1. Die yen 2 Kọrẹnt 3:1-3 tare rọ nẹrhẹ a riẹn nẹ ọyen okpuphẹn ra vwọ vwẹ Baibol yono ohwo te ẹdia ro vwo bromaphiyame? (Ni uhoho rọhẹ opharo ọbe na.)

MAVỌ yen oma ru we wọ da mrẹ ohwo ra vwẹ Baibol yono vwẹ ekogho rẹ ukoko wẹn de ghwoghwo ro bromaphiyame? O muẹro nẹ oma vwerhen owẹ. (Mat. 28:19) Ọ da dianẹ wẹ yen yono ohwo na, unu che se gbikun rẹ aghọghọ ro rhe we-e! (1 Tẹsa. 2:19, 20) Ighwoghwota ri bromaphiyame, ayen “ọbe rẹ ejiro” vwọ kẹ otu ri yono ayen vẹ ukoko na eje.—Se 2 Kọrẹnt 3:1-3.

2. (a) Onọ ọghanghanre vọ yen ofori nẹ e roro kpahen, kẹ diesorọ? (b) Die yen uyono ri Baibol? (Ni eta rehẹ obotọ na.)

² Ọ vwerhoma a vwọ riẹn nẹ iyono ri Baibol * ri te omarẹ 10,000,000 yen a niyẹnrẹn rọyen kemeranvwe kemeranvwe vwẹ akpọneje vwẹ uvwre rẹ ẹgbukpe ẹne re wanre na. Vwẹ ọke vuọvo na, ihwo ri te omarẹ 280,000 bromaphiyame kukpe kukpe kerẹ Iseri ri Jihova kugbe idibo ri Jesu Kristi. Mavọ yen a sa vwọ vwẹ ukẹcha kẹ iduduru rẹ ihwo ra vwẹ Baibol yono vwo bromaphiyame? Ọ vwọ dianẹ Jihova je vwẹ uphẹn kẹ ihwo te ọke na nẹ ayen rhe dia idibo ri Kristi na, e gbe jẹ avwanre jowọ kpakpata ra vwọ chọn ayen uko vwo yerin te ẹdia rẹ omaebrophiyame. Ọke ro chekọ rhe gro-on!—1 Kọr. 7:29a; 1 Pita 4:7.

3. Die yen a cha fuẹrẹn vwẹ uyono nana kpahen uyono ri Baibol?

 ³ Fikirẹ oborẹ iruo rẹ odibo egbe na ghanre te, Ẹko Rọvwẹrote na da nọ oghọn ukoko sansan kpahen obo re se ru rere ihwo rẹ avwanre vwẹ Baibol vwo yono se vwo yerin te ẹdia rẹ omaebrophiyame. Vwẹ uyono nana vẹ ọ rọ vwọ kpahọn, a cha mrẹ obo re se yono mie ekobaro, imishọnare, kugbe iniruo okinriariẹ re tẹn ona. * (Isẹ 11:14; 15:22) Ayen de dje oborẹ ighwoghwota vẹ ihwo rẹ ayen vwẹ Baibol vwo yono se ru rere uyono ri Baibol na sa vwọ yan obaro. Vwẹ uyono nana, a cha fuẹrẹn erọnvwọn iyorin rẹ kohwo kohwo ra vwẹ Baibol yono che ru rere ọ sa vwọ fobọ yerin te ẹdia rẹ omaebrophiyame.

4. Die yen ofori nẹ a riẹn kpahen uyono ri Baibol re ruẹ vwẹ anurhoro?

⁴ Iniọvo avwanre buebun nene ihwo ruẹ uyono ri Baibol vwẹ anurhoro rayen. Dede nẹ a sa vwẹ ona nana vwọ kọn urhurusivwe rẹ Ota rẹ Ọghẹnẹ phiyọ ubiudu rẹ ihwo, jẹ otaẹtakuẹgbe tiọyena gro-on, ọkiọvo dede e se nene ayen ta ota kudughwrẹn kudughwrẹ-ẹn. Urhurusivwe rẹ ohwo re yono na sa vwọ ganphiyọ, ighwoghwota evo ke nokpẹn rẹ ukeri ifonu rẹ ohwo na rere ayen se vwo se yẹrẹ si ovuẹ rhe kpahen ẹkpo ọvwevwerhen ọvo vwẹ Baibol na. Otaẹtakuẹgbe tiọyena sa dia vwẹ emeranvwe evo, jẹ o ji rhi hirhephiyọ uyono ri Baibol rọ yan obaro-o. Ohwo ra vwẹ Baibol yono rha ghwọrọ ọke vwo yono Baibol na-a, ọ cha sa vwomakpahotọ ji yerin te ẹdia rẹ omaebrophiyame-e.

