Die Yen Odẹ rẹ Ọghẹnẹ? Ọghẹnẹ komobọ da ta: “Mẹvwẹ [“Jihova,” NW], ọye odẹ mẹ.” (Aizaya 42:8) Odẹ rẹ Ọghẹnẹ vwomaphia omarẹ abọ 7,000 vwẹ Baibol na. Ẹkẹvuọvo, efanfan ri Baibol buebun phi edova rọyen phiyọ ẹdia na kerẹ “Ọrovwohwo.” Ọghẹnẹ guọnọre nẹ wọ dia ugbeyan rọyen, kọyensorọ ọ vwọ vuẹ wẹ nẹ wo “se odẹ rọye.”—Une Rẹ Ejiro 105:1.

Edova ri Jihova. Baibol na vwẹ edova sansan vwo se Jihova kerẹ “Ọghẹnẹ,” “Ọrovwoẹgba,” “Ọmemama,” “Ọsẹ,” “Ọrovwohwo,” kugbe “Osun.” Baibol na niyẹnrẹn rẹ ẹrhovwo buebun ra da vwẹ odova yẹrẹ oderhi rẹ Ọghẹnẹ, Jihova, vwo se.—Daniẹl 9:4.

 Oborẹ Ọghẹnẹ Hepha. Ọghẹnẹ, ohwo rẹ ẹwẹn. (Jọn 4:24) Baibol na tobọ tanẹ “ohwo ọvuọvo je mrẹ Ọghẹnẹ na dẹvo-o.” (Jọn 1:18) Baibol na ji dje iroro rọyen kẹ avwanre. Ohwo se ru obo rọ cha nẹrhẹ o muomaphiyọ, yẹrẹ obo re cha “vwerhọn oma.”—Isẹ 11:20; Une Rẹ Ejiro 78:40, 41.

Iruemu Iyoyovwin rẹ Ọghẹnẹ Vwori. Ọghẹnẹ nẹ ohwo ruẹ-ẹ, otoro asan rẹ ohwo na nurhe-e. (Iruo Rẹ Iyinkọn Na 10:34, 35) Ọ “ria ehrọre vẹ arodọvwe, ọ fobọ muophu-u ọ vẹ ẹguọnọ vẹ uyota.” (Eyanno 34:6, 7) Ẹkẹvuọvo, Ọghẹnẹ vwo iruemu ẹne kiriguo.

Ẹgba. Ọ vwọ dianẹ ọyehẹ “Ọghẹnẹ ro vwo Ẹgba” na, ka sa tanẹ o vwo ogangan ro se vwo ru kemu kemu ro veri.—Jẹnẹsis 17:1.

Aghwanre. O vwo ohwo vuọvo ro vwo aghwanre te Ọghẹnẹ-ẹ. Kọyensorọ, Baibol na vwọ tanẹ “Ọghẹnẹ ọvuọvo rọ ghwanre na.”—Rom 16:27.

Orhiẹn rẹ Abavo. Ọghẹnẹ ru obo re gbare ọkieje. Iruo rọyen “gbare,” “idjerhe rọye ejobi ọsoso.”—Urhi Rivẹ 32:4.

Ẹguọnọ. Baibol na tare nẹ “Ọghẹnẹ hẹ ẹguọnọ.” (1 Jọn 4:8) Ọ dia Ọghẹnẹ di dje ẹguọnọ phia ọvo-o, ọyehẹ ẹguọnọ komobọ. Ẹguọnọ nana yen muo vwo ruẹ kemu kemu, avwanre je mrẹ erere no cha vwẹ idjerhe sansan.

