Siẹrẹ wọ da guọnọ riẹn ohwo, orọnvwọn rẹsosuọ rẹ wo ruẹ yen wọ vwọ nọ, “Die yen odẹ wẹn?” Siẹrẹ wọ da nọ Ọghẹnẹ onọ yena, die yen ọ cha vuẹ wẹ?

“Mẹvwẹ Jihova. Ọyena yen odẹ mẹ.”—Aizaya 42:8, NW.

Odẹ na ghanre kẹ Ọghẹnẹ mamọ. Ọ dia ohwo yen mu odẹ na kẹ Ọghẹnẹ-ẹ, ọyen ọvo yen mu odẹ na kẹ oma rọyen. Jihova da ta: “Ọnana odẹ mẹ bẹdẹ, enẹ a vwọ karophihọ ovwẹ vwẹ evun rẹ uvwiẹ nana ejobi.” (Eyanno 3:15) Vwevunrẹ Baibol na, odẹ rẹ Ọghẹnẹ komobọ vwomaphia bun vrẹ odova rọyen sansan kerẹ Ọromevwẹgba, Ọsẹ, Ọrovwohwo yẹrẹ Ọghẹnẹ, odẹ na je vwomaphia bun vrẹ kodẹ kodẹ kerẹ Ebraham, Mosis, Devid yẹrẹ Jesu. Vwọrẹ uyota, ọyen ọhọre rẹ Jihova a vwọ riẹn odẹ na. Baibol na da ta: “Jẹ ihwo riẹn nẹ wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.”—Une Rẹ Ejiro 83:18, NW.

Odẹ na ghanre kẹ Jesu. Vwẹ ẹrhovwo re seri nẹ Ọsẹ Avwanre yẹrẹ Ẹrhovwo rẹ Ọrovwori na, Jesu da vuẹ idibo rọyen nẹ ayen yare Ọghẹnẹ vẹ eta nana: “Jẹn avwanre vwẹ ọghọ kẹ odẹ wẹn.” (Matiu 6:9) Jesu komobọ nẹrhovwo rhe Ọghẹnẹ: “Ọsẹ, vwẹ urinrin kẹ odẹ wẹn.” (Jọn 12:28) A vwọ vwẹ urinrin kẹ odẹ rẹ Ọghẹnẹ yen Jesu vwọ kobaro vwẹ akpeyeren rọyen, kọyensorọ ọ sa vwọ ta vwẹ ẹrhovwo: “Mi dje odẹ wẹn kẹ ayen riẹn, ki mi ruo re ayen riẹn.”—Jọn 17:26.

Odẹ na ghanre kẹ ihwo re riẹn Ọghẹnẹ. Ihwo rẹ Ọghẹnẹ vwẹ ọke awanre riẹnre nẹ odẹ rẹ Ọghẹnẹ yen sa nẹrhẹ ayen vwo ochọvwen vẹ usivwin. “Odẹ rẹ Ọrovwohwo na [Jihova] ọye ohẹrhẹ rode,  ọvwata da djẹ ruọ kọ rhọ.” (Isẹ 18:10) “Ihwo ejobi ri se odẹ rẹ Ọrovwohwo na [Jihova] ke che sivwi ayen.” (Joẹl 2:32) Baibol na djerephia nẹ odẹ rẹ Ọghẹnẹ yen e che vwo vughe ihwo re ga. “Kidie ihwo na ejobi ra yan vwẹ odẹ ri dohwo dẹdjọ rọye, ẹkẹvuọvo avwanre yan vwẹ odẹ rẹ Ọrovwohwo [Jihova] Ọghẹnẹ rẹ avwanre bẹdẹ bẹdẹ.”—Maika 4:5; Iruo Rẹ Iyinkọn Na 15:14.

A vwẹ odẹ na vwo vughe Ọghẹnẹ. Ihwo buebun ri yono ẹbe kodo tare nẹ odẹ na Jihova mudiaphiyọ “Ọ ro se Ru Kemu Kemu ro Rhere Ẹwẹn.” Jihova Ọghẹnẹ nẹrhẹ e vwo ẹruọ rẹ otọ rẹ odẹ rọyen na ọke rọ vwọ vwẹ eta nana, rọ ta kẹ Mosis na vwọ ta ota kpahen oma rọyen: “Me Cha Dia Oborẹ Me Guọnọ Dia.” (Eyanno 3:14, NW ) Ọtiọyena, otọ rẹ odẹ rẹ Ọghẹnẹ vrẹ ẹdia rọyen kerẹ Ọmemama na rọ nẹrhẹ erọnvwọn ejobi dia. Odẹ rọyen dje ẹgba ro rhere rọ vwọ nẹrhẹ ọyen komobọ, eriyin ji te erọnvwọn rọ mare eje dia kemu kemu ra guọnọre rere ọhọre rọyen se vwo rugba. Dede nẹ edova djisẹ rẹ ẹdia, uturhi yẹrẹ ẹgba rọyen, odẹ rọyen ọvo rọ dia Jihova yen djisẹ rẹ oka rẹ ohwo rọ hepha vẹ obo rọ sa dia ejobi.

Odẹ na dje ọdavwẹ rẹ Jihova vwo kpahen avwanre. Oborẹ odẹ rẹ Ọghẹnẹ mudiaphiyọ djerephia nẹ o vwo ẹguọnọ rẹ erọnvwọn rọ mare, eriyin ji te avwanre. Vwọba, kidie nẹ Jihova jẹ avwanre riẹn odẹ rọyen, ọyena odjephia nẹ ọ guọnọre nẹ avwanre riẹn ọyen. Ọyen yen tobọ jovwọ rọ vwọ vuẹ avwanre odẹ na tavwen avwanre ki rhi vwo ọdavwẹ ra vwọ riẹn. Aphro herọ-ọ, Ọghẹnẹ guọnọre nẹ avwanre mrẹ kerẹ uvi rẹ Ohwo rẹ avwanre se sikẹre, ọ dia kerẹ ọghẹnẹ ro sherabọ-ọ.—Une Rẹ Ejiro 73:28.

Ẹreyọvwọvwian rẹ odẹ rẹ Ọghẹnẹ ọyen odjephia nẹ avwanre guọnọ riẹn. E vwo dje, wọ sa vuẹ ohwo rẹ wọ guọnọ vwo mu ugbeyan nẹ ọ vwẹ oderhi wẹn se we. Mavọ yen oma che ru we siẹrẹ ohwo na rha rhọvwen vwẹ oderhi wẹn se we-e? Ọke vwọ yanran na, wo se roro sẹ ohwo na ghene guọnọ dia ugbeyan wẹn. Ọtiọyen yen ọ je hepha vwọ kẹ Ọghẹnẹ. Jihova vuẹ ihworakpọ odẹ rọyen, ọ je vuẹ avwanre nẹ a vwẹ odẹ na vwo se. Avwanre de ru ọtiọyen, jẹ avwanre dje kẹ Jihova nẹ avwanre guọnọ sikẹrẹ. Ọ tobọ mrẹ ihwo “ri roro iroro rẹ odẹ rọye na”!—Malakae 3:16.

A vwọ riẹn odẹ rẹ Ọghẹnẹ ọyen owọẹjẹ rẹsosuọ ra vwọ riẹn. Ẹkẹvuọvo, avwanre cha dobọji etiyi-in. Ofori avwanre vwọ nabọ riẹn ohwo ro vwo odẹ na. Ofori a vwọ riẹn oka rẹ ohwo rọ hepha.