1. Diesorọ ẹroẹvwọsuọ rọ kanre akpọ na rhe gbe avwanre unu-u?

 IHWO rehẹ akpọ rẹ Eshu na riẹn ohwo rẹ ayen sa vwẹroso-o. Ọkieje yen ofu rẹ uruemu rẹ ineki, ihwo ri suẹn kugbe ilori rẹ ẹga vwo dje ayen. Buebun rẹ ihwo ji no nẹ ayen cha sa vwẹroso igbeyan, ihwo rẹ orua, tobọ ji te ihwo re vẹ ayen gba dia asan ọvo-o. Ofori nẹ ọnana gbe avwanre unu-u, kidie Baibol na mraro rọyen phiyotọ jovwo nẹ, “vwẹ oba rẹ ẹdẹ na . . . , ihwo . . . gbe cha guọnọ ẹfuọ-ọn, . . . miovwi odẹ rẹ ihwo, . . . ke shẹ ihwo.” Ọnana mudiaphiyọ nẹ ihwo ke cha vwẹrokere Eshu rọ dia ọghẹnẹ rẹ eyeren nana ra cha sa vwẹroso-o na.​—2 Tim. 3:​1-4; 2 Kọr. 4:4.

2. (a) Amono yen a sa vwẹroso karekare? (b) Die yen ihwo evo se roro?

² Ẹkẹvuọvo avwanre re dia Inenikristi riẹnre nẹ a sa vwẹroso Jihova karekare. (Jer. 17:​7, 8) Avwanre vwo imuẹro dẹn nẹ o vwo ẹguọnọ rẹ avwanre, ọ je cha vwẹ ọke vuọvo vwọ “sen” igbeyan rọye-en. (Une 9:10) A je sa vwẹroso Jesu kidie o ghwu kẹ avwanre. (1 Pita 3:18) Ukẹcha rẹ Baibol na vwọ kẹ avwanre cha avwanre uko vwọ mrẹvughe nẹ Baibol na vwo odjekẹ ra sa vwẹroso. (2 Tim. 3:​16, 17) O mu avwanre ẹro nẹ a sa vwẹroso Jihova, Jesu kugbe Baibol na. Ẹkẹvuọvo ihwo evo se roro sẹ ayan sa vwẹroso iniọvo rẹ ukoko na ọkieje. Die yen sa chọn wẹn uko ọ da dianẹ ọ bẹn kẹ wẹ ru wọ vwọ vwẹroso iniọvo na?

3. Uphẹn rẹ oghẹresan vọ yen avwanre vwori? (Mak 10:​29, 30)

³ Jihova sane avwanre ra vwọ dia ẹbẹre ọvo rẹ orua rọyen re ga vwẹ akpọeje. Ọnana uphẹn rẹ oghẹresan rọ je ghwa erere buebun cha! (Se Mak 10:​29, 30.) Vwẹ akpọ na eje, avwanre vwo iniọvo buebun ri vwo ẹguọnọ ri Jihova, re je davwẹngba vwo yerẹn nene iwan rọyen. Ephẹrẹ, ẹkuruemu, vẹ irhuon rẹ  avwanre sa fẹnẹ ọrayen, jẹ avwanre vwo ẹguọnọ rayen ọ da tobọ dianẹ ọyen obọrẹsosuọ rẹ avwanre vwọ mrẹ ayen. Oma vwerhan avwanre e vwo kuomaba ayen ga Ọsẹ rẹ avwanre rọhẹ odjuvwu ro vwo ẹguọnọ na.​—Une 133:1.

4. Diesorọ avwanre vwọ guọnọ ukẹcha rẹ iniọvo rẹ avwanre?

⁴ Enẹna yen a ma vwọ guọnọ nẹ a vẹ iniọvo rẹ avwanre vwo uvi rẹ oyerinkugbe. Vwẹ ọkievo, ayen chọn avwanre uko vwẹ ọke rẹ ebẹnbẹn. (Rom 15:1; Gal. 6:2) Ayen brẹ avwanre uche rere e se vwo muomaphiyọ ẹga ri Jihova je dia ugbeyan rọyen ọkieje. (1 Tẹsa. 5:11; Hib. 10:​23-25) Vwẹ ẹwẹn roro obo rọ rha dia, ọ da dianẹ iniọvo rẹhẹ ukoko na vwẹ ukẹcha kẹ avwanre e se vwo hirharoku ivwighrẹn rẹ avwanre re dia Idẹbono kugbe akpọ rọyen na-a. O rhe che kri-i, Eshu vẹ ihwo ro suẹn ke cha vwọso ihwo rẹ Ọghẹnẹ. Ẹkẹvuọvo, oma cha vwerhen avwanre mamọ siẹrẹ iniọvo rẹ avwanre da vwẹ ukẹcha kẹ avwanre vwẹ ọke ọgangan yena!

