1. Edurhie vọ yen Jesu vwọ kẹ ihwiyerin ẹne, die yen ayen ruru?

PITA, Andru, Jems, vẹ Jọn hwe iyerin shẹ. Vwẹ ẹwẹn roro obo ro gbe ayen unu te ayen vwo nyo edurhie ri Jesu nana: “We nene uvwe, ki mi ru ovwan vwọ dia ihwiyeri rẹ ihwo.” * Kẹ, die yen ayen ruru? Baibol na da ta: “Siẹvuọvo na, ayen da ghwa yan jẹ ibriki rayen vwo, ayen de nene.” (Mat. 4:18-22) Orhiẹn yena wene akpeyeren rayen. Ukperẹ iyerin re rhiẹromrẹ, kẹ ayen cha dia ihwiyerin rẹ ihworakpọ. (Luk 5:10) Nonẹna, Jesu ji vwẹ edurhie vuọvo yena vwọ kẹ ihwo ri vwo ẹguọnọ rẹ uyota na. (Mat. 28:19, 20) Wo rhiabọreyọ edurhie ri Jesu na?

2. Ono yen che brorhiẹn ọghanghanre rọ vwọ dia ihwiyerin rẹ ihwo?

² Ọ sa dianẹ wọ yan obaro vwẹ uyono ri Baibol wẹn te ẹdia wo vwo brorhiẹn sẹ wọ cha dia oghwoghwota. Ọ da dianẹ wo siomauko wo vwo rhiabọreyọ edurhie ri Jesu na, wo jẹ ofu dje we-e. Wo siomauko kidie wọ riẹnre nẹ orhiẹn wo che bru na pha ghanghanre. Vwọrẹ uyota, Baibol na tare nẹ “siẹvuọvo na” Pita vẹ igbeyan rọyen de chukoku ibriki rayen. Ẹkẹvuọvo, Pita vẹ oniọvo rọyen brokpakpa brorhiẹn yena-a. Ọ vrẹ emeranvwe esan ayen ke riẹn Jesu je rhiabọreyọ kerẹ Mesaya na. (Jọn 1:35-42) Vwẹ idjerhe ọvuọvo na, ọ sa dianẹ wo ji yono erọnvwọn buebun kpahen Jihova vẹ Jesu re, wọ je guọnọ sikẹrẹ Jihova phiyọ. Ẹkẹvuọvo tavwen wo ki brorhiẹn yena, ofori nẹ wọ nabọ roro kpahọn. Die yen chọn Pita, Andru, kugbe ihwo efa uko vwo brorhiẹn rayen?

3. Iruemu vọ yen che mu we wo rhiabọreyọ edurhie ri Jesu?

 ³ Idibo ri Jesu ẹsosuọ vwo owenvwe rẹ ayen vwo ru kemu kemu, ayen vwo erianriẹn, ayen fiudugberi ji vwo uruemu rẹ omaesuon. Aphro herọ-ọ, iruemu nana chọn ayen uko vwọ dia ihwo re tẹn ona rẹ ihwiyerin rẹ ihwo. Vwẹ uyona nana, a cha ta ota kpahen obo wo se vwo vwo iruemu tiọyena rere wọ sa vwọ tẹn ona rẹ iruo rẹ aghwoghwo na.

4. Die yen muẹ Pita vwo hwe iyerin?

⁴ Pita hwe iyerin rere ọ sa vwọ ghẹrẹ orua rọyen, ẹkẹvuọvo iruo yena ghwa dia iruo ghevweghe kẹ-ẹ. Pita vwo ẹguọnọ rẹ iyerin ehwe. (Jọn 21:​3, 9-15) O ji vwo ẹguọnọ rẹ iruo rẹ ihwiyerin rẹ ihwo. Womarẹ ukecha ri Jihova, Pita da tẹn ona rẹ iruo na.—Iruo 2:14, 41.

