OKẸ rẹ oghẹresan mu avwanre vwo dje ẹkpẹvwẹ phia. Jesu kanrunumu uyono yena ọke ro vwo sivwin eshare ihwe ri họvwọga re che se sivwin ọke yena-a nu. Ọvo usun rẹ eshare ihwe na “de rhivwi jiri Ọghẹnẹ vẹ urhuru ọgangan.” Jesu da ta: “Ọ dia ihwe e sivwiri? Kẹ irhiri na rhọ?” (Luk 17:12-17) Die yen ọyena yono avwanre? Ẹse rẹ ihwo efa ru kẹ avwanre sa fobọ chọrọ avwanre ẹro!

A mrẹ vwo dje okẹ rẹ ọtanhirhe na-a. Ọyen okẹ rọ ma rho ra kẹ avwanre. Die kọyen ofori nẹ wo ru kpahen oborẹ Ọghẹnẹ ru kẹ wẹ na?

• Yono kpahen Ọkokẹ na. Okẹ rẹ ọtanhirhe na cha sa kẹ ihworakpọ arhọ rẹ bẹdẹ odedede-e. Ukperẹ ọtiọyen, Jesu da ta vwẹ ẹrhovwo kẹ Ọghẹnẹ: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.” (Jọn 17:3) Siẹrẹ a da vuẹ wẹ nẹ ohwo ọvo sivwin arhọ wẹn ọke wọ vwọ hẹ omotete, wọ cha guọnọ idjerhe wọ vwọ riẹn ohwo yena kugbe oboresorọ o vwo sivwin uwe-e? Jihova Ọghẹnẹ rọ kẹ avwanre okẹ rẹ ọtanhirhe na, guọnọre nẹ wọ riẹn oka rẹ ohwo rọ hepha, ọ je guọnọ nẹ wo vwo oyerinkugbe ọkpẹkpẹkpẹ vẹ ọyen. “Si kẹre Ọghẹnẹ,”  eriyin Baibol na tare, “rere o si kẹre owẹ.”—Jems 4:8.

• Vwo esegbuyota kpahen ọtanhirhe na. “Ọ ro se Ọmọ na gbuyota vwo arhọ ri bẹdẹ.” (Jọn 3:36) Die yen o mudiaphiyọ re vwo vwo esegbuyota? O mudiaphiyọ re vwo djephia vwọrẹ uruemu nẹ e vwo esegbuyota kpahen ọtanhirhe na. (Jems 2:17) Oka rẹ uruemu vọ? Okẹ sa dia ọwẹn siẹrẹ wo de rhiabọreyọ. Ọtiọyena, wọ cha riẹn abọ phia rere wọ reyọ ọtanhirhe na. Vwẹ idjerhe vọ? Yono kpahen oka rẹ akpọ rẹ Ọghẹnẹ guọnọre nẹ wo yerin rere wo ru nene. * Nẹrhovwo vwọ kẹ evwoghovwo rẹ umwemwu kugbe ẹwẹn obrorhiẹn ro fiotọ. Bru Ọghẹnẹ ra vwọrẹ imuẹro nẹ ọtanhirhe na cha kẹ ihwo ri sere gbuyota akpeyeren rẹ ufuoma, ofuvwegbe kugbe omavwerhovwẹn bẹdẹ!—Hibru 11:1.

• Kpo Ẹkarophiyọ rẹ Ughwu rẹ Jesu. Jesu ton orẹ re ruẹ kukpe kukpe phiyọ rọ vwọ karophiyọ avwanre ọrhuẹrẹphiyotọ rẹ ọtanhirhe na. Vwọ kpahen orẹ yena, Jesu da ta: “Ru ọnana vwọ karohọ ovwẹ.” (1 Kọrẹnt 11:24) Iseri rẹ Jihova che ru ẹkarophiyọ rẹ ughwu rẹ Jesu vwẹ Tuesday, April 11, 2017, siẹrẹ ọnre de she nu. Vwẹ irueru na rọ cha reyọ omarẹ unọke ọvo na, a cha ta ota kpahen ọghanrovwẹ rẹ ughwu rẹ Jesu kugbe obo rọ cha kẹ avwanre erere ọke nana vẹ ọke rọ cha vwẹ obaro na. Ukpe rọ wanre na, omarẹ ihwo oduduru 20 vwẹ akpọneje yen kpo Ẹkarophiyọ na. Avwanre durhiuwe nẹ wọ rhe vwomaba avwanre vwọrẹ odjephia rẹ idavwaro kpahen okẹ rẹ Ọghẹnẹ rọ ma rho na.