IHWO EVO TARE NẸ ẸJO. Idọktọ ọvo reyọ a vwọ vwẹ odjekẹ rẹ Baibol na vwo ruiruo nonẹna vwo dje a vwọ reyọ ọbe re siri vwẹ ukpe rẹ 1920 vwo yono ikẹmisri vwẹ iklasi. Ohwo rọ nọ enọ kpahen Baibol na sa nọ sẹ wọ sa vwẹ ọbe rẹ Ikọmputa rẹ awanre vwo ruiruo vwẹ Ikọmputa rẹ ọke nana. Obo ra ta na ọna: Ihwo evo ni Baibol na kerẹ ọbe ro kpo awanre re.

Diesorọ ihwo vwọ vwẹ ọbe rẹ awanre tiọyena vwo ruiruo vwẹ akpọ rẹ nonẹna ro rhie ẹro na? Wẹbsaiti buebun rha vwẹ uchebro vẹ odjekẹ kpokpọ vwọphia kọke kọke. Vwẹ TV, a mrẹ ihwo re tare nẹ ayen riẹn kpahen obo rẹ ohwo se yeren akpọ wan, o de vwo omavwerhovwẹn. Eghwa ra da shẹ ẹbe vọnre vẹ ẹbe re sa vwẹ ukẹcha kẹ ihwo, igho oduduru buebun yen ayen mrẹ vwo nẹ ẹshẹ rẹ ẹbe tiọyena cha.

Ọ vwọ dianẹ a mrẹ evuẹ kpokpọ vwẹ ọke nana, diesorọ a vwọ rhoma se Baibol na, ọbe re siri omarẹ ikpe 2,000 re wanre? Ọ rha dianẹ ihwo re nọ enọ kpahen Baibol na gbare ayen vwọ ta nẹ a vwọ vwẹ odjekẹ rẹ Baibol na vwo ruiruo họhẹ a vwọ vwẹ ẹbe rẹ ikọmputa yẹrẹ ikẹmisri rẹ awanre vwo ruiruo? Vwọrẹ uyota, ọ chọre a vwọ vwẹ Baibol na vwo dje ẹbe rẹ ikọmputa yẹrẹ ọ rẹ ikẹmisri rẹ awanre. Irueru rẹ isayẹnsi vẹ egbaerianriẹn wene, ẹkẹvuọvo obo ra ma ohworakpọ wan wene re? Ihwo je guọnọ riẹn obo re se vwo yeren omamọ rẹ akpọ, obo re se vwo vwo omavwerhovwẹn vẹ ofuvwegbe, uvi rẹ akpeyeren rẹ orua, kugbe omamọ rẹ igbeyan.

Dede nẹ o kriri re si Baibol na re, ọ je ta ota kpahen ẹdia yena vẹ efa. Baibol na je tanẹ Ọmemama na yen mu ihwo vwo sio. Ọ vwẹ odjekẹ kẹ avwanre vwẹ kẹdia kẹdia rẹ akpeyeren, ji muegbe rẹ avwanre vwọ kẹ egbabọse re sa vwomaphia. (2 Timoti 3:16, 17) Emu ofa je herọ, Baibol na je vwẹ uchebro vẹ odjekẹ ri kpo awanre-e vwọphia! Baibol na komobọ tare nẹ “Ota rẹ Ọghẹnẹ na ọkpokpọ.”​—Hibru 4:12.

Oborẹ Baibol na tare sa ghene dia uyota? O kpo awanre re, gbanẹ ọyen ọbe rọ ma ghanre, ro ji fi erere kẹ avwanre​—ọbe ro yerẹn? E ru Uwevwin Orhẹrẹ nana rọ dia ọ rẹsosuọ vwẹ e rẹ oghẹresan ra cha vwọphia kpahen ohwohwo na, rere ọ vwọ vwẹ ukẹcha kẹ wẹ vwọ mrẹ ẹkpahọnphiyọ rẹ enọ nana.