Baibol Na—Odjekẹ ra sa Vwẹroso
E de mu erhiẹn ri shekpahen obo ri yoma vẹ obo re chọre kpahen oborẹ oma ru avwanre vẹ ẹro rẹ ihwo efa che vwo no ọvo, o che se mu avwanre ẹro nẹ erhiẹn tiọyena che shephiyọ-ọ. Baibol na vuẹ avwanre oboresorọ, o ji ru vrẹ ọtiọyen. Baibol na cha avwanre uko vwọ riẹn obo ri yoma vẹ obo re chọre, rọ nẹrhẹ oma vwerhen avwanre.
ODJEKẸ RA GUỌNỌRE
Vwẹ Baibol na, Jihova a Ọghẹnẹ tare nẹ ọ ma ihworakpọ rẹ ayen vwo bru ọyen rhe vwọ kẹ odjekẹ, ọ dia ayen vwo sun oma raye-en. (Jerimaya 10:23) Ọnana yen sorọ ọ vwọ kẹ avwanre odjekẹ ri shekpahen obo ri yovwirin vẹ obo re chọre vwẹ Baibol na. O vwo ẹguọnọ rẹ ihworakpọ, ọ guọnọre nẹ e bru erharhe erhiẹn re cha so omaẹwan je nẹrhẹ akpeyeren gan vwọ kẹ avwanre-e. (Urhi Rivẹ 5:29; 1 Jọn 4:8) Vwọ vrẹ ọyena, Ọmemama rẹ avwanre ro vwo aghwanre vẹ erianriẹn na kẹ avwanre uchebro ri me yovwin ri shekpahen obo ri yovwirin vẹ obo re chọre. (Une rẹ Ejiro 100:3; 104:24) Ẹkẹvuọvo, Ọghẹnẹ gba ihwo vwo nene iwan rọye-en.
Jihova vwẹ kemu kemu rẹ Adam vẹ Ivi guọnọre rọ cha nẹrhẹ oma vwerhen ayen vwọ kẹ ayen. (Jẹnẹsis 1:28, 29; 2:8, 15) Ọ je kẹ ayen odjekẹ ọlọlọhọ ji rhẹro rọyen nẹ ayen che nene odjekẹ na. Ẹkẹvuọvo, ọ vwẹ uphẹn kẹ ayen rẹ ayen komobọ vwọ jẹ sẹ ayen che nene odjekẹ na yẹrẹ ayen che nene-e. (Jẹnẹsis 2:9, 16, 17) Ọ da ohwo nẹ Adam vẹ Ivi jojẹ rẹ ayen vwo yeren akpọ vwo nene iwan romobọ rayen, ukperẹ iwan rẹ Ọghẹnẹ. (Jẹnẹsis 3:6) Die yen nẹ obuko rọyen rhe? Oma cha vwerhen ihwo siẹrẹ ayen de ru obo ri je ayen? Ẹjo. Obo re phia wanre djerephia nẹ e de chukoku iwan rẹ Ọghẹnẹ, a cha sa mrẹ ufuoma vẹ omavwerhovwẹn ri bẹdẹ-ẹ.—Aghwoghwo 8:9.
Baibol na kẹ avwanre odjekẹ ra guọnọre, rọ cha nẹrhẹ e bru omamọ erhiẹn re sa cha avwanre uko vwẹ akpeyeren, o toro asan avwanre nurhe-e. (2 Timoti 3:16, 17; ni ekpeti na “ Ọbe Vwọ kẹ Ihwo Eje.”) Fuẹrẹn obo ri Baibol na che ruo wan.
Yono kpobarophiyọ oboresorọ e vwo se Baibol na “ota rẹ Ọghẹnẹ” vwọ dia obo re gbare.—1 Tẹsalonaika 2:13. Ni ividio na Ono Yin Vwo Baibol Na? vwẹ jw.org/urh.
BAIBOL NA VUẸ AVWANRE OBORẸ ỌGHẸNẸ GUỌNỌRE NẸ E RU
Baibol na vuẹ avwanre kpahen oyerinkugbe rẹ Ọghẹnẹ vẹ ihworakpọ nẹ ọtonphiyọ rhe. Obo rehẹ evun rọyen vwẹ ukẹcha kẹ avwanre vwo vwo ẹruọ rẹ ẹro rẹ Ọghẹnẹ vwo nẹ obo ri yovwirin vẹ obo re chọre, obo ri che fierere vẹ obo re cha so omaẹwan. (Une rẹ Ejiro 19:7, 11) Ọkieje yen iyono rọyen vwọ cha avwanre uko vwo brorhiẹn ri shephiyọ vwẹ akpeyeren.
Kerẹ udje, roro kpahen uchebro ra mrẹ vwẹ Isẹ 13:20: “Ohwo rọ yan nene ẹvwaghwanre ko vwo aghwanre, ẹkẹvuọvo ugbeyan rẹ ẹkpa kọ re oja.” Uchebro yena ji fierere kẹ avwanre nonẹna kirobo rọ hepha vwẹ ọke awanre. Oka rẹ uchebro eghanghanre tiọyena vọn evunrẹ Baibol na.—Ni ekpeti na “ Uchebro ri Baibol na Vọnre vẹ Erere ri te Nonẹna.”
Ẹkẹvuọvo wo se roro, ‘Mavọ yen o se vwo muvwẹro nẹ uchebro ri Baibol sa wian kẹ vwẹ nonẹna?’ Uyovwinrota rọ vwọ kpahan ọnana cha ta ota kpahen idje evo re phia wanre.
