1. Mavọ yen avwanre ru riẹn nẹ iruo rẹ odibo egbe na sivwin arhọ?

IRUO rẹ odibo egbe na sivwin arhọ! Mavọ yen avwanre ru riẹn? Jesu vwọ vwẹ iji rọhẹ Matiu 28:19, 20 [NW] phia, ọ da ta: “Ovwan gba yanran, . . . re gbe idibo . . . , we bru ayen phiyọ ame.” Mavọ yen omaebrophiyame ghanre te? Ọyen ọvo usun rẹ erọnvwọn ra guọnọre ohwo ki se vwo usivwin. Ọyen oboresorọ Pita vwọ vuẹ iniọvo na nẹ, “[“omaebrophiyame,” NW] sivwẹ ovwan vwẹ asakiephana, . . . vwẹ oma rẹ evrẹnushi ri Jesu Kristi.” (1 Pita 3:21) Kọyen ohwo de bromaphiyame, ko se vwo iphiẹrophiyọ ro vwo vwo arhọ ri bẹdẹ.

2. Oka rẹ iyono vọ yen 2 Timoti 4:1, 2 tare nẹ avwanre dia?

² Avwanre cha wian kpahen ona rẹ uyono rẹ avwanre tavwen a ke sa chọn ihwo uko vwọ dia idibo ri Jesu. (Se 2 Timoti 4:1, 2.) Diesorọ? Kidie Jesu vwẹ iji nana kẹ avwanre: “Ovwan gba yanran, . . . re gbe idibo . . . , we bru ayen phiyọ ame.” Ọyinkọn Pọl tare nẹ a “yọnre” iruo nana gan, “kidie wo de ru ọtiọye ku wo sivwi oma wẹn kugbe ayen otu ri nyo we.” (1 Tim. 4:16) Avwanre guọnọrẹ nẹ ona uyono rẹ avwanre nabọ fiotọ kidie iruo rẹ odibo egbe na churobọ si eyono.

3. Die yen a cha fuẹrẹn vwẹ uyono nana kpahen uyono ri Baibol?

³ Ọkieje yen avwanre vwo yono iduduru rẹ ihwo uyono rọhẹ Baibol na. Jẹ, kirobo ra tare vwẹ uyono rọ wanre na, avwanre guọnọ riẹn obo ra sa vwọ chọn ihwo buebun uko vwo yerin te ẹdia rẹ ayen vwo bromaphiyame kerẹ idibo ri Jesu. Vwẹ uyono nana, a cha fuẹrẹn erọnvwọn iyorin efa  rẹ kohwo kohwo se ru vwọ chọn ohwo ro yono uko vwo yerin te ẹdia rẹ omaebrophiyame.

4. Diesorọ oghwoghwota vwo sun oma rọyen ọke rọ da vwẹ Baibol vwo yono ohwo? (Ji ni eta rehẹ obotọ na.)

⁴ Avwanre vwo ẹguọnọ rẹ oborẹ avwanre yono ihwo vwẹ Baibol. E rhe nomaso-o, ọnana sa nẹrhẹ a ta eta ibuebun. Ẹkẹvuọvo, owenẹ ọ dia Uyono rẹ Uwevwin Orhẹrẹ, Uyono ri Baibol Rukoko, yẹrẹ uyono ri Baibol re vwo yono ohwo vwẹ uwevwin rọyen, e jẹ ohwo rọ vwẹrote uyono na ta eta ibuebu-un. Ọ sa vwọ vwẹ Baibol na vwo yono, ofori nẹ oghwoghwota na davwẹngba vwo sun oma rọyen, ukperẹ ọ vwọ vuẹ ohwo ro yono na erọnvwọn eje rọ riẹnre kpahen ẹkpo ri Baibol ro seri. * (Jọn 16:12) Vwẹ erianriẹn ri Baibol ro rhe we asaọkiephana vwọ vwanvwe ọ ru wo vwori ọke wo vwo bromaphiyame nu obọ. Ọke yena, ọ sa dianẹ iyono eghanghanre evo re pha lọlọhọ yen wo vwo ẹruọ rọyen. (Hib. 6:1) Ikpe buebun wanvrẹ tavwen wọ ke sa riẹn oborẹ wọ riẹnre enẹna, ọtiọyena wọ davwẹngba vwo yono ohwo kpokpọ erọnvwọn ejobi ofuọvo-o.

