Rosie da ta: “Ọkieje yen me vwọ ro ẹnwan kpahen obo re je phia-a.” Awọreta rẹ Baibol vọ yen vwẹ ukẹcha kẹ? Ọvo usun rayen yen Matiu 6:34: “Ovwan gbe ro ẹnwan kpahe odẹ-ẹ, kidie odẹ re ro ẹnwan rẹ oma roye. Jen ukpokpogho rẹ ẹdẹ na te kẹ ẹdẹ na.” Rosie da tanẹ eta rẹ Jesu yena vwẹ ukẹcha kẹ vwọ dobọ ra vwọ ro ẹnwan kpahen obo re sa phia odẹ rọ cha na ji. Ọ da je ta: “Me rha tobọ ro ẹnwan kpahen obo re je phia-a, ebẹnbẹn mẹ ji bun.”

Yasmine ji noso nẹ ọ je ro ẹnwan gan nọ. “Me viẹ vwẹ ẹdẹ evo, me je sa vwerhen vwẹ ason evo-o. Ke me rhe mrẹvughe nẹ iroro echọchọ mu vwe rọ.” Ẹkpo rẹ Baibol vọ yen vwẹ ukẹcha kẹ? Ọ da rionbọ kpo 1 Pita 5:7: “Vwẹ ẹnwan wẹn ejobi vwọ ya [Ọghẹnẹ], kidie ọye re vwẹ ẹro te we.” Yasmine da ta: “Ọke vwọ yanran na, je me nẹrhovwo rhe Jihova, ọ da kpahenphiyọ ẹrhovwo mẹ. Kọ ghwa họhọ nẹ e mu okpoghwa nẹ uyovwin mẹ. O ji vwo ọke evo rẹ iroro echọchọ na je vwọ cha, ẹkẹvuọvo me riẹn oborẹ mi se vwo yerin ghene ayen enẹna.”

Eghene aye ọvo re se Isabella da ta: “Mi rorori nẹ uruemu e vwo gbeghẹrẹ hẹ evunrẹ ọbara kidie ọsẹ mẹ ji gbeghẹrẹ. Me kpairoro vrẹ erọnvwọn eghanghanre ri fori nẹ mi ru, rere mi vwo jẹ orọnvwọn vuọvo eruo, mi di vwo rovwoma yẹrẹ ni TV. Ọyen orharhe rẹ uruemu kidie otoroba ofudjevwe, ọ je nẹrhẹ ohwo ruiruo ro fiotọ-ọ.” A mrẹ uchebro rọ chọn rọ uko vwẹ 2 Timoti 2:15, rọ tare: “Ru obo rẹ udu wẹn gbare re wọ vwẹ oma wẹn kẹ Ọghẹnẹ kerẹ ohwo ọvo ra jẹreyọ, ọwena rẹ oma jẹvuọ.” Isabella da ta, “Me guọnọ nẹ oma rẹ iruo mẹ vo Jihova kidie nẹ mi gbeghẹrẹ-ẹ.” O ru ewene mamọ re.

Ọtiọyen Kelsey je ta: “Mi de vwo iruo rẹ mi che ru, me fobọ ruo-o, jokpanẹ nẹ ọke re bru kẹ vwẹ joma te re. Ke me vie, me gbe sa vwerhẹ-ẹn, ke me je ro ẹnwan. O shephiyọ kẹ vwẹ kakaka-a.” Kelsey mrẹ ukẹcha vwẹ Isẹ 13:16: “Erianriẹn ohwo ro vwo iroro vwo ruẹ emu kemu ejobi, ẹkẹvuọvo ẹkpa vwẹ ughẹnghẹn rọye nẹ.” Ọ da ta obo ro yono vwo nẹ ẹkpo rẹ Baibol yena rhe: “Ọyen emu rẹ aghwanre e vwo muegbe phiyotọ. Asaọkiephana, mi vwo ẹbe rẹ mi si ọrhuẹrẹphiyotọ mẹ phiyọ, ọnana vwẹ ukẹcha kẹ vwẹ vwọ nabọ vwẹrote iruo mẹ, me rha yanjẹ ọvuọvo vwo hẹrhẹ imibrẹro ri chekọ bẹsiẹ ọke na vwo re-e.”