5. Die yen Jesu tare vwẹ Luk 14:27-33 ra sa reyọ vwọ chọn ihwo rẹ avwanre vwẹ Baibol vwo yono uko?

⁵ O vwo ọkiọvo rẹ Jesu vwọ womarẹ udje vwọ ta obo ro fori nẹ e ru a da guọnọ dia odibo rọyen. Ọ ta ota kpahen ohwo rọ guọnọ bọn ohẹrhẹ kugbe ovie ro kpo ofovwin. Jesu tare nẹ ohwo rọ guọnọ bọn ohẹrhẹ che “tidia te otọ roro unu ro muru” tavwen ọ ke sa bọn re, ovie na ji che chidia totọ “roro tavwe” sẹ udu rẹ isodje rọyen cha gba oborẹ ayen guọnọ ruẹ na. (Se Luk 14:27-33.) Vwẹ idjerhe vuọvo na, Jesu riẹnre nẹ ohwo rọ guọnọ dia odibo rọyen cha nabọ roro kpahen obo ro mudiaphiyọ re vwo nene ọyen. Ọtiọyena, ofori nẹ e jiri uyono  ri kudughwrẹn kudughwrẹn kẹ ihwo rẹ avwanre vwẹ Baibol vwo yono. Mavọ yen e se vwo ru ọtiọyen?

6. Die yen e se ru e se vwo vwo uyono ri Baibol rọ yan obaro?

⁶ Ẹsosuọ, jẹ ọke wo che vwo ru uyono vwẹ anurhoro na gronphiyọ. Ọkiọvo wọ sa ta ota kpahen ẹkpo ri Baibol ivẹ ukperẹ ọvo kọke kọke wo de rhivwin bro ra. Uyono ru wo ru gronphiyọ na da riẹnriẹn ohwo na oma re, gba nọ sẹ asan herọ rẹ ovwan se chidia. Ẹkpahọnphiyọ rọyen che dje oborẹ uyono ri Baibol na ghanre kẹ te. Ọke vwọ yanran na, rere uyono na sa vwọ yan obaro kpakpata, wọ sa nọ sẹ o se yono abọ ivẹ vwẹ udughwrẹn. Jẹ, e di vwo yono obọ ọvo yẹrẹ abọ ivẹ kudughwrẹn kudughwrẹn ghwe te-e.

7. Mavọ yen oyono sa vwọ nabọ muegbe ro fiotọ vwọ kẹ uyono ọvuọvo?

⁷ Kerẹ oyono, ofori nẹ wọ nabọ muegbe vwọ kẹ uyono ọvuọvo. Wo se ru ọnana womarẹ wo vwo se asan rẹ ovwan che yono na vẹ ẹkpo ri Baibol rehẹ evun rọyen. Nabọ vwo ẹruọ rẹ ẹkpo na. Roro kpahen uyovwinrota na, iyovwinreta itete, enọ, ẹkpo ri Baibol ra tanẹ e “se,” ifoto, kugbe ividio re sa nẹrhẹ e vwo ẹruọ rẹ ẹkpo na fiotọ. Gbe roro kpahen ohwo wo che yono na kugbe oborẹ wo che dje ovuẹ na kẹ lọlọhọ rere o se vwo vwo ẹruọ rọyen phẹphẹre ji yeren akpọ nene.—Neh. 8:8; Isẹ 15:28a.