5. Die yen nẹrhẹ ọ bẹn vwọ kẹ ihwo evo ayen sa vwọ vwẹroso iniọvo rayen?

⁵ Ẹkẹvuọvo ọ bẹn vwọ kẹ iniọvo evo rẹ ayen vwọ vwẹroso iniọvo na, ọkiọvo kidie nẹ ayen ku ayen phiyotọ yẹrẹ ayen se ru oborẹ ayen veri-i. Ọ je sa dianẹ ohwo ọvo vwẹ ukoko na ta ota ọvo yẹrẹ ru orọnvwọn rọ da ayen te ẹwẹn. Emu ọtiọyen da phia, ọ sa nẹrhẹ ọ bẹn ra vwọ vwẹroso ihwo efa. Kẹ die yen sa chọn avwanre uko vwọ vwẹroso iniọvo rẹ avwanre?

6. Idjerhe vọ yen ẹguọnọ sa vwọ chọn avwanre uko vwọ vwẹroso ihwo efa? (1 Kọrẹnt 13:​4-8)

⁶ Ẹguọnọ yen e mu ẹroẹvwọsuọ kpahen. Kọrẹnt Rẹsosuọ uyovwin 13 djisẹ rẹ ẹbẹre  sansan rẹ ẹguọnọ re sa chọn avwanre uko vwọ vwẹroso ihwo efa yẹrẹ rhoma vwẹroso ayen siẹrẹ ayen de ku avwanre phiyotọ. (Se 1 Kọrẹnt 13:​4-8.) Kerẹ udje, owọrota 4 tare nẹ, “ẹguọnọ vwo odiri kugbe aruẹdọ.” E de gbe Jihova ku dede o ji vwo odirin rẹ avwanre. Ọtiọyena ofori nẹ e vwo odirin rẹ iniọvo avwanre ọ da tobọ dianẹ ayen ta ota yẹrẹ ru erọnvwọn rọ da avwanre te ẹwẹn. Owọ 5 da je vwọba: “[Ẹguọnọ] ophu fobọ muo-o eyẹ emu fobọ da-a.” Avwanre guọnọ dia ihwo rẹ “emu fobọ da-a,” ri phiẹ obo re ru avwanre phiyọ evu-un. Aghwoghwo 7:9 jẹ avwanre riẹn nẹ, e jẹ a “fobọ mu ophu-u.” Mavọ yen o yovwin te ra vwọ reyọ eta rehẹ Ẹfesọs 4:26 vwo ruiruo, rọ tare nẹ, “wo jẹn ọnre she kpotọ ghene ophu wẹ-ẹn”!

7. Mavọ yen odjekẹ rehẹ Matiu 7:​1-5 sa vwọ chọn avwanre uko vwọ vwẹrosọ ihwo efa?

⁷ Orọnvwọn ọfa rọ sa cha avwanre uko vwọ vwẹroso ihwo efa ọyen a vwọ vwẹ ẹro ri Jihova vwo ni iniọvo na ji vwo nẹ ayen. Ọghẹnẹ vwo ẹguọnọ rayen, ọtiọyena ọ rhe phiẹ imwemwu rayen phiyọ evu-un. Ọna dẹn yen obo ro fori nẹ avwanre ji ru. (Une 130:3) Ukperẹ a vwọ tẹnrovi oruchọ rayen, ofori nẹ a davwẹngba vwọ tẹnrovi omamọ uruemu rayen vẹ owenvwe rẹ ayen vwori rẹ ayen vwo ru obo ri yoma. (Se Matiu 7:​1-5.) O mu avwanre ẹro nẹ ayen guọnọ ru obo ri yovwinrin, ọ dia owenvwe rayen rẹ ayen vwo ru avwanre chọ-ọ, kidie ẹguọnọ “se emu ejobi gbuyota.” (1 Kọr. 13:7) Ọ dia ota nana mudiaphiyọ nẹ Jihova guọnọre nẹ e di mu ihwo vwẹroso-o, ẹkẹvuọvo a vwẹroso ayen kidie ayen dje oma rayen phia kerẹ ihwo ra sa vwẹroso. *

