1. Die yen sa djẹ ro ẹwẹn rẹ avwanre e de roro kpahen ohwo ro gbe arodọnvwẹ?

A DA ta ota kpahen ohwo ro gbe arodọnvwẹ, avwanre sa vwẹ ẹwẹn vwo roro ohwo ro ruẹ ẹse, ro vwo erorokẹ rọ je pha ghwologhwolo. Ikuegbe ri Jesu kpahen ohwo ri Sameria na sa djẹ ro ẹwẹn rẹ avwanre. Ọshare ri Sameria ọvo vwọ mrẹ ohwo ri Ju rẹ iji hweri o de “ni arodọvwẹ ke.” Fikiridie nẹ “aro rọye” dọn ọshare na, o de ru ọrhuẹrẹphiyotọ rọ vwọ vwẹrote. (Luk 10:29-37) Udje nana ghwa odjephia rẹ uruemu oyoyovwin rẹ arodọnvwẹ ri Jihova. Uruemu yena ọyen ẹbẹre ọvo rẹ ẹguọnọ rẹ Ọghẹnẹ, o dje ọnana phia kẹdẹ kẹdẹ womarẹ obo ro nene avwanre yerẹn wan.

2. Ẹdia ọfa vọ yen e de se dje arodọnvwẹ phia?

² O ji vwo ẹbẹre rẹ arodọnvwẹ ọfa rọ je sa djẹ ro ẹwẹn rẹ avwanre. Ọnana churobọsi ra vwọ kpairoro vrẹ oja ro fori nẹ e gbe kẹ ohwo. Ọ da dia ọtiọyen kọyen Jihova ghini gbe arodọnvwẹ kẹ avwanre. Ọbuine na tare: “O nene avwanre yerẹ kirobo rẹ umwemwu rẹ avwanre epha-a.” (Une 103:10) Dedena o vwo ọke ri Jihova je vwọ vwẹ ọghwọku ro fori vwọ kẹ ohwo ro ruchọ.

3. Enọ vọ yen a cha kpahephiyọ?

³ Vwẹ uyono nana a cha kpahephiyọ enọ erha: Diesorọ Jihova vwo gbe arodọnvwẹ? Mavọ yen ọghwọku vwo churobọsi arodọnvwẹ? Kugbe, die yen sa chọn avwanre uko vwo gbe arodọnvwẹ? E ja mrẹ oborẹ Baibol na kpahephiyọ enọ nana wan.

4. Diesorọ Jihova vwo gbe arodọnvwẹ?

⁴ Jihova vwo owenvwe ọgangan ro vwo gbe arodọnvwẹ. Ọyinkọn Pọl siri nẹ Ọghẹnẹ vwo “arodọnvwẹ buebu.” Vwẹ ẹdia nana, Pọl tanẹ Jihova gbe arodọnvwẹ kidie o kẹ idibo rọyen ri jẹgba iphiẹrophiyọ ayen vwo kpo odjuvwu.  (Ẹfe. 2:4-7) Ẹkẹvuọvo, arodọnvwẹ ri Jihova vrẹ ọtiọyen. Ọbuine David de si: “Ọrovwohwo yovwi kẹ ihwo ejobi, aruẹdọ rọye herọ vwẹ enu rẹ emu ejobi rọ mare.” (Une 145:9) Jihova gbe arodọnvwẹ kẹ ihwo ọke ro de fo nẹ o ru ọtiọyen kidiẹ o vwo ẹguọnọ rẹ ihwo eje.

5. Mavọ yen Jesu vwo yono kpahen arodọnvwẹ ri Jihova?

⁵ Jesu ọvo yen ohwo rọ nabọ riẹn owenvwe rẹ Jihova vwori ro vwo dje arodọnvwẹ phia. Jihova vẹ Jesu diarọ kugbe ikpe buebun vwẹ obodjuvwu tavwen Jesu ke rhe otọrakpọ na. (Isẹ 8:30, 31) Ọke buebun yen Jesu vwọ mrẹ Ọsẹ rọyen ro gbe arodọnvwẹ kẹ ihworakpọ ri jẹgba. (Une 78:37-42) Jesu vwo hẹ otọrakpọ na, ọke buebun yen ọ vwọ ta ota kpahen uruemu oyoyovwin rẹ Ọsẹ rọyen nana ọke ro de yono ihwo.