8. Die yen eta ri Pọl rehẹ Kọlose 1:9, 10 yono avwanre kpahen ẹrhovwo ra nẹ vwọ kẹ ihwo ra vwẹ Baibol vwo yono?

⁸ Kerẹ ẹbẹre ọvo rẹ egbemuo wẹn, nẹrhovwo rhe Jihova kpahen ohwo na vẹ ukẹcha rọ guọnọre. Nẹrhovwo rhe Jihova nẹ ọ chọn wẹ uko vwo yono ohwo na vwẹ idjerhe o de te ẹwẹn rọyen. (Se Kọlose 1:9, 10.) Nọ oma wẹn sẹ o vwo orọnvwọn ọvo rẹ ohwo na vwo ẹruọ rọyen yẹrẹ rhọnvwephiyọ-ọ. Karophiyọ nẹ ọdavwẹ wẹn ọyen wọ vwọ chọn uko vwo yerin te ẹdia rẹ omaebrophiyame.

9. Mavọ yen oyono na sa vwọ chọn ohwo ro yono uko vwo muegbe? Djekpahọn.

⁹ Avwanre rhẹro rọyen nẹ uyono ri kọke kọke rẹ ovwan ruẹ na cha vwẹ ukẹcha kẹ vwo dje ọdavwaro phia kpahen oborẹ Jihova vẹ Jesu rure, ọtiọyena ọ cha davwen vwo yono kpobarophiyọ. (Mat. 5:3, 6) Rere ọ sa vwọ mrẹ erere nẹ  uyono na vọnvọn, ofori nẹ ohwo re yono na mu ẹwẹn phiyọ obo ro yono na. Rere o se vwo ru ọtiọyen, vuẹ obo rọ ghanre te ro vwo muegbe hẹrhẹ uyono ọvuọvo, womarẹ o vwo se asan rẹ ovwan che yono na phiyotọ ji roro kpahen oborẹ uyono na shekpahọn. Mavọ yen oyono na sa vwọ vwẹ ukẹcha phia? Wẹ vẹ ohwo na muegbe uyono ọvo kugbe, wo dje obo re ruo wan kẹ. * Dje obo ra sa vwọ mrẹ ẹkpahọnphiyọ rẹ enọ na kẹ, kugbe obo ra vwọ jokaphiyọ ẹkpo na sa vwọ vwẹ ukẹcha kẹ vwọ karophiyọ ẹkpahọnphiyọ na. Gba vuẹ nẹ ọ vwẹ eta romobọ rọyen vwọ kpahenphiyọ onọ na. O de ru ọtiọyen, ku wọ sa riẹn obo ro vwo ẹruọ asan re yono na te. O ji vwo orọnvwọn ọfa wọ sa vuẹ ohwo wọ yono na nẹ o ru.

10. Diesorọ ọ vwọ ghanre re vwo se Baibol na kẹdẹ kẹdẹ, die yen a guọnọre a ke sa mrẹ erere vwo nẹ isese ri Baibol?

¹⁰ Vwọba uyono ri kudughwrẹn kudughwrẹn rẹ ovwan che ru, ohwo re yono na cha mrẹ erere siẹrẹ o de ru erọnvwọn evo komobọ. Ofori nẹ ọ nẹrhovwo rhe Jihova. Vwẹ idjerhe vọ? Ọyen ọ cha vwọ kerhọ je ta ota kẹ Jihova. Ọ sa kerhọ rẹ Ọghẹnẹ womarẹ isese ri Baibol ri kẹdẹ kẹdẹ. (Jos. 1:8; Une 1:1-3) Dje obo ra vwẹ “Ọrhuẹrẹphiyotọ rẹ Isese ri Baibol” re se printi phia rọhẹ jw.org/urh vwo ruiruo. * Rere ọ sa vwọ mrẹ erere vwo nẹ isese ri Baibol rọyen rhe, jiro kẹ nẹ o roro kpahen oborẹ Baibol na ta kpahen Jihova vẹ obo rọ sa vwọ vwẹ obo ro yonori na vwo ruiruo.—Iruo 17:11; Jems 1:25.