Kirsten tare nẹ “ọshare rọyen yanjẹ ọyen vẹ emọ ẹne vwo vwẹ orọnvwe rayen.” Ẹkpo rẹ Baibol vọ yen vwẹ ukẹcha kẹ? Isẹ 17:17 da ta: “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.” Kirsten guọnọ ukẹcha mie ihwo efa re je ga Jihova kerẹ ekpuyovwin rọyen. Ukẹcha vọ yen ọ mrẹre? “Igbeyan mẹ vwẹ ukẹcha kẹ vwẹ vwẹ idjerhe sansan! Ayen mu erọnvwọn ra sa ria vẹ iflawa phiyọ anurhoro mẹ. Abọ erha yen a vwẹ ukẹcha kẹ vwẹ vẹ emọ mẹ vwọ kua vwo nẹ uwevwin ọvo kpo ọfa. Ọvo guọnọ iruo kẹ vwẹ. Ọkieje yen igbeyan mẹ vwọ vwẹ ukẹcha kẹ vwẹ.”

Delphine re djunute vwẹ ẹsosuọ na, ji nene ẹdia rẹ orhuvwohwo muabọ. Ọna yen obo rọ tare ọke rẹ emu eje vwọ va abọ nu: “Kọ họhọ nẹ me hẹ otafe rẹ oghwa rẹ ihworakpọ hepha ri mi vwo nẹ ayen. Ke me rhe mrẹ oma mẹ vwẹ ẹdia rẹ ọruvwohwo.” Ẹkpo rẹ Baibol ọvo rọ vwẹ ukẹcha kẹ yen Une Rẹ Ejiro 68:6: “Ọghẹnẹ vwẹ uwevwi kẹ ohwo ra kua jovwo dia.” Ọ da ta: “Me riẹnre nẹ ọ dia uwevwin re rhiẹro mrẹ yen owọrota yena ta ota kpaha-an. Ukperẹ ọtiọyen, me rhe mrẹvughe re nẹ Ọghẹnẹ kẹ avwanre uwevwin rọ dia asan me da mrẹ ihwo ri ghini vwo ẹguọnọ mẹ, ri ji vwo ẹguọnọ rẹ Jihova. Jẹ me riẹnre nẹ mi che se sikẹre ihwo efa-a, jokpanẹ ki mi sikẹre Jihova tavwen. Ọtiọyena Une Rẹ Ejiro 37:4 vwẹ ukẹcha kẹ vwẹ vwẹ ẹdia nana: ‘Jẹn oma rẹ Ọrovwohwo vwerhe owẹ kọ vwẹ obo rẹ udu wẹn guọnọre kẹ wẹ.’ ”

O de ku ota na phiyọ ọtiọnẹ: “Me rhe mrẹvughe re nẹ ofori mi vwo sikẹre Jihova ganphiyọ. Ọyen ugbeyan ro me yovwin kparobọ. Mi de si erọnvwọn re mẹ vẹ ihwo efa se ru rere oma vwọ vwerhen ovwẹ phiyotọ, ọnana kọ sa nẹrhẹ me dia ugbeyan rẹ ihwo re je dia igbeyan rẹ Ọghẹnẹ. Mi yonori nẹ erhuvwu rẹ ihwo yen ofori nẹ me tẹnrovi, rere mi ji nene ayen yenri vwẹ ọtiọyen.”

Vwọrẹ uyota, igbeyan re ga Ọghẹnẹ dia ihwo re gbare-e. Iseri rẹ Jihova ji vwo oka rẹ ebẹnbẹn rẹ ihwo efa vwori. Ẹkẹvuọvo, uyono rẹ Baibol mu ihwo vwọ vwẹ ukẹcha kẹ ihwo efa kọke kọke uphẹn na de rhiephiyọ. Ọyen emu aghwanre a vwọ vwẹ ihwo tiọyena vwo mu ugbeyan. Ẹkẹvuọvo, uchebro rẹ Baibol na sa vwẹ ukẹcha phia kpahen ebẹnbẹn re che se si no asaọkiephana-a, kerẹ ọga rọ bẹn esivwo yẹrẹ uvweri?