6. Mavọ yen Jesu vwo ru udje rẹ oborẹ Ọsẹ rọyen gbe arodọnvwẹ wan?

⁶ Kirobo re yonori vwẹ uyono rọ wanre na, Jesu reyọ udje rọ ọmọrosoghoro na vwo dje oborẹ Jihova vwo owenvwe ọgangan te ro vwo gbe arodọnvwẹ kẹ avwanre. Ọmọ na vrẹ nẹ uwevwin “ọ da rhaphiẹ ekuakua na ejobi kufia.” (Luk 15:13) Ukuotọ rọyen, o de kurhẹriẹ vwo nẹ orharhe akpọ ro yerẹn jovwo na, je vwomakpotọ rhivwin kpo. Die yen ọsẹ na ruru? Ọ ghwọrọ ọke tavwen ọmọ na ke riẹn nẹ ọsẹ na vwo ghovwo ọyen re-e. Jesu da ta: “Ẹkẹvuọvo rọ vwọ cha vwẹ ogboko re, ọsẹ rọye da mrẹ, ehrọre rọye da riọ, ọ da djẹ ra gbanọ ọ da fiọnfiọn unu.” Ọsẹ na phọphọ ọmọ rọyen na-a. Ukperẹ ọtiọyen, kidie nẹ o vwo arodọnvwẹ o de vwo ghwovwo ọmọ na ji dede ruẹ orua na. Umwemwu rẹ ọmọ na ruru na ghini vwo ọkpa jovwo, ẹkẹvuọvo kidie nẹ o kurhẹriẹ, ọsẹ rọyen de vwo ghwovwo. Ọsẹ na ro gbe arodọnvwẹ vwẹ udje na mudiaphiyọ Jihova. Jesu vwẹ udje nana vwo yono avwanre nẹ Jihova vwo owenvwe ro vwo ghovwo irumwemwu ri kurhẹriẹ nẹ otọ rẹ evun rhe.—Luk 15:17-24.

7. Mavọ yen oborẹ Jihova gbe arodọnvwẹ kẹ ihwo wan vwo djephia nẹ o vwo aghwanre?

⁷ Jihova gbe arodọnvwẹ fikiridie aghwanre rọyen ba asa-an. Aghwanre ri Jihova dia ona yẹrẹ uruemu ghevweghe rẹ ihworakpọ se yono ohwo-o. Ukperẹ ọtiọyen, Baibol na da ta: “Ẹkẹvuọvo aghwanre ro nẹ obenu rhe ọ vọnre vẹ arodọvwe kugbe uruemu esiri.” (Jems 3:17) Kerẹ ọmiọvwọn ro vwo ẹguọnọ rẹ emọ rọyen, Jihova riẹnre nẹ idibo rọyen mrẹ erere vwo nẹ arodọnvwẹ rọyen cha. (Une 103:13; Aiz. 49:15) Arodọnvwẹ ri Jihova nẹrhẹ idibo  rọyen vwo iphiẹrophiyọ dede nẹ ayen gbare-e. Aghwanre ri Jihova rọ ba asa-an na yen muo vwo gbe arodọnvwẹ ọke ro de fo nẹ o ru ọtiọyen. Jihova je riẹn ọke ro de fo nẹ ọyen jẹ arodọnvwẹ egbe. Kidie nẹ Jihova vwo ghwanre, o gbe arodọnvwẹ ọke rọ da riẹn nẹ ọyen de ru ọtiọyen jẹ ọyen phi uphẹn phiyotọ vwọ kẹ umwemwu-u.

8. Die yen ofori nẹ e ru vwẹ ọkievo, kẹ diesorọ?

⁸ Kerẹ udje, ọ da dianẹ odibo ri Jihova ọvo vwẹ arogba rọyen vwo ru umwemwu vwo? Die yen avwanre che ru? Ẹwẹn ọfuanfon na de mu Pọl vwo si: “We kuoma gbe ohwo” ọtiọye-en. (1 Kọr. 5:11) A djẹ orumwemwu rọ rhọvwen kurhẹriẹ-ẹ nẹ ukoko na. Ọnana obo ri fori rere a sa vwọ sẹro rẹ iniọvo rẹ avwanre re fuevun je vwẹrokere idjerhe ọfuanfon ri Jihova. Ihwo evo roro nẹ a da djẹ ohwo vwo nẹ ukoko, jẹ Jihova gbe arodọnvwẹ vwọ kẹ ohwo na-a. Ọyen uyota? E ja fuẹrẹn ni.

