Ọke rẹ Utuoma de Vwoba Vwẹ Akpọ na Re!
Ọ da tobọ dianẹ avwanre rhe vwo utuoma vwẹ ubiudu rẹ avwanre-e, e che se sun uruemu rẹ ihwo efa djephia-a. Ihwo di vwo utuoma kpahen ihwo efa ekueku jẹ ọ dia ayen ru emuvuọvo rọ nẹrhẹ e vwo utuoma kpahen aye-en. Ọtiọyena, kẹ ono yen se phioba phiyọ utuoma bẹdẹ?
Jihova ọvo yen se phioba phiyọ utuoma rọ herọ vwẹ akpọ na nonẹna kare kare. Ọyena dẹn yen oborẹ Baibol na tare nẹ Jihova che ru.—Isẹ 20:22.
ỌGHẸNẸ CHE SI OBO RE SUA UTUOMA VWO NO
-
1. ESHU RỌ DIA IDẸBONO. Eshu, rọ dia amakashe ro gbevwọso Ọghẹnẹ yen sua utuoma rọ herọ vwẹ akpọ na nonẹna. Ọghẹnẹ cha ghwọrọ Eshu vẹ kohwo kohwo ro ji vwo utuoma kpahen ihwo efa kerẹ Eshu.—Une Rẹ Ejiro 37:38; Rom 16:20.
-
2. AKPỌ RẸ ESHU RẸ UTUOMA DA VWẸ OWỌ MUOTỌ NA. Ọghẹnẹ che si umiovwo rẹ akpọ na eje vwo no, ọtiọyen ji te ihwo ri sivwẹn oseghe rẹ usuon re ghwa ihwo ria kugbe ilori rẹ ẹga ri titi utuoma. Ọghẹnẹ che si ekiẹchuọ rẹ ọghware ri gborho ihwo nonẹna vwo no riẹriẹriẹ.—2 Pita 3:13.
-
3. JẸGBA RẸ IHWORAKPỌ. Baibol na djerefiotọ kẹ avwanre nẹ ihworakpọ eje riuku ri jẹgba, ọnana kọyen nẹrhẹ avwanre roro ji ruẹ obo re brare. (Rom 5:12) Ọvo vwẹ usun rẹ erọnvwọn rẹ jẹgba se muẹ avwanre vwo ruẹ yen e vwo phi ota phiyọ evun ji vwo utuoma kpahen ihwo efa. Ọghẹnẹ cha chọn ihworakpọ uko vwo phi iruemu tiọyen ri jẹgba sua na kparobọ rere koka koka rẹ utuoma se vwo no riẹriẹriẹ.—Aizaya 54:13.
BAIBOL NA TARE NẸ UTUOMA CHE NẸ AKPỌ NA
-
1. OSHENYẸ RHA CHA DIA-A. Uvie rẹ Ọghẹnẹ yen che sun akpọ na eje, o che sun vwo nẹ obodjuvwu rhe otọrakpọ na, ọ cha hwarhiẹ orhiẹn-ebro ọsoso vwọ rhe akpọ na. (Daniẹl 2:44) Omaẹfẹnẹ kugbe uruemu re vwo siọrhan ra cha dia-a. Ọghẹnẹ cha rhuẹrẹ ẹdia rẹ oshenyẹ rẹ ihworakpọ hirharokuẹ nonẹna phiyọ.—Luk 18:7.
-
2. IHWO EJE CHA RIAVWERHEN RẸ UFUOMA. O rhe che vwo ohwo ọvuọvo rọ cha rioja fikirẹ ozighi egbe yẹrẹ ofovwi-in. (Une Rẹ Ejiro 46:9) Ihworakpọ na ejobi ke cha dia ihwo ri vwo ẹguọnọ rẹ ufuoma, akpọ na kọ cha dia asan rọ vrabọ rẹ okpetu.—Une Rẹ Ejiro 72:7.
-
3. IHWO EJE KE CHA DIA BẸDẸ VWỌRẸ OFUVWEGBE. Ihwo eje ki che dje uvi rẹ ẹguọnọ phia vwọ kẹ ohwohwo. (Matiu 22:39) Oma ẹlaghọ cha dia-a, erharhe rẹ iroro dede rha cha so ọmiaovwẹ vwọ kẹ ohwo ọvuọvo-o. (Aizaya 65:17) Vwẹ ọke yena, utuoma de nore, “vwẹ evun rẹ oyovwe rode kọye ayen [ihworakpọ] da gọlọ.”—Une Rẹ Ejiro 37:11.
Wo vwo owenvwe ru wọ vwọ dia oka rẹ akpọ ọtiọyena? Enẹna, ihwo buebun davwẹngba vwọ vwẹ iyono ri Baibol vwo ruiruo vwẹ akpeyeren rayen rere ayen sa vwọ kẹnoma vwọ kẹ utuoma. (Une Rẹ Ejiro 37:8) Ọnana yen oborẹ Iseri ri Jihova vwẹ akpọ na eje ruẹ enẹna. Dede nẹ ẹkuotọ sansan yen ayen nurhe, ayen ji yerẹn kuẹgbe vwerhen vwerhen vwọrẹ ẹguọnọ.—Aizaya 2:2-4.
Oma cha vwerhen Iseri ri Jihova rẹ ayen vwọ vuẹ wẹ oborẹ ayen yono kpahen obo re se vwo chirakon rẹ oshenyẹ kugbe omaẹfẹnẹ. Obo wo che yono mie ayen sa chọn wẹ uko vwo gbobọnyẹ utuoma rere wo se vwo vwo ẹguọnọ. Wo se yono kpahen obo wo se vwo dje ẹguọnọ vwọ kẹ ihwo efa tobọ te ihwo re riẹn obo ra kpevwẹ ẹse-e yẹrẹ tobọ ihwo ri vwo utuoma kpahen ihwo efa. Wo de se ru ọtiọyen, ku wo che rhi vwo uvi rẹ omavwerhovwẹn enẹna, ku wo ji che rhi vwo uvi rẹ oyerinkugbe vẹ ihwo efa. Ọ rọ ma rho, wo che yono kpahen obo wo se ru wọ sa vwọ dia vwẹ Uvie rẹ Ọghẹnẹ, rọ dia ọke rẹ utuoma che vwo nẹ akpọ na riẹriẹriẹ.—Une Rẹ Ejiro 37:29.