Odjekẹ re Cha Avwanre Uko
Roro kpahen ẹdia ẹne vwẹ akpeyeren ri Baibol na da vwẹ ukẹcha kẹ ihwo uriorin buebun.
1. Orọnvwe
Ihwo vwo iroro sansan kpahen orọnvwe vẹ obo ra guọnọre e se vwo vwo omavwerhovwẹn vwevunrẹ orọnvwe.
BAIBOL NA DA TA: “E jẹ ovwan ohwo ọvuọvo vwo ẹguọnọ rẹ aye rọyen kirobo ro vwo ẹguọnọ rẹ oma rọyen, ọtiọyen aye ji muọghọ okokodo vwọ kẹ ọshare rọyen.”—Ẹfesọs 5:33.
OBO RO MUDIAPHIYỌ: Orọnvwe ọyen ọrhuẹrẹphiyotọ ro nẹ obọ rẹ Ọghẹnẹ rhe, ọtiọyena ọ riẹn oborẹ ihwo re rọvwọnre guọnọre ayen se vwo vwo omavwerhovwẹn. (Mak 10:6-9) Omavwerhovwẹn no cha siẹrẹ ihwo ivẹ re rọvwọnre da tẹnrovi oborẹ ayen sa vwọ kpurhiẹn phiyọ orọnvwe rayen ukperẹ ọdavwẹ romobọ rayen ovọ. Ọshare ro vwo ẹguọnọ rẹ aye rọyen che djephia womarẹ obo rọ vwẹrote wan. Aye ro muọghọ kẹ ọshare rọyen che djephia womarẹ obo rọ ta ota kẹ ji nene yerẹn wan.
ODJEKẸ RI BAIBOL CHA AVWANRE UKO: Quang vẹ Thi, ri nẹ Vietnam rhe, vwo imuẹro nẹ ayen che se vwo omavwerhovwẹn vwẹ orọnvwe raye-en. Ọkieje yen Quang vwọ djoma vwọ kpahọn. Quang da ta: “Vwọ kẹ Thi, me nama dje ọdavwẹ kpahen oborẹ oma ruo-o, ọkieje yen me vwọ phọphọ.” Thi guọnọ fan orọnvwe na. Ọ da ta: “Mi rorori nẹ me sa vwẹroso ọshare mẹ yẹrẹ muọghọ kẹ ọfa-a.”
Ọke vwọ yanran na, Quang vẹ Thi da rhe mrẹ obo ri Baibol na yonori vẹ oborẹ ayen sa vwọ reyọ Ẹfesọs 5:33 vwo ruiruo vwẹ orọnvwe rayen. Quang da ta: “Ẹkpo ri Baibol nana cha vwẹ uko vwọ riẹn obo rọ ghanre te mi vwo vwo ẹguọnọ je vwẹrote ọdavwẹ ri Thi. Ọke mi vwo ru ọnana, ẹguọnọ ro vwo kpahen ovwẹ vẹ ọghọ ro muẹ kẹ vwẹ da rhe ganphiyọ.” Thi da ta: “Mi vwo ruẹ nene obo rehẹ Ẹfesọs 5:33 phiyọ ye, jẹ ẹguọnọ rẹ ọshare mẹ vwo kpahen ovwẹ rhoma ganphiyọ.”
Vwọ kẹ evuẹ efa kpahen orọnvwe, se Awake! Ukeri 2 2018, ro vwo uyovwinrota na “Erọnvwọn 12 Re Sa Nẹrhẹ Orua Phikparobọ” vwẹ jw.org/urh.
2. Obo ra vẹ Ihwo Efa Yerẹn Wan
Ọkieje yen ihwo vwọ vwẹ ẹro okueku vwo nẹ ihwo efa fikirẹ ohọroma, ẹkuotọ, irhuon, osẹnvwe vẹ ẹga rayen.
BAIBOL NA DA TA: “Muọghọ kẹ ihwo ejobi.”—1 Pita 2:17.
