VWẸ ẹro roro nẹ vwọ yan idjerhe ro muebri vwẹ ason. Dede nẹ o krire rẹ ọnre na she re, wọ riẹnre nẹ wo che ghwru-u, kidie itọshi ro lo mamọ rhe we obọ. Wọ da vwẹ itọshi na vwo ni otọ, wọ nabọ mrẹ obo rehẹ obaro wẹn. Wo de rhe vwo ni obaro na, kẹ wọ sa mrẹ idjerhe na sherẹ.

Vwẹ idjerhe evo, Baibol na họhọ itọshi. Kirobo rẹ avwanre yonori vwẹ iyovwinreta re wanre na, Ota rẹ Ọghẹnẹ sa vwẹ ukẹcha kẹ avwanre vwo phi ebẹnbẹn rẹ avwanre hirharokuẹ kẹdẹ kẹdẹ kparobọ. Ẹkẹvuọvo, Baibol na ru vrẹ ọtiọyen. O ji gburukpẹ phiyọ obaro na, rọ nẹrhẹ avwanre sa mrẹ, ji nene idjerhe ro suẹn kpo omavwerhovwẹn rẹ bẹdẹ. (Une Rẹ Ejiro 119:105) Vwẹ idjerhe vọ?

E jẹ avwanre fuẹrẹn idjerhe ivẹ rẹ Baibol na vwọ kẹ avwanre iphiẹrophiyọ kpahen obaro na: 1 Ọ nẹrhẹ e yeren akpọ ro vwotọ, kugbe 2 O yono avwanre obo ra sa vwọ dia ugbeyan rẹ Ọmemama rẹ avwanre bẹdẹ bẹdẹ.

Baibol na kẹ avwanre uchebro re sa nẹrhẹ avwanre rhuẹrẹ ebẹnbẹn rẹ avwanre phiyọ, dedena, Baibol na ghanre nọ ẹbe re se siẹrẹ a da guọnọ ukẹcha. Ukpe ro vwo yono avwanre nẹ e mu ẹwẹn kpahen ọdavwẹ rẹ avwanre ọvo, o yono avwanre nẹ o vwo erọnvwọn efa re ghanre vrẹ ọdavwẹ rẹ avwanre. Vwẹ idjerhe yena ọvo yen akpeyeren avwanre se vwo vwotọ.

Kerẹ udje, roro kpahen uyono rẹ Baibol nana: “Ẹrhovwo herọ kẹ ọkokẹ nọ ohwo ra kẹ.” (Iruo Rẹ Iyinkọn Na 20:35) Vwọ sa karophiyọ ọke wọ vwọ vwẹ ukẹcha kẹ ohwo? Yẹrẹ wọ vwọ rhuẹrẹ ọke vwọ nabọ kerhọ kẹ ugbeyan wẹn ọke rọ vwọ ta ẹwẹn rọyen kẹ wẹ? Oma rha vwerhe owẹ nẹ wo ru obo re kẹ ohwo ọfa aghọghọ?

Avwanre mrẹ aghọghọ rọ ma rho siẹrẹ avwanre  da kẹ, jẹ e rhẹro rẹ emu vuọvo rhivwi-in. Ọshare ọvo da ta: “Ọ cha bẹn mamọ nẹ wọ vwẹ oma wẹn vwo ze, jẹ wọ mrẹ vrẹ oborẹ wo vwo ze-e​—takpẹ wo rhẹro rẹ osa vuọvo ọke wo vwo ruo-o.” Avwanre da vwẹ oma vwo ze, marho kẹ ihwo ri che se ru ẹse kẹ avwanre rhivwi-in, avwanre cha mrẹ osa. Avwanre rhe dia ẹbẹre ọvo rẹ erọnvwọn re ma ghanre na. Vwọrẹ uyota, avwanre nene Ọmemama na wian kuẹgbe komobọ, o ni owian uruemu esiri avwanre kerẹ igho re momiro. (Isẹ 19:17) O ni oborẹ avwanre ruẹ kẹ ihwo re guọnọ ukẹcha ghanghanre, o ji ve nẹ ọ cha vwẹ arhọ rẹ bẹdẹ vwẹ iparadaisi vwẹ otọrakpọ na vwọ hwosa kẹ avwanre, ọnana uvi rẹ iphiẹrophiyọ vwọ kẹ obaro na.​—Une Rẹ Ejiro 37:29; Luk 14:12-14. *