9-10. Vwo nene obo rehẹ Hibru 12:5, 6, diesorọ a sa vwọ tanẹ a da djẹ ohwo nẹ ukoko ọyen odjephia rẹ arodọnvwẹ? Djudje rọyen.

⁹ E de ghwoghwo vwẹ uyono nẹ, oniọvo ọvo rẹ avwanre vugheri re ji vwo ẹguọnọ kpahen “rha dia Oseri ri Jihova-a,” ọ ghene da avwanre mamọ. Avwanre se roro, ofori ra vwọ djẹ ohwo rẹ avwanre vwo ẹguọnọ kpahen na nẹ ukoko? Ra vwọ djẹ ohwo nẹ ukoko ghini odjephia rẹ arodọnvwẹ? E, re vwo jẹ ghwọkuẹ ohwo rọ guọnọ ọghwọku ọyena shephiyọ-ọ, ọ jẹ dia odjephia rẹ arodọnvwẹ vẹ ẹguọnọ-ọ. (Isẹ 13:24) Ra vwọ djẹ ohwo nẹ ukoko ghene sa chọn uko vwo ru ewene vwẹ akpeyeren rọyen? E. Iniọvo evo ri ru umwemwu jovwore mrẹvughe nẹ orhiẹn rẹ ekpako na bruru chọn ayen uko vwo ni oma so, ji ru ewene, ayen de ji rhivwin bru Jihova rhe.—Se Hibru 12:5, 6.

¹⁰ Roro kpahen udje nana. Osuigegede ọvo vwo oniso nẹ ogodẹ ọvo vwẹ usun rẹ igodẹ rọyen muọga. Ọ riẹnre nẹ ọyen se vwo sivwin ọga na kpo, o che sionẹ asan rẹ igodẹ ri chekọ na hepha. Ẹkẹvuọvo igodẹ guọnọ ukẹcha rẹ osun rayen ọkieje, ayen se she ọkuọnrọn siẹrẹ ayen ọvo da dia kpogono. Ọnana ko mudiaphiyọ nẹ osuigegede na vwo utoma kpahen ogegede yena fikirẹ ona rẹ omaesivwo rọ jẹre na? Ẹjo, kakaka. Ọ riẹnre nẹ ọyen da vwẹ uphẹn kẹ ọ rọ muọga na nẹ o kuomagbe igodẹ ri chekọ na, ọ cha vwẹ ọga na mu ayen. O de mu ogodẹ na nẹ asan rẹ e ri chekọ na hepha, jẹ ọ sẹro rẹ uchuru na.—Ni Livitikọs 13:3, 4. 

11. (a) Diesorọ a sa vwọ vwẹ ohwo ra djẹ nẹ ukoko vwo dje ogodẹ rọ muọga? (b) Die yen ihwo ra djẹ nẹ ukoko se ru, kẹ ukẹcha vọ yen a sa vwọ kẹ ayen?

¹¹ A da djẹ ohwo nẹ ukoko, avwanre sa vwẹ ẹro rẹ ogodẹ yena rọ muọga na vwo no. Ọ muọga rẹ ẹwẹn. (Jems 5:14) Kerẹ oborẹ ega evo se pho muẹ ihwo yen, ọtiọyen yen ihwo re muọga rẹ ẹwẹn je sa vwẹ ọga na vwo mu ihwo efa vwevunrẹ ukoko na. Kọyen ọ ghanre mamọ re vwo si ohwo rọ muọga ọtiọyena vwo nẹ ukoko na. Ọghwọku nana ọyen odjephia rẹ ẹguọnọ ri Jihova vwọ kẹ idibo rọyen re fuevun ga, ọ je sa chọn orumwemwu na uko ri vwo vwo omamọ rẹ oyerinkugbe vẹ Jihova. Ohwo ra djẹ nẹ ukoko, ji se kpo emẹvwa rere ọ sa vwọ bọn esegbuyota rọyen gan. Ọ je sa reyọ ebe ro che se komobọ, ji ni JW Broadcasting^®. Ekpako na vwo no sẹ o ruẹ ewene yen, nẹ ọke ra ruọ ọke ayen je sa chọn uko vwọ riẹn obo ro che ru rere ọ sa vwọ rhoma rhivwin rhe, ji vwo omamọ rẹ oyerinkugbe ve Jihova. *

