Rose da ta: “Mi vwo ọga rọ so emiavwe ọgangan kẹ vwẹ. Oka rẹ akpọ rẹ mi yerẹn de rhi shekpotọ.” Ọvo usun rẹ edavwẹ re ma rho kẹ yen ebẹnbẹn ro vwo mu ẹwẹn phiyọ eyono rẹ Baibol vẹ irueru efa vwẹ ẹga rọyen. Ẹkẹvuọvo ọ mrẹ ukẹcha vwo nẹ eta rẹ Jesu rehẹ Matiu 19:26: rẹ Jesu vwọ tanẹ emu vuọvo “sa bẹn kẹ Ọghẹnẹ-ẹ.” Rose yonori nẹ idjerhe sansan herọ re se vwo ru uyono. Kidie nẹ ọga rọyen nẹrhẹ ọ bẹn kẹ ro vwo se ẹbe ọkievo, Baibol vẹ ẹbe re ru phiyọ uhworo kọyen ọ kerhọ kẹ. * Ọ da ta: “Mane kẹ eyena herọ jovwo-o, me rha riẹn oborẹ me sa vwọ sẹro rẹ oyerinkugbe mẹ vẹ Jihova-a.”

Ọke rẹ Rose vwo muomaphiyọ kidie nẹ o rhe se ruẹ obo ro ruẹ jovwo-o, ọ da mrẹ uchebro vwo nẹ eta rehẹ 2 Kọrẹnt 8:12: “Kidie omaẹcha na da hẹ etiyin, ka sa reyọ kirobo rẹ ohwo na vwori, ọ dianẹ kirobo rẹ ohwo na je evwo-o.” Eta yena nẹrhẹ Rose karophiyọ nẹ Ọghẹnẹ vwo omavwerhovwẹn kpahen obo ro ruẹ na, kidie ọyen asan rẹ ẹgba rọyen teri.

Delphine, re djunute siẹvure da ta: “Ọke rẹ ọmọtẹ mẹ rọhẹ ẹgbukpe 18 vwo ghwu, ọ da vwẹ mamọ te  ẹdia rẹ mi de roro nẹ me rha sa dia ọfa-a. Emu vuọvo re che se shephiyọ-ọ.” Ẹkẹvuọvo ọ mrẹ uchebro vwẹ eta rehẹ Une Rẹ Ejiro 94:19, rẹ ọbuine na da ta kẹ Ọghẹnẹ: “Ọke rẹ ẹnwan rẹ udu mẹ de rhi buphihọ, uchebro wẹn kọye sasa ẹnwẹ mẹ.” Ọ da ta: “Me da nẹrhovwo rhe Jihova nẹ ọ chọn vwẹ uko vwọ mrẹ erọnvwọn re cha sasa ẹwẹn mẹ.”

Ọ da vwomakpahotọ kẹ iruo rẹ ẹga. Ọke vwọ yan obaro, ọ da vwẹ oma rọyen dje ikọlọ-pẹnso rẹ omotete, ọ da tobọ vwirhin, a je reyọ vwo siẹ. Vwẹ idjerhe vuọvo na, dede nẹ o muomaphiyọ, ọ mrẹvughe nẹ ọ je sa vwẹ ukẹcha kẹ ihwo efa. Ọ da ta: “Ke me rhe mrẹvughe nẹ ọke me da vwẹ iyono rẹ Baibol vwọ vwẹ uchebro kẹ ohwo re me vwẹ Baibol vwo yono, ọyena idjerhe rẹ Jihova wan sasa ẹwẹn mẹ.” O de si odẹ rẹ ihwo sansan vwẹ Baibol re je rioja rẹ uvweri ọgangan phiyotọ. Ọ da rhe mrẹvughe nẹ “ayen eje ihwo re nabọ nẹrhovwo.” Ọ je mrẹvughe nẹ “Jihova cha kpahenphiyọ ẹrhovwo avwanre-e siẹrẹ avwanre de rhurhu Baibol na.”

Uyono rẹ Baibol yono Delphine orọnvwọn ọfa, ọyen a vwọ tẹnrovi obaro na ukperẹ e vwo mu ẹwẹn kpahen obo re wanre. Iphiẹrophiyọ re djunute vwẹ Iruo Rẹ Iyinkọn Na 24:15 vwẹ uchebro kẹ: “Evrẹnushi herọ kẹ ihwo te ihwo ọsoso te i ri jẹ ọsoso ẹdia.” Mavọ yen imuẹro rọyen gan te nẹ Jihova cha rhọvwọn ọmọtẹ rọyen? Delphine da kpahenphiyọ onọ na komobọ. “Me mrẹ ọmọtẹ mẹ vwẹ obaro na. Mi ru ọrhuẹrẹphiyotọ rẹ me vẹ ọmọ mẹ cha vwọ heha kugbe nure. Me mrẹ ekpuyovwin mẹ vẹ ọmọtẹ mẹ vwevunrẹ ogba oyoyovwin, kirobo me mrẹrẹ, ji vwo ẹguọnọ rọyen ọke mi vwo vwiẹ.”