Die Yen Cha Phia Vwẹ Obaro Na?
Wo roro kpahen obaro na dẹvure? Baibol na djerephia nẹ erọnvwọn evo cha phia ri che djobọte ihworakpọ eje.
Jesu dje obo ra cha vwọ “riẹn nẹ uvie rẹ Ọghẹnẹ na kẹri re.” (Luk 21:31) Ọ tarọ phiyotọ nẹ ihwo che phi ifovwin, etọ che shu, owẹnvwe che fi, ega cha vọn asan eje; a ghene mrẹ erọnvwọn nana nonẹna.—Luk 21:10-17.
Baibol na ji djephia nẹ ihworakpọ che vwo uruemu ọbrabra “vwẹ oba rẹ ẹdẹ” rẹ usuon rẹ ihworakpọ na. Wo se se kpahen oborẹ uruemu rayen cha dia vwẹ 2 Timoti 3:1-5. Aphro herọ-ọ, wọ da mrẹ iruemu nana nonẹna, wọ cha tanẹ o ghwe ru orugba rẹ aroẹmrẹ ri Baibol na.
Die yen ọnana mudiaphiyọ? O mudiaphiyọ nẹ ọke rẹ Uvie rẹ Ọghẹnẹ che vwo ru akpeyeren rẹ ihwo yovwinphiyọ sikẹri re. (Luk 21:36) Vwẹ Baibol na, Ọghẹnẹ veri nẹ akpọ na vẹ ihwo re cha dia evun rọyen che rhiẹromrẹ omamọ erọnvwọn. E jẹ a fuẹrẹn idje evo.
OMAMỌ RẸ USUON
“Kọye vwẹ isuesun kẹ [Jesu], kugbe urinrin vẹ uvie, rere ihwo ejobi, vẹ ẹgborho ejobi vẹ ephẹrẹ ejobi vwọ sa ga; isuesun rọye ọye isuesun ri bẹdẹ, ro che jẹ ẹwanvrẹn, kẹ uvie re jẹ sa ghwọrọ.”—DANIẸL 7:14.
Oborẹ ọnana mudiaphiyọ: Wọ sa riavwerhen rẹ akpọ na vwẹ otọ rẹ usuon oyoyovwin rẹ Ọghẹnẹ vwo mu, Ọmọ rọyen yen cha dia Ovie.
OMAKPOKPỌ
“O gbi vwo ohwo rẹ orere na ọvuọvo rọ sa tanẹ, Me mwọga-a.”—AIZAYA 33:24.
Oborẹ ọnana mudiaphiyọ: Wọ rha cha muọga ọfa-a, oma wẹn rhe che ji shechọ ọfa-a; ku wọ cha dia bẹdẹ.
OBỌDẸN RẸ UFUOMA
“Ọ nẹrhẹ ofovwi fue re te oba rẹ akpọ na.”—UNE RẸ EJIRO 46:9
Oborẹ ọnana mudiaphiyọ: Ofovwin rha cha dia ọfa-a, ọtiọyen ji te ojaẹriọ rẹ ofovwin ghwa cha.
AKPỌ NA CHA VỌN VẸ OMAMỌ IHWO
“Oruimwemwu gbe cha dia-a . . . ihwo dẹndẹn ri che vwo otọ na.”—UNE RẸ EJIRO 37:10, 11.
Oborẹ ọnana mudiaphiyọ: Irumwemwu rha cha dia-a, jokparẹ ihwo ri nyupho rẹ Ọghẹnẹ ọvo.
AKPỌNEJE CHA DIA IPARADAISI
“Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye.”—AIZAYA 65:21, 22.
Oborẹ ọnana mudiaphiyọ: Akpọneje cha dia yoyovwin. Ọghẹnẹ che ru oyare rẹ avwanre ro che vwo ru ọhọre rọyen vwẹ “akpọ na.”—Matiu 6:10.