12. Mavọ yen ekpako se vwo dje ẹguọnọ vẹ erorokẹ phia vwọ kẹ orumwemwu rọ rhọvwen kurhiẹrẹ-ẹ?

 ¹² Ofori nẹ a karophiyọ nẹ orumwemwu rọ rhọvwen kurhẹriẹ-ẹ yen a djẹ nẹ ukoko. Ekpako na riẹnre nẹ ọnana obo re ghanre mamọ, kọyensorọ ayen vwọ nabọ fuẹrẹn tavwen ayen ki brorhiẹn nẹ a djẹ ohwo nẹ ukoko. Ayen riẹnre nẹ Jihova “ghwọ umuchẹghwọ” ro fori vwọ kẹ ohwo. (Jer. 30:11) Ayen vwo ẹguọnọ rẹ iniọvọ na, ayen je guọnọ nẹ emu ọvuọvo nẹrhẹ ayen she nẹ ukoko na-a. Obo ri me fo yen e vwo si orumwemwu vwo nẹ ukoko na vwẹ ọmọke.

13. Diesorọ o vwo fo nẹ a djẹ oniọvo ọvo nẹ ukoko vwẹ Kọrent?

¹³ Roro kpahen oborẹ ọyinkọn Pọl ru orumwemwu rọ rhọvwen kurhẹriẹ-ẹ vwẹ ẹgbukpe ujorin rẹsosuọ yen. Oniọvo ọvo vwẹ Kọrẹnt nene aye rẹ ọsẹ rọyen gbe ọfanrhiẹn. Uruemu nana brare mamọ. Pọl riẹnre nẹ Jihova vuẹ ihwo rẹ Izrẹl rẹ ọke rẹ awanre nẹ, “ọshare ro du aye rẹ Ọsẹ rọye, yọ mrẹ ẹban rẹ Ọsẹ rọye; ke hwe ọ vẹ aye na.” (Liv. 20:11) Ọ dia Pọl vuẹ iniọvo rehẹ Kọrẹnt nẹ ayen hwe ọshare na-a. Ẹkẹvuọvo ọ vuẹ ayen nẹ ayen djẹ nẹ ukoko. Uruemu rẹ ọfanrhiẹn ọshare na djobọte iniọvo efa vwẹ ukoko na, evo tobọ roro nẹ uruemu yena brare dede-e.—1 Kọr. 5:1, 2, 13.

14. Mavọ yen Pọl vwo dje arodọnvwẹ phia kẹ ọshare na ra djẹ nẹ ukoko vwẹ Kọrẹnt, kẹ diesorọ? (2 Kọrẹnt 2:5-8, 11)

¹⁴ O vwo te ọkiọvo, Pọl da rhe mrẹvughe nẹ ọshare na ru ewene re. Orumwemwu na ghini kurhẹriẹ nẹ otọ rẹ ubiudu rhe. Dedenẹ ọshare na phọphọ odẹ rẹ ukoko na, Pọl vuẹ ekpako na nẹ ọyen guọnọ “sio ganga-an.” Ọ da vwẹ odjekẹ vwọ kẹ ayen: “Ovwan ki vwo ghovwo re bro uche.” Jokaphiyọ oboresorọ rẹ Pọl vwọ ta ọtiọyen: “Ọ rha dia ọtiọye-e oja ro rere phihọ na de rhe hwe.” Aron rẹ ọshare nana ro ku rhiẹrẹ na dọn Pọl. Ọ guọnọre nẹ ọshare nana she ọkuọrọ-ọn, yẹrẹ ofu dje kpahen oborẹ o ruru na tẹ ẹdia rẹ o de jẹ evwoghovwo ẹrhoma guọnọ-ọ.—Se 2 Kọrẹnt 2:5-8, 11.

15. Mavọ yen ekpako sa vwọ vwẹ ẹro rẹ abavo vwo ni arodọnvwẹ vẹ orhiẹn-abavo?

¹⁵ Kerẹ Jihova, ẹkpako na vwo owenvwe ọgangan rẹ ayen vwo gbe arodọnvwe. Ayen ghwọkuẹ ohwo ro ruchọ kirobo ro fori siẹrẹ a da guọnọ, ẹkẹvuọvo, ayen ji gbe arodọnvwẹ o de fo nẹ ayen ru ọtiọyen. Ayen rhe ru ọtiọye-en, kọyen ayen vwẹ uphẹn vwọ kẹ umwemwu eruo. Ekpako na ọvo yen ihwo ri fori nẹ i gbe arodọnvwẹ kẹ ihwo?

