E ghwoghwo iyẹnrẹn esiri rẹ Uvie rẹ Ọghẹnẹ vwẹ akpọ na ejobi kirobo rẹ Jesu ta phiyotọ. (Matiu 24:14) Ọbe rẹ Daniẹl vuẹ avwanre nẹ Uvie nana ọyen igọmẹti rẹ Ọghẹnẹ. Uyovwin 2 rẹ Ọbe rẹ Daniẹl vwo aroẹmrẹ ro djekpahen igọmẹti yẹrẹ usuon rẹ ihworakpọ re cha vwọ kpahen ohwohwo vwo nẹ ọke rẹ Babilọn rẹ awanre rhi te ọke rẹ avwanre na. Rọ vwọ ta kpahen obo re cha phia obaro na, owọ 44 da ta:

“Vwẹ ọke rẹ ivie yena, Ọghẹnẹ rẹ odjuvwu na cha vwẹ uvie ọvo mu, ra sa guọghọ-ọ eyẹ e che siobọ nẹ ekete rọye kẹ ihwo ọfa-a. Ọ cha guọghọ ivie nana ejobi ibribro ọ me vwẹ ayen te oba, ko mudia bẹdẹ.”

Aroẹmrẹ nana vẹ efa vwẹ Baibol na ta phiyotọ nẹ Uvie rẹ Ọghẹnẹ che wene usuon rẹ ohworakpọ; ọ cha hwarhiẹ ufuoma rhe ihworakpọ, ọ je cha dia bẹdẹ. Mavọ yen akpeyeren cha dia vwẹ otọ rẹ usuon rẹ Ọghẹnẹ? Enana evo usun rẹ ive ri che rugba.

• OFOVWIN RHA CHA DIA-A

  Une Rẹ Ejiro 46:9: [“Ọghẹnẹ] nẹrhẹ ofovwi fue re te oba rẹ akpọ na; o vwirhi umurhabọ, o de wurhu ubiri, ọ vwẹ erhanre torhẹ ekpẹre rẹ ofovwi.”

  Vwẹ ẹwẹn roro oborẹ akpọ na ra dia, ọ da dianẹ igho vẹ ẹgba ra ghwọrọ vwo ru ekuakua rẹ ofovwin, a ghwọrọ ayen vwo ru obo ri che fi erere kẹ ihworakpọ ukperẹ obo ri che hwe ayen! Ive yena che rugba vwẹ Uvie rẹ Ọghẹnẹ.

• ỌGA RHA CHA DIA-A

  Aizaya 33:24: “O gbi vwo ohwo rẹ orere na ọvuọvo rọ sa tanẹ, Me mwọga-a.”

  Vwẹ ẹwẹn roro akpọ rẹ ohwo vuọvo rha cha muọga rẹ ubiudu, ikansa, odo, yẹrẹ koka koka rẹ ọga ọfa-a. Họsipito vẹ ihuvwun rha cha dia-a. Ọma kpokpọ yen ihwo re cha dia akpọ na vwẹ obaro na che vwo.

• ỌKANROVWẸ RẸ EMU RHA CHA DIA-A

  Une Rẹ Ejiro 72:16: “E jẹn ọka buebu dia otọ na; vwẹ enu rẹ igbenu na etiyin i de kpogho.”

  Emu cha vọn asan ejobi, ihwoeje cha mrẹ re chekọ. Owẹnvwe vẹ ega rẹ owẹnvwe sua rha cha dia ọfa-a.

• ODJADJA, OMAEMUOPHIYỌ, VẸ UGHWU RHA CHA DIA-A

  Ẹvwọphia 21:4: “[Ọghẹnẹ] ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.”

   Ọyena mudiaphiyọ nẹ a cha dia bẹdẹ vẹ ugboma rọ gbare vwevunrẹ iparadaisi vwẹ otọrakpọ na! Ọyena yen oborẹ Ọmemama rẹ avwanre Jihova Ọghẹnẹ veri nẹ o che ru.

Wo rorori nẹ ọ cha bẹn rẹ ive yena vwo rugba? Dede nẹ ihwo buebun cha rhọvwen nẹ oka rẹ akpọ re djunute vwẹ Baibol na che yovwin mamọ, jẹ fikirẹ iroro sansan, ọ bẹn rẹ ihwo buebun sa vwọ rhọvwen nẹ ihworakpọ sa dia bẹdẹ. Ọyena gbe ohwo unu-u, kidie o vwo ohworakpọ vuọvo rọ diarọ bẹdẹ jovwo re, rọ sa vuẹ avwanre kpahọ-ọn.

Ihworakpọ eviẹn vwọ kẹ umwemwu vẹ ughwu, ayen je rioja rẹ emiavwe, odjadja vẹ ebẹnbẹn efa vwẹ ikpe buebun re, te ẹdia rẹ ihwo buebun da rhọvwen phiyọ nẹ akpeyeren rẹ oja yen oka rẹ akpeyeren ro shephiyọ. Ẹkẹvuọvo ọyena fẹnẹ oborẹ Ọmemama rẹ avwanre Jihova Ọghẹnẹ guọnọ vwọ kẹ ihworakpọ.

Rere e se vwo vwo imuẹro kpahen ive na ejobi, Ọghẹnẹ da ta gori gori kpahen ive rọyen nẹ o “che se fiabọ-ọ ẹkẹvuọvo o ru obo ri mi jiro gba, obo mi jiro no ru ko yovwi.”​—Aizaya 55:11.

E djisẹ rẹ Jihova vwẹ Baibol na nẹ ọyen “Ọghẹnẹ rẹ uyota.” (Taitọs 1:2) Ọ vwọ dianẹ o ve ive nana ejobi kpahen obaro na, ọyen emu rẹ aghwanre e vwo roro kaphen enọ nana: Ihworakpọ ghene sa dia bẹdẹ vwevunrẹ Iparadaisi vwẹ otọrakpọ na? Die yen avwanre ru rere a sa vwọ mrẹ erere vwo nẹ ive rẹ Ọghẹnẹ? Vwẹ aruẹbe re vwọ kpahen ọnana, wọ cha mrẹ evuẹ re cha vwẹ ukẹcha kẹ wẹ vwọ kpahenphiyọ enọ yena.