UYONO 39
Ohwo re Vwo Ẹguọnọ Kpahen da Dobọ rẹ Ẹga ri Jihova Ji
“Mavọ ayen . . . kpare ophu rọye.”—UNE 78:40.
UNE 102 “Cha Otu rẹ Evwiẹre Uko”
ỌDJẸKOKO *
1. Mavọ yen oma ruẹ ohwo a da djẹ ohwo rẹ orua rọyen nẹ ukoko na?
A DJẸ ohwo ru wo vwo ẹguọnọ kpahen vwo nẹ ukoko na jovwore? Ọ da ohwo mamọ! Oniọvo aye ọvo re se Hilda da ta: “Ọke rẹ ọshare mẹ vwo ghwu ẹgbukpe 41 rẹ avwanre vwọ rọnvwọn nu, ki mi roro nẹ ọna yen obo re ma bra kparobọ ri me se rhiẹromrẹ. * Ẹkẹvuọvo, ọke rẹ ọmọshare mẹ vwo nẹ ukoko na, je yanjẹ aye rọyen kugbe emọ royen vwo, ọnana brare mamọ vrẹ ughwu rẹ ọshare mẹ na.”
Jihova riẹn oborẹ ọ dia ọke rẹ ohwo re vwo ẹguọnọ kpahen da dobọ rẹ ẹga ri Jihova ji (Ni ẹkoreta 2-3) *
2-3. Vwo nene obo rehẹ Une Rẹ Ejiro 78:40, 41, mavọ yen oma ruẹ Jihova ọke rẹ odibo rọyen da dobọ rẹ ẹga rọyen ji.
2 Roro kpahen oborẹ oma che ru Jihova ọke rẹ emekashe rọyen evo re dia ẹbẹre ọvo rẹ orua rọyen vwọ siọn! (Jud 6) Gbe ji roro kpahen obo rọ darọ te ọke rẹ ihwo rẹ Izrẹl ro vwo ẹguọnọ kpahen mamọ na vwo gbevwọsuọ abọ buebun. (Se Une Rẹ Ejiro 78:40, 41.) Jẹ omuwẹro nẹ ọke rẹ ohwo ru wo vwo ẹguọnọ kpahen da dobọ rẹ ẹga ri Jihova ji, ọ da Ọsẹ rẹ avwanre rọhẹ obo odjuvwu ro vwo ẹguọnọ rẹ avwanre mamọ na. O vwo ẹruọ rẹ obo wo hirharokuẹ na. O che bru uwe uche je kẹ wẹ ukẹcha ru wọ guọnọre.
3 Vwẹ uyono nana, a cha ta ota kpahen obo rẹ avwanre se ru ra sa vwọ mrẹ ukẹcha ri Jihova ọke rẹ avwanre de hirharoku edia tiọyena. A je cha fuẹrẹn oborẹ avwanre sa vwọ vwẹ ukẹcha phia kẹ ihwo efa rehẹ ukoko na rehẹ ẹdia tiọyena. Jẹ ẹsosuọ, e ja ka ta ota kpahen iroro ọvo ro fori nẹ a kẹnoma kẹ tavwen.
WO BRORHIẸN HWE OMA WẸ-ẸN
4. Die yen esẹ vẹ ini buebun roro ọke rẹ emọ rayen da dobọ rẹ ẹga ri Jihova ji?
4 Ọke rẹ ọmọ rẹ ohwo da dobọ rẹ ẹga ri Jihova ji, esẹ vẹ ini evo ki roro nẹ ayen rhe ru vrẹ oborẹ ayen ruru jovwo ayen sa
vwọ chọn ọmọ rayen na uko vwọ ga Jihova. Ọke ra vwọ djẹ ọmọ rọyen vwo nẹ ukoko, oniọvo ọvo re se Luke da ta: “Mi rori nẹ mẹ yen sorọ. Me tobọ vwerhẹn erharhe rẹ evwerhẹn kpahọn dede. Ọkiọvo dede me tobọ viẹ, ọ da vwẹ mamọ.” Ọke buebun yen oniọvo aye re se Elizabeth ra je djẹ ọmọ rọyen nẹ ukoko vwo roro: “Die yen mi ruchọ kerẹ oni? Mi rori nẹ ẹgbaẹdavwọn mẹ ri mi vwo yono ọmọ mẹ na vwo vwo ẹguọnọ ri Jihova teri-i.”5. Ohwo da dobọ rẹ ẹga ri Jihova ji, ono yen sorọ?