16. Die yen Isẹ 21:13, tare nẹ Jihova che ru kpahen ihwo re rhọvwen gbe arodọnvwẹ vwọ kẹ ihwo efa-a?

¹⁶ Inenikristi eje davwẹngba ayen vwọ vwẹrokere arodọnvwẹ ri Jihova. Diesorọ? Kidie Jihova cha rhọvwen kerhọ rẹ ihwo re rhọvwen gbe arodọnvwẹ kẹ ihwo efa-a. (Se Isẹ 21:13.) O vwo ohwo ọvuọvo rọ guọnọre nẹ Jihova jẹ ẹrhovwo rọyen ẹkpahọnphiyọ-ọ, ọtiọyena kẹ ofori nẹ avwanre dia ihwo ri gbe arodọnvwẹ kẹ ihwo efa. Ukperẹ e vwo kuerhọnfia vwọ kẹ ọmiaovwẹ rẹ iniọvo rẹ avwanre, e jẹ avwanre muegbe ra vwọ kerhọ vwọ kẹ “unuebo rẹ ovwiogbere.” Vwẹ idjerhe vuọvo na, e jẹ avwanre karophiyọ uchebro nana: “Ohwo ro ni arodọvwẹ-ẹ, ọ je cha mrẹ arodọvwẹ vwe ọke re de brorhiẹ rọye-e.” (Jems 2:13) Siẹrẹ a da karophiyọ oborẹ avwanre guọnọ arodọnvwẹ te, ọyena che mu avwanre vwo gbe arodọnvwẹ vwọ kẹ ihwo efa. Ofori nẹ avwanre gbe arodọnvwẹ vwọ kẹ orumwemwu ro kurhẹriẹ ro rhivwin rhe ukoko na.

17. Mavọ yen Ovie Devid vwo dje uruemu rẹ arodọnvwẹ ro nẹ otọ rẹ ubiudu rhe phia?

¹⁷ Idje ri Baibol sa chọn avwanre uko vwọ riẹn obo re se vwo gbe arodọnvwẹ kẹ ihwo je kẹnoma vwọ kẹ aroesio. Kerẹ udje, roro kaphen Ovie Devid. Ọke buebun yen o vwo dje uruemu rẹ arodọnvwẹ ro nẹ otọ rẹ ubiudu rhe phia. Dede nẹ Sọl guọnerọ hwe, Devid ji gbe arodọnvwẹ vwọ kẹ ovie rẹ Ọghẹnẹ jẹreyọ, o vwo ọke vuọvo ro vwo vwo ẹwẹn rẹ orukeri yẹrẹ ro vwo hwe Sọ-ọl.—1 Sam. 24:9-12, 18, 19.

18-19. Ẹdia ivẹ vọ yen Devid de jẹ uruemu rẹ arodọnvwẹ edjephia?

¹⁸ Ẹkẹvuọvo, ọ dia ọkieje yen Devid vwo dje uruemu rẹ arodọnvwẹ phia-a. Kerẹ udje, ọke rẹ Nabal rọ dia ohwo rọ djoma, vwọ ta erhare rẹ eta kpahen Devid je sen nẹ ọyen cha vwẹ emu kẹ vẹ usun rọye-en, ophu de mu Devid, o de brorhiẹn ro vwo hwe Nabal vẹ eshare rehẹ evwruwevwin rọyen eje. Ẹkẹvuọvo, Abigail rọ dia aye ri Nabal, ọyen aye vẹ erorokẹ kugbe akoechiron, o de brokpakpa ghwẹ emu vwo rhe Devid, fikirẹ ọtiọyena, Devid rhe hwe Nabal vẹ eshare rọye-en.—1 Sam. 25:9-22, 32-35.

