Asaọkiephana, avwanre yono erọnvwọn sansan re, re chọn avwanre uko vwọ mrẹ ẹkpahọnphiyọ rẹ onọ na, Ono Yen Ọghẹnẹ? Avwanre yonori vwẹ Baibol na nẹ odẹ rọyen Jihova, avwanre ji yono nẹ uruemu rọyen rọ ma rho yen ẹguọnọ. Avwanre yono kpahen obo ro rure kugbe obo ro ji che ru, fikirẹ erere rẹ ihworakpọ rọ mare. Dede nẹ o ji vwo erọnvwọn buebun rẹ avwanre se yono kpahen Ọghẹnẹ, wo se roro nẹ erere vọ yen che te vwe siẹrẹ mi de yono kpahọn kpobarophiyọ?

Jihova veri nẹ “wọ da guọnọ, ku wọ mrẹ.” (1 Ikun Rivie 28:9) Vwẹro roro okẹ ọghanghanre ro che te we obọ siẹrẹ wọ da riẹn Ọghẹnẹ—wọ cha dia “ugbeyan rẹ Ọrovwohwo”! (Une Rẹ Ejiro 25:14) Erere vọ yen wọ cha mrẹ vwo nẹ ugbeyan tiọyena rhe?

Uvi rẹ omavwerhovwẹn. E dje Jihova kerẹ “Ọghẹnẹ re bruba,” yẹrẹ Ọghẹnẹ rẹ omavwerhovwẹn. (1 Timoti 1:11) Wo de sikẹre Ọghẹnẹ, je vwẹrokere, ọnana cha ghwa uvi rẹ omavwerhovwẹn rhe we, rọ cha nẹrhẹ wọ mrẹ erere rẹ ugboma vẹ iroro. (Une Rẹ Ejiro 33:12) Wo ji se yeren akpọ rẹ omavwerhovwẹn womarẹ wọ vwọ kẹnoma kẹ erọnvwọn re sa guọghọ akpọ wẹn, vwo omamọ rẹ iruemu, kugbe wẹ vẹ ihwo efa vwo vwo omamọ rẹ oyerinkugbe. Wọ cha rhe mrẹvughe nẹ obo rẹ ọbuine na tare uyota: “O yoma mi vwo si kẹrẹ Ọghẹnẹ.”—Une Rẹ Ejiro 73:28.

Ọghẹnẹ cha davwerhọn wẹn. Jihova ve kẹ idibo rọyen: “Me nẹ wẹ iroro ẹro mẹ ko te we sun.” (Une Rẹ Ejiro 32:8) Ọyena mudiaphiyọ nẹ Jihova davwerhọn rẹ idibo rọyen vwo nene ọdavwẹ rẹ ohwo ọvuọvo. (Une Rẹ Ejiro 139:1, 2) Siẹrẹ wo de vwo uvi rẹ oyerinkugbe vẹ Jihova re, kẹ wọ cha mrẹ nẹ ọ cha chọn wẹn uko ọkieje.

Uvi rẹ akpeyeren vwẹ obaro na. Vwọba akpọ rẹ omavwerhovwẹn rẹ Jihova cha chọn wẹn uko vwo yerin enẹna, ọ je gbẹn idjerhe phiyotọ wo vwo yenren akpọ rẹ omavwerhovwẹn vwẹ obaro na. (Aizaya 48:17, 18) Baibol na da ta: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.” (Jọn 17:3) Vwẹ ọke rẹ ọgangan nana, iphiẹrophiyọ rẹ Ọghẹnẹ kẹ avwanre sa họhọ ọtan rọ yọnrọn avwanre e “vwo je bo.”—Hibru 6:19.

Enana evo usun rẹ oboresorọ avwanre vwọ riẹn Ọghẹnẹ kpobarophiyọ, ji vwo mu ugbeyan. Wo se nene Oseri rẹ Jihova rẹ wọ mrẹre ta ota yẹrẹ kpo jw.org/urh vwọ kẹ evuẹ efa re sa vwẹ ukẹcha kẹ wẹ.