Ọ rọ ma rho, Baibol na yonori nẹ avwanre se yeren akpọ ro vwotọ siẹrẹ avwanre da ga Ọghẹnẹ rẹ uyota na rọ dia Jihova. (Aghwoghwo 12:13; Ẹvwọphia 4:11) Siẹrẹ avwanre de ru ọtiọyen, kọyen avwanre ru okpemu ọvo, avwanre nẹrhẹ oma vwerhen Jihova. Vwọrẹ uyota, ọ vuẹ avwanre: “Ghwanre . . . rere udu mẹ vwọ ghọghọ.” (Isẹ 27:11) Di roro tavwen, siẹrẹ avwanre de brorhiẹn rẹ aghwanre re mu kpahen iyono rẹ Baibol na, avwanre nẹrhẹ oma vwerhen Ọsẹ rẹ avwanre rọhẹ odjuvwu. Diesorọ? Kidie ọ davwerhọn rẹ avwanre, ọ je guọnọ nẹ avwanre mrẹ erere womarẹ e vwo nene odjekẹ rọyen. (Aizaya 48:17, 18) Vwọrẹ uyota, a vwọ ga ọ rọ ma akpọ vẹ idjuvwu na, ji yeren akpọ vwẹ idjerhe rẹ oma da vwerhọn yen obo ri me yovwin.

2 RA VWỌ DIA UGBEYAN RẸ ỌMEMAMA NA

Baibol na ji yono avwanre nẹ a vwẹ ugbeyan mu Ọmemama rẹ avwanre. Baibol na tare nẹ “Si kẹrẹ Ọghẹnẹ, rere o si kẹre owẹ.” (Jems 4:8) Ọkievo, avwanre se vwo ẹwẹn ivivẹ sẹ a ghene sa dia ugbeyan rẹ Ọmemama ro me vwo ẹgba na. Ẹkẹvuọvo, Baibol na kẹ avwanre imuẹro nẹ siẹrẹ avwanre da “guọnọ Ọghẹnẹ,” avwanre cha ghene “mrẹ” kidie o “sheri kẹ avwanre ohwo ọvuọvo-o.” (Iruo Rẹ Iyinkọn Na 17:27) Uchebro rẹ Baibol na ra vwọ dia ugbeyan rẹ Ọghẹnẹ cha nẹrhẹ avwanre yeren omamọ rẹ akpọ vwẹ obaro na. Vwẹ idjerhe vọ?

Roro: O vwobo rẹ avwanre davwẹngba te-e, ohwo vuọvo cha sa vrabọ rẹ ughwu rọ dia ọvweghwrẹn avwanre rọ koba-a. (1 Kọrẹnt 15:26) Ẹkẹvuọvo, Jihova ọyen Ọghẹnẹ rẹ bẹdẹ. O che ghwu-u, ọ je guọnọ nẹ igbeyan rọyen dia bẹdẹ. Baibol na vwẹ eta nana vwo djisẹ rẹ oborẹ Jihova guọnọ vwọ kẹ idibo rọyen: “E jẹn udu wẹn dia bẹdẹ!”​—Une Rẹ Ejiro 22:26.

Mavọ yen wọ sa vwọ dia ugbeyan rẹ Ọghẹnẹ bẹdẹ? Yono kpahọn ọkieje vwevunrẹ Ota rọyen Baibol na. (Jọn 17:3; 2 Timoti 3:16) Guọnọ ukẹcha rọyen rere wo se vwo vwo ẹruọ rẹ Baibol na. Baibol na kẹ avwanre imuẹro nẹ, avwanre da “nọ vwẹ obọ rẹ Ọghẹnẹ” ọkieje, ko siobọ nẹ kemu kemu kẹ avwanre. * (Jems 1:5) Ọ rọ koba, davwẹngba reyọ obo wo yonori vwo ruiruo, jẹ Ota rẹ Ọghẹnẹ dia kerẹ “urhukpẹ kẹ awọ [wẹn] kugbe orẹmrẹ kẹ idjerhe [wẹn]” asaọkiephana ra ro bẹdẹ bẹdẹ.​—Une Rẹ Ejiro 119:105.