5 Ofori nẹ avwanre karophiyọ nẹ Jihova kẹ avwanre ọvuọvo okẹ rẹ avwanre vwo brorhiẹn romobọ. Ọnana mudiaphiyọ nẹ avwanre sa jojẹ sẹ avwanre nyẹme rọyen yẹrẹ avwanre nyo-o. Emọ evo herọ ri vwo esẹ vẹ ini ri dje omamọ rẹ udje kẹ ayen vwẹ ẹga ri Jihova-a dedena, ayen brorhiẹn rẹ ayen vwọ ga Jihova je fuevun kẹ. Efa herọ ri vwo esẹ vẹ ini re wianre gangan vwo yono ayen uchebro ri Baibol na ẹkẹvuọvo ayen vwọ ghwanre tedje re, ayen da yan ji Jihova vwo. Ofori avwanre vwọ riẹn nẹ avwanre ọvuọvo yen che brorhiẹn se avwanre cha ga Jihova. (Jos. 24:15) Ọtiọyena, ọsẹ vẹ oni rẹ ọmo rayen dobọ rẹ ẹga ri Jihova ji kẹnoma kẹ iroro na nẹ ayen sorọ.
6. Mavọ yen oma ruẹ emọ ọke rẹ a da djẹ ọsẹ yẹrẹ oni rayen nẹ ukoko?
6 Ọkievo, ọsẹ yẹrẹ oni se nẹ ukoko na ọ me je kpairoro vrẹ orua rọyen. (Une 27:10) Emu tiọyena sa so ọmiaovwẹ rode kẹ emọ ri vwo ẹguọnọ ji muọghọ kẹ ọsẹ vẹ oni rayen mamọ. Esther rọ dia ohwo ra djẹ ọsẹ rọyen nẹ ukoko da ta: “Ọkieje yen me vwọ viẹ kidie ke me rhe mrẹvughe nẹ ọ dia o di bo ghwrẹ nẹ ukoko na-a. O brorhiẹn romobọ nẹ ọyen rha cha ga Jihova ọfa-a. Mi vwo ẹguọnọ rẹ ọsẹ mẹ, kọyensorọ ọke ra vwọ djẹ nẹ ukoko, ọkieje yen mi vwo roro kpahẹn oborẹ o yerẹn akpọ wan. Ọnana tobọ so uguegue kẹ vwẹ.”
7. Mavọ yen oma ruẹ Jihova kpahen eghene ra djẹ ọsẹ yẹrẹ oni rọyen nẹ ukoko?
7 Ighene, ọ da dianẹ a djẹ ọsẹ yẹrẹ oni wẹn nẹ ukoko, ọ da avwanre mamọ. Biko jẹ o muwẹro nẹ Jihova nabọ riẹn obo rọ da wẹ te. O vwo ẹguọnọ wẹn ji vwo ọdavwaro kpahen evun-ẹfuọn wẹn, ọtiọyen ji te avwanre re dia iniọvo wẹn. Je karophiyọ nẹ ọ dia owẹ yen sorọ ọsẹ yẹrẹ oni wẹn vwo brorhiẹn rayen na-a. Kirobo rẹ a tare jovwore, Jihova kẹ ihwo eje ọmuvwiẹ rẹ ayen vwọ jẹ ojẹ romobọ rayen. Ọtiọyena, kohwo kohwo rọ vwomakpahotọ ji bromaphiyame re riẹnre nẹ “dohwo doghwa rọye gba cha ghwa.”—Gal. 6:5.
8. Die yen ihwo rẹ orua se ru ayen vwọ hẹrhẹ ọke rẹ ohwo rẹ ayen vwo ẹguọnọ kpahen ra djẹ nẹ ukoko vwo rhivwin rhe? (Ni ekpeti na “ Rhivwin Bru Jihova Rhe.”)
8 Ọke rẹ ohwo ru wo vwo ẹguọnọ kpahen da dobọ rẹ ẹga ri Jihova ji, wo che re rhẹro rọyen ọkieje nẹ o che rhivwin rhe ẹdẹ ọvo. Die yen wo se ru ọke wọ vwọ hẹrhẹ na? Davwẹngba vwo ru obo wo se ru eje vwọ sẹro rẹ esegbuyota rọ ghwotọ. Wo de ru ọtiọyen, jẹ wo phi omamọ rẹ udje phiyotọ vwọ kẹ ihwo efa rehẹ orua na tobọ te ohwo ra djẹre na. Wọ je cha mrẹ ẹgba ru wọ guọnọre wo se vwo chirakon rẹ ọmiaovwẹ na. E gbe jẹ a ta ota kpahen owọẹjẹ evo rẹ wọ sa jẹ.