Oyerinkugbe Rọhẹ Uvwre rẹ Ọghẹnẹ vẹ Ihworakpọ. Ọghẹnẹ yen Ọsẹ rẹ avwanre rọhẹ odjuvwu. (Matiu 6:9) Avwanre de vwo esegbuyota kpahọn, ka sa dia ugbeyan rọyen. (Une Rẹ Ejiro 25:14) Vwọrẹ uyota, Ọghẹnẹ durhie uwe nẹ wo sikẹrẹ ọyen womarẹ ẹrhovwo, ọ je tanẹ wọ “vwẹ ẹnwan wẹn ejobi vwọ ya, kidie ọye re vwẹ ẹro te we.”—1 Pita 5:7; Jems 4:8.

Jesu Dia Ọghẹnẹ-ẹ. Jesu ọyen ohwo rẹ oghẹresan, ọyen ọvo yen Ọghẹnẹ mare komobọ. Kọyensorọ, Baibol na vwo se nẹ Ọmọ rẹ Ọghẹnẹ. (Jọn 1:14) Jihova vwọ ma Jesu nu, ọ da womarẹ ọmọkpako rọyen, rọ dia “onotu rẹ ọwena” na, vwọ ma erọnvwọn eje kugbe ihworakpọ eje.—Isẹ 8:30, 31; Kọlose 1:15, 16.

 O vwo ọke vuọvo Jesu vwọ tanẹ ọyen Ọghẹnẹ-ẹ. Ukperẹ ọtiọyen, ọ da ta: “Obọ rọye mi nurhe, ọye ri ji vwe rhe.” (Jọn 7:29) Ọke rẹ Jesu vwọ ta ota kẹ odibo rọyen ọvo, o de se Jihova nẹ “Ọsẹ mẹ kugbe Ọsẹ rẹ ovwan, Ọghẹnẹ mẹ kugbe Ọghẹnẹ rẹ ovwan.” (Jọn 20:17) Jesu vwo ghwu nu, Jihova da rhọnvwọn kpo odjuvwu, o de chidia oborhẹn rọyen, ọ da vwẹ ogangan rode vwọ kẹ Jesu.—Matiu 28:18; Iruo Rẹ Iyinkọn Na 2:32, 33.

Jesu Kristi Sa Chọn Wẹ Uko Vwo Sikẹrẹ Ọghẹnẹ

Jesu rhe akpọ na rhi yono avwanre kpahen Ọsẹ rọyen. Jihova komobọ da ta kpahen Jesu: “Ọnana Ọmọ mẹ ro je vwe: ovwan nyo ota rọye.” (Mak 9:7) Jesu riẹn Ọghẹnẹ vwọ vrẹ kohwo kohwo. Ọ da ta: “Ohwo ọvuọvo riẹn Ọsẹ na-a jokpa rẹ ọmọ na kugbe ohwo rẹ ọmọ na vwe rọ phia kẹ.”—Luk 10:22.

Jesu nabọ vwẹrokere iruemu rẹ Ọghẹnẹ gbagba. Jesu vwẹrokere iruemu rẹ Ọsẹ rọyen mamọ te ẹdia rẹ ọ da ta: “Ọ rọ mrẹ vwẹ nu yọ mrẹ Ọsẹ na re.” (Jọn 14:9) Jesu nabọ dje ẹguọnọ rẹ Ọghẹnẹ phia womarẹ eta vẹ uruemu rọyen, ọnana nẹrhẹ ihwo bru Ọghẹnẹ rhe. Ọ da ta: “Mẹvwẹ hẹ idjerhe na, kugbe uyota na, kugbe arhọ na; ohwo ọvuọvo se bru Ọsẹ na rhe-e, ẹkẹvuọvo yẹ oma mẹ.” (Jọn 14:6) Ọ da je ta: “Ọ gegagọ rẹ uyota na da gọ Ọsẹ na vwẹ [“ẹwẹn,” NW] vẹ uyota, kidie ọtiọye Ọsẹ na guọnọre nẹ a ga ọye.” (Jọn 4:23) Di roro! Jihova guọnọ ihwo kerẹ owẹ na rọ guọnọ riẹn kpahọn.