Wọ da hẹ ẹdia rẹ ebẹnbẹn, imuẹro herọ nẹ wo che rhẹro rẹ ugbeyan wẹn nẹ ọ rhe vwẹ ukẹcha kẹ wẹ. Vẹ ẹwẹn yena, ihwo evo tare nẹ Ọghẹnẹ dia ugbeyan raye-en kidie ayen rorori nẹ Ọghẹnẹ ru emu vuọvo vwọ chọn ayen uko-o. Jẹ vwọrẹ uyota, Ọghẹnẹ ru emu ri fierere kẹ avwanre re, ọ je cha jowọ ro vwo si ebẹnbẹn vẹ oja rẹ avwanre ria nonẹna no. Die yen Ọghẹnẹ che ru?

Ọghẹnẹ cha ghwọrọ esiri rẹ umwemwu rere umwemwu vwo vwoba. Baibol na dje esiri rẹ umwemwu rọ vwọ ta: “Akpọ na ejobi hẹ obọ rẹ ogangan rẹ ohwo umwemwu na.” (1 Jọn 5:19) “Ohwo umwemwu na” dia ohwo ọfa-a, ọyehẹ ohwo rẹ Jesu seri “osun rẹ akpọ na,” Eshu rọ dia Idẹbono. (Jọn 12:31) Eshu yen esiri rẹ ebẹnbẹn rehẹ akpọ na nonẹna. Die yen Ọghẹnẹ che ru?

O rhe che kri-i, Jihova Ọghẹnẹ cha reyọ Ọmọ rọyen Jesu Kristi “vwọ guọghọ ohwo ro vwo ogangan rẹ ughwu na, kọye hẹ, Idẹbono na.” (Hibru 2:14; 1 Jọn 3:8) Vwọrẹ uyota, Baibol na djerephia nẹ Idẹbono komobọ “riẹnre nẹ ọke rọye pha krẹkrẹ.” (Ẹvwọphia 12:12) Ọghẹnẹ ji che si umwemwu vẹ ihwo ri ru umwemwu ejobi no.—Une Rẹ Ejiro 37:9; Isẹ 2:22.

Ọke rẹ Ọghẹnẹ de si umwemwu eje nẹ otọrakpọ na nu, Ọmemama rẹ avwanre na kọ cha jowọ rere ọhọre rọyen rẹ ihworakpọ re gbare vwọ dia akpọ na bẹdẹ vwo rugba. Die yen avwanre se rhẹro rọyen?

Ufuoma vẹ ofuvwegbe rẹ bẹdẹ. “Ihwo dẹndẹn ri che vwo otọ na, vwẹ evun rẹ oyovwe rode kọye ayen da gọlọ.”—Une Rẹ Ejiro 37:11.

Emuọre cha vọn asan eje. “E jẹn ọka buebu dia otọ na; vwẹ enu rẹ igbenu na etiyin i de kpogho.”—Une Rẹ Ejiro 72:16.

Omamọ rẹ Iwevwin vẹ Iruo. “Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye. . . . Ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru.”—Aizaya 65:21, 22.

Wọ guọnọ mrẹ ewene nana? O rhe che kri-i, oka rẹ akpọ nana kọyen e che yerin kẹdẹ kẹdẹ.

Nonẹna, kohwo kohwo yen muọga, ji ghwẹ, ẹkẹvuọvo, ọyena che wene kẹrẹkpẹ. O rhe che kri-i, Ọghẹnẹ che ruo rere “ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.” (Jọn 3:16) Die yen che nẹ obuko rọyen rhe?

E che si ọga no. “O gbi vwo ohwo rẹ orere na ọvuọvo rọ sa tanẹ, Me mwọga-a; ihwo re dia etiyin ka vwẹ orukuruku rayen ghovwo ayen.”—Aizaya 33:24.

Ihworakpọ rhe che ghwu-u. “Ko mu ughwu rọ bẹdẹ, Ọrovwohwo rẹ Ọghẹnẹ ko ririe ovie nẹ opharo rayen.”—Aizaya 25:8.

Ihwo cha dia bẹdẹ. “Ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri Jesu Kristi Ọrovwavwanre.”—Rom 6:23.

Ihwo ri ghwuru cha rhoma yerin. “Evrẹnushi herọ kẹ ihwo te ihwo ọsoso te i ri jẹ ọsoso ẹdia.” (Iruo Rẹ Iyinkọn Na 24:15) Ayen cha mrẹ erere vwo nẹ okẹ rẹ ọtanhirhe na.

Mavọ yen Ọghẹnẹ che vwo ru ọnana?

Ọghẹnẹ che ru ọhọre rọyen kpahen ihworakpọ vẹ otọrakpọ na gba womarẹ usuon rẹ obodjuvwu, rẹ Jesu Kristi da cha dia Osun re vwo mu. (Une Rẹ Ejiro 110:1, 2) Ọyen usuon yẹrẹ uvie rẹ Jesu yono idibo rọyen nẹ ayen nẹrhovwo kpahen vẹ eta nana: “Ọsẹ rẹ avwanre rọ hẹ obo odjuvwu, . . . Jẹn Uvie wẹn rhe.”—Matiu 6:9, 10.

Uvie rẹ Ọghẹnẹ che sun akpọ na, ji si emiavwe vẹ ojaẹriọ nẹ akpọ na. Uvie nana yen uvi rẹ usuon rẹ emọ rẹ ihworakpọ se vwo! Kọyen nẹrhẹ Jesu muomaphiyọ aghwoghwo rẹ “iyẹnrẹ esiri rẹ Uvie na” vwẹ ọke rọ vwọ hẹ otọrakpọ na, ọ da vuẹ idibo rọyen nẹ ayen ji ru ọtiọyen.—Matiu 4:23; 24:14.

Fikirẹ ẹguọnọ ọgangan rẹ Jihova vwo kpahen ihworakpọ, Jihova veri nẹ ọyen che ru erọnvwọn nana eje kẹ ihworakpọ. Ọnana rha nẹrhẹ wọ guọnọ riẹn Jihova, ji sikẹrẹ? Wo de brorhiẹn nẹ wo che ru ọtiọyen, die yen erere wọ cha mrẹ norhe? Uyovwinrota rọ vwọ kpahen ọnana che dje kpahọn.