5. (a) Vwo nene obo rehẹ 1 Tẹsalonaika 2:13, die yen avwanre guọnọre nẹ ohwo re yono na mrẹvughe? (b) Mavọ yen e se vwo jiro kẹ nẹ ọ vuẹ ihwo efa obo ro yono?

⁵ Avwanre guọnọ chọn ohwo rẹ avwanre yono na uko vwọ mrẹvughe nẹ Ota rẹ Ọghẹnẹ yen obo ro yono na nurhe. (Se 1 Tẹsalonaika 2:13.) Mavọ yen e se vwo ru ọtiọyen? Jiro kẹ ohwo na nẹ ọ vuẹ ihwo efa kpahen obo ro yono. Ukperẹ wo vwo djisẹ rẹ ẹkpo ri Baibol kẹ, vuẹ nẹ ọ ta obo ro vwo ẹruọ rọyen wan. Chọn uko vwọ mrẹ oborẹ Ota rẹ Ọghẹnẹ djobọte komobọ. Nọ enọ re sa nẹrhẹ ọ ta obo ro rorori kpahen ẹkpo ri Baibol evo ro seri. (Luk 10:25-28) Kerẹ udje, nọ: “Mavọ yen ẹkpo ri Baibol nana chọn wẹ uko vwọ riẹn uruemu ọvo rẹ Jihova vwori?” “Mavọ yen ọ chọn wẹ uko wan?” “Mavọ yen oma ru we ru wọ vwọ riẹn ọnana enẹna?” (Isẹ 20:5) Obo rẹ ohwo na vwo ẹguọnọ rẹ uyono na je reyọ vwo ruiruo te yen ma ghanre, ọ dia uche ro yonori-i.

6. Diesorọ o vwo fo nẹ wo se oghwoghwota rọ tẹn ona rẹ uyono boma vwo kpo asan rẹ ohwo ru wo yono?

⁶ Wo se se ighwoghwota re tẹn ona rẹ uyono boma vwo kpo asan rẹ ihwo ru wo yono? Wo de ru ọtiọyen, ku wọ sa nọ ayen oborẹ ayen niso kpahen oborẹ wo yono  ihwo na wan, kugbe sẹ wọ nabọ vwẹ Baibol na vwo yono ihwo fiotọ. Omaevwokpotọ yen cha nẹrhẹ wo se ru ona rẹ uyono wẹn yovwinphiyọ. (Ji ni Iruo rẹ Iyinkọn Na 18:24-26.) Wo de yono ohwo ọvo nu, wọ sa nọ oghwoghwota rọ tẹn ona na sẹ o rorori nẹ ohwo na nabọ vwo ẹruọ rẹ obo ro yonori. Wọ da riẹn nẹ wo che kpo asan vwẹ udughwrẹn ọvo yẹrẹ tobọ vrẹ ọtiọyen dede, wọ sa vuẹ nẹ ọ chọn wẹ uko vwo yono ohwo na. Ọyena cha nẹrhẹ uyono na dia ọ rẹ ọkieje, ọ je cha nẹrhẹ ohwo re yono na riẹn ọghanrovwẹ rẹ uyono na. Wọ vwẹ uyono na vwo ruẹ “ọromobọ,” yẹrẹ no nẹ ohwo vuọvo che se yono ohwo na fiotọ-ọ. Karophiyọ nẹ wọ guọnọ obo ri me yovwin kẹ ohwo na, rere erianriẹn rọyen se vwo kpobarophiyọ.