OBO RO MUDIAPHIYỌ: Ọ dia Baibol na yono avwanre nẹ e vwo utuoma kpahen ihwo re fẹnẹ ihwo efa fikirẹ ohọroma yẹrẹ ẹkuotọ-ọ, yẹrẹ e vwo utuoma kpahen ọshare ro nene ọshare vwerhẹn vẹ aye ro nene aye vwerhẹ-ẹn. Ukperẹ ọtiọyen, o jiriro kẹ avwanre nẹ e muọghọ kẹ ihwo eje, o toro ohọroma, ẹkuotọ, yẹrẹ oka rẹ ihwo rẹ ayen hepha-a. (Iruo rẹ Iyinkọn Na 10:34) A rha tobọ rhọnvwephiyọ oborẹ ihwo efa vwo imuẹro kpahe-en yẹrẹ iruemu raye-en, e se dje erorokẹ ji muọghọ kẹ ayen.—Matiu 7:12.
ODJEKẸ RI BAIBOL CHA AVWANRE UKO: E yono Daniel ro vwo nẹ ihwo ri nẹ Asia rhe kerẹ imuoshọ vwọ kẹ ẹkuotọ rọyen. Ọtiọyena o de rhi vwo utuoma kpahen ihwo ri nẹ ẹkuotọ rẹ Asia rhe, ọkieje kọyen o vwo yinvwaro kpahen ayen vwẹ azagba. Daniel da ta: “Mi rorori nẹ ẹkuotọ mẹ yen mi biẹcha . Mi tobọ roro nẹ oborẹ mi ruẹ na chọre-e.”
Ọke vwọ yanran na, Daniel da rhe mrẹ obo ri Baibol na yonori. Ọ da ta: “Mi de rhi wene iroro mẹ karekare. Ẹro rẹ Ọghẹnẹ vwo nẹ ihwo kọyen mi ji vwo no ayen—avwanre eje ọvo, o toro asan re nurhe-e.” Daniel da rhe ta ota kpahen oborẹ oma ruo wan enẹna vwẹ ọke ọ da vwa ihwo. Ọ da ta: “Vwọ kẹ vwẹ, mi vwo ẹguọnọ rẹ koka koka rẹ ihwo enẹna, mi ji vwo igbeyan vwẹ kasan kasan vwẹ akpọ na, o toro asan rẹ ayen nurhe-e.”
Vwọ kẹ evuẹ efa, se Awake! Ukeri 3 2020, ro vwo uyovwinrota na “Is There a Cure for Prejudice?” vwẹ jw.org.
3. Igho
Ihwo buebun vwọtua efe rere ayen se vwo vwo omavwerhovwẹn ji yeren omamọ rẹ akpọ.
BAIBOL NA DA TA: “Ekpọfia rẹ aghwanre họhọ ekpọfia rẹ igho; erere rẹ erianriẹn ọ na nẹ aghwanre sa serọ rẹ akpọ rẹ ohwo ro vworo.”—Aghwoghwo 7:12.
OBO RO MUDIAPHIYỌ: Avwanre guọnọ igho, ẹkẹvuọvo ọ cha sa kẹ avwanre omavwerhovwẹn yẹrẹ omamọ rẹ akpeyere-en. (Isẹ 18:11; 23:4, 5) Ukperẹ ọtiọyen, e che vwo omavwerhovwẹn ji yeren omamọ rẹ akpọ siẹrẹ e de ru nene aghwanre ro nẹ obọ rẹ Ọghẹnẹ rhe vwẹ Baibol na.—1 Timoti 6:17-19.
ODJEKẸ RI BAIBOL CHA AVWANRE UKO: Ọshare ọvo re se Cardo vwẹ Indonesia mu akpeyeren rọyen kpahen igho ẹguọnọ. Ọ da ta: “Mi vwo erọnvwọn eje rẹ ihwo buebun guọnọre. Mi se kpo kasan kasan me guọnọre je dẹ erọnvwọn sansan kerẹ imoto vẹ iwevwin re pha ghanghanre.” Ẹkẹvuọvo, igho rọyen na tọnre-e. Cardo da je ta: “E phi vwe iwayo, ọnana da nẹrhẹ igho re me wian koko vwẹ ikpe buebun rhire na va vwẹ abọ. Me wianre gangan vwẹ ikpe buebun vwo koko efe, ukuotọ rọyen me da rhe viẹ idiekpọvwẹ kidie erọnvwọn eje mi vwori va vwẹ abọ, ke me vwẹ ẹro okueku vwo nẹ oma mẹ.”
