Vwo nene obo rehẹ 1 Kọrẹnt 15:​8, Pọl da ta: “Ukuko rọye ejobi, ọ ke vwẹ oma phia kẹ vwẹ, ohwo ra fobọ vwiẹ-ẹ.” Vwẹ ọke rọ wanre, avwanre tare nẹ Pọl ta ota kpahen obo ro rhiẹromrẹ vwẹ emramrẹ rọ vwọ mrẹ Jesu ro suẹn vwẹ urinrin rọyen vwẹ odjuvwu. Kọ ghwa họhọ nẹ e brọghọ phiyọ oma ra vwọ rhoma vwiẹ yẹrẹ rhọvwọn nushi kerẹ ohwo rẹ ẹwẹn, rọ dia obo re vwo dje oka rẹ evrẹnushi ro che rhiẹromrẹ vwẹ ikpe buebun re cha vwẹ obaro na. A vwọ nabọ fuẹrẹn owọrota yena nu, a da rhe mrẹ oboresorọ o vwo fo nẹ a rhoma kpọ ẹruọ ri jovwo na vi.

Omuẹro nẹ vwẹ ẹkpo nana, Pọl ta ota kpahen obo re phia vwọ kẹ vwẹ okurhẹriẹ rọyen. Kẹ, die yen o mudiaphiyọ rọ vwọ tanẹ ọyen ohwo ra “fobọ vwiẹ-ẹ”? O vwo erọnvwọn sansan ri muro vwọ ta ọtiọyen.

Okurhẹriẹ rọyen vwomaphia kpregede vwẹ idjerhe ro muoshọ. Ọke buebun, e vwiẹ emọ rẹ emeranvwe rayen gbare-e kpregede. Ọke rẹ Sọl (ra rhoma rhe riẹn phiyọ Pọl) vwo kpo Damaskọs rere o vwo mukpahen Inenikristi rehẹ oboyin, o rhẹro rọyen nẹ ọyen cha mrẹ Jesu ra rhọvwọn nushi na vwẹ emramrẹ-ẹ. Ọ dia Pọl ọvo yen okurhẹriẹ rọyen na gbunu-u, o ji gbe Inenikristi rọ guọnọ re mukpahen na unu. Vwọba, obo ro rhiẹromrẹ na muoshọ tẹdia ro de rhuẹro vwẹ uvwre rẹ ọke evo.​—Iruo 9:​1-9, 17-19.

Ọ dia “ọke ro fori” yen e vwo kuorhẹriẹ-ẹ. Ubiota rẹ Grik ra vwọ fan phiyọ “ohwo ra fobọ vwiẹ-ẹ” na, a je sa tanẹ “ohwo re vwiẹre vwẹ ọke ro fori-i.” The Jerusalem Bible da rha ta vwẹ idjerhe ọtiọna, “Kọ ghwa họhọ nẹ e vwiẹ vwẹ kpregede vwẹ ọke rẹ ohwo ọvuọvo rhẹro rọye-en.” Jesu rhivwin kpo odjuvwu nu tavwen Pọl ki kurhẹriẹ. Vwọ fẹnẹ ihwo rẹ Pọl ta ota kpahen vwẹ obuko jovwo re mrẹ Jesu, ọyen komobọ mrẹ Jesu ra rhọvwọn nushi tavwen o ki kpo odjuvwu-u. (1 Kọr. 15:​4-8) Uphẹn rẹ Pọl vwọ mrẹ Jesu de rhi rhiephiyọ ọke ri Jesu vwọ vwomaphia kẹ kpregede, dede nẹ ọhọhọre nẹ ọ phiare vwẹ “ọke ro fori-i.”

Ọ ta ota kpahen oma rọyen vẹ ẹwẹn rẹ omaevwokpotọ. Kirobo rẹ ihwo evo ri yono ẹbe kodo tare, ota rẹ Pọl reyọ vwo ruiruo vwẹ etinẹ na se dje ẹro okueku re vwo ni oma rẹ ohwo. Ọ da dianẹ ọnana yen oborẹ Pọl vwo vwẹ ẹwẹn, kọyen ọ tanẹ ọyen muwan rọ vwọ dia ọyinkọ-ọn. Vwọrẹ uyota, ọ tobọ tanẹ, “kidie mẹvwẹ hẹ ọyinkọn rẹ ọkuko, ro fori re se ọyinkọ-ọn, kidie mi mu kpahe ishọshi [ukoko, NW ] rẹ Ọghẹnẹ. Ẹkẹvuọvo vwẹ ẹserọphẹ rẹ Ọghẹnẹ me vwọ hẹ obo re me epha na.”​—1 Kọr. 15:​9, 10.

Ọtiọyena, ọ sa dianẹ Pọl ta ota kpahen oborẹ Jesu vwomaphia kẹ wan kpredege vwẹ idjerhe ro rhẹro rọye-en, okurhẹriẹ rọyen rọ vwomaphia vwẹ ọke ro rhẹro rọye-en yẹrẹ nẹ ọyen muwan vwọ kẹ emramrẹ rọ mrẹre na-a. O toro obo ri muro vwọ ta ọtiọye-en, Pọl nabọ vwẹ ẹro ọghanghanre vwo ni emramrẹ na. Ọnana djerephia phenphẹn kẹ nẹ a rhọvwọn Jesu nushi rhe. A gbe ta rẹ Pọl vwọ karunumuẹ obo ro rhiẹromrẹ ro rhẹro rọye-en vwẹ ọke ro de ghwoghwo kẹ ihwo kpahen evrẹnushi ri Jesu na!​—Iruo 22:​6-11; 26:​13-18.