7. Die yen cha nẹrhẹ ohwo re yono se vwo ẹguọnọ rẹ obo ro yono?

⁷ E jẹ ohwo ru wo yono na mrẹvughe nẹ wo vwo ẹguọnọ vẹ imuẹro kpahen oborẹ wo segbuyota. (1 Tẹsa. 1:5) Ọyena cha nẹrhẹ o se vwo ẹguọnọ rẹ obo ro yono. Ọ da dia obo ro shephiyọ, vuẹ kpahen oborẹ irhi ri Baibol chọn wẹ uko wan. Ọke yena, kọ cha mrẹvughe nẹ Baibol na vọnre vẹ odjekẹ ri ji che fierere kẹ.

8. Die yen wọ sa vwọba yono ohwo, kẹ diesorọ wo vwo ru ọtiọyen?

⁸ Ọke wo de yono ohwo na, wọ me vuẹ kpahen iniọvo sansan ri ji rhiẹromrẹ ebẹnbẹn ro hirharokuẹ enẹna, kugbe oborẹ ayen se vwo phi ayen kparobọ. Wo se se oniọvo ọvo boma ru wọ riẹnre nẹ udje rọyen che fierere kẹ ohwo ru wo yono na. Yẹrẹ wọ sa mrẹ oborẹ iniọvo sansan rhiẹromrẹ vwẹ obotọ rẹ uyovwinrota na “Baibol na Wene Ohwo” rọ vwomaphia okpokpahọn vwẹ jw.org. * Ividio kugbe iyovwinreta tiọyena cha nẹrhẹ ohwo ru wo yono na riẹn obo rọ ghanre te ra vwọ vwẹ iji ri Baibol na vwọba akpọ yerin.

9. Mavọ yen wo se vwo jiro kẹ ohwo ru wo yono na nẹ ọ vuẹ orua kugbe igbeyan rọyen obo ro yono?

⁹ Ọ da dianẹ ohwo re yono na rọvwọn re, ọrivẹ rọyen na ji yono? Ọ da dianẹ o yono-o, gba vuẹ nẹ ọ vwomaba uyono na. Vuẹ ohwo wo yono na nẹ ọ vuẹ ihwo orua kugbe igbeyan rọyen obo ro yono. (Jọn 1:40-45) Vwẹ idjerhe vọ? Wọ sa nọ: “Mavọ yen wo che dje uyota nana kẹ orua wẹn wan?” yẹrẹ “Ẹkpo ri Baibol vọ yen  wo se vwo dje uyota na kẹ ugbeyan wẹn?” Wo de ru ọtiọyen, ju wo yono ohwo na obo rọ sa vwọ dia oyono. O de rhi muwan re, kọ sa ton aghwoghwo phiyọ kerẹ oghwoghwota ro ji rhi bromaphiyame-e. Wọ sa nọ sẹ ọ riẹn ohwo ọfa rọ guọnọ yono Baibol na. Ohwo tiọyena da herọ, ohwo wo yono na se ru ọrhuẹrẹphiyotọ wo vwo dje ividio rẹ Mavọ Yen E Ruẹ Uyono ri Baibol Wan? vwọ kẹ. *

10. Kirobo re djere vwẹ 1 Tẹsalonaika 2:7, 8, mavọ yen ighwoghwota sa vwọ vwẹrokere Pọl?

¹⁰ Ofori nẹ ighwoghwota vwo ọdavwẹ rẹ ihwo rẹ ayen yono. Ni ayen kerẹ ihwo re sa rhe dia iniọvo wẹn vwevunrẹ ukoko na. (Se 1 Tẹsalonaika 2:7, 8.) Ọ lọhọre rẹ ayen vwo chukoku igbeyan rẹ akpọ na, ji ru ewene rere ayen sa vwọ ga Jihova-a. E jẹ avwanre chọn ayen uko vwọ guọnọ omamọ rẹ igbeyan vwevunrẹ ukoko na. Vwẹ ugbeyan vwo mu ohwo ru wo yono na, nene ghwọrọ ọke kugbe, ọ ghwa dia wo vwo ruẹ uyono na ọvo-o. Wọ da vwẹ ifonu se, si ovuẹ rhe, yẹrẹ kọn bro ra vwẹ ọke ọfa, ku wo se djephia nẹ wo ghini vwo ọdavwẹ rọyen.