11. Mavọ yen ohwo re yono na sa vwọ riẹn obo ra nẹrhovwo, diesorọ o vwo fo nẹ ọ nẹrhovwo rhe Jihova ọkieje?

¹¹ Jiro kẹ ohwo wo yono na nẹ ọ nẹrhovwo rhe Jihova kẹdẹ kẹdẹ. Nẹrhovwo ro nẹ otọ rẹ ubiudu rhe vwẹ ọtonphiyọ vẹ okuphiyọ rẹ uyono ọvuọvo, wo mi ji se odẹ rọyen vwẹ ẹrhovwo na. Ọ vwọ kerhọ rẹ ẹrhovwo wẹn na, o che yono obo ra nẹrhovwo ro nẹ otọ rẹ ubiudu vwọ kẹ Jihova Ọghẹnẹ, ọ me vwẹ odẹ ri Jesu Kristi kuophiyotọ. (Mat. 6:9; Jọn 15:16) Di roro kpahen oborẹ isese ri Baibol ri kẹdẹ kẹdẹ (a vwọ kerhọ rẹ Jihova) vẹ ẹrhovwo (a vwọ ta ota kẹ Jihova) sa vwọ vwẹ ukẹcha kẹ ohwo wo yono na vwo  sikẹrẹ Jihova phiyọ! (Jems 4:8) O de ru ọtiọyen kẹdẹ kẹdẹ, ọ cha chọn uko vwo yerin te ẹdia rẹ omaẹvwọkpahotọ vẹ omaebrophiyame. Ọrhọ yen orọnvwọn ọfa rọ sa chọn uko?

12. Mavọ yen wọ sa vwọ vwẹ ukẹcha kẹ ohwo ru wo yono vwo sikẹrẹ Jihova?

¹² E jẹ oborẹ wo yono ohwo na te ubiudu rọyen, ukperẹ ọ vwọ dia erianriẹn ghevweghe. Diesorọ? Avwanre guọnọre nẹ ohwo re yono na riẹn Jihova. Jẹ, ofori nẹ obo re yono na te ubiudu rọyen rere o se vwo yeren akpọ nene. Jesu yono ihwo erọnvwọn buebun, obo ro yono ayen na je ayen. Ẹkẹvuọvo, ihwo nenire kidie obo ro yono ayen na te ubiudu rayen. (Luk 24:15, 27, 32) Ofori nẹ ohwo wo yono na mrẹ Jihova kerẹ Ohwo rọ herọ dẹn, Ọsẹ, Ọghẹnẹ, kugbe Ugbeyan re se sikẹrẹ. (Une 25:4, 5) Ovwan de ruẹ uyono na, jẹ ohwo na mrẹ iwan iyoyovwin rẹ Ọghẹnẹ vughe. (Eyan. 34:5, 6; 1 Pita 5:6, 7) O toro uyovwinrota rẹ ovwan yono-o, tẹnrovi oka rẹ Ohwo rẹ Jihova hepha. Chọn ohwo na uko vwo yono kpahen iwan iyoyovwin ri Jihova kerẹ ẹguọnọ, uruemuesiri, kugbe arodọnvwẹ. Jesu tare nẹ “urhi rẹsosuọ kugbe ọ rọ marho” ọyen wọ vwọ “guọnọ Ọrovwohwo Ọghẹnẹ wẹn.” (Mat. 22:37, 38) Vwẹ ukẹcha kẹ ohwo ru wo yono na vwo vwo ẹguọnọ ri Jihova.

13. Djudje obo ra sa vwọ vwẹ ukẹcha kẹ ohwo re yono vwo yono kpahen iruemu ri Jihova.

¹³ Vwẹ ọke rẹ uyono na, dje oboresorọ wo vwo vwo ẹguọnọ ri Jihova. Ọnana sa nẹrhẹ ọ mrẹvughe nẹ ofori o vwo vwo uvi rẹ oyerinkugbe vẹ Jihova. (Une 73:28) Kerẹ udje, o vwo eta evo vwẹ ọbe rẹ ovwan yono na yẹrẹ ẹkpo ri Baibol ọvo ro dje emuọvo kpahen ẹguọnọ, aghwanre, orhiẹn-ebro abavo, yẹrẹ ẹgba ri Jihova ro te we ẹwẹn? Dje vwọ kẹ ohwo wo yono na, wo mi jẹ ọ riẹn nẹ ọnana ọvo usun rẹ iroro rọ nẹrhẹ wo vwo ẹguọnọ ri Jihova. Orọnvwọn ọfa je herọ rẹ ihwo ra vwẹ Baibol vwo yono che ru ayen se vwo yerin te ẹdia rẹ omaebrophiyame.

