Diesorọ Utuoma Vwọ Vọn Asan Eje?
Diesorọ utuoma vwọ vọn akpọ na? A vwọ riẹn oboresorọ, ofori nẹ a riẹn oborẹ utuoma mudiaphiyọ, obo re nẹrhẹ ihwo vwo utuoma vẹ oboresorọ ọ vwọ hrabọ nene asan eje.
Die Yen Utuoma?
Utuoma ọyen ẹvwọsuọ ọgangan re vwo kpahen ohwo yẹrẹ ẹko rẹ ihwo. Uruemu yena vrẹ ọ rẹ ivun rẹ ohwo ọfa di vwo miovwo ohwo vwẹ ọke evo.
OBO RE NẸRHẸ IHWO VWO UTUOMA
Erọnvwọn sansan yen nẹrhẹ ihwo vwo utuoma. E vwo utuoma kpahen ihwo, ọ dia fikirẹ oborẹ ayen ruru-u, ẹkẹvuọvo fikirẹ oka rẹ ohwo rẹ ayen hepha. E ji se roro nẹ ihwo tiọyena erharhe rẹ ihwo, ihwo okpetu yẹrẹ ayen che se wene-e. E se ni ayen kerẹ ihwo ri fiemu ọvo-o yẹrẹ re so ebẹnbẹn. Ọ sa dianẹ ihwo ri vwo utuoma tiọyena rioja rẹ ozighi, oshenyẹ yẹrẹ erọnvwọn efa re nẹrhẹ ayen vwo oka rẹ ẹwẹn ọtiọyena.
OBORESORỌ UTUOMA VWỌ VỌN ASAN EJE
Ọke ọvo ohwo se vwo utuoma kpahen ihwo efa rọ je mrẹ-ẹ. Kerẹ udje, ohwo se vwo utuoma kidie nẹ ihwo rẹ orua yẹrẹ igbeyan rọyen vwo oka rẹ ẹwẹn tiọyen. Eriyina, utuoma sa fobọ ro asan eje, ọ me rhe dia ẹkuruemu rẹ ihwo rẹ asan na.
Avwanre da riẹn oboresorọ utuoma vwọ vọn asan eje, ọ cha nẹrhẹ e vwo ẹruọ oboresorọ ihwo buebun vwo vwo utuoma kpahen ihwo efa. Ẹkẹvuọvo, e se vwo phi uruemu rẹ utuoma kparobọ, kẹ ofori nẹ a riẹn oborẹ utuoma tonphiyọ wan. A sa mrẹ oborẹ utuoma tonphiyọ wan vwẹ Baibol na.
BAIBOL NA VUẸ AVWANRE KPAHEN OBORẸ UTUOMA TONPHIYỌ WAN
Ọ DIA IHWORAKPỌ YEN TUẸN UTUOMA PHIYỌ-Ọ. Ọ tonphiyọ vwẹ ọke amakashe ọvo vwẹ odjuvwu, rọ rhe dia Idẹbono vwo gbevwọso Ọghẹnẹ. Idẹbono ọyen “ozighẹ o ruẹ nẹ otọrhe.” Kidie nẹ “ọ vwọnrọn ofian o ruẹ ọye hẹ ọsẹ rẹ ofian,” ọ da rhe so utuoma vẹ ivun emiovwo. (Jọn 8:44; 1 Jọn 3:11, 12) Baibol na djere kerẹ ohwo rẹ ivun dja, ohwo rọ rhaphiẹ ohwo kugbe onogbozighi.—Job 2:7; Ẹvwọphia 12:9, 12, 17.
IHWORAKPỌ RI JẸGBA FOBỌ VWO UTUOMA. Ọshare rẹsosuọ Adam, vwẹrokere orharhe rẹ uruemu rẹ Eshu. Ukuotọ rọyen, ihworakpọ eje da rhe riuku rẹ umwemwu vẹ jẹgba. (Rom 5:12) Ọmọkpako rẹ Adam re se Ken, hwe oniọvo rọyen Ebel fikirẹ utuoma. (1 Jọn 3:12) O muẹro nẹ ihworakpọ evo vwo ẹguọnọ ayen ji gbe arodọnvwẹ. Fikirẹ umwemwu ra riuku rọyen na, ihwo buebun ke fobọ dje uruemu kerẹ; urhuru evwo, omaẹriọ kugbe omaephuo phia rọ nẹrhẹ ayen vwo uruemu rẹ utuoma.—2 Timoti 3:1-5.
OHWO RẸ IHWO EFA JE-E YEN VWO UTUOMA. Akpọ na vọnre vẹ utuoma kidie ihwo dje erharhe iruemu ra ghẹmrẹ phia, ayen ji gbe arodọnvwẹ kẹ ihwo-o. Uruemu ra vwọ vwẹ ẹro ri sakamu vwo nẹ ihwo efa, a vwọ fẹnẹ ihwo, ogbegbeta, a vwọ djoshọ muẹ ihwo kugbe a vwọ guọghọ ekuakua rẹ ihwo efa vọn asan eje kidie, “akpọ na ejobi hẹ obo rẹ ogangan rẹ ohwo umwemwu na,” rọ dia Idẹbono.—1 Jọn 5:19.
Dedena, ọ dia oborẹ utuoma tonphiyọ wan ọvo yen Baibol na djephia-a, ọ je ta ota kpahen obo ro che vwo no.