GBE RORO TAVWEN: Wo kiẹn asan ra da sẹro rẹ ema awanre. Buebun rayen kporonri, je guọghọ bekun re. A tobọ rha mrẹ ẹbẹre evo rẹ evo vwẹ usun rẹ ema na-a. Ẹkẹvuọvo, o vwo ọvo rọ je nabọ gan; ọ je hẹ obo re vwo ruo ẹsosuọ yoyovwin. Wọ da nọ ohwo rọ reyọ owẹ vwo kiẹn na “Ọnana yen e ruru kuko vwẹ usun rayen eje?” Ọ da ta nẹ “Ẹjo, a tobọ ruo nu tavwen a ke ma efa buebun rẹ wọ mrẹ na, jẹ, a je rhoma rhuẹrẹ rhabea na-a.” Wọ da rhoma nọ, “A sẹro rọyen nẹ abọ rẹ odju vẹ osio?” Ọ da ta, “Ẹjo, ọnana yen me hirharoku odju vẹ osio rọ ma gan kparobọ re. Ihwo buebun je tobọ davwẹngba ayen vwọ guọghọ re.” Ọkiọvo, o se gbewunu nẹ ‘Die yen e vwo ruo?’

Vwẹ idjerhe vuọvo na, Baibol na họhọ oma yena. Ọyen ọbe rẹ awanre, rọ ghwo vrẹ ẹbe efa buebun. Ẹbe efa ri krire je herọ. Ẹkẹvuọvo, kerẹ ema rẹ awanre yena ri kporonri, je guọghọ bekun na, buebun rẹ isiesi rẹ awanre guọghọre mamọ fikirẹ ikpe buebun re wanvrẹ re. Kerẹ udje, a rhoma reyọ vwọso oborẹ ẹbe tiọyena ta kpahen isayẹnsi jovwo fikirẹ erianriẹn kpokpọ re rhe vwomaphia enẹna. Ọke buebun, ukperẹ odjekẹ rayen kpahen omaesivwon vwọ vwẹ ukẹcha phia, e me rhoma so ukuoma. Buebun rẹ isiesi rẹ awanre tiọyena rha họhọ oborẹ ayen hepha ọke re vwo tu si aye-en, ẹbẹre evo ghuọghọre yẹrẹ ghwruru.

Ẹkẹvuọvo, Baibol na fẹnẹre. Dedenẹ a ton esio rẹ Baibol na phiyọ vwẹ ikpe re vrẹ ujorin 35 re wanre na, ọ je hẹ abavo. Dede nẹ ihwo davwẹngba abọ buebun rẹ ayen vwọ torhẹ yẹrẹ dobọ rẹ ese rọyen ji vwẹ ikpe ujorin evo re wanre na, jẹ emu ọvuọvo se ru eta rẹ Baibol na-a. Erianriẹn re vwomaphia nonẹna se dje Baibol na phiyọ ẹbe rẹ awanre-e,  ukperẹ ọtiọyen, Baibol na ta eta kpahen obo re cha phia vwẹ obaro na.​—Ni ekpeti na “O Kpo Awanre re Gbanẹ Ọ Ka Obaro kẹ Ọke Rọyen?”

Jẹ wo se roro, ‘A ghene sa vwẹ iyono rẹ Baibol vwo ruiruo vwẹ ọke rẹ avwanre na?’ A vwọ kpahenphiyọ, nọ oma wẹn: ‘Erhọ yen ebẹnbẹn re ma gan rẹ ihworakpọ hirharokuẹ nonẹna? Erhọ yen me muoshọ?’ Ọkiọvo, wo che roro kpahen ofovwin, aphopho na ro miovwinrin enẹna, ozighi yẹrẹ umiovwon. Asaọkiephana gbe roro kpahen oborẹ Baibol na yonori. Wo vwo ruẹ ọtiọyena, nọ oma wẹn, ‘Ihwo de ru nene iyono nana, akpọ na che yovwinphiyọ?’