¹⁹ Vwẹ ọke ọfa, ọmraro Natan da vuẹ Devid kpahen ọdafe ọvo ro gborho ogodẹ rẹ ọrivẹ rọyen rọ dia ovwiogbere. Ophu de mu Devid mamọ, ọ da ta: “Kirobo rẹ Ọrovwohwo herọ na, ohwo ro ru emu nana fo ughwu.” (2 Sam. 12:1-6) Devid riẹn urhi ri Mosis na. Ohwo ro cho ogodẹ rẹ ohwo ọfa cha rhan igodẹ ẹne rhivwin vwọ kẹ ohwo ro choro mie na. (Eyan. 22:1) Jẹ Devid brorhiẹn rẹ ughwu hwe ọshare nana? Orhiẹn-ebro nana ra tua nọ-ọ. Natan vuẹ Devid kpahen ọdafe nana rọ vwọ chọn uko vwo vwo ẹruọ rọyen nẹ o ru umwemwu rọ tobọ bra vrẹ ọyena. Jihova tobọ gbe arodọnvwẹ vwọ kẹ Devid vwọ vrẹ arodọnvwẹ rẹ Devid rhe gbe vwọ kẹ ọdafe ro gboro ogodẹ miẹ ovwiogbere rohẹ ikuegbe ri Natan na.—2 Sam. 12:7-13.

20. Die yen se yono vwo nẹ udje ri Devid rhe?

 ²⁰ Jokaphiyọ nẹ ọke rẹ ophu ọgangan vwo mu Devid, o de brorhiẹn ro vwo hwe Nabal vẹ eshare rọyen eje. Vwẹ ikuegbe rẹ Natan gbe vwọ kẹ na, Devid muegbe ro vwo brorhiẹn rẹ ughwu vwo hwe ọdafe na. Vwẹ ẹdia rivẹ na, e se roro: Diesorọ ọshare nana ro vwo erorokẹ na vwo brorhiẹn ọtuatua tiọyena? Roro kpahen obo re phiare vwẹ akpeyeren ri Devid. Vwẹ ọke yena, ẹwẹn obrorhiẹn ri Devid kpokpo. Orhiẹn re bruru vẹ ẹwẹn rẹ aroesio dia oka rẹ ohwo ro vwo omamọ rẹ oyerinkugbe vẹ Jihova-a. Jesu vwẹ orhọnesio ọgangan vwọ kẹ idibo rọyen: “Ovwan gu ẹdjọ rẹ ohwo-o, rere ohwo vwo jẹ ovwan eguo. Kidie oghẹre rẹ orhiẹn ru we bru kẹ ihwo, ọye e ji bru kẹ ovwan.” (Mat. 7:1, 2) E jẹ avwanre davwẹngba ra vwọ kẹnoma vwọ kẹ aroesio rere a vọn vẹ “arodọnvwẹ buebu” kerẹ Ọghẹnẹ ravwanre.

21-22. Erhọ yen idjerhe evo rẹ avwanre se vwo gbe arodọnvwẹ vwọ kẹ ihwo efa?

²¹ Arodọnvwẹ vrẹ e di vwo roro kẹ ohwo. Vwọrẹ uyota, ohwo ro gbe arodọnvwẹ kẹ ihwo ruẹ erọnvwọn vwọ chọn ayen uko. Avwanre eje se gbẹrophiyotọ vwo vwo oniso rẹ ihwo re guọnọ ukẹcha rehẹ orua rẹ avwanre, ukoko avwanre kugbe ekogho rẹ avwanre dia. Aphro herọ-ọ, o vwo ẹdia sansan rẹ avwanre de se dje uruemu rẹ arodọnvwe phia. O vwo ohwo rọ guọnọ uchebro? Avwanre sa vwẹ ukẹcha ro fori vwọ phia, kerẹ a vwọ kẹ ayen emuọre yẹrẹ chọn ayen uko vwo ru erọnvwọn evo? O vwo ohwo ra ghwa reyọ rhivwin rhe ukoko na rọ guọnọ omamọ rẹ ugbeyan ro se phiuduphiyọ awọ? Avwanre sa vuẹ ihwo efa kpahen iyẹnrẹn esiri rehẹ Baibol na re sa bọn ayen gan? Ọnana idjerhe ọvo ro me yovwin re se vwo gbe arodọnvwẹ vwọ kẹ ihwo efa.—Job 29:12, 13; Rom 10:14, 15; Jems 1:27.

²² Avwanre de se vwo oniso rẹ ihwo re guọnọ oka rẹ ukẹcha re djunute na, ka cha mrẹ nẹ o vwo idjerhe sansan ri rhiephiyọ re se vwo gbe arodọnvwẹ vwọ kẹ ihwo efa. Avwanre de gbe arodọnvwẹ vwọ kẹ ihwo, oma vwerhan Ọsẹ rẹ avwanre rọhẹ obodjuvwu rọ dia Ọghẹnẹ rọ vọnre vẹ “arodọnvwẹ buebu”!