5. Vwo nene Luk 5:8-11, diesorọ oshọ vwo mu Pita, die yen sa chọn avwanre uko vwọ kẹnoma kẹ oshọ tiọyena?

⁵ Avwanre ghwoghwo kidie nẹ e vwo ẹguọnọ ri Jihova. Ọnana yen emu rẹsosuọ ro muẹ avwanre vwo ghwoghwo. Ẹguọnọ rẹ avwanre vwo kpahen Jihova sa nẹrhẹ avwanre phi ẹwẹn rẹ mi muwa-an kparobọ. Ọke rẹ Jesu vwo durhie Pita nẹ ọ rhe dia ohwiyerin rẹ ihworakpọ, ọ da vuẹ: “Wọ djẹ oshọ-ọ.” (Se Luk 5:8-11.) Ọ dia oshọ rẹ obo re sa phia siẹrẹ Pita da dia odibo ri Jesu yen muo na-a. Ẹkẹvuọvo, oshọ rẹ iyerin ibuebun rẹ Jesu chọn ayen uko vwo mu vwẹ idjerhe rẹ igbevwunu na yen muro. Ọtiọyena, Pita de ni oma rọyen nẹ ọyen muwa-an. Kerẹ Pita, oshọ se mu we wo de roro kpahen  obo ro churobọ si ra vwọ dia odibo ri Kristi. Ọ da dia ọtiọyen, jẹ ẹguọnọ wo vwo kpahen Jihova, Jesu, kugbe ọrivẹ wẹn ganphiyọ, ku wo che vwo owenvwe wo vwo rhiabọreyọ edurhie ri Jesu na.—Mat. 22:37, 39; Jọn 14:15.

6. Erhọ yen erọnvwọn efa ri mu avwanre vwo ghwoghwo?

⁶ Roro kpahen erọnvwọn efa ri mu avwanre vwo ghwoghwo. Avwanre guọnọ kerhọ rẹ iji ri Jesu nana: “Yanran, rere we re gbe idibo.” (Mat. 28:19, 20, NW.) Avwanre ji ghwoghwo kidie ihwo buebun “ro ẹnwan,” ayen guọnọ riẹn uyota ro shekpahen Uvie rẹ Ọghẹnẹ. (Mat. 9:36) Jihova guọnọre nẹ ihworakpọ eje vwo erianriẹn ọgbagba rẹ uyota na ji sivwin rhọ.—1 Tim. 2:4.

7. Mavọ yen Rom 10:13-15 dje oborẹ iruo rẹ aghwoghwo na ghanre te?

⁷ Avwanre cha jowọ re vwo ghwoghwo siẹrẹ e de roro kpahen oborẹ iruo aghwoghwo na sivwin arhọ rẹ ihwo wan. Vwọ fẹnẹ ohwiyerin rọ shẹ yẹrẹ re iyerin ro hweri, avwanre gbe idibo rẹ ihwo rere ayen se vwo sivwin rhọ.—Se Rom 10:13-15; 1 Tim. 4:16.

8-9. Die yen ofori nẹ ohwiyerin riẹn, kẹ diesorọ?

⁸ Vwẹ ọke ri Jesu, ofori nẹ ohwo ri Izrẹl rọ dia ohwiyerin riẹn oka rẹ iyerin ro se hwe. (Liv. 11:9-12) O ji fo nẹ ọ riẹn asan rọ da sa mrẹ iyerin na hwe. Iyerin dia asan rẹ ame na de shephiyọ ayen oma vẹ asan emuọre vọnre. Ọke ohwiyerin vwo kpo iyerin ehwe je pha ghanghanre. Vwọ kpahen ọke ro me vwo fo re vwo kpo iyerin ehwe, jokaphiyọ oborẹ oniọvo rọ dia ekogho rẹ ame riariẹ phiyọ vwẹ Pacific tare ọke ro vwo durhie imishọnare ọvo kpo iyerin ehwe. Imishọnare na da: “Mi che bru we rhe vwẹ ughọjọ irhirin rẹ urhiọke rodẹ rọ cha na.” Oniọvo na da kpahen, “Wo vwo ẹruọ obo ri mi ta na-a. Avwanre kpo iyerin ehwe vwẹ ọke ro shephiyọ kẹ iyerin na, ọ dia ọke ro shephiyọ kẹ avwanre-e.”

⁹ Ọtiọyen yen idibo ri Jesu re rhe dia ihwiyerin rẹ ihworakpọ kpo asan ra da sa mrẹ ihwo vẹ ọke ra vwọ mrẹ ayen. Kerẹ udje, idibo ri Jesu ghwoghwo vwẹ uwevwin rẹ ẹga vẹ sinegọg, nuwevwin kpuwevwin, ọtiọyen ji te afieki. (Iruo 5:42; 17:17; 18:4) O fori nẹ avwanre je riẹn iruemu rẹ ihwo re dia ekogho avwanre de ghwoghwo. O ji fo nẹ e wene ọrhuẹrẹphiyotọ avwanre rere e se vwo ghwoghwo kẹ ihwo vwẹ asan vẹ ọke a da sa mrẹ ayen.—1 Kọr. 9:19-23.