OBORẸ WO SE RU VWỌ SẸRO RẸ ESEGBUYOTA RỌ GHWOTỌ
9. Idjerhe vọ yen wọ sa vwọ bọn esegbuyota wẹn gan? (Ni ekpeti na “ Ẹkpo ri Baibol re Sa Chọn Wẹ Uko Ohwo ru Wo Vwo Ẹguọnọ Kpahen da Dobọ rẹ Ẹga ri Jihova Ji.”)
9 Ru oborẹ wo se ru eje wọ sa vwọ bọn esegbuyota wẹn gan. Ọyen obo re ghanre wo vwo ru esegbuyota wẹn vẹ ọ rẹ ihwo rẹ orua wẹn gan ọkieje. Mavọ yen wo se vwo ru ọtiọyen? Jihova sa kẹ wẹ ẹgba wọ sa vwọ bọn esegbuyota wẹn gan siẹrẹ wo de vwo uvi rẹ ọrhuẹrephiyotọ rẹ isese ri Baibol vẹ eroro kodo kpahen obo wo seri je davwẹngba vwo kpo uyono ọkieje. Joanna rẹ ọsẹ rọyen vẹ oniọvo rọyen rẹ ọmọtẹ she nẹ ukoko na da ta: “Ọke rẹ mi de se kpahen ihwo kerẹ Abigail, Ẹsta, Job, Josẹf, kugbe Jesu vwẹ Baibol na ẹwẹn mẹ ko totọ. Udje rayen chọn vwẹ uko vwọ kẹnoma kẹ ẹnwan rọ kamuka ji phiuduphiyọ ovwẹ awọ. Ine ri JW Broadcasting na je chọn vwẹ uko.”
10. Mavọ yen Une Rẹ Ejiro 32:6-8 vwo djephia kẹ avwanre oborẹ avwanre se vwo chirakon rẹ ofudjevwe?
10 Vuẹ Jihova kpahen obo ri kpokpo uwe ẹwẹn eje. Ọke rẹ ofu de dje we, wọ dobọ rẹ ẹrhovwo jẹ-ẹ. Vwẹ ọkieje vwọ rẹ Ọghẹnẹ ro vwo ẹguọnọ na nẹ ọ chọn wẹ uko vwo vwo ọkpọ rẹ iroro rọyen, nẹ o “dje kẹ wẹ” ji “yono uwe idjerhe ru wọ cha ra.” (Se Une Rẹ Ejiro 32:6-8.) Aphro herọ-ọ nẹ ọ sa bẹn mamọ ra vwọ vuẹ Jihova oborẹ oma ghini ruẹ avwanre. Ẹkẹvuọvo, Jihova nabọ riẹn omiaovwẹ rọhẹ udu wẹn. O vwo ẹguọnọ wẹn mamọ, o ji jiro kẹ wẹ nẹ wọ vuẹ ọyen obo rehẹ udu wẹn eje.—Eyan. 34:6; Une 62:7, 8.
11. Vwo nene obo rehẹ Hibru 12:11, diesorọ e vwo vwo imuẹro kpahen ọghwọku ri Jihova? (Ni ekpeti na “ Ra Vwọ Djẹ Ohwo Nẹ Ukoko Ọyen Odjephia rẹ Ẹguọnọ ri Jihova.”)
11 Bicha orhiẹn-ebro rẹ ekpako na. Ọyen ẹbẹre ovo rẹ ọrhuẹrephiyotọ ri Jihova ra vwọ djẹ ohwo ro ruchọ rọ rhọvwen kurhẹriẹ-ẹ Hibru 12:11.) Ihwo evo vwẹ ukoko na sa tanẹ orhiẹn rẹ ekpako na bruru na gbare-e. Ẹkẹvuọvo, karophiyọ nẹ ihwo re ta eta tiọyena guọnọ ta ota kpahen obo re chọre rẹ ohwo ra ghwọku na ruru-u. Avwanre riẹn emueje-e. Ọtiọyena, vwo imuẹro nẹ ekpako ri chidia vwẹ agware na davwẹngba rayen eje vwo nene uchebro ri Baibol na ji guẹdjọ vwọ “kẹ Jihova.”—2 Ikun 19:6, NW.
nẹ ukoko na. Ọghwọku rọyen na yovwin vwọ kẹ ihwo eje ji te ọ ra djẹre na. (Se12. Erere vọ yen te ihwo evo obọ kidie nẹ ayen yan nene odjekẹ ri Jihova ro shekpahen ohwo ra ghwọku?
