Seth * vwọ karophiyọ obo re phia kẹ, ọ da ta: “Ọke vuọvo yen a vwọ djẹ vwẹ vẹ aye mẹ nẹ iruo. Vwẹ ẹgbukpe ivẹ, ẹse rẹ ihwo ruẹ kẹ avwanre vẹ imiruo itete kọyen avwanre vwọ riemu. Ọnana da nẹrhẹ ẹwẹn rẹ aye mẹ Priscilla kuọrọn mamọ, ki mi ji no nẹ mi fiemu vuọvo-o.

“Mavọ yen avwanre se vwo yerin ghene ẹdia nana? Kọke kọke yen aye mẹ vwọ karophiyọ eta rẹ Jesu rehẹ Matiu 6:34. Ọ vuẹ vwẹ nẹ e jẹ a ro ẹnwan rẹ odẹ-ẹ, kidie ẹdẹ vuọvo vwo ukpokpogho robọ rọyen. Ẹrhovwo ẹnẹ kẹrẹ ẹgba vwo chirakon. Vwọ kẹ vwẹ, Une Rẹ Ejiro 55:22, yen bru vwe uche. Kerẹ ọbuine na, mi mu oghwa mẹ vwọ kẹ Jihova, ọ da ghene sẹro mẹ. Dede nẹ mi vwo iruo asaọkiephana, avwanre ji yeren akpeyeren rẹ kekpe kirobo rẹ Jesu tare vwẹ Matiu 6:20-22. Ọ rọ ma rho, avwanre da rhe nabọ sikẹrẹ Ọghẹnẹ vẹ ohwohwo.”

Jonathan da je ta: “Oshọ rẹ obaro na mu vwe mamọ ọke rẹ eki rẹ orua avwanre vwo she fikirẹ esa. Uweren ọgangan da nẹrhẹ oborẹ avwanre kokori vwẹ ẹgbukpe 20 re muotọ. Me vẹ aye mẹ ke kunu fikirẹ igho. Avwanre rha sa dẹ emu vuọvo-o.

“Ẹkẹvuọvo, Ota rẹ Ọghẹnẹ vẹ ẹwẹn ọfuanfon rọyen chọn vwẹ uko vwo brorhiẹn rẹ aghwanre. Kiruo kiruo me mrẹre eje kọyen mi ruẹ, avwanre rhe ji muẹ erọnvwọn dẹ-ẹ. Kerẹ Iseri rẹ Jihova, iniọvo avwanre ji bicha avwanre mamọ. Ayen phiuduphiyọ avwanre awọ, je chọn avwanre uko ọke rẹ erọnvwọn vwọ ghene gan mamọ.”

Raquel da ta: “Ọke rẹ ọshare mẹ vwọ djẹ juvwe vwo, ivun de miovwo uvwe mamọ, ọ da vwẹ dẹn, ẹwẹn mẹ da je kuọrọn totọ. Ẹkẹvuọvo, mi sikẹrẹ Ọghẹnẹ, o de bru vwe uche. Kẹdẹ kẹdẹ me da nẹrhovwo rhe Ọghẹnẹ, ufuoma rọyen kọ sẹro rẹ ubiudu mẹ. Kọ ghwa họhọ nẹ ọ rhuẹrẹ ubiudu mẹ phiyọ.

“Baibol na je chọn vwẹ uko vwo phi ẹwẹn rẹ ophu kparobọ. Me da reyọ eta rẹ ọyinkọn Pọl te ubiudu, rọ vwọ ta vwẹ Rom 12:21 nẹ, ‘Wo jẹ umwemwu phi we kparobọ-ọ, ẹkẹvuọvo vwẹ uyoyovwi phi umwemwu kparobọ.’

“Omamọ ugbeyan mẹ ọvo chọn vwẹ uko mamọ vwo yerin ghene ẹdia na. O dje ọbe rẹ Aghwoghwo 3:6 kẹ vwẹ, ọ da vuẹ vwẹ nẹ o vwo ọke rẹ obo re vwori vwo ‘ghwrẹ’ va ohwo abọ. Uchebro na bẹnre mamọ jẹ ọyen obo me guọnọre. Ọ da nẹrhẹ me tẹnrovi erọnvwọn efa re sa kẹ vwẹ omavwerhovwẹn.”

Elizabeth je tanẹ, “Wọ guọnọ obicha siẹrẹ orọnvwe wẹn da fan. Mi vwo omamọ ugbeyan ọvo rọ kẹ vwẹ obicha tiọyen kẹdẹ kẹdẹ. O nene uvwe viẹ, o bru vwe uche, o de ji dje obọdẹn rẹ ẹguọnọ kẹ vwẹ. Mi vwo imuẹro nẹ Jihova reyerọ vwọ chọn vwẹ uko ọke yena.”

Luis, re djunute vwẹ uyovwinrota rẹsosuọ na vwo ọga rẹ ubiudu ọgangan ọvo, abọ ivẹ yen o dino ghwu. E phi ijini rẹ odju phiyọ inwe rọyen inọke 16 vwẹ ẹdọke. Ọ da ta: “Me nẹrhovwo kẹ Jihova kọke kọke. Me da nẹrhovwo nu, kọ ghwa họhọ nẹ Ọghẹnẹ kẹ vwẹ ẹgba me guọnọre. Ẹrhovwo kẹ vwẹ uduefiogbere mi se vwo yerin ghene ebẹnbẹn mẹ na kidie mi vwo esegbuyota kpahọn, me je riẹn nẹ ọyen vwẹrote vwe.”