8. Die yen wo se ru vwọ vwẹroso iniọvo wẹn?

⁸ Ọ reyọ ọke a ke sa vwẹroso iniọvo rẹ avwanre. Kẹ die yen wo se ru wọ sa vwọ vwẹroso iniọvo wẹn? Nabọ vughe ayen. Nene ayen ta ota vwẹ uyono. Wẹ vẹ ayen wiankugbe vwẹ iruo rẹ aghwoghwo na. Vwo odirin rayen rere wo ji rhie uphẹn phiyọ kẹ ayen vwo djephia nẹ ayen ihwo ra sa vwẹroso. Ọ vwọ dianẹ wo vughe ayen cha obọ na, ọ dia erọnvwọn eje ri shekpahen owẹ yen wọ cha vuẹ aye-en. Oyerinkugbe rẹ ovwan vwọ kpẹkpẹ na, wo se rhi rhievun ta edavwẹ wẹn kẹ ayen. (Luk 16:10) Ẹkẹvuọvo, die yen wo se ru ọ da dianẹ oniọvo ọvo ku we phiyotọ? Wọ fobọ kpairoro vrẹ-ẹ, ukperẹ ọtiọyen vwẹ ọke kẹ. Wọ vwẹ uphẹn kẹ uruemu yena nẹ ọ nẹrhẹ wo jẹ iniọvo wẹn ẹroẹvwọsuọ-ọ. Fikirẹ ọnana, avwanre che roro kpahen udje rẹ idibo ri Jihova evo re fuevun re ji kuphiyotọ, dedena ayen je vwẹroso ihwo efa.

9. (a) Idjerhe vọ yen Hanah vwọ vwẹroso ọrhuẹrẹphiyotọ ri Jihova dede nẹ ihwo evo re kobaro rẹ iruo rẹ ẹga na ruẹ chọ? (b) Die yen oborẹ Hanah rhiẹromrẹ na yono uwe kpahen a vwọ vwẹrosua ọrhuẹrẹphiyotọ ri Jihova? (Ni uhoho na.)

⁹ Oniọvo ọvo ro yerin tedje ku we phiyotọ womarẹ uruemu rọyen jovwo re? Ọ da dia ọtọyen, wọ cha mrẹ erere siẹrẹ wo de roro kpahen udje ri Hanah. Vwẹ ọke yena, Eli rọ dia orherẹn rode na yen kobaro vwẹ ẹga ri Jihova vwẹ Izrẹl. Ẹkẹvuọvo orua rọyen dia omamọ rẹ udje-e. Ọkieje yen emọ rọyen re vwo mu ẹdia vwẹ uwevwin rẹ ẹga na vwo vwobọ vwẹ uruemu rẹ ophọnphọnvwe ji te ọfanrhiẹn, jẹ ọsẹ rayen sa vwẹ ọghwọku ro fori vwọ kẹ aye-en. Jihova ghwe mie Eli ẹdia rọyen ugege yena-a. Hanah chukoku ọrhuẹrẹphiyotọ rẹ Ọghẹnẹ rọ vwọ dobọ rẹ ẹga rọ vwọ  kẹ ji vwẹ itabanako na kidie nẹ Eli je ga vwẹ etiyin kerẹ orherẹn rode-e. Ọke rẹ Eli vwọ mrẹ Hanah rọ nẹrhovwo vwẹ ọdjarhe rọyen, o de brokpakpa tanẹ udi muo. Ọ nama roro obo re phia tavwen o ki brorhiẹn hwe aye nana rẹ ofu rẹ akpọ dje hwe na-a. (1 Sam. 1:​12-16) Dedena Hanah veri nẹ o de vwiẹ ọmọshare, ọ cha vwọ kpahotọ ga vwẹ itabanako na vwẹ otọ rẹ ẹroevwote rẹ Eli. (1 Sam. 1:11) Ofori nẹ e ru emu kpahen orharhe uruemu rẹ emọ rẹ Eli na? E, Jihova ru emu kpahọn vwẹ ọke ro fori. (1 Sam. 4:17) Ukuotọ rọyen, Ọghẹnẹ da vwẹ ọmọshare vwọ kẹ Hanah re se odẹ rọyen Samuẹl.​—1 Sam. 1:​17-20.