14. Die yen Hibru 10:24, 25 ta kpahen uyono ẹra rọ sa vwẹ ukẹcha kẹ ohwo re yono na vwọ yan obaro?

¹⁴ Avwanre eje guọnọre nẹ ihwo ra vwẹ Baibol yono yerin te ẹdia rẹ omaebrophiyame. Idjerhe ọghanghanre ọvo a sa vwọ chọn ayen uko yen e vwo jiri uyono ẹra kẹ  ayen. Ighwoghwota re tẹn ona tare nẹ ihwo re yono Baibol na re fobọ ton uyono ẹra phiyọ yan obaro kpakpata. (Une 111:1) Ighwoghwota evo vuẹ ihwo rẹ ayen yono nẹ ofori ayen kpo uyono rere ayen sa vwọ mrẹ erere vọnvọn vwo nẹ Baibol na. Wẹ vẹ ohwo wọ vwẹ Baibol yono na se Hibru 10:24, 25 kugbe, rere wọ vuẹ erere rọ cha mrẹ siẹrẹ o de kpo uyono. Hworo ividio na Die Yen E Ruẹ Vwevunrẹ Ọguan Ruvie? * vwọ kẹ. Vwẹ ukẹcha kẹ ohwo wo yono na vwọ mrẹvughe nẹ uyono ẹra ọyen orọnvwọn ọvo rọ pha ghanghanre vwẹ akpeyeren rọyen.

15. Die yen e se ru vwo jiri uyono ẹra ọkieje vwọ kẹ ihwo ra vwẹ Baibol vwo yono?

¹⁵ Die yen wo se ru ọ da dianẹ ohwo ru wo yono ji rhi kpo uyono-o yẹrẹ o gbe ẹdẹ rẹ uyono? Vuẹ kpahen orọnvwọn ọvo rọ vwerhen owẹ oma wo yonori vwẹ uyono, o kri nọ-ọ na. Ọnana sa nẹrhẹ o vwo owenvwe ro vwo kpo uyono vrẹ ọ rẹ wọ de vwọ vuẹ nẹ ọ ra. Vwẹ ọbe Uwevwin Orhẹrẹ yẹrẹ Ọbe Uyono rẹ Akpeyeren vẹ Iruo Uvie Na re yono vwẹ udughwrẹn yena vwọ kẹ. Dje obo re che yono vwẹ uyono rọ vwọ kpahọn, wọ me jẹ nọ kpahen ẹbẹre ro me je vwẹ uyono na. Oborẹ ohwo ru wo yono na cha mrẹ vwẹ uyono rọyen rẹsosuọ cha vrẹ ọ rọ mrẹre vwẹ ẹga efa rọ rare jovwo. (1 Kọr. 14:24, 25) Ọ cha mrẹ ihwo rọ sa vwẹrokere omamọ rẹ udje rayen, re je sa chọn uko vwo yerin te ẹdia rẹ omaebrophiyame.

16. Die yen a guọnọre e ki se ru uyono ri Baibol ro che sun kpo omaebrophiyame, kẹ die yen e che yono vwẹ uyono rọ cha na?

¹⁶ Mavọ yen e se vwo ru uyono ri Baibol ro se sun kpo omaebrophiyame? A sa vwẹ ukẹcha kẹ ohwo re yono vwọ mrẹ ọghanrovwẹ rẹ uyono na, siẹrẹ a da vuẹ nẹ o muegbe hẹrhẹ uyono ọvuọvo ji ru uyono na kudughwrẹn kudughwrẹn. Ofori nẹ a vuẹ nẹ ọ nẹrhovwo kẹdẹ kẹdẹ, ji vwo omamọ oyerinkugbe vẹ Jihova. O ji fo nẹ a kọn oruru rẹ uyono ẹra phiyọ oma. (Ni ekpeti na “ Oborẹ Ihwo re Yono Che Ru Ayen Vwo Yerin te Ẹdia rẹ Omaebrophiyame” rọhẹ aruọbe 12.) Ẹkẹvuọvo, uyono rọ vwọ kpahen ọnana che dje erọnvwọn iyorin efa rẹ ighwoghwota che ru rọ sa nẹrhẹ ihwo rẹ ayen yono yerin te ẹdia rẹ omaebrophiyame.