Owọrota na de se: “Ọ da dianẹ wọ mrẹ ubrakpọ re de shenyẹ ivwiogbere na ra da kpare ọvwata vẹ ọsoso kuẹfia, wo jo gbe we unu-u; kidie oruiruo ro kpenu ji vwo ọfa ro kpenu nọ rọ rhẹrẹ, efa re je rhonọ eyena je hẹ enu rẹ ayen.”—Aghwo. 5:8.

A da vwẹ ẹro rẹ ohworakpọ vwo no, ọ sa họhọ nẹ ihwo ri vwo ogangan rẹ usuon yen owọrota nana ta ota kpahan. Ẹkẹvuọvo, e de no kodo vrẹ ọtiọyen, o dje uyota ọvo phia kpahen Jihova rọ sa kẹ avwanre imuẹro je nẹrhẹ ẹwẹn avwanre totọ.

Aghwoghwo 5:8 ta ota kpahen isun ri shenyẹ ivwiogbere ekueku. Ofori nẹ osun tiọyena karophiyọ nẹ o vwo ohwo rọ rho nọ yẹrẹ ro vwo ẹgba rẹ usuon vrẹ ọ rọyen rọ rhẹrẹ. Vwọrẹ uyota, ọ sa dianẹ o ji vwo ihwo efa ri vwo ẹdia ri kpenu vrẹ ọ rọyen. Jẹ, ọ da ohwo mamọ nẹ ihwo ri suẹn miovwirin, ọtiọyena ihwo ke rioja fikirẹ isuesun rẹ oshenyẹ rayen na.

Dede nẹ usuon rayen miovwirin, ẹwẹn avwanre se totọ avwanre vwọ riẹn nẹ Jihova ‘rhẹrẹ isun ri kpenu’ vwẹ usuon rẹ ihworakpọ. Avwanre sa nokpẹn rẹ ukẹcha mie Jihova ji mu oghwa avwanre vwọ kẹ. (Une 55:22; Fil. 4:6, 7) Avwanre riẹnre nẹ, “ẹro rẹ Ọrovwohwo djuẹ kpenẹ kpenẹ wan akpọ na ejobi, ro vwo dje ẹgba rọye kpahe ihwo rẹ udu rọye fon kpahọ.”—2 Ikun 16:9.

Ọtiọyena, Aghwoghwo 5:8 nẹrhẹ avwanre riẹn ẹdia rẹ ihworakpọ hepha vwẹ ẹdia rẹ usuon, o vwo ohwo rẹ usuon rọyen me kpenu. Marho, owọrota yena cha avwanre uko vwọ riẹn nẹ ẹgba rẹ usuon ri Jihova yen me kpenu. O suẹn enẹna womarẹ Ọmọ rọyen, Jesu Kristi rọ dia Ovie rẹ Uvie na. Ọromevwẹgba rọ mrẹ ihwo eje na, ọyen ohwo rẹ ọsoso ro shenyẹ ihwo-o, ọtiọyen Ọmọ rọyen je hepha.