12 Wo de se bicha orhiẹn-ebro rẹ ekpako na ra vwọ djẹ ohwo ru wo vwo ẹguọnọ kpahen ro ruchọ nẹ ukoko na, wọ sa chọn ohwo tiọyena uko vwo rhivwin bru Jihova rhe. Elizabeth ra ta ota kpahen siẹvure tare nẹ, “ọyen obo re bẹnre mamọ re mẹ vẹ ọmọshare mẹ rọ ghwanre tedjere vwo jẹ ota eta. Ẹkẹvuọvo, ọ vwọ rhoma rhivwin bru Jihova rhe, ọ da tanẹ ọyen omamọ rẹ orhiẹn ra vwọ djẹ ọyen. Ọke vwọ yan obaro, ọ da tanẹ ọyen yono erọnvwọn iyoyovwin buebun. Mi rhi yono re nẹ ọghwọku ri Jihova pha ghanghanre,” eriyin Elizabeth tare. Ọshare rọyen Mark da je vwọba: “O rhi vwo te ọke ọvo, ọmọ rẹ avwanre da vuẹ vwẹ nẹ ọyen guọnọ rhivwin rhe re kidie avwanre vẹ ọyen re yerẹnkuẹgbe-e. Oma vwerhen ovwẹ nẹ jihova chọn avwanre uko vwọ yan nene odjekẹ rọyen.”
13. Die yen sa chọn wẹ uko ọke rẹ ẹwẹn wẹn da hra totọ?
13 Ta ota kẹ ugbeyan rọ nabọ vwẹruọ rẹ oborẹ oma ru we. Nene ihwo ri tedje vwẹ ukoko na re sa chọn wẹ uko vwọ sẹro rẹ ẹro rẹ abavo ghwọrọ ọke kugbe. (Isẹ 12:25; 17:17) Joanna ra ta ota kpahen sẹvure da ta: “ki mi no nẹ mẹvwẹ ọvo yen herọ. Ẹkẹvuọvo igbeyan ri tedje ri mi ta ota kẹ chọn vwẹ uko mamọ.” Kẹ, ọ da rha dianẹ ihwo evo vwẹ ukoko na rhoma vuẹ wẹ eta re hra ẹwẹn wẹn vwo?
14. Diesorọ o vwo fo nẹ avwanre “rhe chirakon rẹ ohwohwo, ohwohwo vwo ghovwo ohwohwo nẹ otọ rẹ evun rhe”?
14 Chirakon rẹ iniọvo wẹn. Vwọrẹ uyota, ọ dia ihwo eje yen cha ta omamọ re eta-a. (Jems 3:2) Avwanre ọvuọvo gbare-e, ọtiọyena, wo jẹ o gbe wẹ unu siẹrẹ ohwo ra riẹn obo rọ cha ta-a yẹrẹ ọ da ta eta ri miovwo uwe ivun vwọ ri jẹ riẹ-ẹn. Karophiyọ uchebro rẹ ọyinkọn Pọl: “Ovwan rhe chirakon rẹ ohwohwo, ohwohwo vwo ghovwo ohwohwo nẹ otọ rẹ evun rhe ọ da tobọ dianẹ e gbe avwanre ku.” (Kọl. 3:13, NW) Oniọvo aye ọvo ra djẹ ohwo rẹ orua rọyen ọvo nẹ ukoko da ta: “Jihova chọn vwẹ uko vwo ghovwo iniọvo ri roro nẹ ayen chọn vwẹ uko jẹ ukuoma yen ayen sua kẹ vwẹ.” Die yen ukoko na se ru vwọ vwẹ ukẹcha phia kẹ ihwo rẹ orua rẹ ohwo ra djẹ nẹ ukoko re je fuevun ga Jihova?
