Ihwo buebun rhọnvwere nẹ o vwo iruemu evo re nabọ shephiyọ vẹ e re chọre karekare. Kerẹ udje, vwẹ akpọ na eje, iruemu kerẹ a vwọ dẹ ozighẹ, a vwọ gba ohwo duẹ, vẹ re vwo gbe imitete ẹgua chọre, ẹkẹvuọvo vwọ kẹ uruemuesiri, erorokẹ vẹ a vwọ vwẹ erọ abavo vwo nẹ ihwo eje, ọyen oborẹ ihwo buebun vwẹ akpọ na jirẹ. Kẹ ọ da rha dia ojẹ ra cha jẹ vwẹ akpeyeren, kerẹ ohwo re che nene bru ehware, ra vwọ ta uyota, yẹrẹ a vwọ yọnrọn emọ ghwanra vwo? Vwọ kpahan enana, ihwo buebun roro nẹ ayen se ru obo ri je ayen. Ayen no nẹ e se rhiabọreyọ kojẹ kojẹ rẹ ayen jẹre. Ọke buebun na, ihwo muẹ erhiẹn rayen kaphen oborẹ oma ru ayen vẹ oborẹ oma ruẹ ihwo efa re riariẹ ayen phiyọ. A sa ghene vwẹroso erhiẹn nana?

Ọke buebun na, ẹwẹn obrorhiẹn na yen mu avwanre vwo brorhiẹn rẹ obo ri yoma vẹ obo re chọre, vwo nene oborẹ oma ruẹ avwanre wan. (Rom 2:​14, 15) Tobọ vwo nẹ ọkiemọ rhe, imitete se phi ofẹnẹ phiyọ obo ri yovwirin vẹ obo re chọre, ọtiọyena vwẹ ọke rẹ ayen de ru obo re chọre, kọ nẹrhẹ ẹwẹn obrorhiẹn rayen kpokpo ayen. A vwọ ghwanra cha ye, jẹ e yono obo ri yovwirin vẹ obo re chọre vwo mie ihwo avwanre vẹ ayen gba ghwọrọ ọke kuẹgbe. Vwẹ ọke re de brorhiẹn, jẹ ẹwẹn obrorhiẹn na vuẹ avwanre sẹ ojẹ rẹ avwanre vẹ obo re yono avwanre rhọnvwephiyọ ohwohwo.

Ẹgba re vwo vughe obo ri yovwirin vẹ obo re chọre se mu avwanre vwo dje erorokẹ, ọdavwaro, vẹ ẹguọnọ vwọ kẹ ihwo efa, je nẹrhẹ a vwẹ ẹro abavo vwo nẹ ayen. O ji se mu avwanre vwọ kẹnoma kẹ erọnvwọn re sa so omaẹwan kẹ ihwo re vwo ẹguọnọ kpahen yẹrẹ erọnvwọn re sa so omaẹphọphọ, omaẹvuọ, je nẹrhẹ ẹwẹn obrorhiẹn rẹ avwanre kpokpo avwanre.

A ghene sa vwẹroso oborẹ oma ru avwanre ọkieje siẹrẹ e de brorhiẹn? Vwọ kpahen oka rẹ akpọ ri Garrick yerin kerẹ eghene rẹ ọshare, ọ da ta, “Mi se ru obo ri je vwe.” Ẹkẹvuọvo ọ da rhe mrẹvughe nẹ o vwo ru obo ro rorori nẹ ọyen shephiyọ ghwa erhuvwu rhe-e. O dje akpeyeren  rọyen phiyọ akpeyeren rẹ “omavwerhovwẹn hepha kakaka-a, kidie o yeren akpọ rẹ ọfanrhiẹn, ẹreyọ rẹ ihuvwun egangan, udi ẹda vroma, ji vwobọ vwẹ iruemu rẹ ozighi egbe.”

Vwọ vrẹ oborẹ oma ruẹ avwanre, ọke buebun na avwanre mu erhiẹn avwanre vwọ kpahen ẹro rẹ ihwo efa che vwo nẹ erhiẹn na. Ọyena me nẹrhẹ aghwanre rẹ ihwo tiọyena vẹ oborẹ ayen rhiẹromrẹ fierere kẹ avwanre. Ihwo rẹ orua avwanre, igbeyan kugbe ihwo rehẹ ekogho rẹ avwanre dia che muọghọ kẹ avwanre siẹrẹ e de ru oborẹ ayen rorori nẹ ọyen yovwirin.

A sa vwẹroso oborẹ oma ruẹ ihwo efa ọkieje siẹrẹ e de brorhiẹn? Kerẹ eghene rẹ aye, Priscila vwẹrokere oborẹ igbeyan rọyen buebun ruẹ, ọtiọyena, ko bru ehware odedede jẹ ọ je rọvwọ-ọn. Dede nẹ ihwo efa nẹ uruemu yena phiyọ obo re chọre-e, jẹ oma vwerhenrọ kakaka-a. Ọ da ta: “Me vwọ vwẹrokere ihwo efa vwo ruẹ oborẹ ayen ruẹ fierere kẹ vwẹ-ẹ, kidie o mu vwe vwo ru erọnvwọn re vọnre vẹ imuoshọ rẹ ọhọ hepha-a.”

Ọke re de che brorhiẹn obo ri yoma vẹ obo re chọre, oborẹ oma ru avwanre vẹ ẹro rẹ ihwo efa che vwo nẹ erhiẹn na pha ghanghanre. Ẹkẹvuọvo a cha sa vwẹroso enana ọvo nẹ i mu avwanre vwo bru omamọ erhiẹ-ẹn. Ọkievo, kidie nẹ a riẹn obo ri che nẹ ojẹ avwanre rhe-e, ọ sa nẹrhẹ a so omaẹwan kẹ oma rẹ avwanre yẹrẹ kẹ ihwo efa. (Isẹ 14:12) Ọ da tobọ dianẹ avwanre vẹ ihwo efa rorori nẹ orọnvwọn ọvo yovwirin, ọ je sa so omaẹwan, vwọba, e ji se wene ẹwẹn. Vwọrẹ uyota, iruemu evo re niri nẹ e chọre jovwo dia obo re rhiabọreyọ enẹna vwẹ akpọ na eje, ẹkẹvuọvo, iruemu re rhiabọreyọ jovwo, rhe dia obo re nẹ phiyọ obo re chọre enẹna.

O vwo obo ri che sun avwanre ọke re de che brorhiẹn obo ri yovwirin vẹ obo re chọre? O vwo odjekẹ ro che ku avwanre phiyotọ-ọ re se nene enẹna vẹ ọke rọ cha vwẹ obaro na?

Ọ vwerhoma nẹ odjekẹ tiọyen ra sa vwẹroso herọ, ọdjeke nana wian vwọ kẹ kohwo kohwo, o toro asan rẹ ohwo na hepha-a. Uyovwinrota rọ vwọ kpahen ọnana cha ta ota kpahen asan avwanre da sa mrẹ odjekẹ tiọyena.