11. Die yen avwanre guọnọre nẹ ihwo re yono mrẹ vwevunrẹ ukoko na, kẹ diesorọ?

¹¹ Ihwo evo tare nẹ, “Ọ dia ọsẹ vẹ oni ọvo yen yọnre ọmọ re vwiẹ totọ nu-u.” Avwanre sa ta: “Ukoko na eje yen chọn ohwo uko vwọ dia odibo.” Ọnana yen sorọ ighwoghwota evo vwo dje ohwo rẹ ayen yono kẹ iniọvo re sa dia omamọ udje kẹ ayen vwevunrẹ ukoko na. Ọke yena ohwo re yono na kọ sa riavwerhen rẹ uvi rẹ oyerinkugbe vẹ ihwo ri Jihova re cha chọn uko je bọn gan. Avwanre guọnọre nẹ kohwo kohwo re yono mrẹ oma rọyen kerẹ ẹbẹre ọvo rẹ ukoko na. Avwanre guọnọre nẹ ọ riavwerhen rẹ ẹguọnọ rẹ okugbe rẹ iniọvo rẹ avwanre rehẹ akpọeje. Ọyena cha nẹrhẹ ọ lọhọ rọ vwọ kẹnoma kẹ ihwo re cha sa chọn uko vwo vwo ẹguọnọ ri Jihova-a. (Isẹ 13:20) Igbeyan ro vwori jovwo da djẹ nẹ oma, ko se vwo imuẹro nẹ ọ cha mrẹ uvi rẹ igbeyan buebun vwevunrẹ ukoko ri Jihova.—Mak 10:29, 30; 1 Pita 4:4.

12. Diesorọ o vwo fo nẹ a vuẹ ohwo re yono na kpahen omaẹvwọkpahotọ kugbe omaebrophiyame?

¹² Nabọ dje ọghanrovwẹ rẹ omaẹvwọkpahotọ vẹ omaebrophiyame. Kidie  ọdavwẹ rẹ avwanre vwo yono ihwo ọyen ayen vwo bromaphiyame kerẹ idibo ri Jesu. O de yono vwẹ emeranvwe evo nu, ma rho siẹrẹ ọ da ton uyono ẹra phiyọ re, ofori nẹ ohwo na mrẹvughe nẹ e yono rere ọ sa vwọ ga Jihova kẹre ọvo usun rẹ Iseri ri Jihova.

13. Owọẹjẹ sansan vọ yen ohwo cha reyọ tavwen o ki yerin te ẹdia rẹ omaebrophiyame?

¹³ O vwo erọnvwọn sansan rẹ ohwo re yono rọ guọnọ yerin te ẹdia rẹ omaebrophiyame che ru. Ẹsosuọ, ohwo na cha riẹn Jihova ji vwo esegbuyota vẹ ẹguọnọ kpahọn. (Jọn 3:16; 17:3) O mi rhi vwo oyerinkugbe vẹ Jihova, ji sikẹrẹ iniọvo rẹ ukoko na. (Hib. 10:24, 25; Jems 4:8) Ukuotọ rọyen, o mi siobọnu erharhe uruemu ro vwori, ji kurhẹriẹ. (Iruo 3:19) Esegbuyota rọyen mi rhe muo vwọ vuẹ ihwo efa kpahen obo ro segbuyota. (2 Kọr. 4:13) Ọ me vwomakpahotọ kẹ Jihova, ji djephia womarẹ omaebrophiyame. (1 Pita 3:21; 4:2) Ọyena cha dia ẹdẹ rẹ aghọghọ kẹ ihwo ejobi! Nabọ jiri ohwo ru wo yono vwọ kẹ ẹyan-obaro rọyen, wo mi ji phiuduphiyọ awọ rere ọ sa vwọ rha yan obaro.