UKOKO NA SA VWẸ UKẸCHA PHIA
15. Ukẹcha vọ yen herọ vwọ kẹ ihwo ra ghwa djẹ ohwo rẹ orua rayen nẹ ukoko obọ?
15 Dia dẹndẹn wọ je vwẹ ugbeyan vwo mu ihwo rẹ orua rẹ ohwo ra djẹ nẹ ukoko re je fuevun ga Jihova. Oniọvo aye ọvo re se Miriam tare nẹ, ọyen ka ro ẹnwan kpahen
uyono ẹra ọke ra vwọ djẹ oniọvo rọyen ọmọshare nẹ ukoko. “Oshọ rẹ obo rẹ ihwo cha ta mu uvwe. Ẹkẹvuọvo iniọvo buebun herọ rọ je da mamọ nẹ a djẹ oniọvo mẹ nẹ ukoko, ayen je ta erharhe rẹ eta kpahọ-ọn. Me kpẹvwẹ ayen mamọ kidie ayen sikẹrẹ ovwẹ ọke rẹ ẹwẹn mẹ vwọ hra totọ.” Oniọvo aye ọfa da ta: “Ọke ra vwọ djẹ ọmọshare rẹ avwanre nẹ ukoko, iniọvo buebun rhere ri bru avwanre uche. Evo vuẹ avwanre nẹ ayen ghwa riẹn obo rẹ ayen cha ta-a. Evo nene uvwe viẹ, efa de rhe si ọbe rẹ ota rẹ uchebro vwo rhe avwanre. Oborẹ ayen ruru na ghini chọn vwẹ uko mamọ!”16. Mavọ yen ukoko na se vwo phiuduphiyọ awọ je vwẹ ukẹcha vwọ kẹ orua rẹ ihwo ra djẹ nẹ ukoko?
16 Bicha ihwo rẹ orua rẹ ohwo ra djẹ nẹ ukoko re je fuevun ga Jihova. Ayen guọnọ ukẹcha wẹn enẹna vrẹ obo ri jovwo. (Hib. 10:24, 25) Ọkievo, ihwo rẹ orua rẹ ihwo ra djẹ nẹ ukoko rhi no so re nẹ ihwo evo vwẹ ukoko na rhe nene ayen ta ota-a, kerẹsiẹ ra da mrẹ nẹ a je djẹ ayen nẹ ukoko. Avwanre guọnọre nẹ ayen vwo ọkpọ rẹ iroro tiọye-en. E jẹ avwanre jiri ighene rẹ esẹ yẹrẹ ini rayen dobọ rẹ ẹga ri Jihova ji je bọn ayen gan. Maria ra djẹ ọshare rọyen nẹ ukoko rẹ ọshare na da kpairoro vrẹ orua na da ta: “Igbeyan mẹ evo kọn bru avwanre cha, nene uvwe chere emu je chọn avwanre uko vwo ruẹ ẹga rẹ orua. Ayen mrẹ oborẹ ọ da vwẹ te, ayen je nene uvwe viẹ. Ayen chochọn mẹ ọke rẹ ihwo efa da ta eta vwọ rhaphiẹ odẹ mẹ. Ayen ghini phiuduphiyọ ovwẹ awọ mamọ!”—Rom 12:13, 15.
Iniọvo rehẹ ukoko na se dje ẹguọnọ phia vwọ kẹ orua rẹ ohwo ra djẹ nẹ ukoko womarẹ ayen vwọ vwẹ ukẹcha kẹ ayen. (Ni ẹkorota 17) *
17. Die yen ekpako se ru vwo phiuduphiyọ awọ rẹ ihwo rẹ ẹwẹn rayen hra totọ?
17 Ekpako, ovwan reyọ kuphẹn kuphẹn ro rhiephiyọ eje vwọ kpuriẹn phiyọ esegbuyota rẹ ihwo rẹ orua rẹ ohwo ra djẹ nẹ ukoko re je fuevun ga Jihova. Ovwan vwo okpoghwa rẹ ovwan vwo phiuduphiyọ awọ rẹ ihwo rẹ ihwo rẹ ayen vwo ẹguọnọ kpahen dobọ rẹ ẹga ri Jihova ji. (1 Tẹsa. 5:14) Jẹ owọ wo vwo phiuduphiyọ ayen awọ, wọ vẹ ayen ta ota tavwen a ke ton uyono phiyọ kugbe ọke rẹ uyono de kuphiyọ nu. Kọn bru ayen ra, wẹ vẹ ayen je nẹrhovwo kugbe. Owẹ vẹ ayen wiankugbe vwẹ iruo rẹ aghwoghwo na yẹrẹ wo ji se durhie ayen nẹ ayen vwomaba ẹga rẹ orua wẹn. Ofori nẹ ekpako davwerhọn rẹ ihwo rẹ ẹwẹn rayen hra totọ ji dje ọdavwaro kugbe ẹguọnọ rẹ ayen guọnọre phia kẹ ayen.—1 Tẹsa. 2:7, 8.