Cardo da rhe vwẹ uchebro ri Baibol ro shekpahen igho vwo ruiruo. O rhe mu akpeyeren rọyen eje kpahen igho ẹguọnọ-ọ, ẹkẹvuọvo ọ da jojẹ o vwo yeren akpọ ri kekpe. Cardo da ta: “Mi rhi vwo obọdẹn rẹ efe enẹna re kidie mẹ vẹ Ọghẹnẹ vwo uvi rẹ oyerinkugbe. Me riẹn vwerhẹn vwẹ ason, vwọba, mi rhi vwo uvi rẹ omavwerhovwẹn.”
Vwọ kẹ evuẹ ri shekpahen ẹro ri Baibol na vwo nẹ igho, se uyovwinrota na “Ẹbe Eyono Kugbe Igho sa Nẹrhẹ E Yeren Omamọ Akpọ?” vwẹ Uwevwin Orhẹrẹ Ukeri 3 2021, vwẹ jw.org/urh.
4. Ehware
Ihwo vwo iroro sansan kpahen ehware.
BAIBOL NA DA TA: “Kẹnoma kẹ ọfanrhiẹn. E jẹ ovwan ohwo ọvuọvo riẹn obo ro sun oma rọyen wan vwẹ ofuanfon kugbe ọghọ, ọ dia ọ rẹ urhurusivwe rẹ ehware re je suo-on, kerẹ ọ rẹ ihwo rẹ ẹgborho na re riẹn Ọghẹnẹ-ẹ na.”—1 Tẹsalonaika 4:3-5.
OBO RO MUDIAPHIYỌ: Baibol na gbere ughwru phiyọ ohwo ro fori nẹ e nene bru ehware. Ota na “evwọfanrhiẹn” churobọ si igberadja, ọfanrhiẹn egbe, eshare ri nene eshare vwerhẹn, eya ri nene eya vwerhẹn, ihwo ri nene eranvwe vwerhẹn vẹ ehware vwẹ uvwre rẹ ihwo ivẹ re je rọvwọ-ọn. (1 Kọrẹnt 6:9, 10) Ehware ọyen okẹ ro nẹ obọ rẹ Ọghẹnẹ rhe vwọ kẹ aye gbe ọshare re rọvwọnre ọvo.—Isẹ 5:18, 19.
ODJEKẸ RI BAIBOL CHA AVWANRE UKO: Aye ọvo vwẹ Australia re se Kylie da ta: “Kerẹ ohwo rọ je rọvwọ-ọn, mi rorori nẹ mi de bru ehware, oma che fuvwe je vwerhen ovwẹ. Ẹkẹvuọvo, ọ dia ọtiọyen ọ hepha-a, kidie ọ so ẹnwan kẹ vwẹ je nẹrhẹ udu mẹ kuọrọn.”
Ọke vwọ yanran na, Kylie de rhi yono oborẹ Baibol na ta kpahen ehware je reyọ vwo ruiruo. Ọ da ta: “Me rhe mrẹvughe nẹ iwan rẹ Ọghẹnẹ sẹro rẹ avwanre nẹ emiavwe je nẹrhẹ ẹwẹn rẹ avwanre te otọ. Enẹna mi vwo ọshare ro vwo ẹguọnọ mẹ rọ je nẹrhẹ oma vwerhen ovwẹ kidie mi ruẹ erọnvwọn vwo nene oborẹ Jihova guọnọre nẹ avwanre ru. Odjekẹ ri Baibol ri mi neneri sẹro mẹ vwo nẹ okpetu buebun re!”
Vwọ kẹ evuẹ efa, se uyovwinrota na “Die Yen Baibol na ta Kpahen Ihwo re Dia Kuẹgbe jẹ Ayen je Rọvwọ-ọn?” vwẹ jw.org/urh.
Ọmemama rẹ avwanre cha avwanre uko vwọ riẹn obo ri yoma vẹ obo re chọre. Dede nẹ ọ dia ọkieje yen ọ vwọ lọhọ e vwo nene odjekẹ rọye-en, jẹ e de nene, o che fierere kẹ avwanre. O se mu avwanre ẹro nẹ ọnana cha ghwa omavwerhovwẹn ọkieje vwo rhe avwanre.