10. Idjerhe vọ yen Ovie Devid vwọ vwẹroso ihwo efa dede nẹ ihwo evo kurophiyotọ?

¹⁰ Ugbeyan ọvo rọ ma kẹrẹ owẹ ku we phiyotọ jovwo re? Ọ da dia ọtiọyen, gbe roro kpahen oborẹ Ovie Devid rhiẹromrẹ. Ahitofẹl ọyen ọvo vwẹ usun rẹ igbeyan rọyen. Ẹkẹvuọvo ọke rẹ ọmọ ri Devid re se Absalọm vwọ davwẹngba ro vwọ reyọ usuon na mie ọsẹ rọyen, Ahitofẹl da vwomaba Absalọm vwọso Devid. Mavọ yen ọnana da Devid te, rẹ ọmọ robọ rọyen kugbe ugbeyan rọ ma kẹrẹ vwo kuophiyotọ! Dedena, Devid vwẹ uphẹn kẹ obo re phiare na nẹ ọ dobọ rọyen ji ro vwo jẹ ihwo efa ẹroẹvwọsuọ-ọ. Ukperẹ ọtiọyen, Devid da rhoma vwẹroso ugbeyan rọyen ọfa rọ fuevun re se Hushai, rọ rhọnvwe vwomaba ẹvwọsuọ na-a. O vwo iroro sansan ri mu Devid vwọ vwẹroso Hushai. Hushai rhe dia uvi rẹ ugbeyan kẹ Devid ro vwo phi arhọ rọyen phiyọ ẹdia rẹ imuoshọ vwọ vwẹ ukẹcha kẹ.​—2 Sam. 17:​1-16.

11. Idjerhe vọ yen ọvo vwẹ usun rẹ idibo ri Nabal vwo dje uruemu rẹ ẹroẹvwọsuọ phia?

¹¹ Ji roro kpahen udje ọvo rẹ ọvo vwẹ usun rẹ idibo ri Nabal phiyotọ. Devid vẹ ihwo rọyen sẹro rẹ idibo ri Nabal rọ dia ohwo rẹ Izrẹl. Ọke vwọ yanran na, Devid da nokpẹn rẹ emuọre rẹ ọyen vi ihwo rọyen cha re vwo mie Nabal rọ dia ọdafe, uche rọ guọnọ kẹ ayen eje. Ọke ri Nabal vwọ sen oyare na, ophu de mu Devid gangan, o de brorhiẹn ro vwo hwe eshare rehẹ uwevwin ri Nabal eje. Odibo ri Nabal ọvo da niyẹnrẹn rẹ obo re phia na kẹ Abigail rọ dia aye ri Nabal. Ọ vwọ dianẹ uwevwin na yen ọ je dia na, ọ riẹnre nẹ Abigail se sivwin arhọ rọyen. Ukperẹ  odibo na vwọ djẹ, ọ vwẹroso Abigail nẹ ọ sa rhuẹrẹ ebẹnbẹn na phiyọ. Odibo na vwẹroso Abigail kidie ọ riẹnre nẹ ọyen aye vẹ aghwanre. Obo re rhoma phia djerephia nẹ ọ nabọ vwo oboresorọ rọ vwọ vwẹroso Abigail. Abigail fiudugberi vwọ dobọ rẹ Devid ji ro vwo jẹ obo rọ guọnọ ruẹ na eruo. (1 Sam. 25:​2-35) Ọ riẹnre nẹ Devid che brevun kpiroro.