14. Mavọ yen oghwoghwota sa vwọ fuẹrẹn ẹyan-obaro rẹ ohwo ro yono?

¹⁴ Ofori nẹ avwanre vwẹ erhiorin vwọ chọn ohwo re yono uko vwo yerin te ẹdia rẹ omaebrophiyame. O ji fo nẹ a guọnọ ọke ro fori vwọ fuẹrẹn ni sẹ ọ ghene guọnọ ga Jihova. Ohwo ru wo yono na djephia nẹ ọyen davwẹngba vwo nene iji ri Jesu? Gbanẹ ọ de guọnọ riẹn ikuegbe evwevwerhen evo vwẹ Baibol na?

15. Oka rẹ ẹyan-obaro vọ yen ofori nẹ oghwoghwota jokaphiyọ vwẹ oma rẹ ohwo ro yono?

¹⁵ Fuẹrẹn ẹyan-obaro rẹ ohwo ru wo yono na nọke ra ruọke. Kerẹ udje, ọ sa nẹrhovwo rhe Jihova? Ọ ta ọdavwẹ rọyen kẹ? (Une 116:1, 2) O vwo omavwerhovwẹn kpahen ese rẹ Ota rẹ Ọghẹnẹ? (Une 119:97) O kpo uyono ọkieje? (Une 22:22) O ru ewene evo vwẹ akpeyeren rọyen re? (Une 119:112) Ọ vuẹ ihwo rẹ orua vẹ igbeyan rọyen obo ro yono? (Une 9:1) Ma rho kparobọ, o vwo ẹwẹn rọ vwọ dia Oseri ri Jihova? (Une 40:8) Siẹrẹ ọ rha yan obaro vwẹ ọvo usun rẹ ẹdia nana eje-e, gba vwẹ ona vwọ guọnọ otọ rẹ  oboresorọ, rere wo rhievun nene ta ota kpahọn. *

16. Die yen e che ni vwọ dobọ rẹ uyono rẹ ohwo ji?

¹⁶ Nọke ra ruọke, wọ me rha fuẹrẹn ohwo na sẹ ofori nẹ wo ji rhe yono. Nọ oma wẹn: ‘Ohwo na muegbe rẹ uyono na phiyotọ? O vwo omavwerhovwẹn kpahen uyono ẹra? O ji vwo erharhe uruemu? O ji kpo ẹga rẹ efian?’ Ẹkpahọnphiyọ na da dia e, wo de ji muomaphiyọ uyono na ghene, ku wọ cha họhọ ohwo ro yono ohwo ọfa obo ra rhẹrhẹ, jẹ ohwo na guọnọre nẹ ame te ọyen oma-a! Ọ da dianẹ ohwo na vwo ẹguọnọ kpahen obo ro yono-o, ọ je guọnọ ru ewene vwẹ akpeyeren rọye-en, kẹ diesorọ wo vwo yono ghene?

17. Vwo nene obo rehẹ 1 Timoti 4:16, die yen ofori nẹ ihwo eje re vwẹ Baibol vwo yono ihwo efa ru?

¹⁷ Avwanre vwẹ ẹro ọghanghanre vwo nẹ owian rẹ odibo egbe na, avwanre je guọnọ nẹ ihwo rẹ avwanre yono na yerin te ẹdia rẹ omaebrophiyame. Ọnana yen sorọ o vwo fo nẹ a vwẹ Baibol vwo yono ayen, e mi rhe ji ru ọtiọyen vẹ oruru kugbe obọdẹn rẹ imuẹro. Avwanre jiro kẹ ayen nẹ ayen vwẹ igbeyan vwẹ ukoko na. Vwọba, avwanre kanrunumuẹ ọghanrovwẹ rẹ omaẹvwọkpahotọ kugbe omaebrophiyame, avwanre je fuẹrẹn ẹyan-obaro rayen nọke ra ruọke. (Ni ekpeti na “ Oborẹ Ighwoghwota Che Ru Rere Ihwo rẹ Ayen Yono se Vwo Yerin te Ẹdia rẹ Omaebrophiyame” rọhẹ aruọbe 13.) Oma vwerhen avwanre nẹ avwanre se vwobọ vwẹ iruo nana ro sivwin arhọ na! E jẹ avwanre davwẹngba rẹ avwanre eje vwo ru uyono ri Baibol ro che sun ihwo kpo omaebrophiyame.