WO JẸ OFU DJE WE-E, VWẸROSO JIHOVA ỌKIEJE
18. Vwo nene obo rehẹ 2 Pita 3:9, die yen Jihova guọno miẹ ihwo re dobọ rẹ ẹga rọyen ji?
18 Jihova “guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.” (Se 2 Pita 3:9.) Dedenẹ ohwo se ru umwemwu ọgangan, jẹ arhọ rọyen je pha ghanghanre vwọ kẹ Ọghẹnẹ. Karophiyọ nẹ Jihova hwa okpo osa, rọ dia arhọ rẹ Ọmọ rọyen ọghanghanre rọ vwọ de avwanre ohwo ọvuọvo reyọ na. Vwọrẹ ẹguọnọ, Jihova davwẹngba rọ vwọ chọn ihwo ri bo ghwru jovwo uko vwo rhivwin bru ọyen rhe. O rhẹro rọyen nẹ ayen che rhivwin rhe kirobo ra mrẹrẹ vwẹ udje ri Jesu rẹ ọmọsoghoro na. (Luk 15:11-32) Ihwo buebun ri bo ghwru jovwo rhoma rhivwin bru Jihova rhire. Ọtiọyena, iniọvo rẹ ukoko na da nabọ dede ayen reyọ vẹ omavwerhovwẹn. Elizabeth re djunute siẹvure rhiẹromrẹ oka rẹ aghogho tiọyen ọke rẹ a vwọ reyọ ọmọ rọyen rhivwin rhe ukoko na. Ro vwo roro kpuko, ọ da ta: “Omavwerhovwẹn mamọ kpahen iniọvo ri phiuduphiyọ avwanre awọ nẹ e jẹ ofu dje avwanre-e.”
19. Diesorọ avwanre vwọ vwẹroso Jihova ọkieje?
19 Avwanre sa vwẹroso Jihova ọkieje. Ọkieje yen uchebro rọyen sa vwọ chọn avwnare uko. O vwo uruemu ra vwọ kẹ okẹ ri ghwolo ghwolo, o gbe arodọnvwẹ, ọyen Ọsẹ ro vwo ẹguọnọ okokodo kpahen ihwo ri vwo ẹguọnọ rọyen re je ga. Jẹ o muwẹro nẹ Jihova cha kpairoro vrẹ owẹ-ẹ. (Hib. 13:5, 6) Mark re djunute siẹvure tare nẹ, “Jihova kpairoro vrẹ avwanre-e. Ọkieje yen ọ cha vwọ chọn avwanre uko siẹrẹ ẹwẹn rẹ avwanre da hra totọ.” Ọkieje yen Jihova cha vwọ kẹ wẹ “ẹgba rọ vrẹ ẹgba na.” (2 Kọr. 4:7) E, wọ sa sẹro rẹ evun-ẹfuọn wẹn ọ da tobọ dianẹ ohwo ru wo vwo ẹguọnọ kpahen dobọ rẹ ẹga ri Jihova ji.
UNE 44 Ẹrhovwo rẹ Ohwo ro Muomaphiyọ
^ ẹko. 5 Ọ da ohwo mamọ siẹrẹ ohwo re vwo ẹguọnọ kpahen da dobọ rẹ ẹga ri Jihova ji. Uyono nana ta ota kpahen oborẹ oma ruẹ Ọghẹnẹ emu tiọyen da p̣hia. Ọ ta ota kpahen oborẹ ihwo rẹ orua rẹ ohwo na se ru vwọ mrẹ uduephiophiyawọ je sẹro rẹ esegbuyota rọ ghwotọ. Uyono nana je cha ta ota kpahen oborẹ ihwo rehẹ ukoko na se ru vwọ vwẹ uchebro vẹ ukẹcha phia kẹ orua na.
^ ẹko. 1 E wene edẹ evo vwẹ uyovwinrota nana
^ ẹko. 79 IDJEDJE RẸ IHOHO: Oniọvo ọshare da yan jẹ orua rọyen vwo ji dobọ rẹ ẹga ri Jihova ji, te aye rọyen tẹ emọ rọyen ke rioja.
^ ẹko. 81 IDJEDJE RẸ IHOHO: Ekpako ivẹ ri phiuduphiyọ awọ rẹ orua ọvo vwẹ ukoko na.