10. Ekuakua vọ yen ukoko ri Jihova vwọ kẹ avwanre?

¹⁰ Ohwiyerin guọnọ ekuakua ro fo vwọ kẹ iruo rọyen, o ji fo nẹ ọ riẹn obo ra reyọ ayen vwo ruiruo wan. Ọtiọyen avwanre je guọnọ ekuakua ri fori vwọ kẹ iruo rẹ aghwoghwo na. O ji fo nẹ a riẹn obo ra vwẹ ayen vwo ruiruo wan. Jesu vwẹ odjekẹ ro fiotọ kẹ idibo rọyen kpahen oborẹ ayen se vwo hwe iyerin rẹ ihworakpọ. Ọ vuẹ ayen oborẹ ayen che mu nene oma, asan rẹ ayen de ghwoghwo, vẹ oborẹ ayen ta. (Mat. 10:​5-7; Luk 10:1-11) Nonẹna, ukoko ri Jihova kẹ avwanre Ekpeti rẹ Uyono rọ vọnre vẹ ekuakua sansan re pha yoyovwin. * E ji yono avwanre obo ra vwẹ ayen vwo ruiruo wan. Uyono tiọyena chọn avwanre uko vwo fiudugberẹ ọke re de ghwoghwo kugbe obo ra sa vwọ dia omamọ rẹ iyono.—2 Tim. 2:15.

11. Diesorọ ihwiyerin rẹ ihworakpọ vwo fiudugberi?

¹¹ Ihwo ri hwe iyerin shẹ guọnọ uduefiogbere. Ọkiọvo, ayen rhiẹromrẹ oborẹ ayen rhẹro rọye-en vwẹ abadi. Ọkieje yen ayen vwọ wian vwẹ ason, ọkiọvo ayen ji rhiẹromrẹ ogiribo ọgangan. Ihwiyerin rẹ ihworakpọ je guọnọ uduefiogbere. E se hirharoku “ogiribo” rẹ ẹvwọsuọ rẹ orua, ehwẹjẹ ro nẹ obọ rẹ igbeyan cha, kugbe ihwo re sa sen ovuẹ avwanre siẹrẹ a da ton aghwoghwo phiyọ obọ, ji dje oma rẹ avwanre phia kerẹ Iseri ri Jihova. Jẹ, ọnana che se gbe avwanre unu-u. Jesu si idibo rọyen orhọ nẹ ọyen che ji ayen ro ohri rẹ ihwo ri che mukpahen ayen.—Mat. 10:16.

12. Vwo nene obo rehẹ Joshua 1:7-9, die yen sa nẹrhẹ avwanre fiudugberi?

¹² Mavọ yen wo se vwo fiudugberi? Ẹsosuọ, jẹ o muwẹro nẹ Jesu yen vwẹrote iruo rẹ aghwoghwo na vwo nẹ obodjuvwu cha. (Jọn 16:33; Ẹvwọ. 14:14-16) Ọrivẹ, ru esegbuyota wẹn ganphiyọ kpahen ive ri Jihova nẹ ọ cha vwẹrote we. (Mat. 6:32-34) Esegbuyota wẹn vwọ ganphiyọ ye, jẹ uduefiogbere wẹn ganphiyọ. Pita vẹ igbeyan rọyen dje esegbuyota rayen phia vwẹ ọke rẹ ayen vwo chukoku iruo rẹ iyerin ehwe rayen, vwo nene Jesu. Ọtiọyen ọ je pha, wo dje esegbuyota rode phia ọke wọ vwọ vuẹ igbeyan vẹ ihwo rẹ orua wẹn nẹ wọ ton uyono ri Baibol phiyọ vẹ Iseri ri Jihova re, wo ji  kpo omẹvwa rayen. Aphro herọ-ọ, wo ru ewene buebun vwẹ akpeyeren wẹn rere wo se vwo yeren akpọ nene irhi ọgbagba ri Jihova. Esegbuyota vẹ uduefiogbere yen mu we vwo ru ewene na. Uduefiogbere wẹn vwọ ganphiyọ ye, wo se vwo imuẹro nẹ “Ọrovwohwo Ọghẹnẹ wẹn vẹ owẹ herọ vwi kasan kasan wọ ra ejobi.”—Se Joshua 1:7-9.

