba vwo nene odjekẹ rẹ Jesu, ka sa bọn esegbuyota rẹ ihwo efa gan, ji toroba uvi rẹ oyerinkugbe. Vwọ kpahen uche ihwo re ga vwẹ Bẹtẹl re si kpotọ, André da ta: “Ẹwẹn esiri rẹ iniọvo re ga vwẹ Bẹtẹl jovwo na djephia kpahen ewene na, toroba ọghọ vẹ ẹroẹvwọsuọ ro rhe vwe. Ayen nene akpẹrẹ rẹ Jihova kpẹkpẹkpẹ, rẹ ayen vwo ruẹ kiruo kiruo ro te ayen obọ vẹ aghọghọ.”

20, 21. (a) Diẹsorọ a sa vwọ vwẹroso Jesu rọ dia Osun rẹ avwanre? (b) Onọ vọ yen a cha kpahenphiyọ vwẹ uyono rọ vwọ kpahen ọnana?

²⁰ Jesu Kristi rọ dia osun rẹ avwanre na che “phi kparobọ” kẹrẹkpẹ, ji ru erọnvwọn ri “mu oshọ.” (Ẹvwọ. 6:2; Une 45:4) Jẹ enẹna, o muegbe rẹ avwanre ohwo vuọvo vwọ hẹrhẹ ọke re che vwo vwobọ vwẹ iruo rẹ eyono vẹ ẹbabọn rode re che ru vwẹ ọke rẹ evrẹnushi na.

²¹ O toro obo re phiare-e, Ovie rẹ avwanre che sun avwanre ro akpọ kpokpọ na siẹrẹ a da vwẹrosuọ kare kare. (Se Une Rẹ Ejiro 46:1-3.) Ewene sa dia egbabọse kẹ avwanre, ma rho siẹrẹ o de djobọte akpeyeren rẹ avwanre siẹvuọvo. Mavọ kọyen avwanre sa vwọ sẹro rẹ ufuoma rẹ ubiudu rẹ avwanre, vẹ esegbuyota ọgangan kpahen Jihova? Onọ nana yen a cha kpahenphiyọ vwẹ uyono rọ vwọ kpahen ọnana.