12. Idjerhe vọ yen Jesu vwo djephia nẹ ọyen vwẹroso idibo rọyen dede nẹ o vwo ẹdia evo rẹ ayen de shekpotọ?

¹² Jesu vwẹroso idibo rọyen dede nẹ o vwo ẹdia evo rẹ ayen de shekpotọ. (Jọn 15:​15, 16) Ọke rẹ Jems vẹ Jọn vwọ vuẹ Jesu nẹ ọ kẹ ayen ẹdia rẹ oghẹresan vwẹ Uvie na, Jesu nọ ayen onọ kpahen obo ri mu ayen vwọ ga Jihova yẹrẹ sen ayen nẹ ayen rha cha dia iyinkọn rọye-en. (Mak 10:​35-40) Ọmọke vwọ wan nu, idibo ri Jesu da djẹ jovwo vwẹ ason re rhi vwo muo na. (Mat. 26:56) Ẹkẹvuọvo, Jesu je vwẹroso ayen. Ọ riẹnre nẹ ayen gbare-e, jẹ o ji ‘vwo ẹguọnọ rayen te oba.’ (Jọn 13:1) A vwọ rhọvwọn Jesu nushi nu, ọ da vwẹ iruo ọghanghanre ọvo vwọ kẹ iyinkọn 11 rọyen re fuevun na, rẹ ayen vwọ kobaro rẹ iruo rẹ odibo egbe na je vwẹrote igodẹ rọyen re pha ghanghanre na. (Mat. 28:​19, 20; Jọn 21:​15-17) O vwo oboresorọ rẹ Jesu vwọ vwẹroso eshare nana re gbare-e na. Ayen eje fuevun re te ẹdẹ ughwu rayen. Vwọrẹ uyota, Hanah, Devid, odibo ri Nabal, Abigail vẹ Jesu phi omamọ udje phiyotọ kpahen obo ra sa vwọ vwẹroso ihworakpọ re gbare-e.

13. Die yen sa nẹrhẹ ọ bẹn a sa vwọ vwẹroso ihwo efa?

¹³ Wọ vwẹroso ohwo ọvo jovwore wọ da vuẹ ota rẹ odjahọn, wo de re nyo vwẹ unu rẹ ohwo ọfa? Ọyena sa kuọrọn ẹwẹn rẹ ohwo. Oniọvo aye ọvo ta ota rẹ odjahọn kẹ ọkpako ọvo. Vwẹ ẹdẹ rọ vwọ kpahọn, aye rẹ ọkpako na de se oniọvo aye na vwẹ uchebro kẹ, ọ sa dianẹ o nyo kpahen ota rẹ odjahọn rẹ oniọvo aye na vuẹ ọshare rọyen na. A sa rhọnvwe nẹ ọ cha bẹn rẹ oniọvo aye na vwọ rhoma vwẹroso ọkpako yena. Jẹ ọ dia oniọvo aye na ru chọ rọ vwọ guọnọ ukẹcha-a. O de bru ọkpako ọfa ra, ọkpako yena da vwẹ ukẹcha kẹ rọ sa vwọ rhoma vwẹroso ekpako na.

14. Die yen vwẹ ukẹcha kẹ oniọvo ọvo vwọ rhoma vwẹroso ihwo efa?

¹⁴ Oniọvo ọshare ọvo muophu kpahen ekpako ivẹ vwẹ ọke grongron, ko roro nẹ ọyen rha cha sa vwẹroso aye-en. Ẹkẹvuọvo, ko roro kpahen ota rẹ oniọvo ọvo ro muoghọ mamọ tare. Ota rẹ oniọvo na tare na vọnre vẹ ẹgba o ji phẹn, rọ vwọ tanẹ, “Eshu yen ọvweghrẹn na, ọ dia iniọvo rẹ avwanre-e.” Oniọvo na vwọ nabọ roro kpahen ota na je nẹrhovwo kpahọn nu, o de brorhiẹn rọ vẹ ekpako ivẹ na vwọ rhuẹrẹkugbe.