13. Mavọ yen eroro kpahọn vẹ ẹrhovwo sa vwọ chọn wẹ uko vwo fiudugberi?

¹³ Die yen orọnvwọn ọfa rọ sa nẹrhẹ wo fiudugberi? Nẹrhovwo vwọ kẹ uduefiogbere. (Iruo 4:29, 31) Jihova cha kpahenphiyọ ẹrhovwo wẹn, ọ cha yan ju we vwo-o. O muegbe ro vwo bicha wẹ ọkieje. Vwọba, wo se roro kpahen oborẹ Jihova sivwin ihwo efa wan vwẹ ọke rẹ awanre. Ji roro kpahen obo rọ chọn wẹ uko vwo phi ebẹnbẹn sansan kparobọ je kẹ wẹ ẹgba wo vwo ru ewene vwẹ akpeyeren wẹn. O muẹro nẹ Ohwo ro sun ihwo rọyen wan Abadi Ọvwavware na je sa chọn wẹ uko vwọ dia odibo ri Kristi. (Eyan. 14:13) Wo se vwo oka rẹ imuẹro ro rhe ọbuine na, rọ vwọ ta: “Ọrovwohwo vẹ ovwẹ vwọ obọ na me gbe djẹ oshọ-ọ. Kidie ohwo se ru vwe?”—Une 118:6.

14. Die yen udje ri Masae vẹ Tomoyo yono uwe?

¹⁴ Idjerhe ọfa re se vwo fiudugberi ọyen e vwo yono kpahen oborẹ Jihova cho ihwo rẹ oma vua uko vwo fiudugberi. Roro kpahen udje rẹ oniọvo aye ọvo re se Masae. Oma vuọ, o ji roro nẹ ọyen che se ghwoghwo vwẹ azagba-a. O niro nẹ ọyen vwọ ta ota kẹ erhorha pha kerẹ igbẹhẹ ro kpenu mamọ ro che se yeri-in. Ọtiọyena, ọ da davwẹngba gangan vwo ru ẹguọnọ rọyen kpahen Jihova vẹ irivẹ rọyen ganphiyọ. O de roro kpahen oboresorọ ọ vwọ dia emu rẹ okpakpa re vwo ghwoghwo enẹna, je nẹrhovwo vwọ kẹ ukẹcha. O de phi oshọ kparobọ je ga kerẹ ọkobaro ọkieje. Jihova je sa chọn ighwoghwota kpokpọ uko vwo “yivwaro” yẹrẹ fiudugberi. Roro kpahen ikuegbe rẹ oniọvo aye ọvo re se Tomoyo. Ọke rọ vwọ ton aghwoghwo ri nuwevwin kpuwevwin phiyọ, ohwo rẹsosuọ ro tu ta ota kẹ da van kuo: “Me guọnọ nene Iseri ri Jihova ta ota-a!” o de bi ẹchẹ na gbe. Tomoyo de fiudugberi ta kẹ oniọvo rẹ ọ vẹ ọyen gba wian: “Wọ nyo obo rọ tare na? Dede nẹ me ta ota vuọvo-o, jẹ o vughe uvwe kerẹ ọvo usun rẹ Iseri ri Jihova. Oma vwerhen ovwẹ mamọ!” Enẹna, Tomoyo ga kerẹ ọkobaro ọkieje.

15. Die yen omaesuon, diesorọ o vwo fo nẹ Inenikristi vwo?

¹⁵ Ihwo re tẹn ona rẹ iyerin ehwe vwo uruemu rẹ omaesuon. Omaesuon ọyen uruemu rẹ “ohwo vwo gba oma rọyen vwo ruẹ erọnvwọn ofori nẹ o ru.” Ofori nẹ ihwo ri hwe iyerin shẹ sun oma rayen rere ayen vwọ fobọ vrẹn, je dia re te ọke rẹ iruo na che vwo re, ayen je wian vwẹ aruọke ro miovwirin. A da guọnọ chirakon je wiowian avwanre re, ofori nẹ e vwo uruemu rẹ omaesuon.—Mat. 10:22.