ẸGUỌNỌ VẸ UFUOMA

“Ebruba kẹ ihwo rẹ ufuoma: kidie e che se ayen emọ rẹ Ọghẹnẹ.” (Matiu 5:9) “Udu wẹn da gba, wọ vẹ ohwo ọvuọvo ghwọ-ọ.”​—Rom 12:18.

ARODỌVWẸN, EVWOGHOVWON

“Ebruba kẹ ihwo ri ni aruẹdọn: kidie ihwo efa ki ji ni aruẹdọn kẹ ayen.” (Matiu 5:7) “Ohwohwo chirako kẹ ohwohwo, fobọ si ophu nẹ evun rere ohwohwo vwo ghovwo ohwohwo nẹ otọ rẹ evun rhe: kirobo rẹ Ọrovwohwo vwo ghovwo na, eriyin we ji vwo ghovwo rhe.”​—Kọlose 3:13.

OYERINKUGBE RẸ IHWO EJE

Ọghẹnẹ “ma ihwo phihọ ẹgborho ọvuọvo nẹ e dia enu rẹ akpọ na.” (Iruo Rẹ Iyinkọn Na 17:26) “Ọghẹnẹ ghwẹ oma hẹ abọvo jẹ ọvo vwo-o; ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.”​—Iruo Rẹ Iyinkọn Na 10:34, 35.

ỌGHỌ VWỌ KẸ AKPỌ NA

“Ọrovwohwo Ọghẹnẹ da reyọ ohwo na o de phio phihọ udju rẹ Iden na rere ọ sẹro rọye.” (Jẹnẹsis 2:15) Ọghẹnẹ cha “ghwọrọ ọghwọrọ rẹ akpọ na.”​—Ẹvwọphia 11:18.

UTUOMA KPAHEN URHURU VẸ ỌFANRHIẸN

“Si oma wẹn nẹ urhuru evwo; ọ dia efe buebu rẹ ohwo vwori ọye urhuarhọ rọye epha-a.” (Luk 12:15) “Ẹkẹvuọvo ọfanrhie kugbe oka koka re ijẹfuọn ejobi eyẹ urhuru evwo e jẹn e se odẹ rọye vwẹ ohri rẹ ovwa-an, kirobo ro fori vwẹ ohri rẹ ihwo efuanfon.”​—Ẹfesọs 5:3.

OHWO RẸ UYOTA, ỌGBOWIAN

Avwanre “guọnọ ruẹ emu rẹ ọghọ vwi kemu kemu ejobi.” (Hibru 13:18) “E jẹn ohwo ro cho uji jẹ uji vwo, ẹkẹvuọvo e jẹn vwẹ obọ rọye wian.”​—Ẹfesọs 4:28.

ỌGHANROVWẸ RA VWỌ CHỌN IHWO EFA UKO

“Yono otu rẹ oma rhọ, cha otu rẹ evwiẹre uko, chirako rẹ ayen ejobi.” (1 Tẹsalonaika 5:14) “Te asan rẹ emephran orivwi kugbe eyauku re hẹ ukpokpogho.”​—Jems 1:27.

Ọ dia Baibol na ghwe di kere iruemu nana-a. Vwẹ idjerhe ra da sa vwẹ ayen ruiruo, o yono avwanre nẹ a vwẹ ẹro rọ ghanre vwo ni ayen, je vwẹ ayen ruiruo kẹdẹ kẹdẹ. Siẹrẹ ihwo buebun da vwẹ iyono re djunute na vwo ruiruo, ebẹnbẹn rẹ ihworakpọ hirharoku nonẹna rhe shekpotọ? Ọtiọyena, a guọnọ iyono rẹ Baibol na nonẹna vrẹ ọke rẹ jovwo! Jẹ, die yen iyono rẹ Baibol na se ru kẹ wẹ enẹna?

