OBO RE SE VWO PHI UTUOMA KPAROBỌ
4 | Ọghẹnẹ Cha Chọn Wẹ Uko Vwo Phi Utuoma Kparobọ
Baibol na da ta:
“Omamọ rẹ ẹwẹn na yen ẹguọnọ, aghọghọ, ufuoma, ako echiro, ẹse-eruo, uyoyovwin, esegbuyota, dẹndẹn, omaẹriẹnsuon.”—GALESHA 5:22, 23, NW.
Obo ro Mudiaphiyọ:
E se phi utuoma kparobọ womarẹ ukẹcha rẹ Ọghẹnẹ. Ẹwẹn ọfuanfon na sa chọn avwanre uko vwo vwo iruemu rẹ avwanre rorori nẹ e se vwo jovwo komobọ-ọ. Ukperẹ a vwọ davwẹngba romobọ rẹ avwanre vwo phi utuoma kparobọ, e jẹ a vwẹroso ukẹcha rẹ Ọghẹnẹ. A da vwẹroso ukẹcha rẹ Ọghẹnẹ, ke se vwo ọkpọ rẹ ẹwẹn ro rhe ọyinkọn Pọl ro vwo si: “Mi se ru emu ejobi vwi Kristi rọ kẹ vwẹ ogangan.” (Filipae 4:13) Vwọba, kẹ avwanre je sa ta; “Ọchuko mẹ nẹ obọ rẹ Ọrovwohwo cha.”—Une Rẹ Ejiro 121:2.
Obo Wo Se Ru:
“Jihova wene uvwe vwo nẹ ohwo ro gbozighi phiyọ ohwo rẹ ufuoma re.”—WALDO
Rhievun nẹrhovwo rhe Jihova vwọ nokpẹn rẹ ukẹcha rẹ ẹwẹn ọfuanfon rọyen. (Luk 11:13) Yare mie nẹ ọ chọn wẹ uko vwo dje iruemu rẹ Inenikristi phia vwẹ akpeyeren wẹn. Yono oborẹ Baibol na ta kpahen ẹguọnọ, ufuoma, ako echiro kugbe omaẹriẹnsuon re dia iruemu re sa chọn wẹn uko vwọ kẹnoma vwọ kẹ utuoma. Guọnọ idjerhe ru wọ se vwo dje iruemu yena phia vwẹ akpeyeren wẹn. Kuomagbe ihwo re je davwẹngba ayen se vwo dje iruemu ọtiọyena phia vwẹ akpeyeren rayen. Ihwo tiọyena sa chọn wẹ uko vwo vwo “ẹguọnọ kugbe iruo esiri.”—Hibru 10:24.
Wọ je sa Fuẹrẹn
Ẹkpahọnphiyọ rẹ Enọ rẹ Baibol Na
Die Yen Baibol Na Yonori Kpahen Ophu?
Ophu se ghini shephiyọ ọke ọvo? Die yen ofori nẹ wo ru tavwen ophu ro mu we na ke gan?