16. Mavọ yen avwanre se vwo vwo uruemu rẹ omaesuon?

¹⁶ E vwiẹ ohwo vwiẹ uruemu rẹ omaesuo-on. Vwọba, kohwo kohwo guọnọ ru erọnvwọn vwẹ idjerhe rọ cha ma lọhọ kẹ. Ẹkẹvuọvo erọnvwọn re ghanre mamọ ro fori nẹ e ru, ghwa dia obo re lọhọre-e. Ọtiọyena, ofori nẹ avwanre yono obo ra sa vwọ sun oma. A guọnọ ukẹcha e se vwo yono oma vwo ru erọnvwọn re sa bẹn avwanre eruo. Jihova vwẹ ukẹcha  tiọyena kẹ avwanre womarẹ ẹwẹn ọfuanfon rọyen.—Gal. 5:22, 23.

17. Vwo nene obo rehẹ 1 Kọrẹnt 9:25-27, mavọ yen ọyinkọn Pọl djisẹ rẹ ẹgbaẹdavwọn ro vwo sun oma rọyen?

¹⁷ Ọyinkọn Pọl ọyen ohwo ro vwo uruemu rẹ omaesuon. Ẹkẹvuọvo, ọ tare nẹ ọyen “nyẹ oma” rọyen rere o se vwo ru obo ri yovwirin. (Se 1 Kọrẹnt 9:25-27.) O ji jiro kẹ ihwo efa nẹ ayen vwo uruemu rẹ omaesuon ji “ru emu na ejobi dẹndẹn utute.” (1 Kọr. 14:40) Ofori nẹ avwanre muomaphiyọ ẹga ri Jihova ro churobọ si aghwoghwo rẹ ọkieje kugbe eyono rẹ ihwo.—Iruo 2:46.

18. Die yen cha nẹrhẹ Jihova nẹ avwanre kerẹ ihwo re tẹn ona?

¹⁸ Ohwo ro hwe iyerin shẹ de hwe iyerin buebun, kọyen tẹn ona rẹ iyerin ehwe. Vwọ fẹnẹ ọyena, ọ dia uche ihwo ra vwẹ ukẹcha kẹ vwọ rhe ukoko na yen che djephia sẹ avwanre tẹn ona-a. (Luk 8:11-15) Siẹrẹ avwanre de chirakon ghwoghwo ji yono ihwo efa, Jihova che ni avwanre kerẹ ihwo re tẹn ona. Diesorọ? Kidie avwanre nyupho rọyen vẹ Ọmọ rọyen.—Mak 13:10; Iruo 5:28, 29.

19-20. Orọnvwọn oghẹresan vọ yen muẹ avwanre vwo ghwoghwo vẹ ẹwẹn rẹ okpakpa enẹna?

¹⁹ Vwẹ ẹkuotọ evo, o vwo emeranvwe evo ra vwọ rhọnvwa nẹ e se kpo iyerin ehwe. Vwẹ ẹkuotọ tiọyena, ẹwẹn rẹ okpakpa rẹ ohwiyerin na sa rhe ganphiyọ siẹrẹ ọke ra rhọnvwe kẹ ayen na da guọnọ wanvrẹ re. Kerẹ ihwiyerin rẹ ihworakpọ, ofori nẹ avwanre ghwoghwo vẹ ẹwẹn rẹ okpakpa enẹna, kidie oba rẹ eyeren nana totọ re! Ọke re vwo ghwoghwo ovuẹ rẹ arho na re bu-un. Wo re hwọke yẹrẹ hẹrhẹ ọke ro me fo wo vwo vwobọ vwẹ iruo ọghanghanre nana-a.—Aghwo. 11:4.

²⁰ Ru owenvwe wo vwo ghwoghwo ganphiyọ, jẹ erianriẹn wẹn kpahen Baibol na kodophiyọ, fiudugberi, ji vwo uruemu rẹ omaesuon. Wọ cha mrẹ aghọghọ ri Jihova siẹrẹ wọ da vwomaba ihwiyerin rẹ ihworakpọ re vrẹ oduduru ẹrenren na. (Neh. 8:10) Brorhiẹn wo vwo vwobọ vwẹ iruo nana vọnvọn bẹsiẹ rẹ Jihova vwọ tanẹ o teri. Vwẹ uyono rọ cha na, a cha ta ota kpahen idjerhe erha re se vwo ru oruru avwanre ganphiyọ kpahen aghwoghwo rẹ Uvie na.