15. Diesorọ ọ vwọ reyọ ọke a ke sa rhoma vwẹroso ihwo efa? Djudje rọyen.

¹⁵ Uphẹn rẹ ẹga va wẹ abọ jovwore? Emu ọtiọyena sa da ohwo mamọ. Grete vẹ oni rọyen eyen Iseri re nabọ fuevun ga vwẹ Nazi Germany ọke ra vwọ dobọ rẹ iruo rẹ avwanre ji vwẹ etiyin vwẹ ikpe re kpahen 1930. Uphẹn rẹ ẹga ri Grete vwori rọ vwọ teyen ẹbe rẹ Uwevwin Orhẹrẹ na kẹ iniọvo rọyen vwerhọn oma mamọ. Ẹkẹvuọvo, ọke rẹ iniọvo na vwọ riẹn nẹ ọsẹ rọyen vwọsua uyota na, ayen de mie Grete uphẹn rẹ ẹga na vẹ ẹwẹn nẹ ọsẹ rọyen che tue ayen phia vwọ kẹ ihwo re vwọsua ukoko na. Grete ji hirharoku edavwini efa. Vwẹ uvwre ọke rẹ Ofovwin rẹ Akpọeje Rivẹ na, iniọvo na rha vwẹ imagazini kẹ Grete vẹ oni rọyen se-e, ayen ji yeren ayen ọke rẹ ayen da yan kanroma vwẹ urhuvwu-un. Ọ da ayen mamọ! A mrẹ vwo dje ọmiaovwẹ rọye-en, Grete tare nẹ ọ reyọ ọyen ọke grongron ọ ke sa reyọ vwo ghovwo iniọvo na je rhoma  vwẹroso ayen. Ọke vwọ yanran na, ọ da rhe mrẹ nẹ Jihova vwo ghovwo iniọvo na re, ko ji fo nẹ ọyen vwo ghovwo ayen. *

16. Diesorọ a vwọ kẹnoma kẹ korọnvwọn korọnvwọn rọ cha guọghọ ẹroẹvwọsuọ rẹ avwanre vwo kpahen ihwo efa?

¹⁶ Ọ da dianẹ obo re phia kẹ oniọvo na je phia kẹ wẹ re, gba davwẹngba wọ vwọ rhoma vwẹroso ihwo efa. Dede nẹ ọ cha reyọ ọke, jẹ erere che norhe siẹrẹ wọ da davwẹngba vwo ru ọtiọyen. Kerẹ udje, ọ da dianẹ wọ riemu ra wranre jovwo re, wọ cha jomaotọ kpahen obo ru wọ ria. Ẹkẹvuọvo orharhe emu ọvo ru wọ rere cha sa nẹrhẹ wọ dobọ rẹ emuẹriọ ji-i. Ọtiọyena, e ja vwẹ uphẹn kẹ erọnvwọn vuọvo nẹ ọ guọghọ ẹroẹvwọsuọ rẹ avwanre vwo kpahen iniọvo rẹ avwanre-e, kidie avwanre riẹnre nẹ ayen gbare-e. A da rhoma vwẹroso ihwo efa, oma cha vwerhen avwanre vrẹ obo ri jovwo, kẹ avwanre cha tẹnrovi oborẹ avwanre se ru e se vwo toroba uruemu rẹ ẹroẹvwọsuọ rọhẹ ukoko na.

17. Diesorọ ẹroẹvwọsuọ vwọ ghanre, kẹ die yen a cha ta ota kpahen vwẹ uyono rọ vwọ kpahen ọnana?

¹⁷ A fobọ mrẹ ohwo ra sa vwẹroso vwẹ akpọ rẹ Eshu nana-a, ẹkẹvuọvo avwanre vwẹrosua iniọvo rẹ avwanre kidie avwanre vwo ẹguọnọ rẹ ohwohwo. Ẹroẹvwọsuọ ọtiọyena toroba aghọghọ vẹ oyerinkugbe rọhẹ ohri rẹ avwanre enẹna, ọ je cha chọn avwanre uko vwo hirharoku edavwini vwẹ obaro na. Kẹ ọ da rha dianẹ ohwo ọvo ku we phiyotọ jovwore vwo? Davwẹngba vwo ni erọnvwọn kirobo rẹ Jihova nẹ ayen, reyọ odjekẹ ri Baibol na vwo ruiruo, ru ẹguọnọ ru wo vwo kpahen iniọvo wẹn kodophiyọ, wo mi ji yono vwo nẹ idje rehẹ Baibol na rhe. E se phi ofudjevwe ro no cha siẹrẹ ohwo de ku avwanre phiyotọ kparobọ, je rhoma vwẹroso ihwo efa. E de ru ọtiọyen, ka cha riavwerhen rẹ ebruphiyọ ro no cha siẹrẹ e de vwo igbeyan buebun ‘re kẹrẹ avwanre nọ oniọvo.’ (Isẹ 18:24) Ẹkẹvuọvo, ẹroẹvwọsuọ vwo ẹbẹre ivẹ. Vwẹ uyono rọ vwọ kpahen ọnana, a cha ta ota kpahen obo re se vwo djephia nẹ avwanre ihwo rẹ iniọvo rẹ avwanre sa vwẹroso.