Ohwo rọ ma ghwanre rọ dia otọrakpọ na re tare nẹ “iruo rọye vọnre vẹ aghwanre,” yẹrẹ iruo yen e vwo vughe ohwo ro vwo aghwanre. (Matiu 11:19) Wọ rhọnvwe phiyọ ota yena? Iruo rẹ aghwanre yen e se vwo vughe. Ọtiọyena, wo se roro: ‘Ọ da dianẹ Baibol na vwo odjekẹ re se vwo ruiruo, o rhe fo nẹ o djobọte akpeyeren mẹ? Mavọ yen ọ sa vwọ vwẹ ukẹcha kẹ vwẹ vwẹ ebẹnbẹn ri mi hirharokuẹ enẹna?’ Roro kpahen udje ọvo.

Delphine * ọyen ohwo ro yeren akpọ rẹ omavwerhowẹn. Siẹvuọvo na, erọnvwọn evo da rhe va abọ. Ọmọtẹ rọyen rọ dia eghene ghwuru. Orọnvwe rọyen fanre. Uweren da rhe gan kẹ. Ọ da ta: “Me rha riẹn oka rẹ ohwo re me hepha-a​—ọmọ, ọshare vẹ uwevwin va wẹ abọ. Ki mi no nẹ mi rhe fo ohwo ro yeri-in kidie mi rhe vwo iphiẹrophiyọ vwọ kẹ obaro na-a.”

Ọnana yen obọ rẹsosuọ rẹ Delphine rhe mrẹ uyota rẹ eta nana: “Ikpe rẹ akpọ rẹ avwanre ujorha gbe ihwe, eyẹ ọkeọvo ugbegangan o vwo te ujọne; dede na ẹdẹ rẹ akpọ rayen vọnre vẹ omaesuo vẹ ukpokpogho; nananana ayen wanvrẹn nure, avwanre ke rhan yanran.”​—Une Rẹ Ejiro 90:10.

 Vwẹ ọke ọtiọyẹna, Delphine da guọnọ ukẹcha vwẹ Baibol na. Oborẹ Baibol na ru kẹ gberunu. Kirobo rẹ iyovwinreta erha re vwọ kpahen ọnana che dje, ihwo efa buebun mrẹrẹ nẹ Baibol na vwẹ ukẹcha kẹ ayen ọke rẹ ayen vwọ reyọ uchebro rọyen vwo ruiruo vwẹ ọke rẹ ebẹnbẹn. Ayen rhe mrẹ nẹ Baibol na họhọ oma re djunute siẹvore vwẹ ọtonphiyọ rẹ uyovwinrota nana. Ọ fẹnẹ ẹbe buebun re ghwa, a rha sa vwẹ ayen ruẹ emu vuọvo-o. Ọ hẹ ọtiọyen kidie nẹ orọnvwọn ọfa yen e vwo ru Baibol na? Ota rẹ Ọghẹnẹ yen evun rọyen gbanẹ ọ rẹ ohworakpọ?​—1 Tẹsalonaika 2:13.

Ọkiọvo, wọ je mrẹ nẹ ikpe rẹ ohwo yeren akpọ krẹnre, ọ je vọn vẹ okpetu. Ọke rẹ okpetu de bun nọ kẹ wẹ, tivọ yen wọ da guọnọ onẹrhẹvwe, ukẹcha vẹ uchebro ra sa vwẹroso?

E jẹ e roro kpahen idjerhe erha rẹ Baibol na da sa chọn wẹ uko vwẹ akpeyeren. O se yono uwe obo wọ sa vwọ

1. kẹnoma kẹ ebẹbẹn ọ da dia obo wo se ru.

2. rhuẹrẹ ebẹnbẹn phiyọ ọke re da vwomaphia.

3. yerin ghene ẹdia rẹ wo che se wene-e.

Iyovwinreta re vwọ kpahen ọnana cha ta ota kpahen ẹdia erha nana.