Petra rọ vrẹ ẹgbukpe 80 re, da je ta: “Me guọnọ ru erọnvwọn buebun, je mi rhe vwo ẹgba na-a. Ẹdia  mẹ na da vwẹ mamọ. Oma ko mu vwe ghwọrọ. Ọkieje kọyen me vwọ rọ ihunvwun. Ọke sansan mi vwo iroro rẹ Jesu ọke rọ vwọ vuẹ Ọsẹ rọyen nẹ e jẹ ebẹnbẹn na wanvrẹ, siẹrẹ ọ da dia ọhọre rọyen. Ẹkẹvuọvo, Jihova vwẹ ogangan kẹ Jesu, ọ je kẹ vwẹ ogangan. Ẹrhovwo yen uhunvwun mẹ kẹdẹ kẹdẹ. Oma mẹ yovwẹn siẹrẹ me da ta ota kẹ Ọghẹnẹ nu.”—Matiu 26:39.

Julian ji vwo ẹwẹn yena kidie ọyen ohwo ro nene ọga ro djobọte ẹbẹre ọvo rẹ afọnrhe na vẹ ubekun rẹ ugbuko (multiple sclerosis) muabọ omarẹ ikpe 30 re. Ọ da ta: “Ukperẹ agbara rẹ uwevwin mẹ, agbara re ghorie kọyen mi chidia. Ẹkẹvuọvo, oma je vwerhen ovwẹ kidie me vwẹ akpọ mẹ vwọ chọn ihwo efa uko. Uruemu ra vwọ kokẹ sa nẹrhẹ ọmiaovwẹ rẹ oja kpotọ, Jihova ji ruẹ orugba rẹ uve rọyen rọ vwọ kẹ avwanre ẹgba ọke ra da guọnọ. Kerẹ ọyinkọn Pọl, me sa nabọ tanẹ, ‘Mi se ru emu ejobi vwi Kristi rọ kẹ vwẹ ogangan.’”—Filipae 4:13.

Antonio vwọ karophiyọ ọke rẹ ọsẹ rọyen vwo ghwu, ọ da ta: “Ọke rẹ imoto vwọ djẹ ro ọsẹ mẹ hwe, o muvwẹro ẹsosuọ-ọ. Mi niro nẹ ofori nẹ ọ phia-a, oyan obọ rọyen yen ọ yan ẹdẹ yena. Jẹ, o vwo emu vuọvo mi se ru-u. Vwẹ ẹdẹ iyorin, ọ ta ota-a, o kpoghoma-a tavwen o ki rhi ghwu. Me davwẹngba mi vwo jẹ ẹviẹ vwẹ obaro rẹ oni mẹ, ẹkẹvuọvo me viẹ gangan siẹrẹ mẹvwẹ ọvo da herọ. Ọkieje me vwọ nọ oma mẹ nẹ, ‘Diesorọ? Diesorọ?’

“Vwẹ ọke rẹ imuoshọ yena, me vuẹ Jihova nẹ ọ chọn vwẹ uko vwo sun iroro mẹ, ọ je kẹ vwẹ ufuoma. Ememerha na, ẹwẹn mẹ ko rhi totọ. Me karophiyọ nẹ Baibol na tare nẹ kohwo kohwo se rhiẹromrẹ irhevwa ‘ro di bru’ avwanre cha. Ọ vwọ dianẹ Ọghẹnẹ che se gun efian na-a, mi vwo imuẹro kokoroko nẹ me cha rhoma mrẹ ọsẹ mẹ vwẹ evrẹnushi na.”—Aghwoghwo 9:11; Jọn 11:25; Taitọs 1:2.

Robert, re djunute vwẹ uyovwinrota rẹsosuọ na ji vwo iroro tiọyen. Ọ da je tanẹ, “Me vẹ aye mẹ Maribel rhiẹromrẹ ufuoma rẹ ubiudu rẹ Filipae 4:6, 7 ta ota kpahen. Avwanre mrẹ ọnana womarẹ ẹrhovwo rẹ avwanre nẹ kẹ Jihova. Ufuoma rẹ ubiudu nana nẹrhẹ avwanre sa ta ota kpahen iphiẹrophiyọ rẹ evrẹnushi na vwọ kẹ ihwo re ghwa iyẹnrẹn. Dede nẹ ọmọ avwanre ghwu vwẹ asidẹnti rẹ aropleni na, avwanre je karophiyọ omamọ ọke avwanre vẹ ọyen ghwọrọ kugbe. Ọyena kọyen avwanre tẹnroviẹ.

“Iniọvo na vwọ vuẹ avwanre nẹ ayen mrẹ avwanre vwẹ itẹlivishọni rẹ avwanre vwọ nabọ ta ota kpahen oborẹ avwanre segbuyota, avwanre da vuẹ ayen nẹ ẹrhovwo rayen yen chọn avwanre uko. Mi vwo imuẹro na dẹn nẹ Jihova bru avwanre uche womarẹ evuẹ buebun rẹ ayen si rhe avwanre.”

Kirobo ra mrẹ vwẹ udje rẹ ihwo nana, Ọghẹnẹ sa vwẹ uchebro kẹ ihwo ri rhiẹromrẹ ebẹnbẹn vẹ egbabọse sansan. Kẹ owẹ vwo? Otoro ebẹnbẹn wo rhiẹromrẹ vwẹ akpeyere-en, uchebro herọ re sa chọn wẹ uko vwo yerin ghene ayen. * Yare ukẹcha rẹ Jihova. Ọyehẹ “Ọghẹnẹ rẹ uchebro.”—2 Kọrẹnt 1:3.